1 ତାନିୱେନେକା ନିଜେଦି ମାଡ଼ାନ୍ ଜାକୁବଦି ମାରିନ୍‌ ଜନମ୍‌ ଆଏତାନ୍, ଇକା ସୁଡ଼ୁଜି ରାହେଲ ନିଜେଦି ତାଙ୍ଗିଁ ଉଣ୍ତିଙ୍ଗ୍ ରିସା ଆଜି ଜାକୁବଙ୍ଗ୍ ଇର୍ହାତ୍, "ନାଙ୍ଗିଁ କଡ଼ ସିଦା, ସିଲ୍‌ତିଙ୍ଗ୍‌ ନାନୁ ସାନା ।"

2 ଆବେଟ୍‌ ରାହେଲ ଉଣ୍ତିଙ୍ଗ୍‌ ଜାକୁବଦି ରିସା ନାଣ୍ତ ଆତାତ୍, ମାରି ୱାନ୍‌ ଇର୍ହାନ୍‌, "ନାନୁ ଇନିକା ମାପୁରୁ ? ୱାନ୍ ଗାଦେ ନିଙ୍ଗିଁ ଗାର୍ବୁ ସିଏନ୍‌ ।"

3 ନାସ୍ତିୱାଲେ ରାହେଲ ଇର୍ହାତ୍‌, "ଇକା ସୁଡ଼ୁଆ, ନା ସାକରାଣି ବିଲ୍‍ହା ମାନାତ୍, ତାନି ୱାଲେ ଇଲୁଆସ୍‌ଆ; ୱାଦ୍ କଡ଼ ଜନମ୍‌ କିଜି ନା ଗାତୁ ସିତିଙ୍ଗ୍‌ ତାନି ଉଣ୍ତିଙ୍ଗ୍‌ ନାନୁ କଡ଼ଦି ୟାୟା ଆନା ।"

4 ମାରି ୱାଦ୍ ନିଜେଦି ଦାସି ବିଲ୍‍ହାଦିଙ୍ଗ୍‌ ଜାକୁବ ୱାଲେ ପେଡ଼ି କିତାତ୍‌ । 5 ଆବେଟ୍‌ ଜାକୁବ ତାନି ୱାଲେ ଇଲୁଆସ୍‌ତାନ୍‌, ବିଲ୍‍ହା ଗାର୍ବୁଦୁ ଆଜି ଜାକୁବଦିଙ୍ଗ୍‌ ଉଣ୍ତ୍ରି କଡ଼ ଜନମ୍‌ କିତାତ୍ । 6 ନାସ୍ତିୱାଲେ ରାହେଲ ଇର୍ହାତ୍, "ମାପୁରୁ ନା ବିସାର୍‌ କିତାନ୍‌, ମାରି ନା କାକୁର୍ତି ୱେନ୍‌ଜି ନାଙ୍ଗିଁ କଡ଼ ସିତାନ୍," ଆଦେଙ୍ଗ୍ ୱାନି ଦରୁ *ଦାନ୍‌ ଇଟ୍‌ତାତ୍‌ । 7 ତାନିୱେନେକା ରାହେଲତି ଦାସି ବିଲ୍‍ହା ମାରି ପଟାଦୁ ଆଜି ଜାକୁବ ଉଣ୍ତିଙ୍ଗ୍‌ ମାରି ଅରେନ୍‌ କଡ଼ ଜନମ୍‌ କିତାତ୍ । 8 ନାସ୍ତିୱାଲେ ରାହେଲ ଇର୍ହାତ୍, "ନାନୁ ତାଙ୍ଗିଁ ୱାଲେ ମାପୁରୁ ବିସୟ୍‌ଦି ମୁଟି ଜୁଦ୍‌ କିତା ମାରି ଜିଣାତା," ଆଦେଙ୍ଗ୍‌ ତାନି ଦରୁ *ନପ୍ତାଲି ଇଟ୍‌ତାତ୍‌ ।

9 ତାନିୱେନେକା ଲେୟା ନିଜେଦି ପଟାଦୁ ଆଇକା ନେସ୍‍ସି ନିଜେଦି ସିଲ୍‌ପା ଦରୁଦି ଦାସିଙ୍ଗ୍‌ ଅସି ଜାକୁବ ୱାଲେ ପେଡ଼ି କିତାତ୍ । 10 ଆବେଟ୍ ଲେୟାଦି ଦାସି ସିଲ୍‌ପା ମାଡ଼ାନ୍‌ ଜାକୁବଦି ଅରେନ୍ କଡ଼ ଜନମ୍‌ ଆତାନ୍ । 11 ଆବେଟ୍ ଲେୟା ଇର୍ହାତ୍‌, "ଇକା ଏସା ବାଗ୍ୟ !" ଇୟାଉଣ୍ତିଙ୍ଗ୍‌ ୱାନି ଦରୁ *ଗାଦ୍ ଇଟ୍‍ତାତ୍‌ । 12 ତାନିୱେନେକା ଲେୟାଦି ଦାସି ସିଲ୍‌ପା ଜାକୁବ ଉଣ୍ତିଙ୍ଗ୍ ମାରି ଅରେନ୍‌ କଡ଼ ଜନମ୍‌ କିତାତ୍ । 13 ଆବେଟ୍ ଲେୟା ଇର୍ହାତ୍, "ନା ଇନି ୱେଡ଼ିକା ! ଆଇଲିକ୍‌ ନାଙ୍ଗିଁ ୱେଡ଼ିକାଦିକାତ୍ ଇନେ," ଆଦେଙ୍ଗ୍ ୱାଦ୍‌ ୱାନି ଦରୁ *ଆସେର ଇଟ୍‌ତାତ୍‌ ।

14 ତାନିୱେନେକା ଗଦୁମୁ କୟ୍‌ନି ବେଡ଼ାଦୁ ରୁବେନ୍ ଆତ୍ରେ ସଲିସ୍ କିଡ଼ିଇଦାନ୍‌ ଦୁଦାପଲ* ପୋୟଜି ତାସି ନିଜେଦି ୟାୟା ଲେୟାଙ୍ଗ୍ ସିତାତ୍‌ । ଆବେଟ୍ ରାହେଲ ଲେୟାଙ୍ଗ୍ ଇର୍ହାତ୍, "ନି ମାରିନ୍‌ ତାତିମାନି ଦୁଦାପଲ ଏସ ନାଙ୍ଗିଁ ସିଦା ।" 15 ଆବେଟ୍ ୱାଦ୍ ଇର୍ହାତ୍, "ନିନୁ ନା କନ୍‍ଲିଙ୍ଗ୍‌ ଡଙ୍ଗାଁକିତି ଅତିମାନି, ଇକା ଇନିକା ଉଣାଦି ମାଟା ? ନିନୁ ନା ମାରିନ୍‌ଦି ଦୁଦାପଲ ବା ଡଙ୍ଗାଁକିନି ଅନି ?" ଆର୍‌ତିଙ୍ଗ୍‌ ରାହେଲ ଇର୍ହାତ୍‌, "ମି ମାରିନ୍‌ଦି ଦୁଦାପଲ ବାଦୁଲୁ ୱାନ୍‌ ନେରୁ ନାଡ଼ା ନି ୱାଲେ ଡର୍‌ନାନ୍‌ ।"

16 ତାନିୱେନେକା ମିଲିମିଲିକା କିଡ଼ିଇଦାନ୍‌ ଜାକୁବ ୱାନି ବେଡ଼ାଦୁ ଲେୟା ୱାନି ୱାଲେ ବେଟ୍‌ବୁଡ଼ାନି ଉଣ୍ତିଙ୍ଗ୍‌ ଆତ୍ରେ ସଲିସ୍ ଇର୍ହାତ୍, "ନିନୁ ନା ଲାକୁତୁ ୱାଦେଙ୍ଗ୍ ଆନାତ୍; ଇରିଙ୍ଗ୍‌ ନାନୁ ନିଜେଦି ମାରିନ୍‌ତି ଦୁଦାପଲ ସିଜି ନିଙ୍ଗିଁ କଟା ମାନା ।" ଆବେଟ୍ ୱାନ୍‌ ଆୟା ନାଡ଼ା ତାନି ୱାଲେ ଡରିତାନ୍‌ ।

17 ଆବେଟ୍ ମାପୁରୁ ଲେୟାଦି ପାର୍‌ତନା ୱେର୍ହାନ୍, ୱାଦ୍ ପଟାଦୁ ଆଜି ଜାକୁବଦି ପାସ୍‌ ନମ୍ବର୍‍ କଡ଼ ଜନମ୍‌ କିତାତ୍ । 18 ଆବେଟ୍ ଲେୟା ଇର୍ହାତ୍, "ନାନୁ ନା କନ୍‍ଲିଙ୍ଗ୍‌ ନିଜେଦି ଦାସି ସିତାମାର୍ହା, ମାପୁରୁ ତାନି ଦାନ୍‌ ନାଙ୍ଗିଁ ସିତାମାନାନ୍," ଆବେଟ୍ ୱାଦ୍ ୱାନି ଦରୁ *ଇସାକର ଇଟ୍‍ତାତ୍‌ । 19 ତାନିୱେନେକା ଲେୟା ମାରିଡ଼େସି ପଟାଦୁ ଆଜି ଜାକୁବଦି ସଅ ନମ୍ବର୍‍ କଡ଼ ଜନମ୍‌ କିତାତ୍ । 20 ଆବେଟ୍ ଲେୟା ଇର୍ହାତ୍, "ମାପୁରୁ ନାଙ୍ଗିଁ ନେଗି ବର୍‌ ସିତାନ୍; ଇଲେଇ ନା କନ୍‍ଲି ନା ୱାଲେ ବାସା କିନାନ୍, ଏଣ୍ତେସ୍ ନାନୁ ୱାନି ସଅ ନମ୍ବର୍‍ କଡ଼ଦିଙ୍ଗ୍ ଜନମ୍‌ କିତାମାନା," ଆବେଟ୍ ୱାଦ୍‌ ୱାନି ଦରୁ *ସବୁଲୁନ୍ ଇଟ୍‍ତାତ୍‌ । 21 ତାନି ୱେନେକା ୱାଦ୍ ଉଣ୍ତ୍ରି ଆଇଲି ଜନମ୍‌ କିଜି, ତାନି ଦରୁ ଦିଣା ଇଟ୍‍ତାତ୍ ।

22 ତାନିୱେନେକା ମାପୁରୁ ରାହେଲତିଙ୍ଗ୍‌ ଏତ୍‌କିତାନ୍‌ ମାରି ମାପୁରୁ ତାନି ପାର୍‌ତନା ୱେନିଜି ତାନିଙ୍ଗ୍ ଗାର୍ବୁଦୁ ଆନି ସାକ୍ତି ସିତାନ୍ । 23 ଆବେଟ୍ ୱାଦ୍ ଗାର୍ବୁଦୁ ଆଜି କଡ଼ ଜନମ୍‌ କିଜି ଇର୍ହାତ୍, "ମାପୁରୁ ଇଲେଇ ନା ଅପମାନ୍‌ ଆକ କିତାନ୍‌ ।" 24 ଆଦେଙ୍ଗ୍‌ ୱାଦ୍‌ ୱାନି ଦରୁ *ଜୋସେପ୍ ସିଜି, ଇର୍ହାନ୍‌, "ପ୍ରବୁ ନାଙ୍ଗିଁ ମାରି ଅରେନ୍ କଡ଼ ସିପିନ୍ ।"

25 ମାରି ରାହେଲ ମାଡ଼ାନ୍ ଜୋସେପ୍ ଜନମ୍‌ ଆତି ୱେନେକା ଜାକୁବ ଲାବନତିଙ୍ଗ୍‌ ଇର୍ହାନ୍‌, "ନାଙ୍ଗିଁ ପୋକ୍‌ଆ, ନାନୁ ନିଜେ ବାଡିଦୁ ମାରି ନିଜେଦି ଦେସ୍‍ତୁ ସନା । 26 ନାନୁ ଏମେୱାରି ଉଣ୍ତିଙ୍ଗ୍ ନି ଗତିପାଣି କିତାମାନା, ନା ଆୟା ଆଇମେକାଙ୍ଗ୍‌ ମାରି କଡ଼ରିଙ୍ଗ୍ ଆଇଲିକାଙ୍ଗ୍ ଅତେଙ୍ଗ୍‌ ସାରି ସିଦା; ଏଣ୍ତେସ୍ ୱାଜା ନାନୁ ନି ଗତିପାଣି କିତାମାନା, ଆକା ନିନୁ ନେସ୍‌ନି ।"

27 ନାସ୍ତିୱାଲେ ଲାବନ ତାନିଙ୍ଗ୍ ଇର୍ହାନ୍‌, "ମାଡ଼ିସ୍‌ କିଜିନା, ନିନୁ ନା ଉଣ୍ତିଙ୍ଗ୍ ଦୟା କିଆ, ମାତର ନି ଉଣ୍ତିଙ୍ଗ୍‌ ପ୍ରବୁ ନାଙ୍ଗିଁ ଆର୍ସିବାଦ୍‌ କିତାମାନାନ୍‌, ଇକା ନାନୁ ଲେକିସ୍‍ କିଜି ନେସ୍‍ସ୍ତାମାନା । 28 ଇଲେଇ ନିନୁ ନିଜେଦି କୁଲି ୱେର୍‌ଆ, ନାନୁ ଆକା ନିଙ୍ଗିଁ ସିନା ।"

29 ଆବେଟ୍ ଜାକୁବ ୱାନିଙ୍ଗ୍ ଇର୍ହାନ୍‌, "ନାନୁ ନିମାନୁ ଏଣ୍ତେସ୍‌ ୱାଜା ଗତିପାଣି କିତାମାନା ମାରି ନା ଲାକୁତୁ ମି ଡ଼ାକୁକଡିଙ୍ଗ୍‌ ଏଣ୍ତେସ୍ ମାନେ, ଆକା ନିନୁ ନେସ୍‌ତିମାନି । 30 ଇରିଙ୍ଗ୍‌ ନାନୁ ୱାନି ଆଗିଡ଼ିନେ ନିଦି ଉଣା ଦନ୍‌ ମାର୍ହାତ୍‌, ମାତର୍‌ ଇଲେଇ ନାଣ୍ତ ଆତାମାନାତ୍‌; ମାରି ନାନୁ ଏମେ ଜାଗାଦୁ ନି ମେଣ୍ତେଙ୍ଗ୍‌ ମାନ୍ଧା ସାରାକିଦେଙ୍ଗ୍‌ ଅତା ସଦାପ୍ରବୁ ନି ଆର୍ସିବାଦ୍‌ କିତାମାନାନ୍; ମାତର୍‌ ନାନୁ ନିଜେଦି ପରିବାର୍ ଉଣ୍ତିଙ୍ଗ୍ ଏସାଙ୍ଗ୍ ଉଣ୍ତାକିନା ?"

31 ଆବେଟ୍‌ ଲାବନ ଇର୍ହାନ୍‌, "ନାନୁ ନିଙ୍ଗିଁ ଇନିକା ସିନା ?" ଜାକୁବ ଇର୍ହାନ୍‌, "ନିନୁ ଇନିକା ସିଦେଙ୍ଗ୍‌ ପଡ଼ାଏତ୍; ଜଦି ନିନୁ ନା ଉଣ୍ତିଙ୍ଗ୍ ଉଣ୍ତ୍ରି ପାଣି କିନି, ଆର୍‌ତିଙ୍ଗ୍‌ ନାନୁ ନି ଡ଼ାକାଙ୍ଗ୍ ମାରିଡ଼େସି ସାରାକିଜି ସେବା କିନା । 32 ନେରୁ ନାନୁ ନି ୱିଜୁ ମାନ୍ଦା ଲୋଇ ସଲ୍‌ସି ମେଣ୍ତେଙ୍ଗାଁ ଲୋଇରାନ୍‌ କାବ୍ରାସିତ୍ରା ନି ସିନା ନେସ୍‌ନିକା ମାରି କାରିନି ମେଣ୍ତେଆଙ୍ଗ୍, ମାରି, ଗୋରିଆପିଲେକା ଲୋଇରାନ୍‌ ସିନା ନେସ୍‌ନିକା ମାରି କାବ୍ରାସିତ୍ରା ଗୋରିଆପିଲେକ୍‌ ୱେରେଏ କିନା; ଆୟାୱିଜୁ ନା କୁଲି ଡାବୁଙ୍ଗୁଁ ୱାଜା ଆନେ । 33 ଆୟାମାଡ଼ାନ୍ ଏସ୍ତିୱାଲେ ମି ଆଗିଡ଼ି ନା କୁଲି ବିସୟ୍‌ ଇଗା ୱାନାତ୍‌, ନାସ୍ତିୱାଲେ ନା ଦାର୍ମୁମାଟା ନା ବିସୟ୍‌ତାନ୍‌ ସାକି ସିନାତ୍, ଆର୍ତାତ୍, ଗୋରିଏଙ୍ଗ୍‌ ଲୋଇରାନ୍‌ କାବ୍ରାସିତ୍ରା ମାରି ସିନା ନେସ୍‌ନି ଗୋରିଏଙ୍ଗ୍‌ ୱେରେଏ ମାରି ମେଣ୍ତେଙ୍ଗା ଲୋଇରାନ୍‌ କାର୍‌ନି କଲର୍‌ତି ମେଣ୍ତେଙ୍ଗ୍‌ ୱେରେଏ ଏସୋ ମାନେ, ଆକା ନା ଆଗିଡ଼ି ଲେକିସ୍ କିଆୟ୍‌ ଆନେ ।"

34 ଆବେଟ୍ ଲାବନ ଇର୍ହାନ୍‌, "ନେଗେନ୍‌, ନି ମାଟା ଇସାପ୍‍ତାନ୍‍ ଆପିତ୍ ।" 35 ତାନିୱେନେକା ୱାନ୍ ଆୟାନାଣ୍ତିଙ୍ଗ୍‌ ବାନାମାନିକା ମାରି ସିନା ନେସ୍‌ନି ଗୋରିଏଙ୍ଗ୍‌ ୱିଜୁ ମାରି କାବ୍ରାସିତ୍ରା ମାରି ସିନା ନେସ୍‌ନିକେଙ୍ଗ୍‌ ବା ଅଡ଼ିନି ତାଡ଼ି ଗୋରିଏଙ୍ଗ୍‌ ୱିଜୁ, ମାରି, କାରିନି ମେଣ୍ତେଙ୍ଗ୍ ୱିଜୁ ୱେରେଏ ୱେରେଏ କିଜି ନିଜେଦି ମାରିନ୍‌କା କିୟୁଦୁ ସର୍ପେକିତାନ୍‌; 36 ମାରି ୱାନ୍ ନିଜେଦି ମାରି ଜାକୁବଦି ମାଡ଼ାନ୍ ମୁନେଟି ସାରିଦାନ୍‌ ଆକ କିଜି ଇଟ୍‍ତାନ୍; ମାରି ଜାକୁବ ଲାବନଦି ୱିଜୁ ଡ଼ାକୁ ମାନ୍ଦା ସାରାକିଦେଙ୍ଗ୍ ଆସ୍‌ତାନ୍‌ । 37 ମାରି ଜାକୁବ ଲିବନୀ ମାରି ଲୁସ୍ ମାରି ଅର୍ମୋନ୍‌ ମାରାତି ପୁନି କମା କାତ୍‍ସି ଆବେଣି ପାଡ଼ି ରେକ୍‌ସି ୱେରୁଗିଦି ଅଡ଼ିନି ମୁଜ୍‌ ସପ୍‍ତାନ୍ । 38 ତାନିୱେନେକା ଏମେ ବାଡିଦୁ ଜାତୁ ମାନ୍ଦା ଏରୁ ଉଣି ଉଣ୍ତିଙ୍ଗ୍‌ ୱାନେ, ଆୟା ବାଡିଦୁ ୱାନିକା ଆଗିଡ଼ିରି ଏରୁକୁଣ୍ତି ଲୋଇ ଆୟା ପାଡ଼ିସିଲି କମେଙ୍ଗ୍‌ ୱିଜୁ ମୁସ୍‌କୁ କିଜି ଇଟ୍‍ତାନ୍‌; ଆବେଟ୍ ଏରୁ ଉଣି ବେଡ଼ାଦୁ ଆୟାକେଙ୍ଗ୍‌ ଗାର୍ବୁନୁ ଆତେ । 39 ମାରି ଆୟା କମେଙ୍ଗ୍‌ ଲାକୁତୁ ୱାକ୍ ଉଣ୍ତାତିମାଡ଼ାନ୍‌ ଡ଼ାକ୍‌କଡିଙ୍ଗ୍‌ ବାନା ମାରି କାବ୍ରାସିତ୍ରା ମାରି ସିନା ନେସ୍‌ନି ପିଲେକ୍ ପୋକ୍‌ତେ ।

40 ଆବେଟ୍ ଜାକୁବ ଆୟା ପିଲେକାଙ୍ଗ୍ ୱେରେଏ ୱେରେଏ କିତାନ୍, ମାରି ଲାବନତି ସିନାକିତି କାର୍‍ନି ୱାନିକାଙ୍ଗ୍ ୱିଜୁ ମେଣ୍ତେଙ୍ଗ୍‌ ଉଣ୍ତିଙ୍ଗ୍ ମେଣ୍ତାଆଙ୍ଗ୍ ସୁଡ଼ୁଦେଙ୍ଗ୍‌ ଇଟ୍‌ତାନ୍; ଇୟାୱାଜା ୱାନ୍ ଲାବନତି ମେଣ୍ତାମାନ୍ଦା ୱାଲେ ନିଜେଦି ମେଣ୍ତେଙ୍ଗ୍ ଇଡ୍‌ଏଜି ୱେରେଏ କିତାନ୍ । 41 ମାରି ସାକ୍ତିଦି ଜାତୁଙ୍ଗ୍‌ ଏଣ୍ତେସ୍ କମା ଲାକୁତୁ ଗାର୍ବୁନ୍‌ ଆନେ, ଇୟା ଉଣ୍ତିଙ୍ଗ୍ ଏରୁ କୁଣ୍ତି ଲୋଇ ଡ଼ାକା ଆଗିଡ଼ି ଆୟା କମା ଜାକୁବ ଇଟ୍‍ତାନ୍; ମାତର୍‌ ସାକିସିଲି ଡ଼ାକୁ ଆଗିଡ଼ି ଇଡ଼୍‍ଏତାନ୍; 42 ଆବେନୁ ସାକିସିଲିକେଙ୍ଗ୍‌ ପସାକିନି ଜାତୁଙ୍ଗ୍‌ ଲାବନୱି ମାରି ମୋଟାରଟାଦିକେଙ୍ଗ୍‌ ପସାକିନି ଜାତୁଙ୍ଗ୍‌ ଜାକୁବୱି ଆତେ । 43 ଇୟାଉଣ୍ତିଙ୍ଗ୍‌ ଜାକୁବ ନାଣ୍ତ ପେରାତାନ୍, ମାରି ୱାନି ପସା କିନି ଜାତୁଙ୍ଗ୍‌, ସାକର୍‍ଙ୍ଗୁଁ, ଉଟ୍‌ ମାରି ଗଦଙ୍ଗ୍ ନାଣ୍ତ ଆତେ ।