1 ତାନିୱେନ୍‌କା ଅର୍‌ଲେନ୍‌ ୱେଡ଼େରି ତେର୍‍ନି ବେଡ଼ାଦୁ ଅବ୍ରାହାମ ମମ୍ରିଦି ଅଲୋନ ମାରାନ୍‌ ମଦରୁ ନିଜେଦି ଗୁଡ଼ାଦି ସେର୍‍ଲାଦୁ ବାସ୍‌ତାମାର୍ହାନ୍; ଆୟା ବେଡ଼ାଦୁ ମାପୁରୁ ଆୟା ଜାଗାଦୁ ୱାନିଙ୍ଗ୍ ତରାୟ୍‌ଆତାନ୍‌ । 2 ଆବେଟ୍ ୱାନ୍ ମାର୍‌ଜି ସୁଡ଼ୁତାନ୍, ମୁଏର୍ ଲୋକୁ ୱାନି ଆଗିଡ଼ି ନିର୍ହାର୍‌ ମାନାର୍‌; ମାରି ସୁଡ଼ୁତି ଦାପ୍ରେ ଦାପ୍ରେ ବେଟ୍‍ବୁଡ଼ାଦେଙ୍ଗ୍ ଗୁଡ଼ାଦି ସେର୍‍ଲାଦୁ ବେଗି ସଲିସ୍ ମାଡ଼ିସ୍ କିଜି ଇର୍ହାନ୍‌, 3 "ଏ ପ୍ରବୁ, ଅନୁରଦ୍ କିଜିନା, ପେରିଲୋକୁ, ଜଦି ମିରୁ ନା ମୁସ୍‌କୁ ୱେଡ଼ିକା ମାନିଙ୍ଗ୍‌, ଆର୍‌ତିଙ୍ଗ୍‌ ଇୟା ଦାସତି ବାଡିଦୁ ଏସୋ ବେଡ଼ା ତେବାପିର୍‌ । 4 ଅନୁରଦ୍ କିଜିନା, ନାଙ୍ଗିଁ ଉବୁଡ଼ି ଏରୁ ତାସ ସିଦା, ମିରୁ ନିଜେଦି ପାଦାମ୍‌କୁ ନର୍‌ବାଜି ଇୟା ମାରାନ୍‌ ଆଡିଗି ରମ୍‍ଦୁ 5 ଏଣ୍ତେସ୍‌କି ମିରୁ ମି ଦାସ୍‌ତି ଲାକ୍‌ତୁ ୱାତିମାନିଦେର୍‌, ଇୟାଉଣ୍ତିଙ୍ଗ୍‌ ନାଙ୍ଗିଁ କାଣ୍ତେକ୍‌ କାଦି ତାତେଙ୍ଗ୍‌ ସିଦାଟ୍‌, ମାରି ଉଟି ୱେନ୍‌କା ମିରୁ ସନିଦେର୍‌ ।" ନାସ୍ତିୱାଲେ ୱାର୍‌ ଇର୍ହାର୍‌, "ଏମେକା ଇଜିନି ଆକା କିଆ ।"

6 ଆବେଟ୍‍କୁ ଅବ୍ରାହାମ ବେଗି ଗୁଡ଼ା ଲୋଇ ସାରା ଲାକୁତୁ ସଲିସ୍ ଇର୍ହାନ୍‌, "ମୁଣ୍ତୁରି ଆଡେଙ୍ଗ୍‌ ନେଗି ଗଦ୍‌ମୁ ଦୁରୁ ଜଲପିସି ବେଗି ରୁଟି ତିଆର୍‌ କିଆ ।" 7 ତାନିୱେନେକା ଅବ୍ରାହାମ ଗଟାଣ୍‌ତୁ ବେଗି ସଲ୍‍ସି ନେଗି ଇସ୍ରି ଦୁମାଦି ବାଚିପିଲା ତାସି ଆଡ଼ିସିଙ୍ଗ୍‌ ସିତାନ୍, ୱାନ୍‌ ଆକା ବେଗି ୱାର୍‍ତାତ୍ । 8 ନାସ୍ତିୱାଲେ ୱାନ୍‌ ଦହି, ପାଲୁ ମାରି ୱେତି କାଣ୍ତା ତାସି ୱାରି ଲାକୁତୁ ଇଟ୍‍ତାନ୍‌, ମାରି ୱାରି ଉଣି ବେଡ଼ାଦୁ ମାରାନ୍‌ ମଦରୁ ୱାରି ଲାକୁତୁ ନିର୍ହା ମାର୍ହାନ୍‌ ।

9 ଆୟା ୱେନ୍‌କା ୱାର୍ ୱାନିଙ୍ଗ୍ ୱେନ୍‍ବାତାର୍, "ନି ଆଇମା ସାରା ଏମେ ?" ୱାନ୍ ଇର୍ହାନ୍‌, "ସୁଡ଼ୁଦୁ, ୱାଦ୍ ଗୁଡ଼ାଦୁ ମାନାତ୍ ।"

10 ୱାରି ଲୋଇରାନ୍‌ ଅରେନ୍‌ ଇର୍ହାନ୍‌, "ଇୟା କାଡ଼ା ଡ଼େସିୱାନି ବେଡ଼ାଦୁ ମାପୁ ଏଣ୍ତେସ୍‌ବା ଡ଼େସିୱାନାପ୍; ସୁଡ଼ୁଦୁ, ଆୟା ବେଡ଼ାଦୁ ନି ଆଡ଼ି ସାରାଦି ଗାତୁ ଅରେନ୍ କଡ଼ ତେବାନାନ୍‌ । ଇୟା ମାଟା ସାରା ଗୁଡ଼ାଦୁ ତେବାଜି ୱାରି ମାଟା ୱେରାତ୍ ।" 11 ଆୟା ବେଡ଼ାଦୁ ଅବ୍ରାହାମ ନି ସାରା ଡକ୍ରା ଡକିରି ଆତାମାର୍ହାର୍‌ ମାରି କାଡ଼ା ଜିଣାତା ମାର୍ହାତ୍‌, ମାରି ସାରାଦି କଡ଼କକ୍‌ରା ଆନି ବେଡ଼ା ଜିଣାତାମାର୍ହାତ୍‌ । 12 ଇୟାଉଣ୍ତିଙ୍ଗ୍‌ ସାରା ସିକିସ୍ ମନେ ମନେ ଇର୍ହାତ୍, "ସତେନେ ନାନୁ ଇୟା ଡକିରି କାଡ଼ାଦୁ ଇନିକା ଇୟାୱାଜା ୱେଡ଼ିକା ଆନାତ୍ ? ସତେନେ ନା କନ୍‌ଲି ବା ଡକରା ।"

13 ନାସ୍ତିୱାଲେ ମାପୁରୁ ଅବ୍ରାହାମତିଙ୍ଗ୍ ଇର୍ହାନ୍‌, "ନିଜେଦି ଡକରା ବେଡ଼ା ଇନିକା ସତେନେ କଡ଼ ଜନମ୍‌ ଆନାନ୍‌, ଇକା ଅଡ଼୍‌ବିଜି ସାରା ଏନ୍ଦା ସିକିସିନାତ୍ ? 14 ପ୍ରବୁଦି ଉଣ୍ତିଙ୍ଗ୍‌ ଇନି ପାଣି ଆଟ୍‌ୱା ନୋ ? ଇୟା କାଡ଼ା ଡ଼େସି ୱାତିଙ୍ଗ୍, ଟିକ୍ ବେଡ଼ାଦୁ ମାପୁ ଡ଼େସି ୱାନାପ୍, ଆୟା କାଡ଼ାଦୁ ସାରାଦି ଗାତୁ କଡ଼ ତେବାନାନ୍ ।"

15 ଆବେଟ୍‌ ସାରା ତିଲାଜି ଇର୍ହାତ୍, "ନାନୁ ସିକିଏ," ଏଣ୍ତେସ୍‌କି ୱାଦ୍‌ ତିଲାତାତ୍ ।

ମାତର୍‌ ପ୍ରବୁ ଇର୍ହାନ୍‌, "ନିନୁ ଏଣ୍ତେସ୍‌ବା ସିକ୍‌ତି ।"

16 ତାନିୱେନ୍‌କା ଆୟା ଲୋକୁ ଆବେଟ୍‍ତାନ୍ ନିଙ୍ଗିଁଜି ସଦୋମ ତରିନ୍‌ ସର୍ହାର୍‌, ଅବ୍ରାହାମ ସାରି ତର୍‌ନି ଉଣ୍ତିଙ୍ଗ୍ ୱାରି ୱାଲେ ଅରେସ୍ ସର୍ହାନ୍ । 17 ଆବେଟ୍‌ ମାପୁରୁ ଇର୍ହାନ୍‌, "ମାପୁ ଏମେକା କିଦେଙ୍ଗ୍ ବଦା ମାନାତ୍, ଆକା ନ ଅବ୍ରାହାମ ମାଡ଼ାନ୍ ଆଡ଼ାକ୍‍ନାପ୍‌ ? 18 ଅବ୍ରାହାମଦି ମାଡ଼ାନ୍‌ ଉଣ୍ତ୍ରି ପେରି କୁଟୁମ୍‌ ଆନାତ୍ ମାରି ଦୁନିଆଦି ଲୋକା କୁଟୁମ୍‌ ୱାନି ମାଡ଼ାନ୍‌କୁ ଆର୍ସିବାଦ୍‌ ପୟ୍‌ନାର୍‌ । 19 ଏଣ୍ତେସ୍ ୱାରି ୱାନିଦିନ୍‌ତି କଡ଼ କକରାର୍ ମାରି ଇଲୁପରିବାର୍‌ ଏଣ୍ତେସ୍ ନେଗି ଦାର୍ମୁପାଣି କିଦେଙ୍ଗ୍ ମାପୁରୁଦି ସାରିଦୁ ବୁଲାନାର୍, ଇୟା ଉଣ୍ତିଙ୍ଗ୍ ୱାରିଙ୍ଗ୍ ୱାନ୍ ଏଣ୍ତେସ୍ ଆଜ୍ଞା ସିନାନ୍, ଇୟା ବଦାଦାନ୍‌ ମାପୁ ୱାନିଙ୍ଗ୍ ଟିକ୍‌ କିତାମାନାପ୍; ଆବେଟ୍‍କୁ ପ୍ରବୁ ଅବ୍ରାହାମଦି ବିସୟ୍‌ତାନ୍‌ ୱିଜୁ ନିଜେ ସିତିମାନି ଟିକ୍ କାବୁର୍ ପୁରା କିନାନ୍ ।"

20 ସଦାପ୍ରବୁ ଅବ୍ରାହାମତିଙ୍ଗ୍‌ ଇର୍ହାନ୍‌, "ସଦୋମ ନି ହମରାଦି ବିରୁଦ୍‌ତାନ୍‌ ନାଣ୍ତ ଆଉଲି ନିଙ୍ଗିଁଜିନାତ୍, ୱାରି ପାପ୍‌ ନାଣ୍ତ ସାତି ୱାଜା; 21 ଆବେଟ୍‌ ନାନୁ ଆଡ୍‌ଗି ସୁଡ଼ୁଦେଙ୍ଗ୍‌ ଇଜି ସର୍ହାନୋ ମା ଲାକୁତୁ ୱାଜିନି ଆଡ଼ାବାନି ଇସାପ୍‍ତାନ୍ ୱାର୍ ୱିଜେରେ କିତାମାନାର୍ ନ ସିଲେ, ଆକା ନେସ୍‍ନାଟ୍‌ ।" 22 ଆବେଟ୍‌ତାନ୍‌ ଆୟା ଲୋକୁ ଆୟା ମାଡ଼ାନ୍‌ ଡ଼େସି ସଦୋମ ତରିଙ୍ଗ୍‌ ବୁଲାଜି ସରାର୍‌; ମାତ୍ର ଅବ୍ରାହାମ ୱାନ୍‌ ଆୟା ସାନ୍ଦି ମାପୁରୁଦି ଆଗିଡ଼ି ନିର୍‌ଆ ମାର୍ହାନ୍‌ । 23 ତାନିୱେନେକା ଅବ୍ରାହାମ ଲାକୁତୁ ସଲିସ୍ ଇର୍ହାନ୍‌, "ନିନୁ ନୋ ତାଗ୍‌ଇ ଲୋକା ୱାଲେ ଦାର୍ମୁଦି ଲୋକାୱାଲେ ନାଷ୍ଟୁ କିନି ନୋ ? 24 ଆର୍‌ତିଙ୍ଗ୍‌ ଗାଡ଼୍‌ ଲୋଇ ପସାସ୍ ଲୋକୁ ଦାର୍ମୁଦିକାର୍ ମାର୍ହିଙ୍ଗ୍; ଆବେଣି ପସାସ୍ ଲୋକୁ ଦାର୍ମୁଦିୱାଲେ ନ ଆୟା ଜାଗା ରକିୟା କିଏଜି ନାଷ୍ଟୁ କିନି ନୋ ? 25 ତାଗ୍‌ଇ ଲୋକା ୱାଲେ ଦାର୍ମୁ ଲୋକ୍‍ତିଙ୍ଗ୍‌ ନାଷ୍ଟୁ କିନି ପାଣି ନିଜେଦି ମାଡ଼ାନ୍‍କୁ ଆକ ମାନିତ୍‌ ମାରି ଦାର୍ମୁ ଲୋକ୍‌ତିଙ୍ଗ୍ ଦୁଷ୍ଟଦି ସାମାନ୍ କିନି ନିଜେଦି ମାଡ଼ାନ୍‌କୁ ଆକ ମାନିତ୍ । ସାରା ଦୁନିଆଦି ବିସାର୍ କିନିକାନ୍‌ ନ୍ୟାୟ୍‌ ବିସାର୍‌ କିଏରେନି ?"

26 ଆବେଟ୍‍କୁ ପ୍ରବୁ ଇର୍ହାନ୍‌, "ମାପୁ ଏସାଙ୍ଗ୍ ସଦୋମ ଗାଡ଼ଦୁ ପସାସ୍ ଲୋକୁ ଦାର୍ମୁତିକାର୍ ସୁଡ଼ୁତିଙ୍ଗା, ଆର୍‌ତିଙ୍ଗ୍ ୱାରି ଉଣ୍ତିଙ୍ଗ୍ ୱିଜୁ ଜାଗା ରକିୟା ପୋଇନାତ୍ ।"

27 ଆବେଟ୍ ଅବ୍ରାହାମ ମାରିଡ଼େସି ଇର୍ହାନ୍‌, "ସୁଡ଼ୁଆ, ନାନୁ ଦୁଡ଼ି ନି ନିରୁ ଆତିଙ୍ଗ୍‌ବା ପ୍ରବୁ ଆଗିଡ଼ି ମାଟା ଇଣ୍ତ୍ରେଙ୍ଗ୍ ତିଆର୍ ମାନା । 28 ଆନାତ୍‌, ପସାସ୍ ଲୋକୁ ଦାର୍ମୁତି ଲୋଇ ପାଞ୍ଚ୍‌ ଲୋକୁ ଉଣା ମାର୍ହିଙ୍ଗ୍; ଆୟା ପାଞ୍ଚ୍‌ ଲୋକୁ ଉଣା ଆନି ଉଣ୍ତିଙ୍ଗ୍ ଇନିକା ନିନୁ ୱିଜୁ ଗାଡ଼୍‌ ନାସ୍ଟୁ କିନିଦେର୍‌ ?" ସଦାପ୍ରବୁ ଇର୍ହାନ୍‌, "ମାପୁ ସାଲିସ୍‍ ପାଞ୍ଚ୍‌ ଲୋକାଙ୍ଗ୍ ପୋଇତିଙ୍ଗ୍, ଆକା ନାସ୍ଟୁ କିଏପ୍ ।"

29 ଅବ୍ରାହାମ ମାରିଡ଼େସି ଇର୍ହାନ୍‌, "ଆର୍‌ତିଙ୍ଗ୍ ଆବେନୁ ଚାଲିସ୍ ଲୋକୁ ପୋଇତିଙ୍ଗ୍ ।" ସଦାପ୍ରବୁ ଇର୍ହାନ୍‌, "ଆୟା ଚାଲିସ୍ ଲୋକୁ ଉଣ୍ତିଙ୍ଗ୍ ଆକା ନାସ୍ଟୁ କିଏପ୍ ।"

30 ମାରିଡ଼େସି ଅବ୍ରାହାମ ଇର୍ହାନ୍‌, "ପ୍ରବୁ ରିସା ଆଏତିଙ୍ଗ୍ ମାରି ଉଣ୍ତ୍ରି ମାଟା ଇନା; ଆନାତ୍‌, ଆବେନୁ ତିରିସ୍ ଲୋକୁ ପୋଇତିଙ୍ଗ୍ ।" ସଦାପ୍ରବୁ ଇର୍ହାନ୍‌, "ତିରିସ୍ ଲୋକୁ ପୋଇତିଙ୍ଗ୍ ଦଂସ କିଏପ୍‌ ।" 31 ଅବ୍ରାହାମ ଇର୍ହାନ୍‌, "ସୁଡ଼ୁଆ, ପ୍ରବୁଦି ଆଗିଡ଼ି ନାନୁ ଡ଼େସି ମାଟା ୱେର୍‌ତେଙ୍ଗ୍‌ ତିଆର୍ ମାନା; ଆନାତ୍‌, ଆବେନୁ କଡ଼େ ଲୋକୁ ପୋଇତିଙ୍ଗ୍ ।" ପ୍ରବୁ ଇର୍ହାନ୍‌, "ଆୟା କଡ଼େ ଲୋକୁ ଉଣ୍ତିଙ୍ଗ୍ ମାପୁ ଆକା ନାଷ୍ଟୁ କିଏପ୍ ।"

32 ଅବ୍ରାହାମ ଇର୍ହାନ୍‌, "ପ୍ରବୁ ରିସା ଆଏତିଙ୍ଗ୍ ମାରି ଉଣ୍ତ୍ରି ଦେବା ଇନା; ଆର୍‌ତିଙ୍ଗ୍, ଆବେନୁ ଦାସ୍‌ ଲୋକୁ ପୋଇତିଙ୍ଗ୍ ।" ପ୍ରବୁ ଇର୍ହାନ୍‌, "ଆୟା ଦାସ୍‌ ଲୋକା ଉଣ୍ତିଙ୍ଗ୍ ମାପୁ ଆକା ନାଷ୍ଟୁ କିଏପ୍ ।" 33 ନାସ୍ତିୱାଲେ ପ୍ରବୁ ଅବ୍ରାହାମ ୱାଲେ ଇୟାୱାଜା ୱାର୍‌ଗିଜି ସାନିକା ୱିସ୍‍ସି ସର୍ହାନ୍‌, ମାରି ଅବ୍ରାହାମ ବା ନିଜେଦି ବାଡିଦୁ ଡ଼େସି ସର୍ହାନ୍‌ ।