1 ନାସ୍ତିୱାଲେ ଜୋସେପ୍‌ ନିଜେଦି ବୁବାଦି ମୋକମ୍‌ତୁ ମୋକମ୍‌ ମିସାକିଜି ଆଡ଼୍‍ବାଜି ନଣ୍ତିତାନ୍ । 2 ମାରି, ଜୋସେପ୍‌ ନିଜେଦି ବୁବାଦି ମାଡ଼ା ବାସ୍‌ନା ନିୟୁ ଉସ୍‌ନି ଉଣ୍ତିଙ୍ଗ୍ ନିଜେଦି ଦାସ୍‌ ଡାକ୍ତର୍‌କାଙ୍ଗ୍ ମାଡ଼ା ମୁସୁନି ଆଦେସ୍ ସିତାନ୍; ଆବେଟ୍ ଲୋକୁ ଜାକୁବଦି ମାଡ଼ାଦିଙ୍ଗ୍ ବାସ୍‌ନା ନିୟୁ ଉସ୍‌ତାର୍ । 3 ୱାନି ଉଣ୍ତିଙ୍ଗ୍ ଚାଲିସ୍ ଦିନ୍ ଆସ୍‌ତାତ୍‌; ଏଣ୍ତେସ୍‌କି ବାସ୍‌ନା ନିୟୁ ଉସ୍‌ତେଙ୍ଗ୍‌ ଚାଲିସ୍ ଦିନ୍ ଆସ୍‌ତାତ୍‌; ମାରି ମିସରତି ଲୋକୁ ୱାନି ଉଣ୍ତିଙ୍ଗ୍ ସତୁରି ଦିନ୍ ସାନ୍ଦି ଆଡ଼୍‍ବାତାର୍ ।

4 ଆୟା ଆଡ଼୍‍ବାନି ଦିନ୍ ସରି ୱେନେକା, ଜୋସେପ୍‌ ପାରୋ ରାଜାଦି ଲୋକାଙ୍ଗ୍ ଇର୍ହାନ୍‌, "ଜଦି ନାନୁ ମି ଆଗିଡ଼ି ଦୟା ପୋଇତାମାନା, ଆର୍‌ତିଙ୍ଗ୍‌ ମାଡ଼ିସ୍‌ କିଜିନା, ପାରୋ ରାଜାଦି ଲାକୁତୁ ଇୟା କାବୁର୍ ୱେରୁତୁ ।" 5 ମା ବୁବା ନାଙ୍ଗିଁ ପାର୍‍ମାଣ୍ କିବିସ୍‌କିଜି ଇର୍ହାମାନାନ୍ ସୁଡ଼ୁଆ, ନାନୁ ସାତିଙ୍ଗାଁ, କିଣାନ୍ ଦେସ୍‍ଦୁ ନିଜେଦି ଉଣ୍ତିଙ୍ଗ୍ ଏମେ ଦୁକିଗୁଟା କାରିତାମାନା, ଆବେନୁ ନାଙ୍ଗିଁ ସାତିଙ୍ଗାଁ ମୁସ୍‍ନିଦେର୍‌ । ଆଦେଙ୍ଗ୍‌ ନାଙ୍ଗିଁ ସନ୍‍ଡ୍ରେଙ୍ଗ୍ ସିଦାଟ୍, ନାନୁ ବୁବେଙ୍ଗ୍‌ ମୁସ୍‍ନାନ ଡ଼େସି ୱାନା ।

6 ଆବେଟ୍ ପାରୋ ରାଜା ଇର୍ହାନ୍‌, "ସାଙ୍ଗ୍ଆ, ମି ବୁବା ନିଙ୍ଗିଁ ଏମେ ପାର୍‍ମାଣ୍ କିବିସ୍‍ତାମାନାନ୍, ନିନୁ ଆୟା ଇସାପ୍‍ତାନ୍ ୱାନିଙ୍ଗ୍ ମୁସ୍‌ସୋ ରାଆ ।"

7 ଆବେଟ୍ ଜୋସେପ୍‌ ନିଜେଦି ବୁବାଦି ସାତିମାଡ଼ା ମୁସୁତେଙ୍ଗ୍ ସତାସର୍ହାନ୍; ଆବେଟ୍ ପାରୋ ରାଜାଦି ଦାସର୍‌ ମାରି ୱାନି ଇଲୁଦି ପେରି ଲୋକୁ ମାରି ମିସର ଦେସ୍‍ତି ପେରି ଲୋକୁ ସର୍ହାର୍‌ । 8 ମାରି, ଜୋସେପ୍‌ଦି ୱିଜୁ ଇଲୁଦି କୁଟୁମ୍‌ ମାରି ୱାନି ତୋଡ଼ାନ୍‌କୁ ମାରି ୱାନି ବୁବାସି ଇଲୁଦି କୁଟୁମ୍‌ ୱାନି ୱାଲେ ବୁଲାଜିସର୍ହାର୍; ଗୋସନ୍ ରାଜିଦୁ ୱାର୍ କେବଲ ନିଜେଦି କଡ଼ରିଙ୍ଗ୍ ମାରି ମେଣ୍ତେଙ୍ଗ୍‌ ମାନ୍ଦା ମାରି ଡ଼ାକୁମାନ୍ଦା ଡ଼ିସ୍‍ତାସର୍ହାର୍‌ । 9 ୱାନି ୱାଲେ ରତ ମାରି ରତଙ୍ଗ୍‌ ସାଲାକିନାର୍‌ ସର୍ହାର୍‌; ଆବେଟ୍ ନାଣ୍ତ ଗଲି ଆତାତ୍ ।

10 ତାନିୱେନ୍‌କା ୱାର୍ ଜର୍ଦନ ମୋକମିମାନି ଆଟଦର କାଡ଼ାତୁ ଇଗା ସର୍ହାର୍, ଆବେନୁ ନାଣ୍ତ ସମୟ ଆଉଲି ଆଜି ଆଡ଼ାବାତାର୍‌; ଜୋସେପ୍‌ ଆବେନୁ ନିଜେଦି ବୁବାଦି ଉଣ୍ତିଙ୍ଗ୍ ସାତ୍ ନମ୍ୱର୍‌ତି ଦିନ୍ ସାନ୍ଦି ଆଡ଼ାବାତାନ୍ । 11 ମାରି, ଆୟା ଦେସ୍‍ତୁ ବାସାନି କିଣାନ୍‍ତି ଲୋକୁ ଆଟଦର କାଡ଼ାତୁ ୱାରି ଇୟା ଆଡ଼ାବାନିକା ସୁଡ଼ିଜି ଇର୍ହାର୍, "ମିସରତି ଲୋକା ଇୟା ବେସି କାସ୍ଟୁଦି ଆଡ଼୍‍ବାନିକା," ଆଦେଙ୍ଗ୍ ଜର୍ଦନ ମୋକମି ମାନି ଆୟା ବାଡି ଆବେଲ୍-ମିସର* ମିସରଦି ଲୋକୁ ଆଡ଼୍‍ବାନିକା ଦରୁଦାନ୍ ୱିଙ୍ଗିତାତ୍ ।

12 ତାନିୱେନେକା ଜାକୁବ ନିଜେଦି ମାରିସିରିଙ୍ଗ୍ ଏଣ୍ତେସ୍ ଆଦେସ୍ ସିତାମାର୍ହାନ୍, ୱାର୍ ୱାନି ଉଣ୍ତିଙ୍ଗ୍‌ ଆୟା ଇସାପ୍‍ତାନ୍ କିତାର୍; 13 ଅର୍ତାତ୍, ୱାନି ମାରିସିର୍‌ ୱାନିଙ୍ଗ୍ କିଣାନ୍ ଦେସ୍‍ତୁ ଅସି ମକ୍‍ପେଲା କିଡ଼ିଇଦୁ ନାଡ଼ିମି ମାନି ସାରାଦୁ ମୁସ୍‍ତାର୍; ଆୟା ସାରା ମମ୍ରିଦି ଆଗିଡ଼ିମାନି କିଡ଼ିଇଦି ୱାଲେ ମୁସିନି ବାଡି ଅଦିକାର୍ ହେତିୟ ଇପ୍ରୋଣ ମାଡ଼ାନ୍ ଅବ୍ରାହାମ କଟା ମାର୍ହାତ୍‌ । 14 ଜୋସେପ୍‌ ନିଜେଦି ବୁବାଦି ମାଡ଼ା ମୁସିତି ୱେନେକା ୱାନ୍ ମାରି ୱାନି ତୋଡ଼ାନ୍‍କୁ ୱିଜେରେ ଏସୋ ଲୋକୁ ୱାନି ବୁବାଦି ମାଡ଼ା ମୁସ୍‍ଦେଙ୍ଗ୍ ୱାନିୱାଲେ ସର୍ହାମାର୍ହାର୍, ୱିଜେରେ ମିସରତୁ ଡ଼େସି ସର୍ହାର୍ ।

15 ମାରି ନିଜେଦି ବୁବା ସାତାମାନାନ୍, ଇକା ସୁଡ଼ୁଜି ଜୋସେପ୍‌ଦି ଦାଦାର୍‌ ଇର୍ହାର୍, "ନେସ୍ତି ଜୋସେପ୍‌ ମାଙ୍ଗିଁ କାଡ଼୍‌ନାନ୍, ମାରି, ମାଡ୍‌ ୱାନିଙ୍ଗ୍ ଜେ ୱିଜୁ ତାଗିଇକା କିତିମାନିକା, ଆବେଣି ପୁରା ଦଣ୍ତ୍‌ ମାଙ୍ଗିଁ ସିନାନ୍ ।" 16 ଇୟାଉଣ୍ତିଙ୍ଗ୍‌ ୱାର୍ ଜୋସେପ୍‌ଦି ଲାକୁତୁ ଇୟା ମାଟା ଇନିଜି ପୋକ୍‌ତାର୍, "ମି ବୁବା ସାନି ଆଗିଡ଼ି ମାଙ୍ଗିଁ ଇକା ଇର୍ହିମାର୍ହି, ମିରୁ ଜୋସେପ୍‌ତିଙ୍ଗ୍ ଇୟା ମାଟା ଇନିଦେର୍‌, 17 ମି ଦାଦାର୍‌ ନିଙ୍ଗିଁ ତାଗିଇକା କିତାମାନାର୍; ମାତର୍‌ ନିନୁ ଦୟା କିଜି ୱାରି ଆୟା ଅଦାର୍ମୁ ମାରି ପାପ୍‌ କେମା କିନି; ଇୟାଉଣ୍ତିଙ୍ଗ୍‌ ମାପୁ ମାଡ଼ିସ୍‌ କିଜିନାପ୍, ମି ବୁବାରି ମାପୁରୁଦି ଦାସରି ଅଦାର୍ମୁ ପାଣି କେମା କିଆ ।" ୱାର୍ ଇୟା ମାଟା ଇନିୱାଲେ ଜୋସେପ୍‌ ଆଡ଼୍‍ବାଦେଙ୍ଗ୍ ଆସ୍ତାନ୍ ।

18 ତାନିୱେନେକା ୱାନି ଦାଦାର୍‌ ୱାନି ଆଗିଡ଼ି ସଲ୍‍ସି ମାଡ଼ିସ୍ କିଜି ଇର୍ହାର୍, "ସୁଡ଼ୁଆ, ମାପୁ ନି ସାକର୍‍ଙ୍ଗୁ ।"

19 ମାତର୍‌ ଜୋସେପ୍‌ ୱାରିଙ୍ଗ୍ ଇର୍ହାନ୍‌, "ମିରୁ କାଣ୍ତେକ୍ ବା ତିଲାମାଟ୍‌, ନାନୁ ଇନିକା ମାପୁରୁଦି ୱାଜା ?" 20 ମିରୁ ନା ବିରୁଦ୍‌ତାନ୍ ତାଗିଇକା ଅଡ଼୍‍ବିତି ମାର୍ହିଦେର୍‌ ସତ୍‌, ମାତର୍‌ ମାପୁରୁ ଆକା ନେଗିକା ଚିନ୍ତା କିତାନ୍; ଇଲେଇ ଏଣ୍ତେସ୍ ସୁଡ଼ିଜିନିଦେର୍‌, ଆୟାୱାଜା ନାଣ୍ତ ଲୋକୁଦି ଜିବନ୍‌ ରକିୟା କିଦେଙ୍ଗ୍ ୱାନି ବଦା ମାର୍ହାତ୍‌ । 21 ଇୟାଉଣ୍ତିଙ୍ଗ୍‌ ମିରୁ ଇଲେଇ ତିଲାମାଟ୍, ନାନୁ ମିଙ୍ଗିଁ ମାରି ମି କଡ଼ରିଙ୍ଗ୍ ଜାତୁନୁ ଅନା । ଇୟା ୱାଜା ୱେଡ଼ିକାଦି ମାଟା ଇନ୍‌ଜି ୱାନ୍ ୱାରିଙ୍ଗ୍ ସାନ୍ତି ସିତାନ୍ ।

22 ତାନିୱେନେକା ଜୋସେପ୍‌ ମାରି ୱାନି ବୁବାରି ଇଲୁ କୁଟୁମ୍‌ ମିସର ଦେସ୍‍ତୁ ବାସା କିଜି ତେବାତାର୍‌; ଜୋସେପ୍‌ ସଏ ଦାସ୍‌ ବାର୍ସୁ ଜିବନ୍‌ ମାର୍ହାନ୍‌ । 23 ଜୋସେପ୍ ଇପ୍ରୟିମ୍ ମୁଣ୍ତ୍ରି କୁଡ଼ା ସାନ୍ଦି କଡ଼ କକରାରିଙ୍ଗ୍ ସୁଡ଼ୁତାନ୍; ମାରି, ଜୋସେପ୍‌ ମନଃସିଦି ମାକିର ଦରୁଦି ମାରିନ୍‌ଦି କଡ଼ରିଙ୍ଗ୍ ଗାତୁ କିତାନ୍ ।

24 ତାନିୱେନେକା ଜୋସେପ୍‌ ଦାଦାରିଙ୍ଗ୍‌ ଇର୍ହାନ୍‌, "ନାନୁ ସାଜିନା, ମାତର୍‌ ମାପୁରୁ ସତେନେ ମି ଜାତୁନ୍‍ ଅନାନ୍, ମାରି, ଇୟା ଦେସ୍‍ଦାନ୍ ମିଙ୍ଗିଁ ସପ୍‍ସି ଏମେ ଦେସ୍ ସିନି ଉଣ୍ତିଙ୍ଗ୍ ଅବ୍ରାହାମ, ଇସ୍‍ହାକ୍ ମାରି ଜାକୁବଦି ଲାକୁତୁ ପାର୍‍ମାଣ୍ କିତାମାନାନ୍, ଆୟା ଦେସ୍‍ତୁ ମିଙ୍ଗିଁ ଅସି ସନାନ୍ ।" 25 ମାରି ଜୋସେପ୍‌ ଜାକୁବଦି କଡ଼ରିଙ୍ଗ୍ ଇୟା ପାର୍‍ମାଣ୍ କିବିସ୍‍ସି ଇର୍ହାନ୍‌, "ମାପୁରୁ ଅବସ୍ୟ ମି ଜାତୁନ୍‍ ଅନାନ୍, ଆୟା ବେଡ଼ାଦୁ ମିରୁ ଇୟା ବାଡିଦାନ୍ ନା ପେଡ଼େକ୍ ଅସି ସନିଦେର୍‌ ।" 26 ଇୟାୱାଜା ଜୋସେପ୍ ସଏ ଦାସ୍‌ ବାର୍ସୁ ବୟସ୍‌ତାନ୍ ସାତାନ୍‌; ଆବେଟ୍ ୱାର୍ ୱାନି ସାତିମାଡ଼ାଦିଙ୍ଗ୍ ବାସ୍‌ନା ନିୟୁ ଉସ୍‌ସି ମିସର ଦେସ୍‍ତୁ ଉଣ୍ତ୍ରି ପେଡ଼ାଦୁ ଇଟ୍‌ତାର୍ ।