1 ତାନିୱେନେକା ମାପୁରୁ ଅବ୍ରାମତିଙ୍ଗ୍‌ ଇର୍ହାନ୍‌, ନିନୁ ନିଜେଦି ଦେସ୍ ମାରି ନିଜେଦି କୁଟୁମ୍‌ ମାରି ନିଜେଦି ଇଲୁ ଡ଼ିସ୍‍ସି, ନାନୁ ଏମେ ଦେସ୍ ନିଙ୍ଗିଁ ତୋର୍‍ନା ଆୟା ଦେସ୍‍ତୁ ସାଙ୍ଗ୍‍ଆ 2 ମାପୁ ମି ମାଡ଼ାନ୍‌କୁ ଉଣ୍ତ୍ରି ପେରି କୁଟୁମ୍‌ କିନିକା, ମାରି ନାନୁ ନିଙ୍ଗିଁ ଆର୍ସିବାଦ୍‌ କିଜି ମି ଦରୁ ପେରିକା କିନା; ନିନୁ ଆର୍ସିବାଦ୍‌ଦି ଆନି ।

3 ଏମେକାର୍ ନିଙ୍ଗିଁ ଆର୍ସିବାଦ୍‌ କିନାର୍ । ମାଡୁ ୱାରିଙ୍ଗ୍‌ ଆର୍ସିବାଦ୍‌ କିନାଟ୍‌;

ମାରି ଏମେକାର୍ ନିଙ୍ଗିଁ ଆନାଦୁରିଆ ସିନାର୍, ମାଡୁ ୱାନିଙ୍ଗ୍ ଆନାଦୁରିଆ ସିନାଟ୍‌;

ମାରି ମି ମାଡ଼ାନ୍‌କୁ ଦୁନିଆଦି ୱିଜୁ କୁଟୁମ୍‌ତିଙ୍ଗ୍‌ ଆର୍ସିବାଦ୍‌ କିନାଟ୍‌ ।

4 ଅବ୍ରାମ ମାପୁରୁଦି ଇୟା ମାଟା ଇସାପ୍‍ତାନ୍ ସର୍ହାନ୍, ମାରି ଲୋଟ ୱାନି ୱାଲେ ସର୍ହାନ୍‌; ହାରଣଦି ମାଡ଼ାନ୍ ସନିୱାଲେ ଅବ୍ରାମଦିଙ୍ଗ୍‌ ବୟସ୍ ସତୁରି ପାଞ୍ଚ୍‌ ବାର୍ସୁ ଆତାମାର୍ହାତ୍‍ । 5 ଇୟାୱାଜା ଅବ୍ରାମ ନିଜେଦି ଆଡ଼ି ସାରିଙ୍ଗ୍‌ ମାରି ତୋଡ଼ାନ୍‌ତି ମାରିସି ଲୋଟଙ୍ଗ୍‌ ମାରି ହାରଣଦୁ ନିଜେଦି ଉଣ୍ତାକିତି ଦନ୍‍ସମ୍ପତି ମାରି ପୟ୍‌ତି ଜାତୁଆଙ୍ଗାଁ ଅସି କିଣାନ୍ ଦେସ୍‍ତୁ ସୋଲ୍‌ସି କିଣାନ୍‌ତୁ ଇତାର୍‌ । 6 ଅବ୍ରାହାମ ଆୟା ଦେସ୍ ସିଜି ସଲୁପୁ ସଲୁପୁ ସିକିମ୍‌ ଲାକୁତୁ ମୋରିଦି ଅଲୋନ ମାରାନ୍‌ ମଦରୁ ଇଗାସର୍ହାନ୍ । ଆୟା ବେଡ଼ାଦୁ କିଣାନିୟ ଲୋକୁ ଆୟା ଦେସ୍‍ଦୁ ବାସା କିଜିମାର୍ହାର୍ । 7 ମାପୁରୁ ଅବ୍ରାହାମତିଙ୍ଗ୍‌ ତରାଜି ଇର୍ହାନ୍‌, ନାନୁ ମି କୁଟୁମୁଦିଙ୍ଗ୍ ଇୟା ଦେସ୍ ସିନା; ଇୟା ଉଣ୍ତିଙ୍ଗ୍ ଅବ୍ରାମ ନିଜେଦି ଲାକୁତୁ ତରାତି ମାପୁରୁଦି ଆଦେସ୍‍ତାନ୍ ଆୟା ଜାଗାଦୁ ପୁଜାବେଦି ତିଆର୍ କିତାନ୍ । 8 ତାନିୱେନେକା ୱାନ୍‌ ଆୟା ଜାଗା ଡ଼ିସ୍‌ସି ବେତେଲଦି ଆଗିଡ଼ି ତରିଟି ଗୋରନ୍‌ତୁ ସଲିସି ନିଜେଦି ଗୁଡ଼ା ତିଆର୍‌ କିତାନ୍‌; ଆବେଟ୍‍କୁ ୱେଡ଼ାଆର୍‌ନି ତୋରିନ୍‌ ବେତେଲ ମାରି ୱେଡ଼ାସନି ତୋରିନ୍‌ ଅୟ ଗାଡ଼୍‌ ମାର୍ହାତ୍‌; ମାରି, ଆୟାମାଡ଼ାନ୍ ମାପୁରୁଦି ଉଦେସ୍‍ତାନ୍‌ ଉଣ୍ତ୍ରି ପୁଜାବେଦି ତିଆର୍ କିଜି ମାପୁରୁଦି ଦରୁତାନ୍ ପାର୍‌ତନା କିତାନ୍‌ । 9 ତାନିୱେନ୍‌କା ଅବ୍ରାମ୍ ବୁଲାବୁ ବୁଲାବୁ ମାରି ଉଣେରି ତରିନ୍‌ ସର୍ହାନ୍‌ ।

10 ଆୟା ବେଡ଼ାଦୁ ଆୟା ଦେସ୍‍ତୁ ଉଣିତିନିକା ପୁଟ୍‌ଏତାତ୍‌ଆକା ଅବ୍ରାମ୍ ମିସର୍ ଦେସ୍‍ତୁ ତେବାଦେଙ୍ଗ୍‌ ସର୍ହାନ୍; ଏଣ୍ତେସ୍‌କି ଦେସ୍‍ତୁ ନାଣ୍ତ ଉଣିତିନିକା ପୁଟ୍‌ଏତାତ୍‌ । 11 ତାନିୱେନେକା ମିସର ଦେସ୍‍ତୁ ସନି ଉଣ୍ତିଙ୍ଗ୍‌ ବଦା କିତାନ୍, ଅବ୍ରାମ ନିଜେଦି ଆଡ଼ିଙ୍ଗ୍‌ ସାରିଙ୍ଗ୍ ଇର୍ହାନ୍‌, "ୱେନ୍‌ଆ, ନିନୁ ସୁଣୁଦେଙ୍ଗ୍ ସୁନ୍ଦର୍, ଆକା ନାନୁ ନେସ୍‍ନା । 12 ଇୟାଉଣ୍ତିଙ୍ଗ୍‌ ମିସର୍ ଦେସ୍‍ତି ଲୋକୁ ନିଙ୍ଗିଁ ସୁଡ଼ୁଜି ନା ଆଡ଼ି ଇଜି ନେସ୍‍ତିଙ୍ଗ୍‍, ନାଙ୍ଗିଁ ସାପିସ୍ କିଜି ନିଙ୍ଗିଁ ଜିବନ୍‌ ଇଡ୍‌ନାର୍‌ । 13 ଇୟାଉଣ୍ତିଙ୍ଗ୍‌ ନାନୁ ଅନୁରଦ୍ କିଜିନା, ନିନୁ ନା ତାଙ୍ଗିଁ, ଇକା ଇନି; ଆବେଟ୍‍ତାନ୍ ନି ଉଣ୍ତିଙ୍ଗ୍‌ ନାନ୍‌ ନେଗେନ୍‌ ଆନାତ୍ ମାରି ନି ଉଣ୍ତିଙ୍ଗ୍‌ ନା ଜିବନ୍‌ ରକିଆ ପୋଇନାତ୍‌ ।" 14 ତାନିୱେନେକା ଅବ୍ରାମ ମିସର ଦେସ୍‍ତୁ ସର୍ହାନ୍‌, ମିସରତି ଲୋକୁ ୱାନି ଆଡ଼ିଦିଙ୍ଗ୍‍ ନାଣ୍ତ ସୁନ୍ଦିରି ସୁଡ଼ୁତାର୍‌ । 15 ମାରି, ପାରଦି ନେତାର୍‌ ତାନିଙ୍ଗ୍ ସୁଡ଼ୁଜି ପାରଦି ଲାକ୍‌ତୁ ତାନି ବିସୟ୍‌ତାନ୍‌ ୱେର୍‌ତାର୍, ଆୟା ଆଇମାଦିଙ୍ଗ୍‍ ପାରଦି ଇନ୍‌ଡ୍ର ତାତାର୍ । 16 ପାର ତାନି ଉଣ୍ତିଙ୍ଗ୍‌ ଅବ୍ରାମତିଙ୍ଗ୍‌ ସନମାନ୍ କିଜି ୱାନିଙ୍ଗ୍ ମେଣ୍ତା, ଡ଼ାକୁ, ଗଦ ମାରି ସାକର୍‍ଙ୍ଗୁ ମାରି ତାଡ଼ିଗଦଙ୍ଗ୍‌ ନି ଉଟ୍‌କୁ ସିତାନ୍ ।

17 ମାତର୍‌ ଅବ୍ରାମଦି ଆଡ଼ି ସାରିଦି ଉଣ୍ତିଙ୍ଗ୍‌ ସଦାପ୍ରବୁ ପାର ମାରି ୱାରି ଇଲୁଦି ମୁସୁକୁ ପେରି ବେମାର୍‌ ଗଟେକିତାନ୍ । 18 ଇୟାଉଣ୍ତିଙ୍ଗ୍‌ ପାର ଅବ୍ରାମତିଙ୍ଗ୍ କୁକ୍‌ସି ଇର୍ହାନ୍‌, "ନିନୁ ମା ୱାଲେ ଇକା ଇନିକା ବେବହାର୍ କିତି ? 19 ଆୟା ଆଇମା ମି ଆଡ଼ି, ଇୟା ମାଟା ନାଙ୍ଗିଁ ଏନ୍ଦା ଇନ୍‍ଏତି ? ତାନିଙ୍ଗ୍ ଏନ୍ଦା ନିଜେଦି ତାଙ୍ଗିଁ ଇଜି ଇର୍ହି ? ଆବେଟ୍‍ ନାନୁ ତାନିଙ୍ଗ୍ ପେଡ଼ି ଆଦେଙ୍ଗ୍ ଅତା; ଇଲେଇ ନି ଆଡ଼ିଙ୍ଗ୍‍ ସୁଡ଼ୁଆ, ତାନିଙ୍ଗ୍ ଆସ୍‌ସୋ ସାଙ୍ଗ୍‍ଆ ।" 20 ଆବେଟ୍‌ ପାର ଲୋକାଙ୍ଗ୍‌ ଅବ୍ରାମତି ବିସୟ୍‌ତାନ୍‌ ଇର୍ହାନ୍‌, ମାରି ୱାର୍ ୱିଜେରି ୱାଲେ ଅବ୍ରାମ ନି ୱାନି ଆଡ଼ିଙ୍ଗ୍‍ ପେରିତାର୍‌ ।