1 ଆୟା ଗଟ୍‌ନା ୱେନେକା ଦର୍ସନ୍‌ତାନ୍‌ ପ୍ରବୁଦି କାବୁର୍‌ ଅବ୍ରାମଦି ଲାକୁତୁ ଇଗାୱାତାତ୍, "ଏ ଅବ୍ରାମ, ତିଲାମା, ନାନୁ ନି ସାକା ମାରି ପେରି ପୁରସ୍କାର୍‌ ୱାଜା ।"

2 ଆବେଟ୍‍କୁ ଅବ୍ରାମ ଇର୍ହାନ୍‌, "ଏ ପ୍ରବୁ, ନିନୁ ନାଙ୍ଗିଁ ଇନିକା ସିନି ? ନାନୁ ତ କଡ଼କକ୍‌ରା ଆଏଣ୍ତା ଜିଜିନା, ମାରି ଦମ୍ମେସକିୟ ଇଲିୟେଜର ନା, ଇଲୁଦି ଅଦିକାରି ମାନାନ୍‌ ।" 3 ମାରି, ଅବ୍ରାମ ଇର୍ହାନ୍‌, "ସୁଡ଼ୁଆ, ନିନୁ ନାଙ୍ଗିଁ କଡ଼ ସିଇତି, ଇଲେ ନା ଇନ୍‌ଡ୍ରଣି ସାକର୍‌ ନା ଅଦିକାରି ଆନାନ୍‌ ।"

4 ନାସ୍ତିୱାଲେ ୱାନି ଉଣ୍ତିଙ୍ଗ୍‌ ପ୍ରବୁଦି ଇୟା ବାକ୍ୟ ୱାତାତ୍, "ସୁଡ଼ୁଆ, ଆୟା ଲୋକୁ ନି ଅଦିକାରି ଆଏନ୍‌; ମାତର୍‌ ଏନ୍‌ ନି ମାଡ଼ାନ୍‌କୁ ଜନମ୍‌ ଆନାନ୍, ୱାନ୍ ମି ଅଦିକାରି ଆନାନ୍ ।" 5 ତାନିୱେନେକା ମାପୁରୁ ୱାନିଙ୍ଗ୍‌ ଆତ୍ରେ ତାସି ଇର୍ହାନ୍‌, "ନିନୁ ବାଦଡ଼ଦୁ ସୁଡ଼ିଜି ଏସାଙ୍ଗ୍ ସୁକେଙ୍ଗା ଲେକିସ୍‍ କିଦେଙ୍ଗ୍‌ ଆଟିନି, ଆର୍‌ତିଙ୍ଗ୍‌ ଲେକିସ୍ କିଆ ।" ୱାନ୍ ମାରି ଇର୍ହାନ୍‌, "ଇୟାୱାଜା ମି କୁଟୁମ୍‌ ଆନାତ୍ ।"

6 ନାସ୍ତିୱାଲେ ଅବ୍ରାମ ସଦାପ୍ରବୁମାନୁ ବିସ୍‍ବାସ୍ କିତିମାନିଙ୍ଗ୍‌, ପ୍ରବୁ ଅବ୍ରାମତିଙ୍ଗ୍‌ ଦାର୍ମୁଦିକାନ୍‌ ଇଜି ଲେକିସ୍‌ତାନ୍‌ ।

7 ତାନିୱେନ୍‍କା ପ୍ରବୁ ୱାନିଙ୍ଗ୍ ଇର୍ହାନ୍‌, "ଏନ୍‌ ମି ଅଦିକାର୍ ଉଣ୍ତିଙ୍ଗ୍ ଇୟା ଦେସ୍ ସିନିଉଣ୍ତିଙ୍ଗ୍ କଲଦିୟରିଙ୍ଗ୍ ଊର ଦାନ୍‌ ତାତାନ୍, ଆୟା ସଦାପ୍ରବୁ ମାପୁ ।"

8 ଆବେଟ୍ ଅବ୍ରାମ ଇର୍ହାନ୍‌, "ଏ ପ୍ରବୁ, ନାନୁ ଜେ ଇୟା ଦେସ୍‍ଦି ଅଦିକାରି ଆନା, ଆକା ଏଣ୍ତେସ୍ ନେସ୍‍ନା ?"

9 ପ୍ରବୁ ଇର୍ହାନ୍‌, "ନିନୁ ତିନି ବାର୍ସେକ୍‌ତି ଉଣ୍ତ୍ରି କୁରାକଡି ମାରି ତିନି ବାର୍ସେକ୍‌ତି ଉଣ୍ତ୍ରି ଗରିଆ ମାରି ତିନି ବାର୍ସେକ୍‌ତି ଉଣ୍ତ୍ରି ମେଣ୍ତା ମାରି ଉଣ୍ତ୍ରି ଗୁଗୁରାମ୍ ମାରି ପାଉରାପିଲା ନା ଲାକୁତୁ ତାଗା ।" 10 ଆବେଟ୍‍କୁ ୱାନ୍ ୱାନି ଲାକୁତୁ ତାସି ରୁଣ୍ତି ମକେଙ୍ଗ୍‌ କିଜି ମକା ଆଗିଡ଼ି ଆଇ ମକା ଇଟ୍‍ତାନ୍; ମାତର୍‌ ପଟିଆଙ୍ଗ୍‌ଁ ରୁଣ୍ତି ମକେଙ୍ଗ୍‌ କିଏତାନ୍ 11 ତାନିୱେନେକା ପେରି ଡେଗେଙ୍ଗ୍‌ ଆୟା ସାତି ମାଡ଼ା ମୁସୁକୁ ବାସ୍‍ତେ, ଅବ୍ରାମ ୱାନିକାଙ୍ଗ୍‌ ପେରିତାନ୍‌ ।

12 ମାରି, ୱେଡ଼ା ଆର୍‌ନିୱାଲେ ଅବ୍ରାମ ବେସି ସୁଜ୍‌ଜି ନାଣ୍ତ ସିକାଟିଦୁ ତିୟେଲ୍‌ ଆତାନ୍ । 13 ନାସ୍ତିୱାଲେ ପ୍ରବୁ ଅବ୍ରାମତିଙ୍ଗ୍ ଇର୍ହାନ୍‌, "ମି କଡ଼ରିଙ୍ଗ୍ ଚାରିସ ବାର୍ସେକ୍‌ ଆଇ ଦେସ୍‍ଦୁ ଲୋକ୍‌ ଆଜି ସାକର୍‌ପାଣି କିଜି କାସ୍ଟୁ ପୋଇନାର୍; ଇକା ସତେନେ ନେସ୍‍ନି; 14 ମାତର୍‌ ୱାର୍ ଏମେ ଜାତିତି ଲୋକା ସାକର୍ ପାଣିକିନାର୍, ନାନୁ ୱାରିଙ୍ଗ୍ ବିସାର୍ କିନା; ଆବେଟ୍‍କୁ ୱାର୍ ନାଣ୍ତ ଦନ୍ ଆସ୍‌ସି ଆୟା ଦେସ୍‍ଦାନ୍‌ ସସିୱାନାର୍ । 15 ମାତର୍‌ ନିନୁ ୱେଡ଼ିକାଦାନ୍ ନିଜେଦି ଡକରାଦାଦାରି ଲାକୁତୁ ସନି ମାରି ନେଗି ଡକ୍ରା କାଡ଼ାଦୁ ସାଜି ମୁସାନି । 16 ମାରି ମି କୁଟୁମ୍‌ତି ନାଲ୍‌ଗି ସାନ୍ଦିଦି କୁଡ଼ାଦି ଲୋକୁ ଇୟା ଦେସ୍‍ତୁ ଡ଼େସି ୱାନାର୍‌; ଏଣ୍ତେସ୍ ଇମୋରିୟ ଲୋକା ପାପ୍ ଇୟାସାନ୍ଦି ପୁରା ଆଏଦେ ।"

17 ମାରି ଆବେଟ୍ ୱେଡ଼ା ସନିୱାଲେ ମାରି ସିକାଟି ଆତାତ୍, ସୁଡ଼ୁଦୁ, ଉଡ୍ରି ଗୟ୍‌ ସସିମାନି ବାଟି ମାରି ସିସୁ ଡ଼ିବୁକୁ କାସ୍‌ନିକା ତରିତାତ୍‌ ମାରି ଆକା ଆୟା ଜାତୁଆଙ୍ଗାଁ ନାଡ଼ିମି ସିଜି ସର୍ହାତ୍‌ । 18 ମାରି ଆୟା ନାଣ୍ତିଙ୍ଗ୍‌ ମାପୁରୁ ଅବ୍ରାମଦି ୱାଲେ ତିର୍‌ କିଜି ଇର୍ହାନ୍‌, "ନାନୁ ଇୟା ମିସରଦି ଗାଡାଦାନ୍ ପରାତ୍ ଦରୁଦି ପେରିଗାଡା ସାନ୍ଦି ଇୟା ଦେସ୍ ମି କୁଟୁମୁଦିଙ୍ଗ୍ ସିତାପ୍, 19 ଇୟାତାନି ୱାଲେ କେନିୟ, ମାରି କନଜିୟ, ମାରି କଦ୍‍ମୋନିୟ 20 ମାରି ହିତିୟ ମାରି ପରିସିୟ ମାରି ରପାୟିୟ 21 ମାରି ଇମୋରିୟ ମାରି କିଣାନିୟ ମାରି ଗିର୍ଗାସିୟ ମାରି ଜିବୁସିୟରି ଦେସ୍ ସିତାପ୍ ।"