1 କ୍ରିସ୍ତ ବିସ୍‍ବାସି ତଡ଼ାନ୍‍କୁ ନି ତାଙ୍ଗିଁକ୍‍, ମିର୍‌ ବା ମାପୁରୁଦି ମାଡ଼ାନ୍ କୁକାୟ୍‍ଆତିମାନିଦେର୍‍ ! ମିର୍‌ ଜିସୁଦି ବିଷୟ ଚିନ୍ତା କିଦୁ, ୱାନ୍‌ ମା ଦାର୍ମୁବିସ୍‍ବାସ୍‍ତି ପେରିଜାଜକ ଆନି ଉଣ୍ତିଙ୍ଗ୍‌ ମାପୁରୁଦି ମାଡ଼ାନ୍ ପୋକାଇ ଆତାମାନାନ୍‌ । 2 ମୋସା ଏଣ୍ତେସ୍ ମାପୁରୁଦି ଇଲୁତୁ ବିସ୍‍ବାସ୍‌ତାନ୍‌ ପାଣି କିତାମାର୍ହାନ୍, ମାପୁରୁଦି ମାଣୁକୁ ଆସ୍‌କିଆୟ୍‌ଆତି ଜିସୁ ଆୟାୱାଜା ଇୟା ପାଣି ଉଣ୍ତିଙ୍ଗ୍‌ ମାପୁରୁଦି ଉଣ୍ତିଙ୍ଗ୍‌ ବିସ୍‍ବାସ୍ ମାର୍‌ର୍ହାନ୍ । 3 ଇଲୁଦି ବାଦ୍‍ଲୁ ଇଲୁକୁତିଆର୍‌କିନିୱାନିଙ୍ଗ୍‍ଁ ନାଣ୍ତ ସମ୍ମାନ୍‍ ସିନାର୍‍ । ଆୟାୱାଜା ମୋସାଦି ବାଦ୍‍ଲୁ ଜିସୁଙ୍ଗୁଁ ନାଣ୍ତ ସନ୍‍ମାନ୍‍ ପୋଇଦେଙ୍ଗ୍‍ଁ ଜଗ୍‍ମାନାତ୍ । 4 ୱିଜୁ ଇଲୁକୁ ଏନ୍‌ ସିଲେତିଙ୍ଗ୍‌ ଏନ୍‌ ଲୋକା ମାଡ଼ାନ୍ ତିଆର୍‍ ଆତେମାନେ, ମାତର୍‌ ମାପୁରୁ ୱିଜୁ ବିସୟତିଙ୍ଗ୍‌ ତିଆର୍‌କିତିକାନ୍‌ । 5 ସେବକ ୱାଜା ମୋସା ମାପୁରୁଦି ଇଲୁଦୁ ବିସ୍‍ବାସ୍‍ଦାନ୍ ପାଣି କିତାମାର୍ହାନ୍ ମାରି ଆମାୱିଜୁ ବିସୟ୍‌ ମାପୁରୁ ୱାଜିନିଦିନ୍‍ତୁ ସାକ୍ୟ ୱେର୍‍ତେଙ୍ଗ୍‌ ବଦାକିତା ମାର୍ହାନ୍‌, ଆୟା ବିସୟ୍‍ତାନ୍‍ ମୋସା ୱେର୍‍ତା ମାର୍ହାନ୍‍ । 6 ମାତର୍‌ କ୍ରିସ୍ତ ମାରିନ୍‌ ୱାଜା ମାପୁରୁଦି ଇଲୁଦୁ ଜାତୁନ୍‍ ଅତେଙ୍ଗ୍‍ ବିସ୍‍ବାସ୍‍ତିକାନ୍‍ । ମାଡୁ ଜଦି ସାହାସ୍ ଆସ୍‌ସି ଆସାଦି ବିଷୟ ପୋଇନିକା ଇଜି ମା ବିସ୍‍ବାସ୍‍ଦୁ ଡାଟ୍‍ ମାନାଟ୍‍, ଆର୍‌ତିଙ୍ଗ୍‌ ମାଡୁ ୱାନି ଇଲୁୱାଜା ଆନିକା ।

7 ମାରି ପବିତ୍ର ଆତ୍ମା ଏଣ୍ତେସ୍ ଇଜିନାତ୍ :

"ନେରୁ ଜଦି ମିର୍‌ ମାପୁରୁଦି ବାକ୍ୟ ୱେନ୍‌ଡ୍ରୁ,

8 ଆର୍‌ତିଙ୍ଗ୍‌ ମି ପୁର୍ବେଦିଡକ୍‍ରାଦାଦାରି ୱାଜା ଜିବନ୍‌ ଆଟ୍‍ୱା କିମାଟ୍ ।

ମରୁବୁମିଦୁ ୱାର୍‌ ଆୟା ନାଣ୍ତିଙ୍ଗ୍ ମାପୁରୁଙ୍ଗୁଁ ପରିକା କିଜି

ୱାନି ଉଣ୍ତିଙ୍ଗ୍‌ ବିରୁଦ୍‍ କିତାମାର୍ହାର୍‍ ।

9 ମାପୁରୁ ଇନାନ୍‌, ଆବେନ୍‌ ୱାର୍‌ ନା ସାକ୍ତି ନି ସାସ୍‌ ପରିକା କିତାର୍,

ମାରିବା ଚାଲିସ୍ ବାର୍ସେକ୍ ସାନ୍ଦି ନାନୁ ଏମେ ୱିଜୁ ପାଣି କିତାମାର୍ହା, ଆକା ୱାର୍‌ ସୁଡୁତାମାର୍ହାର୍ ।

10 ଆଦେଙ୍ଗ୍‌ ନାନୁ ୱାରି ଉଣ୍ତିଙ୍ଗ୍‌ ରିସାଆଜି ଇର୍ହା,

‘ୱାର୍‌ ୱିଜୁଦିନ୍ ଅବିସ୍‍ବାସ୍‍ତିକାର୍‍

ମାରି ନା ମାଟା ମାନାଦେଙ୍ଗ୍‍ଁ ବଦା କିଏର୍ ।’

11 ନାନୁ ରିସାଦାନ୍ ପାର୍‍ମାଣ୍‍ କିତା,

ନାନୁ ଏମେ ରାଜିଦୁ ୱାରିଙ୍ଗ୍ ରମ୍‍ଦେଙ୍ଗ୍‍ ସିତାମାନ୍ଦି, ଆୟା ଦେସ୍‌ତୁ ୱାର୍‌ ଏସାଙ୍ଗ୍‍ବା ସନ୍‌ଡ୍ରେଙ୍ଗ୍ ଆଟ୍‍ଏର୍‍ !"

12 ଏ ନା ବିସ୍‍ବାସ୍‍ତି ତଡ଼ାନ୍‍କୁ ନି ତାଙ୍ଗିଁକ୍‍, ଜାଗାର୍‌ତା, ମି ଲୋଇରାନ୍‌ ଆମାୱାନି ଜିବନ୍‌ ଏଣ୍ତେସ୍ ପାପ୍‌ ମାରି ଅବିସ୍‍ବାସ୍‌ତୁ ପୁରା ଆଜି ଜିବନ୍‌ମାନି ମାପୁରୁଦି ଉଣ୍ତିଙ୍ଗ୍‌ ୱେର୍‌ଏ ଆମାଟ୍‌ । 13 ମି ମାଡ଼ାନ୍‍କୁ ଏନ୍‍ ଏଣ୍ତେସ୍ ପାପ୍‌ଦାନ୍ ବେମ୍‌ରି ଆଜି ଆଟୁୱା ଜିବନ୍‌ କିମାଟ୍, ଇୟାଉଣ୍ତିଙ୍ଗ୍‌ ନିଜେନିଜେଦିଙ୍ଗ୍‌ ୱିଜୁଦିନ୍ ୱେଡ଼ିକା କିଦୁ । ମାରି ଦାର୍ମୁସାସ୍ତ୍ରଦୁ ରାସାତିମାନି "ନେରୁ" ବଲୁ ଜେ ଆମାସାନ୍ଦି ମା ଉଣ୍ତିଙ୍ଗ୍‌ ଦରକାର୍‍, ଆୟା ସାନ୍ଦି ଆକା କିଜିମାଡ୍ରୁ । 14 ଜଦି ମାଡୁ ସାରାସାରି ସାନ୍ଦି ମା ଆଗ୍‌ଡ଼ିରି ବିସ୍‍ବାସ୍‍ତୁ ଡାଟ୍‍ ମାନାଟ୍, ଆର୍‌ତିଙ୍ଗ୍‌ ମାଡୁ ୱିଜେରେ କ୍ରିସ୍ତଦିମାନୁ ମିସାଦେଙ୍ଗ୍ ଆଟ୍‍ନିକା ।

15 ଦାର୍ମୁସାସ୍ତ୍ରଦୁ ରାସାତାମାନାତ୍‌ :

"ନେରୁ ଜଦି ମିରୁ ମାପୁରୁଦି ବାକ୍ୟ ୱେନିଦେର୍‌,

ଆର୍‌ତିଙ୍ଗ୍‌ ମି ଡକ୍ରାଦାଦାର୍‍ ଜିବନ୍‌ ଆଟୁୱା କିଜି

ମାପୁରୁଦି ଉଣ୍ତିଙ୍ଗ୍‌ ଏଣ୍ତେସ୍ ବିରୁଦ୍‍ କିତାମାର୍ହାର୍, ଆୟାୱାଜା କିମାଟ୍ ।"

16 ମାପୁରୁଦି ବାକ୍ୟ ୱେନ୍‌ଜି ବା ଏମେକାର୍ ୱାନି ଉଣ୍ତିଙ୍ଗ୍‌ ବିରୁଦ୍‍ କିତାମାର୍ହାର୍‍, ୱାର୍‌ ଏର୍‌ ? ଏମେୱାରିଙ୍ଗ୍‌ ମୋସା ମିସର୍‍ ଦେସ୍‍ଦାନ୍ ସପ୍‍ତା ତାତା ମାର୍ହାନ୍‌, ଆୟାକାର୍‌ ଆଏର୍‌ନୋ । 17 ଚାଲିସ୍ ବାର୍ସେକ୍ ସାନ୍ଦି ଏମେ ମାପୁରୁଙ୍ଗୁଁ ରିସା କିତାମାର୍ହାର୍, ୱାର୍‌ ଏର୍‌ ? ଏମେକାର୍ ପାପ୍‌ ପାଣି କିଜି ମରୁବୁମିଦୁ ସାତା ମାର୍ହାର୍‌, ଆୟାକାର୍‌ । 18 ମାପୁରୁ ନାସ୍ତିୱାଲେ ପାର୍‍ମାଣ୍‍ କିଜି ଇର୍ହାମାର୍ହାନ୍, ୱାର୍‌ ୱାନି ରମ୍‍ନିମାନୁ ଏସାଙ୍ଗ୍‍ ବା ସନ୍‌ଡ୍ରେଙ୍ଗ୍‌ ଆଟ୍‍ଏର୍‍, ନାସ୍ତିୱାଲେ ୱାନ୍‌ ଏମେୱାରି ବିସୟତାନ୍ ଆକା ଇର୍ହାମାର୍ହାନ୍ ? ଏମେକାର୍ ବିରୁଦ୍‍ କିତାମାର୍ହାର୍‍ ୱାରି ବିସୟ୍‌ତାନ୍ ୱାନ୍‌ ଆକା ଇର୍ହାମାର୍ହାନ୍ । 19 ମାରି ମାଡୁ ସୁଡ଼ୁଜିନିକା ଜେ, ୱାରି ଅବିସ୍‍ବାସ୍‌ତି ଉଣ୍ତିଙ୍ଗ୍‌ ୱାର୍‌ ଆୟା ପାର୍‌ମାଣ୍‌ତି କିଣାନ୍‌ ଦେସ୍‌ତୁ ସନ୍‌ଡ୍ରେଙ୍ଗ୍‍ ଆଟ୍‍ଏତାର୍‍ ।