1 ଆବେଟ୍ ଜୋସେପ୍‌ ନିଜେଦି ଲାକୁତୁ ନିରିଇମାନିକା ଲୋକା ଆଗିଡ଼ି ନିଜେଦିଙ୍ଗ୍ ସାସ୍‌ କିଦେଙ୍ଗ୍ ଆଟ୍‍ଏଜି ପେରିବଲୁଦାନ୍ ଇର୍ହାନ୍‌, ମା ଆଗିଡ଼ିରାନ୍ ୱିଜୁ ଲୋକାଙ୍ଗ୍ ସପ୍‍ତୁ । ଆବେଟ୍ ଏନ୍‌ ୱାନି ଲାକୁତୁ ମାନ୍ଏଜି, ଜୋସେପ୍‌ ଦାଦାରି ଆଗିଡ଼ି ନିଜେଦି ବିସୟ୍‌ ୱେର୍‌ତେଙ୍ଗ୍ ଆସ୍ତାନ୍ । 2 ୱାନ୍ ପେରିଆଉଲିଦାନ୍ ଇୟାୱାଜା ଆଡ଼ାବାତାନ୍ ଜେ ମିସରତିକାର୍‌ ମାରି ପାରୋ ରାଜାଦି ଇଲୁଦି ଲୋକୁ ଆକା ୱେନ୍‍ଡ୍ରେଙ୍ଗ୍ ଆଟ୍‍ତାର୍ 3 ଜୋସେପ୍ ନିଜେଦି ଦାଦାରିଙ୍ଗ୍‌ ଇର୍ହାନ୍‌, "ନାନୁ ଜୋସେପ୍‌; ନା ବୁବା ନ ନେରୁ ସାନ୍ଦି ଜିତାମାନାନ୍ ?" ଆବେଟ୍ ୱାନି ଦାଦାର୍‌ ୱାନି ଆଗିଡ଼ି ତିଲାଜି ଇନି ମାଟା ଇନ୍‌ଡ୍ରେଙ୍ଗ୍‌ ଆଟ୍ଏତାର୍‌ । 4 ତାନିୱେନେକା ଜୋସେପ ନିଜେଦି ଦାଦାରିଙ୍ଗ୍‌ ଇର୍ହାନ୍‌, "ମାଡ଼ିସ୍‌ କିଜିନା, ନା ଲାକୁତୁ ରାଦୁ," ଆବେଟ୍ ୱାର୍ ଲାକୁତୁ ସର୍ହାର୍, ୱାନ୍ ଇର୍ହାନ୍‌, ନାନୁ ମି ତୋଡ଼ାନ୍ ଜୋସେପ୍‌, ଏମେୱାନିଙ୍ଗ୍ ମିରୁ ମିସର୍‍ତି ଲୋକାଙ୍ଗ୍ ପୋର୍‌ତି ମାରିଦେର୍‌ । 5 ମାତର୍‌ ମିରୁ ନାଙ୍ଗିଁ ଇବେନୁ ୱାନି ଉଣ୍ତିଙ୍ଗ୍ ପୋର୍‍ତାପ୍ ଇଜି ଇଲେଇ ଦୁଃକ୍‌ ମାରି ନିଜେ ନିଜେ ଉଣ୍ତିଙ୍ଗ୍ ରିସା ଆମାଟ୍; ଇରିଙ୍ଗ୍‌ ମାପୁରୁ ଜିବନ୍‌ ଜିପିସ୍‌କିନି ଉଣ୍ତିଙ୍ଗ୍ ମି ଆଗିଡ଼ି ନାଙ୍ଗିଁ ପୋକ୍‍ତାନ୍ । 6 ସୁଡ଼ୁଦୁ, କେବଲ ରୁଣ୍ତି ବାର୍ସେକ୍ ଆତାତ୍ ଦେସ୍‍ତୁ ଦୁର୍ବିକ ଆତାମାନାତ୍; ମାରି ପାସ୍‌ ବାର୍ସୁ ବାକି ମାନାତ୍, ତାନି ମାଡ଼ାନ୍ ଡ଼ୁନିକା ନ କୟ୍‌ନିକା ଇନିକା ଆଏତ୍ । 7 ଇୟାଉଣ୍ତିଙ୍ଗ୍‌ ମାପୁରୁ ଦେସ୍‍ତୁ ମିଙ୍ଗିଁ ରକିଆ କିନି ଉଣ୍ତିଙ୍ଗ୍ ମାରି ପେରି ଉଦାର୍ କିନିଉଣ୍ତିଙ୍ଗ୍ ମିଙ୍ଗିଁ ଜିବନ୍‌ତୁ ଜିପିସ୍‍କିଦେଙ୍ଗ୍ କାବାଦାନ୍‌ ମି ଆଗିଡ଼ି ନାଙ୍ଗିଁ ପୋକ୍‍ତା ମାନାନ୍ । 8 ଇୟାଉଣ୍ତିଙ୍ଗ୍ ମିରୁ ଜେ ନାଙ୍ଗିଁ ଇୟା ବାଡିଦୁ ପୋକ୍‍ତି ମାନିଦେର୍‌, ଆକା ସିଲେ, ମାପୁରୁ ପୋକ୍‍ତାମାନାନ୍; ମାରି, ୱାନ୍ ନାଙ୍ଗିଁ ପାରୋ ରାଜାଦି ବୁବା ମାରି ୱାନି ଇଲୁଦି ମାଲିକ୍ ମାରି ୱିଜୁ ମିସର ଦେସ୍‍ତି ସାସନ୍‌କିନି ନେତା କିତାମାନାନ୍ ।

9 ଜୋସେପ୍‌ ଇର୍ହାନ୍‌, "ମିରୁ ବେଗି ନା ବୁବାଦି ଲାକୁତୁ ସଲ୍‌ସି ୱାନିଙ୍ଗ୍ ଇନ୍‍ଡ୍ରୁ, ନି ମାରିନ୍‌ ଜୋସେପ ଇୟାୱାଜା ଇର୍ହାମାନାନ୍, ମାପୁରୁ ନାଙ୍ଗିଁ ୱିଜୁ ମିସର ଦେସ୍‍ତି ସାସନ୍‌କିନି ନେତା କିତାମାନାନ୍; ମିରୁ ନା ଲାକୁତୁ ରାଦୁ, ଲାଡ଼ି କିମାଟ୍ । 10 ମିରୁ, ମି କଡ଼ର୍‌ ଆଇଲିକ୍‌, ମାରି ନାତିର୍‌ ନାତିକ୍‌ ମାରି ଡ଼ାକୁକଡିଙ୍ଗ୍‌ ୱିଜୁଦି ୱାଲେ ଗୋସନ୍ ରାଜିଦୁ ବାସା କିଜି ନା ଲାକୁତୁ ୱାନିଦେର୍‌ । 11 ଜଦି ମିରୁ ଆୟା ଗୋସନ୍‌ ବାଡିଦୁ ତେବାନିଦେର୍‌, ନାନୁ ମିଙ୍ଗିଁ ଜାତୁନ୍ କିନା; ଇରିଙ୍ଗ୍‌ ମାରି ପାସ୍‌ ବାର୍ସୁ ଦୁର୍ବିକ ମାନାତ୍; ଆଏତିଙ୍ଗ୍ ମି ମାରି ମି ଇଲୁଦି ୱିଜେରି କାକୁର୍ତି ଆନିକା ଗଟାନାତ୍ ।"

12 ମାରି ଜୋସେପ୍‌ ଇର୍ହାନ୍‌, "ଇଲେଇ ନା ମୋକମ୍ ମିଙ୍ଗିଁ ଇୟା ମାଟା ଇଜିନାତ୍, ଇକା ମି କାଣୁକୁ ମାରି ନା ତୋଡ଼ାନ୍‌ ବିନ୍ୟାମିନ୍‍ତି କାଣ୍‌ଗା ସୁଡ଼ିଜିନାତ୍ । 13 ଆଦେଙ୍ଗ୍‌ ମିରୁ ଇୟା ମିସର ଦେସ୍‍ତୁ ନା ସାକ୍ତିଦି ପାଣି ଇନି ଇନିକା ସୁଡ଼ିଜିନିଦେର୍‌, ଆୟା ୱିଜୁ ନା ବୁବେଙ୍ଗ୍‌ ୱେର୍‍ସି ୱାନିଙ୍ଗ୍ ବେଗି ଇବେନୁ ତାନିଦେର୍‌ ।"

14 ତାନିୱେନେକା ୱାନ୍ ୱାନି ନିଜେଦି ତୋଡ଼ାନ୍‍ ବିନ୍ୟାମିନ୍‍ତି କକ୍‌ଲାଦୁ ପୋମଜି ଆସ୍‌ସି ଆଡ଼ାବାତାନ୍, ମାରି ବିନ୍ୟାମିନ୍ ୱାନି କକ୍‌ଲା ପୋମଜିଆସ୍‍ସି ଆଡ଼ାବାତାନ୍ । 15 ମାରି, ଜୋସେପ୍‌ ଆଇ ଦାଦାରିଙ୍ଗ୍ ନଣ୍ତିତାନ୍‌ ମାରି ୱାରିଙ୍ଗ୍ ଆସ୍‌ସି ଆଡ଼୍‍ବାତାନ୍ । ଆବେଟ୍‍ତାନ୍ ୱାନି ଦାଦାର୍‌ ୱାନି ୱାଲେ ପୋମ୍‍ଦେଙ୍ଗ୍ ଆସ୍‌ତାର୍‌ ।

16 ମାରି ଜୋସେପ୍‌ତି ଦାଦାର୍‌ ୱାତାମାନାର୍ ଇଜି, ପାରୋ ରାଜାଦି ଇଲୁଦୁ ଲୋକା ଆଉଲି ୱିଙ୍ଗିଁତାତ୍, ପାରୋ ରାଜା ମାରି ୱାନି ଦାସର୍‌ ୱିଜେରେ ୱେଡ଼ିକା ଆତାର୍‌ । 17 ମାରି ପାରୋ ରାଜା ଜୋସେପ୍‌ତିଙ୍ଗ୍ ଇର୍ହାନ୍‌, "ନିନୁ ନି ଦାଦାରିଙ୍ଗ୍ ଇନ୍‍ଆଁ, ମିରୁ ଇୟା ପାଣି କିଦୁ; ନିଜେ ନିଜେ ଗଦଙ୍ଗ୍ ମୁସ୍‌କୁ ପାସି ଲାଦେକିଜି କିଣାନ୍ ଦେସ୍‍ତୁ ସାନ୍‍ଡ୍ରୁ, 18 ମାରି, ବୁବେଙ୍ଗ୍‌ ମାରି ନିଜେ ନିଜେଦି ୱିଜୁ ପରିବାରଦିଙ୍ଗ୍ ଆସ୍‌ସି ନା ଲାକୁତୁ ରାଦୁ; ନାନୁ ମିଙ୍ଗିଁ ମିସର ଦେସ୍‍ତି ନେଗି ଜିନିସ୍‌ ସିନା, ମାରି, ମିରୁ ଦେସ୍‍ତି ବେସି ନେଗି ବିସୟ୍‌ ପୋୟ୍‌ନିଦେର୍‌ । 19 ଇଲେଇ ମା ଆଦେସ୍‍ ଇସାପ୍‍ତାନ୍ ଇୟା ପାଣି କିଦୁ, ମିରୁ ନିଜେ ନିଜେଦି କଡ଼ରିଙ୍ଗ୍ ମାରି ଆଡ଼ିକା ଉଣ୍ତିଙ୍ଗ୍ ମିସର ଦେସ୍‍ତାନ୍ ସଗଡ଼ ଗାଡ଼ି ଆସ୍‌ସି ସାନ୍‍ଡ୍ରୁ, ମାରି, ମି ବୁବେଙ୍ଗ୍ ଆସ୍‍ସ ରାଦୁ । 20 ମାରି ମି ଜିନିସ୍‌ ବିସୟ୍‌ତିଙ୍ଗ୍ ସିନ୍ତା କିମାଟ୍; ୱିଜୁ ମିସର ଦେସ୍‍ତି ନେଗି ଜିନିସ୍‌ ମିଦି ଆନାତ୍ ।"

21 ଆବେଟ୍ ଜାକୁବଦି କଡ଼ର୍ ଆୟାୱାଜା କିତାର୍; ମାରି, ଜୋସେପ୍‌ ପାରୋ ରାଜାଦି ଆଦେସ୍‍ତାନ୍ ୱାରିଙ୍ଗ୍‌ ସଗଡ଼ ଗାଡ଼ି ମାରି ସନି ଉଣ୍ତିଙ୍ଗ୍‌ କାଦି ସିତାନ୍‌ । 22 ମାରି, ଜୋସେପ୍‌ ୱିଜେରି ଉଣ୍ତିଙ୍ଗ୍ ଉଣ୍ତ୍ରି ଉଣ୍ତ୍ରି ଜୋଡ଼ା ଆଙ୍ଗିଁଙ୍ଗ୍‌ ସିତାନ୍‌, ମାତର୍‌ ବିନ୍ୟାମିନ୍‍ତିଙ୍ଗ୍ ତିନିସୋ ୱେଣ୍ତି ଡାବୁଙ୍ଗ୍‌ ମାରି ପାସ୍‌ ଜୋଡ଼ା ଆଙ୍ଗିଁଙ୍ଗ୍‌ ସିତାନ୍‌ । 23 ମାରି, ବୁବା ଉଣ୍ତିଙ୍ଗ୍ ମିସର ଦେସ୍‍ତି ନେଗି ନେଗି ଜିନିସ୍‌ତୁ ଲାଦେକିତି ଦାସ୍‌ ଗଦ ମାରି ସାରିଦୁ ବୁବାଦି ଉଣି ଉଣ୍ତିଙ୍ଗ୍‌ କାଦି ମାରି ରୁଟି ୱିଜୁ ଉଣିତିନିକା ଜିନିସ୍‌ତୁ ଲାଦେକିତି ଦାସ୍‌ ଗଦଙ୍ଗ୍ ପୋକ୍‍ତାନ୍ 24 ଇୟାୱାଜା ଜୋସେପ୍‌ ନିଜେଦି ଦାଦାରିଙ୍ଗ୍‌ ସପ୍‍ସି ସିତାନ୍, ୱାର୍ ଡ଼େସିସର୍ହାର୍; ମାରି, ୱାନ୍ ୱାରିଙ୍ଗ୍ ଇର୍ହାନ୍‌, "ଜାଗାର୍‌ତା, ସାରିଦୁ ଜାଟି କିମାଟ୍‌ ।"

25 ତାନିୱେନେକା ୱାର୍ ମିସର ଦେସ୍‍ତାନ୍‌ ସହସି ସଲ୍‍ସି କିଣାନ୍ ଦେସ୍‍ତୁ ନିଜେଦି ବୁବା ଜାକୁବ ଲାକୁତୁ ଇଗାସର୍ହାର୍ । 26 ମାରି, ୱାର୍ ୱାନିଙ୍ଗ୍ ଇର୍ହାର୍, "ଜୋସେପ ନେରୁ ସାନ୍ଦି ଜିବନ୍‌ ମାନାନ୍, ମାରି ୱାନ୍ ୱିଜୁ ମିସର ଦେସ୍‍ତି ସାସନ୍‌କିନିକାନ୍‌ ଆତାମାନାନ୍ ।" ଆବେଟ୍ ଜାକୁବ କାବା ଆତାନ୍‌, ମାତର ୱାନ୍ ୱାରିଙ୍ଗ୍ ବିସ୍‍ବାସ୍ କିଏତାନ୍ ।

27 ମାରି, ଜୋସେପ୍‌ ଏସୋ ମାଟା ୱାରିଙ୍ଗ୍ ଇର୍ହାମାର୍ହାନ୍, ଆୟା ୱିଜୁ ମାଟା ୱାର୍ ୱାନିଙ୍ଗ୍ ୱେର୍‌ତାର୍ । ମାତର୍‌ ୱାନ୍ ଏସ୍ତିୱାଲେ ଅନି ଉଣ୍ତିଙ୍ଗ୍ ଜୋସେପ୍‌ତି ପୋକ୍‌ତାତିମାନି ସଗଡ଼ ଗାଡ଼ି ୱିଜୁ ସୁଡ଼ୁତାନ୍, ନାସ୍ତିୱାଲେ ୱାରି ବୁବା ଜାକୁବଦି ଆତ୍ମା ଡ଼େସିଜିବନ୍‌ ଆତାତ୍ । 28 ଆବେଟ୍ ଜାକୁବ ଇର୍ହାନ୍‌, "ନାଣ୍ତ ଆତାତ୍‌; ନା କଡ଼ ଜୋସେପ୍‌ ନେରୁସାନ୍ଦି ଜିତାମାନାନ୍; ନାନୁ ସନା, ସାନି ଆଗିଡ଼ି ୱାନିଙ୍ଗ୍ ସୁଣା ।"