1 ଆୟା ୱିଜୁ ଗଟ୍‌ନା ୱେନେକା ଏନ୍‌ ଅରେନ୍‌ ଜୋସେପ୍‍ତିଙ୍ଗ୍‌ କାବୁର୍ ସିଜି ଇର୍ହାନ୍‌, "ସୁଡ଼ୁଆ, ମି ବୁବା ନୋବ୍‌ ଆତାମାନାନ୍‌," ଆବେଟ୍‌ ୱାନ୍ ନିଜେଦି ରିଏର୍ ମାରିସିରିଙ୍ଗ୍ ମନଃସି ମାରି ଇପ୍ରୟିମ୍‍ତିଙ୍ଗ୍‌ ଅର୍‌ସେ ଅସି ସର୍ହାନ୍‌ । 2 ନାସ୍ତିୱାଲେ ଏନ୍‌ ଅରେନ୍‌ ଜାକୁବଙ୍ଗ୍ ଇର୍ହାନ୍‌, "ସୁଡ଼ୁଆ, ନି ମାରିନ୍‌ ଜୋସେପ୍‌ ନି ଲାକୁତୁ ୱାତାମାନାନ୍," ଆବେଟ୍ ଜାକୁବ ନିଜେଦିଙ୍ଗ୍ ସାକ୍ତି କିଜି ଟାଟିଦୁ ନିଙ୍ଗିଁଜି ବାସାତାନ୍ । 3 ଆବେଟ୍‍କୁ ଜାକୁବ ଜୋସେପ୍‌ତିଙ୍ଗ୍ ଇର୍ହାନ୍‌, "କିଣାନ୍ ଦେସ୍‍ତୁ ଲୁସ୍ ଦରୁଦି ବାଡିଦୁ ସର୍ବସକ୍ତିମାନ୍ ମାପୁରୁ ନାଙ୍ଗିଁ ବର୍‌ ସିଜି ଆର୍ସିବାଦ୍‌ କିଜି ଇକା ଇର୍ହାମାର୍ହାନ୍, 4 ସୁଡ଼ୁଆ, ନାନୁ ନିଙ୍ଗିଁ ବେଲି ମାରି ନାଣ୍ତ କୁଟୁମ୍‌ କିନାପ୍ ମାରି ନି ମାଡ଼ାନ୍ ଆଇ ଆଇ ନାଣ୍ତ ଲୋକୁ ଜନମ୍‌ କିନାପ୍, ମାରି, ନି ୱାନିଦିନ୍‌ତି କୁଟୁମ୍‌ତିଙ୍ଗ୍‌ ୱିଜୁଦିନ୍‌ତି ଅଦିକାର୍ ଉଣ୍ତିଙ୍ଗ୍ ଇୟା ଦେସ୍ ସିନାପ୍ ।"

5 ଜାକୁବ ମାରି ଇର୍ହାନ୍‌, ଇୟାଉଣ୍ତିଙ୍ଗ୍ ମିସର ଦେସ୍‍ତୁ ମି ଲାକୁତୁ ନା ୱାନି ଆଗିଡ଼ି ନି ଏମେ ରିଏର୍ କଡ଼ର୍ ମିସର ଦେସ୍‍ତୁ ଜନମ୍‌ ଆତାମାର୍ହାର୍‌, ୱାର୍ ନାୱାର୍ ଆନାର୍; ରୁବେନ୍ ମାରି ସିମିୟୋନ୍ ୱାଜା ଇପ୍ରୟିମ୍ ମାରି ମନଃସି ନାୱାର୍ ଆନାର୍ । 6 ଜଦି ଇୟାୱେରି ୱେନେକା ନି ଏମେ କଡ଼ର୍‌ ଜନମ୍‌ ଆନାର୍, ୱାର୍ ମିୱାର୍ ଆନାର୍ ମାରି ପେରି ତୋଡ଼ାନ୍‍କା ଦରୁଦାନ୍ ନିଜେ ନିଜେ ଅଦିକାର୍‌ଦୁ ୱିଙ୍ଗିଁନାର୍‌ । 7 ପଦନ ଅରାମ ମାଡ଼ାନ୍ କିଣାନ୍ ଦେସ୍‍ତୁ ନା ୱାନି ବେଡ଼ାଦୁ ଇପ୍ରାତାଦୁ ଇନି ଅଲପ୍ ଆକ ମାନୁବୁ ମାନୁବୁ ରାହେଲ ସାରି ଲୋଇ ନା ଲାକୁତୁ ସାତାନ୍; ଆବେଟ୍ ନାନୁ ଆବେନୁ ଇପ୍ରାତାଦୁ, ଅର୍ତାତ୍, ବେତଲିହିମ୍‍ଦି ସନିସାରି ପାଡ଼ିଦୁ ତାନି ମାଡ଼ା ମୁସ୍‍ତାପ୍ ।

8 ତାନିୱେନେକା ଜାକୁବ ଜୋସେପ୍‌ତି କଡ଼ରିଙ୍ଗ୍ ସୁଡ଼ୁଜି ୱେନେବାତାନ୍, "ଇୟା କଡ଼ର୍‌ ଏରୁ ?" 9 ଆବେଟ୍ ଜୋସେପ୍‌ ବୁବେଙ୍ଗ୍ ଇର୍ହାନ୍‌, "ଇୟାକାର୍ ନା କଡ଼ର୍, ମାପୁରୁ ୱେରିଙ୍ଗ୍ ଇୟା ଦେସ୍‍ତୁ ନାଙ୍ଗିଁ ସିତାମାନାନ୍ ।" ଆର୍‌ତିଙ୍ଗ୍‌ ଜାକୁବ ଇର୍ହାନ୍‌, "ମାଡ଼ିସ୍‌ କିଜିନା, ଇୟାୱେରିଙ୍ଗ୍ ନା ଲାକୁତୁ ତାଗା, ନାନୁ ଇୟାୱେରିଙ୍ଗ୍ ଆର୍ସିବାଦ୍‌ କିନା ।" 10 ଆୟା ବେଡ଼ାଦୁ ଜାକୁବ ଡକରାମାର୍ହାନ୍ଆକା ସୁଣିକା ଉଣା ଆତେ ନେଗେନ୍‌ତାନ୍ ସୁଡ଼ୁଦେଙ୍ଗ୍ ଆଟ୍‍ଏତାନ୍‌ । ଆଦେଙ୍ଗ୍ ଜୋସେପ୍‌ ୱାନି ଲାକ୍‌ତୁ ତାତାନ୍‌ଆକା, ୱାନ୍ ପୋମିତାନ୍‌ ମାରି ନଣ୍ତିତାନ୍‌ । 11 ମାରି, ଜାକୁବ ଜୋସେପ୍‌ତିଙ୍ଗ୍ ଇର୍ହାନ୍‌, "ନାନୁ ଅଡ଼୍‌ବିତା ମାର୍ହା, ନି ମୋକମ୍‌ ମାରି ସୁଡ଼ୁଦେଙ୍ଗ୍ ଆଟ୍‍ଏନି; ମାତର୍‌ ସୁଡ଼ୁଆ, ମାପୁରୁ ନି କୁଟୁମ୍‌ତୁ ବା ନାଙ୍ଗିଁ ତୋରିସ୍‍ତାନ୍ ।" 12 ଆବେଟ୍ ଜୋସେପ୍‌ ବୁବାଦି ରୁଣ୍ତି କୁରୁଗୁ ମାଡ଼ାନ୍ ୱାରିଙ୍ଗ୍ ଅସି ନିଜେ ବୁମିଦୁ ମାଡ଼ିସ୍ କିତାନ୍‌ ।

13 ତାନିୱେନେକା ଜୋସେପ୍‌ ଆୟା ରିଏରିଙ୍ଗ୍ ଅସି ନିଜେଦି ଉଣି କିୟୁଦୁ ଇପ୍ରୟିମ୍‍ତିଙ୍ଗ୍ ଆସ୍‌ସି ଜାକୁବଦି ଡେବିରି ତୋରିଙ୍ଗ୍ ମାରି ଡେବିରି କିୟୁଦୁ ମନଃସିଙ୍ଗ୍‌ ଆସ୍‌ସି ଜାକୁବଦି ଉଣିତୋରିଙ୍ଗ୍ ଆସ୍ତା ନିଲ୍‌ପ୍‌ତାନ୍‌ । 14 ଆବେଟ୍ ଜାକୁବ ନିଜେଦି ଉଣି କିୟୁ ସାକ୍‍ସି ଇସ୍ରି କଡ଼ ଇପ୍ରୟିମ୍‍ତି ତାଲା ମୁସୁକୁ ଇଟ୍‍ତାନ୍, ମାରି, ମନଃସିଦି ତାଲା ମୁସୁକୁ ଡେବିରି କିୟୁ ଇଟ୍‍ତାନ୍, ୱାନ୍ ଅଡ଼୍‌ବିଜି ନିଜେଦି କିୟୁ ଇୟାୱାଜା ବୁଲାକିତାନ୍; ଇରିଙ୍ଗ୍‌ ମନସି ପେରିକଡ଼ ମାର୍ହାନ୍‌ । 15 ତାନିୱେନେକା ୱାନ୍ ଜୋସେପ୍‌ତିଙ୍ଗ୍ ଆର୍ସିବାଦ୍‌ କିଜି ଇର୍ହାନ୍‌,

"ଏମେ ମାପୁରୁଦି ଆଗିଡ଼ି ନା ପୁର୍ବେଦିଡକରାଦାଦା ଅବ୍ରାହାମ ମାରି ଇସ୍‍ହାକ୍ ସେବା କିଜିମାର୍ହାର୍‌,

ଏମେ ମାପୁରୁ ଜନମ୍‌ ନାଣ୍ତିରାନ୍ ନେରୁସାନ୍ଦି ନାଙ୍ଗିଁ ଜାତୁନ୍ ଅତାମାନାନ୍ ।

16 ଏମେ ଦୁତ୍ ୱିଜୁ ସନିଦାନ୍ ନାଙ୍ଗିଁ ମୁକ୍‌ଡ଼ା କିତାମାନାନ୍, ୱାନ୍ ଇୟା କଡ଼ରିଙ୍ଗ୍ ଆର୍ସିବାଦ୍‌ କିପିନ୍;

ଇୟାକାର୍ ନା ଦରୁଦାନ୍ ମାରି ନା ପୁର୍ବେଦିଡକରାଦାଦା ଅବ୍ରାହାମ୍‌ ମାରି ଇସ୍‍ହାକଦି ଦରୁତାନ୍ ୱିଙ୍ଗିଁପିର୍,

ମାରି, ଇୟାକାର୍ ଦେସ୍ ଲୋଇ ନାଣ୍ତ ଆଜି ପୁରା ଆପିର୍ ।"

17 ନାସ୍ତିୱାଲେ ଇପ୍ରୟିମ୍‍ତି ତାଲାଦୁ ବୁବାଦି ଉଣି କିୟୁ ସୁଡ଼ୁଜି ଜୋସେପ୍‌ ସାନ୍ତି ଆଏତାନ୍; ଇୟାଉଣ୍ତିଙ୍ଗ୍‌ ଇପ୍ରୟିତି ତାଲାଦାନ୍ ମନଃସିଦି ତାଲାଦୁ ଆକା ଇଡ୍‌ନି ଉଣ୍ତିଙ୍ଗ୍‌ ବୁବାଦି କିୟୁ ନିକିସ୍ 18 ଜୋସେପ୍‌ ଇର୍ହାନ୍‌, "ବୁବା, ଇୟାୱାଜା ସିଲେ, ଇୟାକାନ୍‌, ପେରିକଡ଼ ଇୟାୱେନି ତାଲାଦୁ ଉଣି କିୟୁ ଇଡ୍‌ଆ ।"

19 ମାତର୍‌ ୱାନି ବୁବା ରାଜିଆଏଜି ଇର୍ହାନ୍‌, "ମାରିନ୍‌; ଆକା ନାନୁ ନେସ୍‍ନା, ନାନୁ ନେସ୍‍ନା; ୱାନ୍ ବା ଉଣ୍ତ୍ରି କୁଟୁମ୍‌ ଆନାନ୍‌ ମାରି ୱାନ୍ ବା ପେରିକାନ୍ ଆନାନ୍; ମାତର୍‌ ୱାନି ଇସ୍ରି ତୋଡ଼ାନ୍‌ ୱାନି ମାଡ଼ାନ୍ ନାଣ୍ତ ପେରିକାନ୍‌ ଆନାନ୍ ମାରି ୱାନି କୁଟୁମ୍‌ ପେରି କୁଟୁମ୍‌ ଆନାତ୍ ।"

20 ଆୟା ନାଣ୍ତିଙ୍ଗ୍ ୱାନ୍ ୱାରିଙ୍ଗ୍ ଆର୍ସିବାଦ୍‌ କିଜି ଇର୍ହାନ୍‌, "ଇସ୍ରାଏଲ କୁଟୁମ୍‌ତିଙ୍ଗ୍‌ ଆର୍ସିବାଦ୍‌ କିନି ୱେଡ଼ାଦୁ ମି ଦରୁ ଆସ୍‌ସି ଇନାର୍‌, ମାପୁରୁ ମିଙ୍ଗିଁ ଇପ୍ରୟିମ୍ ମାରି ମନଃସି ୱାଜା କିପିନ୍‌ ।" ଇୟା ୱାଜା ଜାକୁବ ମନସି ମାଡ଼ାନ୍ ଇପ୍ରୟିମ୍‍ତିଙ୍ଗ୍ ଆଗିଡ଼ି କିତାନ୍‌ ।

21 ମାରି ଜାକୁବ ଜୋସେପ୍‌ତିଙ୍ଗ୍ ଇର୍ହାନ୍‌, "ସୁଡ଼ୁଆ, ନାନୁ ସାଜିନା; ମାତର୍‌ ମାପୁରୁ ନି ୱାଲେ ତେବାନାନ୍‌ ମାରି ନିଙ୍ଗିଁ ଡ଼େସି ପୁର୍ବେଦି ଡକରାଦାଦାରି ଦେସ୍‍ତୁ ଅସିସନାନ୍ । 22 ନାନୁ ନିଜେଦି କାଣ୍ତା ମାରି ଦନୁ ମାଡ଼ାନ୍ ଇମୋରିୟରି କିୟୁଦାନ୍ ଏମେ ବାଗ୍ ପୋଇତାମାନା, ନି ତୋଡ଼ାନ୍‍କା ମାଡ଼ାନ୍‌କୁ ଆୟା ନାଣ୍ତ ବାଗ୍ ନିଙ୍ଗିଁ ସିତା ।"