1 ଆୟା ବେଡ଼ାଦୁ ଜାକୁବ ନିଜେଦି ବୁବାଦି ବାସାନି ବାଡି କିଣାନ୍ ଦେସ୍‍ତୁ ବାସା କିଜିମାର୍ହାନ୍ । 2 ଇକା ଆଜିନାତ୍‌ ଜାକୁବ ଇଲୁଦି କାତା । ଜୋସେପ୍, ସତର ବାର୍ସୁ ବୟସ୍ ବେଡ଼ାଦୁ, ନିଜେଦି ଦାଦାରି ୱାଲେ ଡ଼ାକୁକଡିଙ୍ଗ୍ ମାନ୍ଦା ସାରାକିଜିମାର୍ହାର୍; ୱାନ୍ ନିଜେଦି ବୁବା ଇସ୍ରି ଆଡ଼ିକ୍‌ ବିଲ୍‍ହା ମାରି ସିଲ୍‌ପାଦି କଡ଼ରିୱାଲେ ସାଙ୍ଗ କଡ଼ ମାର୍ହାନ୍‌; ମାରି ଜୋସେପ୍ ଆୟା ତୋଡ଼ାନ୍‍କା ତାଗିଇପାଣିଦି କାବୁର୍‌ ବୁବା ଲାକୁତୁ ତାସିମାର୍ହାନ୍ । 3 ଆୟା ଜୋସେପ୍ ଜାକୁବଦି ଡକରା କାଡ଼ାଦୁ କଡ଼ ଆନି ଉଣ୍ତିଙ୍ଗ୍‌ ଜାକୁବ ୱିଜୁ କଡ଼ରିମାଡ଼ାନ୍ ୱାନିଙ୍ଗ୍‌ ନାଣ୍ତ ଜିବନ୍‌ନୋତାନ୍‌, ମାରି ୱାନିଙ୍ଗ୍ କାବ୍ରାର୍‌‍ଦି ଉନ୍‌ଡ୍ରି ଆଙ୍ଗିଁ ତିଆର୍‌ କିଜି ସିତାମାର୍ହାନ୍ । 4 ମାତର୍‌ ବୁବା ୱିଜୁ କଡ଼ରି ବାଦ୍‌ଲୁ ଜୋସେପ୍‌ତିଙ୍ଗ୍ ନାଣ୍ତ ଜିବନ୍ ନୋନିକା ସୁଡ଼ିଜି ୱାନି ଦାଦ୍‌ସିର୍‌ ୱାନିଙ୍ଗ୍ କାଡ଼ିତାର୍ ମାରି ୱାନି ଉଣ୍ତିଙ୍ଗ୍ ଜିବନ୍‌ନୋନି ମାଟା ଇନ୍‌ଡ୍ରେଙ୍ଗ୍‌ ଆଟ୍‍ଏତାର୍ ।

5 ତାନିୱେନେକା ଜୋସେପ୍ ଉନ୍‌ଡ୍ରି ନାଡ଼ା ଲୋବୁ ସୁଡ଼୍‌ଜି ନିଜେଦି ଦାଦାରିଙ୍ଗ୍‌ ଇର୍ହାନ୍‌; ଆବେଟ୍‍ତାନ୍ ୱାର୍ ୱାନିଙ୍ଗ୍ ମାରି ବେସି କାଡ଼ିତାର୍ । 6 ଇରିଙ୍ଗ୍‌ ୱାନ୍ ୱାରିଙ୍ଗ୍ ଇର୍ହାନ୍‌, "ନାନୁ ଏମେ ଲୋବୁ ସୁଡ଼ୁତାମାନା, ମାଡ଼ିସ୍ କିଜିନା, ଆକା ୱେନ୍‌ଡ୍ରୁ । 7 ସୁଡ଼ୁଦୁ, ମାଡୁ କିଡ଼ିଇଦୁ ମୋପ୍‌କୁ ତୋର୍‌ସିମାର୍ହିକା, ଆବେଟ୍‍ ସୁଡ଼ୁଦୁ, ନା ମୋପ୍‌ ନିଙ୍ଗିଁଜି ନିର୍ହାତ୍; ମାରି, ସୁଡ଼ୁଦୁ, ମି ମୋପ୍‌କୁ ୱିଜୁ ନା ମୋପ୍‌ତିଙ୍ଗ୍‌ ସାରିବେଡ଼୍‌ତି ଆଜି ମାଡ଼ିସ୍ କିତେ ।"

8 ଆବେଟ୍‍ତାନ୍ ୱାନି ଦାଦାର୍‌ ୱାନିଙ୍ଗ୍ ଇର୍ହାର୍, "ନିନୁ ନ ସତେ ମା ରାଜା ଆନି ? ନିନୁ ନ ସତେ ମା ମୁସୁକୁ ସାସନ୍ କିନି ?" ଆବେଟ୍ ୱାର୍ ୱାନି ୱିଜୁ ଲୋବୁକୁ ମାରି ମାଟା ଉଣ୍ତିଙ୍ଗ୍‌ ୱାନିଙ୍ଗ୍ ମାରି ନାଣ୍ତ କାଡ଼ିତାର୍ ।

9 ତାନିୱେନେକା ଜୋସେପ୍‌ ମାରି ଉନ୍‌ଡ୍ରି ଲୋବୁ ସୁଡ଼୍‌ଜି ଦାଦାରିଙ୍ଗ୍‌ ୱେରିସ୍ ଇର୍ହାନ୍‌, "ସୁଡ଼ୁଦୁ, ନାନୁ ମାରି ଉନ୍‌ଡ୍ରି ଲବୁ ସୁଡ଼ୁତାମାନା, ସୁଡ଼ୁଦୁ, ୱେଡ଼ା ମାରି ଲେଜୁ ମାରି ଏଗାର୍‌ଗୋଟା ସୁକେଙ୍ଗ୍ ନାଙ୍ଗିଁ ମାଡ଼ିସ୍ କିତେ ।"

10 ମାତର୍‌ ୱାନ୍ ନିଜେଦି ବୁବା ମାରି ଦାଦ୍‌ସିରି ଆଗିଡ଼ି ଆକା ଇର୍ହାନ୍‌, ୱାନି ବୁବା ୱାନିଙ୍ଗ୍ ଆଦ୍‌ରିସ୍‌ ଇର୍ହାନ୍‌, "ନିନୁ ଇୟା ଏଣ୍ତେସ୍‌ ନାନି ଲୋବୁ ସୁଡ଼ୁତି ? ନାନୁ ମାରି ମି ୟାୟା ମାରି ମି ଦାଦାର୍‌, ମାପୁ ନ ପାଡ଼୍‌ଗିଜି ନିଙ୍ଗିଁ ମାଡ଼ିସ୍ କିଦେଙ୍ଗ୍‌ ୱାନାପ୍‌ ?" 11 ଆବେଟ୍ ୱାନି ଦାଦାର୍‌ ୱାନିଙ୍ଗ୍ ରିସା ଆତାର୍‌, ମାତର୍‌ ୱାନି ବୁବା ଆୟା ମାଟା ମନ୍‌ତୁ ଇଡ୍‍ଜି ଅଡ଼୍‌ବିତାନ୍‌ ।

12 ଆବେଟ୍ ଅର୍‌ଲେନ୍‌ ୱାନି ଦାଦାର୍‌ ବୁବାଦି ଡ଼ାକୁକଡିଙ୍ଗ୍ ସାରାକିଦେଙ୍ଗ୍ ସିକିମ୍‌ତୁ ସର୍ହାର୍ । 13 ମାରି ଜାକୁବ ଜୋସେପ୍‍ତିଙ୍ଗ୍‌ ଇର୍ହାନ୍‌, "ମି ଦାଦାର୍‌ ସିକିମ୍‍ତୁ ଡ଼ାକୁକଡିଙ୍ଗ୍ ସାରାକିଜିନାର୍ ।" ରାଆ, ନାନୁ ନିଙ୍ଗିଁ ୱାରି ଲାକୁତୁ ପୋକ୍‌ନା; ଆବେଟ୍ ୱାନ୍‌ ଇର୍ହାନ୍‌, "ସୁଡ଼ୁଆ, ନାନୁ ତିଆର୍‌ ମାନା ।"

14 ନାସ୍ତିୱାଲେ ଇସ୍ରାଏଲ ୱାନିଙ୍ଗ୍ ଇର୍ହାନ୍‌, "ନିନୁ ସଲ୍‌ସି ମି ଦାଦାର୍‌ ମାରି ଡ଼ାକୁକଡିଙ୍ଗ୍ ନେଗେନ୍‌ ମାନେ ନ ସିଲେ, ଆକା ସୁଡ଼ିଜି ନା ଲାକୁତୁ କାବୁର୍ ତାଗା ।" ଇୟା ୱାଜା ୱାନ୍‌ ହିବ୍ରୋଣଦି ଆଡ୍‌ଗିରି ବୁମିଦାନ୍ ଜୋସେପ୍‌ତିଙ୍ଗ୍‌ ପୋକ୍‍ତାନ୍‌, ୱାନ୍ ସିକିମ୍‍ଦୁ ଇଗା ସର୍ହାନ୍ । 15 ନାସ୍ତିୱାଲେ ଅରେନ୍ ଲୋକୁ ଜୋସେପ୍‍ତିଙ୍ଗ୍‌ କିଡ଼ିଇଦୁ ଇନିଙ୍ଗାଁ ଆନିଙ୍ଗାଁ ବୁଲାନିକା ସୁଡ଼ିଜି ୱେନ୍‌ବାତାନ୍, "ନିନୁ ଇନିକା ପୋଇଜିନି ?"

16 ୱାନ୍ ଇର୍ହାନ୍‌, "ନା ଦାଦାରିଙ୍ଗ୍‌ ପୋଇଜିନା, ୱାର୍ ଏମେମାନୁ ଡ଼ାକୁକଡିଙ୍ଗ୍ ସାରାକିଜିନାର୍, ନାଙ୍ଗିଁ ଅଡ଼ପ୍ ଇନ୍‍ଆଁ ।"

17 ଆୟା ଲୋକୁ ଇର୍ହାନ୍‌, "ୱାର୍ ଇବେଟ୍‍ତାନ୍ ସର୍ହାମାନାର୍; ଇରିଙ୍ଗ୍‌ ନାନୁ ୱେନିଜିମାର୍ହା, ୱାର୍ ଦୋତନ ବାଡିଦୁ ସନାପ୍‌ ଇଜି ଇନ୍‌ଜିମାର୍ହାର୍ ।" ଆବେଟ୍ ଜୋସେପ୍ ନିଜେଦି ଦାଦାରି ୱେନେକା ୱେନେକା ସଲ୍‌ସି ଦୋତନ ବାଡିଦୁ ୱାରିଙ୍ଗ୍ ବେଟ୍‍ଆତାନ୍ ।

18 ୱାର୍ ୱାନିଙ୍ଗ୍ ଆକରାନ୍ ସୁଡ଼ୁତାର୍, ମାରି, ୱାନ୍ ୱାରି ଲାକୁତୁ ଇନି ଆଗିଡ଼ି ୱାର୍ ୱାନିଙ୍ଗ୍ ସାପିସ୍ କିଦେଙ୍ଗ୍ ୱାର୍‍ଗିତାର୍ । 19 ମାରି, ୱାର୍ ଅରେନ୍‌ ମାରି ଅରେନ୍‌ୱାନିଙ୍ଗ୍‌ ଇର୍ହାନ୍‌, "ଇନିଙ୍ଗାଁ ସୁଡ଼ୁଦୁ, ଲୋବୁସୁଣି ବାବୁ ୱାଜିନାନ୍ । 20 ରାଦୁ, ମାଡୁ ୱାନିଙ୍ଗ୍ ସାପିସ୍ କିଜି ଉଣ୍ତ୍ରିଗୁଟାଦୁ ପୋକ୍‍ନା ସିନାଟ୍; ମାରି, ଇନି ନରେସ୍ ଜାତୁ ୱାନିଙ୍ଗ୍ ତିର୍‌ଆପୋକ୍‍ତାତ୍ ଇଜି ଇନାଟ୍; ଆବେଟ୍‌ ସୁଣାଟ୍, ୱାନି ଲୋବୁକୁ ୱିଜୁ ଇନିକା ଆନେ ।"

21 ଇୟା ମାଟା ୱେନିଜି ରୁବେନ୍ ୱାରି କିୟୁଦାନ୍ ରକିଆ କିଦେଙ୍ଗ୍‌ ଇର୍ହାନ୍‌, "ସିଲେ, ମାଡୁ ୱାନିଙ୍ଗ୍ ଜିବନ୍‍ତାନ୍ ସାପିସ୍ କିଦେଙ୍ଗ୍ କେଏଟ୍ ।" 22 ମାରି ରୁବେନ୍ ୱାରି କିୟୁଦାନ୍ ୱାନିଙ୍ଗ୍ ରକିଆ କିଜି ବୁବା ଲାକୁତୁ ଡ଼େସି ପୋକ୍‍ନି ଉଣ୍ତିଙ୍ଗ୍ ୱାରିଙ୍ଗ୍ ଇର୍ହାନ୍‌, "ମିରୁ ନର୍ ସାପିସ୍ କିମାଟ୍; ଗରତି ଇୟା ଗୁଟାଦୁ ୱାନିଙ୍ଗ୍ ପୋକ୍‌ତୁ, ମାତର୍‌ ୱାନି ଉଣ୍ତିଙ୍ଗ୍ କିୟୁ ପେର୍‍ମାଟ୍ ।" 23 ତାନିୱେନେକା ଜୋସେପ୍ ଦାଦ୍‌ସିରି ଲାକୁତୁ ୱାତାନ୍‌, ୱାର୍ ୱାନି ଆଙ୍ଗିଁ, ଆୟା କାବ୍ରାସିତ୍ରା, ଆଙ୍ଗିଁ, ୱାନି ମେନ୍ଦଲ୍‍ତାନ୍ କୁତ୍‍ତା ଅତାର୍ । 24 ମାରି ୱାନିଙ୍ଗ୍ ଆସ୍‌ସି ଗୁଟାଦି ନାଣିମି ପୋକ୍‍ତାର୍, ଆୟା ଗୁଟା ୱାର୍‌ତିକା, ଆବେନୁ ଏରୁ ସିଲୁତେ । 25 ଆବେଟ୍ ୱାର୍ ଉଣ୍ତେଙ୍ଗ୍ ବାସ୍‌ତାର୍; ୱାର୍ ମାର୍‌ଜି ବେସ୍‌ତାର୍, ଜେ ଗିଲିୟଦ୍‌ଦାନ୍ ଉଣ୍ତ୍ରିଦଲ୍‌ ଇସ୍ମାଏଲିୟ ଲୋକୁ ଉଟ୍‌ ମୁସୁକୁ ବାସ୍‌ନା ଜିନିସ୍‌ ମାରି ଦୁପ୍‍ଣି ମାରି ଗନ୍ଦରସ୍ ଆସ୍‌ସି ମିସର୍ ଦେସ୍‍ତୁ ସଲ୍‌ସିନାର୍ । 26 ନାସ୍ତିୱାଲେ ଜିହୁଦା ତୋଡ଼ାନ୍‌କାଙ୍ଗ୍‌ ଇର୍ହାନ୍‌, "ମା ତୋଡ଼ାନ୍‌ତିଙ୍ଗ୍ ସାପିସ୍ କିଜି ୱାନି ନେତେର୍‌ ମୁସ୍‌ତିଙ୍ଗ୍‌ ମା ଇନି ଲାବ ? 27 ରାଦୁ, ମାଡୁ ୱାନିଙ୍ଗ୍ ଇୟା ଇସ୍ମାଏଲିୟ ଲୋକାଙ୍ଗ୍ ପର୍‍ନାଟ୍, ମା କିୟୁ ୱାନି ବିରୁଦ୍‌ତାନ୍‌ ନିଙ୍ଗ୍‌ଁମାକିତ୍; ଇରିଙ୍ଗ୍‌ ୱାନ୍ ମା ତୋଡ଼ାନ୍ ମାରି ମା କାଣ୍ତା ୱାଜା ।" ଆବେଟ୍ ୱାରି ତୋଡ଼ାନ୍‌କୁ ମାନାତାର୍ । 28 ନାସ୍ତିୱାଲେ ଆୟା ମିଦିୟନିୟ ବେପାର୍‍ଙ୍ଗୁ ଲାକୁତୁ ୱାତାର୍ । ମାରି ୱାନି ଦାଦ୍‌ସିର୍‌ ଜୋସେପ୍‍ତିଙ୍ଗ୍ ଗୁଟା ଲୋଇରାନ୍ ମୁସୁକୁ ରେଲିଜି ତାତାର୍; ମାରି, ଇସ୍ମାଏଲୟିର ମାଡ଼ାନ୍‌କୁ କୋଡ଼େ ୱେଣ୍ତି ଅଦୁଲି ଟାକା ଅସି ଜୋସେପ୍‍ତିଙ୍ଗ୍ ପୋର୍‍ତାର୍; ଆବେଟ୍ ୱାର୍ ଜୋସେପ୍‍ତିଙ୍ଗ୍ ମିସର୍ ଦେସ୍‍ତୁ ଅତାର୍ ।

29 ତାନିୱେନେକା ରୁବେନ୍ ଗୁଟା ଲାକୁତୁ ଡ଼େସି ସଲ୍‌ସି ଜୋସେପ୍ ଗୁଟା ଲୋଇ ସିଲେନ୍, ଇକା ସୁଡ଼ୁଜି ନିଜେଦି ଆଙ୍ଗିଁ କିସ୍‍ତାନ୍ । 30 ମାରି, ତୋଡ଼ାନ୍‍କା ଲାକୁତୁ ଡ଼େସି ୱାଜି ଇର୍ହାନ୍‌, "କଡ଼ ସିଲେନ୍; ମାରି ନାନୁ ଇନିକା କିନା ?"

31 ତାନିୱେନେକା ୱାର୍ ଜୋସେପ୍‍ତି ଆଙ୍ଗିଁ ଅସି ଉନ୍‌ଡ୍ରି ଗରିଆ ଡାକ୍‌ସି ତାନି ନେତେର୍‌ତୁ ଆକା ମୁଡ଼ୁକୁତାର୍ । 32 ମାରି, ୱାର୍ ନିଜେଦି ବୁବା ଲାକୁତୁ ଆୟା କାବ୍ରାସିତ୍ରା ଆଙ୍ଗିଁ ପୋକ୍‍ସି ଇର୍ହାର୍, "ମାପୁ ନିସ ମାତର୍‌ ପୋଇତାପ୍, ଇକା ନି କଡ଼ଦି ଆଙ୍ଗିଁ ନ ସିଲେ, ଚିନିସ୍‌ କିଆ ।"

33 ଆବେଟ୍ ୱାନ୍ ଆକା ସିନିସ୍ କିଜି ଇର୍ହାନ୍‌, ଇୟା ଆଙ୍ଗିଁ ତ ନା କଡ଼ଦି; ଇନି ନରେସ୍ ଜାତୁ ୱାନିଙ୍ଗ୍ ତିର୍ହା ପୋକ୍‍ତାମାନାତ୍, ଜୋସେପ୍ ସତେନେ ମକା ମକା ଆଜି ଚିନ୍ ଚତର୍ ଆତାମାନାନ୍ । 34 ଇୟାୱେନ୍‌କା ଜାକୁବ ନିଜେଦି ଆଙ୍ଗିଁ କିସ୍‍ସି ମେନ୍ଦଲ୍‌ତୁ ବାସ୍ତା ଆରାଜି କଡ଼ ଉଣ୍ତିଙ୍ଗ୍ ନାଣ୍ତଦିନ୍ ସାନ୍ଦି ଆଡ଼ାବାତାନ୍ । 35 ତାନିୱେନେକା ୱାନି ୱିଜୁ ମାରିନ୍‌କୁ ମାରି ୱିଜୁ ଆଇଲିକ୍‌ ନିଙ୍ଗିଁଜି ୱାନିଙ୍ଗ୍ ସାନ୍ତି କିନି ଉଣ୍ତିଙ୍ଗ୍ ଜାତ୍‍ନୁ ଅତାର୍; ମାତର୍‌ ୱାନ୍ ମାନାଏତାନ୍; ମାରି, ୱାନ୍ ଇର୍ହାନ୍‌, ନାନୁ ଆଡ଼ବାଜି ଆଡ଼ବାଜି କଡ଼ ଲାକୁତୁ ଦୁକିଦୁ ଗୁଟାଦୁ ସନା । ଇୟା ୱାଜା ୱାନି ବୁବା ୱାନି ଉଣ୍ତିଙ୍ଗ୍‌ ଅଡ଼୍‍ବିତାନ୍ ।

36 ଆବେଟ୍‍ତାନ୍ ଆୟା ମିଦିୟନିୟ ଲୋକୁ ମିସର ଦେସ୍‌ତୁ ପୋଟିପର୍‌ ଦରୁଦି ପାରୋ ରାଜାଦି ରକିଆ କିନି ସେନାପତିଙ୍ଗ୍‌ ଲାକ୍‌ତୁ ଜୋସେପ୍‍ତିଙ୍ଗ୍ ପୋର୍‍ତାର୍ ।