1 ରିନେଟି ୱେନ୍‌କା ଗାଲିଲିଦି କାନା ଗାଡ଼୍‌ତୁ ଉଣ୍ତ୍ରି ପେଡ଼ି ଆଜିମାର୍ହାତ୍‍, ମାରି ଜିସୁରି ଆଇସି ଆବେ ମାର୍‌ଆତ୍‌ । 2 ଜିସୁ ନି ୱାନି ସିସୁରିଙ୍ଗ୍‌ ବା ଆୟା ପେଡ଼ିଦୁ କୁକ୍‍ତାମାର୍‍ଆର୍‍ । 3 ଏସ୍ତିୱାଲେ ଅଙ୍ଗୁର୍‍ରସ୍‍ ୱିଜିତେଆକା ଜିସୁରି ଆଇସି ୱାନିଙ୍ଗ୍‌ ଇର୍ହାତ୍‌, "ୱାରି ଅଙ୍ଗୁର୍‍ରସ୍‍ ସିଲୁ ।"

4 ଆବେଟ୍‌ ଜିସୁ ତାନିଙ୍ଗ୍‌ ଇର୍ହାନ୍‌, "ନାଙ୍ଗିଁ ଇନିକା କିଦେଙ୍ଗ୍‌ ଆନାତ୍‌ ନିନ୍‌ ୱେର୍‍ମା, ନା ୱେଡ଼ା ଇୟାସାନ୍ଦି ଇଗା ରେଏଦେ ।"

5 ଜିସୁଦି ଆଇସି ସେବାକିନିୱାରିଙ୍ଗ୍‌ ଇର୍ହାତ୍‌, "ୱାନ୍‌ ମିଙ୍ଗିଁ ଆମାକା ଇନାନ୍‌, ଆକା କିଦୁ ।"

6 ମାରି, ଆବେ ଜିହୁଦିର୍‌ ନର୍‍ବାନି ନିୟମ୍‍ତାନ୍‍ ସଗୋଟା କାଲ୍‍କାଣ୍‍କୁ ତିଆର୍‌ଆତି ପେରି ପେରି ଏର୍‍ କୁଣ୍ତ୍‍କୁ ମାର୍‍ଏ, ୱିଜୁ କୁଣ୍ତ୍‍କାଙ୍ଗ୍‍ଁ ପୁରା ସହେ ଲିଟର ଏର୍‌ ଆସ୍‌ତେଙ୍ଗ୍‌ ଆଟ୍‍ନାତ୍‍ । 7 ଜିସୁ ସାକର୍‌କାଙ୍ଗ୍‌ ଇର୍‌ଆନ୍‌, କୁଣ୍ତ୍‍କାଙ୍ଗ୍‍ଁ ଏର୍‌ ପୁରା କିଦୁ । ଆବେଟ୍‌ ୱାର୍‌ ଆୟାୱିଜୁ ମୁସ୍‌କୁ ସାନ୍ଦି ପୁରା କିତାର୍‍ । 8 ମାରି, ୱାନ୍‌ ୱାରିଙ୍ଗ୍‌ ଇର୍‌ଆନ୍‌, ଇଲେଇ ଆନ୍ଦ୍‍ଜି ଅସି ବୋଜିଦି ନେତା ଲାକ୍‌ତୁ ଅତୁ । ଆବେଟ୍‌ ୱାର୍‌ ଅତାର୍‍ । 9 ବୋଜିଦି ନେତା ଅଙ୍ଗୁର୍‍ରସ୍‍ ଆତିମାର୍‍ଇ ଆୟା ଏର୍‍ତିଙ୍ଗ୍‍ ୱେଡ଼୍‍ଜି ଆକା ଆମାଣ୍‍କୁ ୱାତାତ୍‍, ଇକା ନେସ୍‌ଏପ୍‌ ମାର୍‌ଆନ୍‌ ମାତର୍‌ ଏମେ ସେବାକିନିକାର୍‍ ଏର୍‌ ଆନ୍ଦ୍‌ତା ମାର୍‌ଆର୍‌, ୱାର୍‌ ନେସ୍‍ତାମାର୍‍ଆର୍‍, ଆଦେଙ୍ଗ୍‌ ୱାନ୍‌ ପେଡ଼ିମୁରୁଲିଙ୍ଗ୍‍ କୁକ୍‌ସି ଇର୍‌ଆନ୍‌, 10 "ୱିଜେରେ ପାର୍‌ତୁମ୍‌ ନେଗି ଅଙ୍ଗୁର୍‍ରସ୍‍ ସିନାର୍‍, ମାରି ଲୋକୁ ସସ୍‍ତି ୱେନ୍‌କା ତାଗ୍‍ଇକେଙ୍ଗ୍‍ ସିନାର୍‍; ନିନ୍‌ ଇୟାସାନ୍ଦି ନେଗି ଅଙ୍ଗୁର୍‍ରସ୍‍ ଇଟ୍‌ତିମାନି ।"

11 ଜିସୁ ଇୟାୱାଜା ଗାଲିଲିଦି କାନା ଗାଡ଼୍‌ତୁ ୱାନି ପାର୍‌ତୁମ୍‌ କାବାଆନି ପାଣି ଆରାମ୍‌ କିଜି ନିଜେଦି ମହିମା ତର୍‍ତାନ୍‍, ମାରି ୱାନି ସିସୁର୍‍ ୱାନିବାନୁ ବିସ୍‌ବାସ୍‌ କିତାର୍‍ ।

12 ଇୟା ୱେନ୍‌କା ଜିସୁ ୱାନି ଆଇସି, ତଡ଼ାନ୍‌କୁ ମାରି ସିସୁରିୱାଲେ କପର୍‍ନାହୁମ୍‍ତୁ ସରଆର୍‌; ମାରି, ୱାର୍‌ ଆବେ ନାଣ୍ତ ଦିନ୍‌ ତେବାଏତାର୍‍ ।

13 ନାସ୍ତିୱାଲେ ଜିହୁଦିର୍‌ ନିସ୍ତାର୍‌ ପଣ୍ତୟ୍‌ ଲାକ୍‌ତୁ ଇଗାୱାତା ମାର୍‌ଆତ୍‌, ମାରି ଜିସୁ ଜିରୁସାଲାମ୍‍ତୁ ସର୍‌ଆନ୍‌ । 14 ମାରି, ଜିସୁ ମନ୍ଦିର୍‌ତୁ ଡ଼ାକ୍‍, ମେଣ୍ଡେଙ୍ଗ୍‌ ମାରି ପାର୍‌ୱେଙ୍ଗ୍‌ ପୋର୍‍ନିୱାରିଙ୍ଗ୍‍ ମାରି ଡାବୁଙ୍ଗୁଁ ପର୍‍ନିୱାରିଙ୍ଗ୍‍ ବାସ୍‍ତିମାରିକା ସୁଡ଼ୁତାନ୍‌ । 15 ଆବେଟ୍‌ ୱାନ୍‌ ନାସ୍‍ତାନ୍‍ ଉଣ୍ତ୍ରି କରଡ଼ା ତିଆର୍‌ କିଜି ମେଣ୍ଡେଙ୍ଗ୍‌ ନି ଡ଼ାକାୱାଲେ ୱିଜେରିଙ୍ଗ୍‍ ମନ୍ଦିର୍‌ତାନ୍‌ ସପ୍‌ତା ସିତାନ୍‌ । ମାରି, ଡାବୁଙ୍ଗୁଁ ପର୍‌ନିୱାରି ଡାବୁଙ୍ଗୁଁ ଆଡ୍‍ଗି ୱିତ୍‍ସିପକ୍‍ସି ୱାରି ଟେବୁଲ୍‍ଙ୍ଗୁଁ ମାର୍‍ତାପକ୍‍ତାନ୍‍ । 16 ମାରି, ୱାନ୍‌ ପାର୍‌ୱେଙ୍ଗ୍‌ ପର୍‍ନିୱାରିଙ୍ଗ୍‍ ଇର୍‌ଆନ୍‌, ଇକେଙ୍ଗ୍‍ ୱିଜୁ ଇବେଟ୍‌କୁ ଅତୁ, ନା ବୁବାଦି ଇଲ୍‍ତିଙ୍ଗ୍‍ କଣି ପର୍‌ନି ଇଲୁ କିମାଟ୍‌ । 17 ଇକା ସୁଡ଼୍‌ଜି ୱାନି ସିସୁର୍‍ ସାସ୍ତ୍ରଦୁ ରାସାତାମାନାତ୍‌ ଇଜି ଏତ୍‍କିତାର୍‍, "ନି ଇଲୁଦିଙ୍ଗ୍‍ ନା ଦ୍ୟାନ୍‍, ନା ଲୋଇ ସିସୁ କାସ୍‍ନି ୱାଜା ଆଜିନାତ୍‍ ।"

18 ଆବେଟ୍‌ ଜିହୁଦିର୍‌ ପେରିକାର୍‌ ଡ଼େସିୱାଜି ଜିସୁଦି ଲାକ୍‌ତୁ ଡ଼େସିୱାଜି ଇୟା ପ୍ରସ୍ନ ୱେନ୍‌ବାତାର୍‌, "ନିନ୍‌ ଜେ ଇୟାୱିଜୁ ପାଣି କିଦେଙ୍ଗ୍‌ ଇଜି ଅଦିକାର୍‌ ପୋୟ୍‍ତିମାନି ଇଜି ମାପ୍‌ ଏଣ୍ତେସ୍‌ ନେସ୍‌ନାପ୍‌ ? ମାଙ୍ଗିଁ ଏମେ ସିନା ଦାନ୍‌ ତର୍‍ସିନି ?"

19 ✝ ୨:୧୯ ମାତିଉ ୨୬:୬୧; ୨୭:୪୦; ମାର୍କ ୧୪:୫୮; ୧୫:୨୯. ଜିସୁ ୱାରିଙ୍ଗ୍‌ ଇର୍ହାନ୍‌, "ମିର୍‌ ଇୟା ମନ୍ଦିର୍‌ତିଙ୍ଗ୍‌ ରୁକ୍‍ତୁ, ମାରି ମୁନେନ୍‌ ଲୋଇ ନାନ୍ ଆକା ପେର୍‍ନା ।"

20 ଆବେଟ୍‌ ଜିହୁଦିର୍‌ ଇର୍ହାର୍‌, "ଇୟା ମନ୍ଦିର୍‌ ତିଆର୍‌ କିଦେଙ୍ଗ୍‌ ଇଜି ସାଲିସ୍‍ ସୋ ବାର୍‍ସେକ୍‍ ଆସ୍‍ତା ମାର୍‍ଆତ୍‍; ମାରି ନିନ୍‌ ଇନିକା ତାନିଙ୍ଗ୍‌ ମୁନେଟାନ୍‍ ପେର୍‍ନି ?"

21 ମାତର୍‌ ଜିସୁ ନିଜେଦି ମେନ୍ଦଲ୍‌ରୁପ୍‍ତି ମନ୍ଦିର୍‌ ସୁଡ଼ୁଜି ମନ୍ଦିର ବିସୟ୍‌ତାନ୍‌ ଇଜିମାର୍‍ଆନ୍‍ । 22 ଆବେଟ୍‌ ୱାନ୍‌ ସାତିମାଣ୍‌କୁ ନିଙ୍ଗିଁତି ୱେନ୍‌କା ୱାନି ସିସୁର୍‍ ୱାନ୍‌ ଇକା ଇର୍ହାମାର୍ହାନ୍‌ ଇଜି ଏତ୍‍କିତାର୍‍; ମାରି, ୱାର୍‌ ଦାର୍ମୁସାସ୍ତ୍ର ନି ଜିସୁ ଇର୍‍ଇମାର୍‍ଇ ମାଟା ବିସ୍‌ବାସ୍‌ କିତାର୍‍ ।

23 ନିସ୍ତାର୍‍ ପଣ୍ତୟ୍‌ ଆନିୱାଲେ ଜିସୁ ଜିରୁସାଲମ୍‌ତୁ ମାନିୱାଲେ ନାଣ୍ତ ଲୋକୁ ୱାନ୍‌ କିତି କାବାଆନି ପାଣିଙ୍ଗ୍‍ୱିଜୁ ସୁଡ଼ୁଜି ୱାନି ଦର୍‌ତାନ୍‌ ବିସ୍‌ବାସ୍‌ କିତାର୍‍ । 24 ମାତର୍‌ ଜିସୁ ୱାରି ମୁସ୍‌କୁ ବିସ୍‌ବାସ୍‌ କିଏଣ୍‍ଗା ୱାରି ମାଣ୍‌କୁ ନିଜେଦିଙ୍ଗ୍‍ ୱେରେହେ ଇଟ୍‌ତାନ୍‌, ଇରିଙ୍ଗ୍‌ ୱାନ୍‌ ୱିଜେରିଙ୍ଗ୍‍ ନେସ୍‌ସି ମାର୍‌ଆନ୍‌ । 25 ମାରି, ଏନ୍‌ ଜେ ଲୋକା ବିସୟ୍‌ତାନ୍‌ ସାକି ସିନାନ୍‍, ଇକା ୱାନି ଦର୍‌କାର୍‌ ସିଲେତାତ୍‍, ଇରିଙ୍ଗ୍‌ ଲୋକା ଜିବନ୍‌ତୁ ଇନିକା ମାନାତ୍‌, ଆକା ୱାନ୍‌ ନିଜେ ନେସ୍‌ସି ମାର୍‌ଆନ୍‌ ।