ପାର୍‍ତୁମ୍‍ ବଇ 24

ଇସ୍‌ହାକ ଉଣ୍ତିଙ୍ଗ୍‌ ଆଡ଼ି

1 ଆୟା ବେଡ଼ାଦୁ ଅବ୍ରହାମ ନାଣ୍ତ ଡକରା ଆତାମାର୍ହାନ୍‌, ମାରି ମାପୁରୁ ଅବ୍ରହାମଦିଙ୍ଗ୍‌ ୱିଜୁ ବିସୟ୍‌ତାନ୍‌ ଆର୍ସିବାଦ୍‌ କିତା ମାର୍ହାନ୍‌ । 2 ଆବେଟ୍ ୱାନ୍‌ ନିଜେଦି ଇଲୁଦି ୱିଜୁପାଣିଦି ଅଦିକାର୍ ପୟ୍‌ତିମାନି ଡକରା ଦାସଙ୍ଗ୍ ଇର୍ହାନ୍‌, "ନାନୁ ମାଡ଼ିସ୍‌ କିଜିନା, ନିନୁ ନା କୁରୁଗୁଦୁ କିୟୁ ଇଡ୍‌ଆ; 3 ନାନୁ ମୁସ୍‍କୁପୁର୍‌ ନାଣିମିପୁର୍‌ ପ୍ରବୁ ମାପୁରୁଦି ଦରୁଦାନ୍‌ ନିଙ୍ଗିଁ ପାର୍‍ମାଣ୍ କିବିସ୍‍ନା ଜେ, ଏମେ କିଣାନିୟ ଲୋକୁ ଲୋଇ ନାନୁ ବାସା କିଜିନା, ନିନୁ ୱାରି ଲୋଇରାନ୍‌ ନା ମାରିନ୍‌ତି ପେଡ଼ିଦି ଉଣ୍ତିଙ୍ଗ୍‌ ଏମେ କାନ୍ୟା ଆସ୍‍ କିମା; 4 ମାତର୍‌ ନିନୁ ନା ଦେସ୍‌ତି ଲୋକା ଲାକୁତୁ ସଲିସି ନା ମାରିନ୍‌ ଇସ୍‍ହାକ୍ ଉଣ୍ତିଙ୍ଗ୍ କାନ୍ୟା ତାନି ।"

5 ନାସ୍ତିୱାଲେ ଆୟା ସାକର୍‌ ୱାନିଙ୍ଗ୍‌ ଇର୍ହାନ୍‌, "ଜଦି ଏସାଙ୍ଗ୍‌ ଏମେ ଆଇଲି ନା ୱାଲେ ଇୟା ଦେସ୍‍ତୁ ୱାନି ଉଣ୍ତିଙ୍ଗ୍‌ ବଦା କିଏତ୍, ଆର୍‌ତିଙ୍ଗ୍‌ ଏମେ ଦେସ୍‍ତାନ୍‌ ନିନୁ ୱାତିମାନି ଆୟା ଦେସ୍‍ତୁ ଇନିକା ନି କଡ଼ଦିଙ୍ଗ୍‌ ଅନା ?"

6 ଆବେଟ୍‌ ଅବ୍ରାହାମ ଇର୍ହାନ୍‌, "ଜାଗାର୍‌ତା; ନା କଡ଼ଦିଙ୍ଗ୍‌ ଏସାଙ୍ଗ୍‌ ବା ଆବେନୁ ଅମା ! 7 ଏଣ୍ତେସ୍‌କି ଏମେ ମୁସୁକୁ ପୁର୍‌ତିଙ୍ଗ୍‌ ତିଆର୍‌କିତି ସଦାପ୍ରବୁ ମାପୁରୁ ନାଙ୍ଗିଁ ବୁବାରି ଇଲୁ ମାରି ଜନମ୍‌ ଦେସ୍‌ତାନ୍‌ ତାତାମାନାନ୍ ମାରି ନା ୱାଲେ ମିସାକିତାନ୍, ମାରି ମାପୁ ମି କୁଟୁମ୍‌ତିଙ୍ଗ୍ ଇୟା ଦେସ୍ ସିନି ଉଣ୍ତିଙ୍ଗ୍ ପାର୍‍ମାଣ୍ କିତାମାନାନ୍‌, ୱାନ୍ ନି ଆଗ୍‌ଡ଼ି ନିଜେଦି ଦୁତ୍ ପୋକନାନ୍; ଆବେଟ୍‌କୁ ନିନୁ ନା ମାରିନ୍‌ ପେଡ଼ି ଉଣ୍ତିଙ୍ଗ୍ ଆବେଣାନ୍‌ ଉଣ୍ତ୍ରି କାନ୍ୟା ତାନି । 8 ଆୟା ଦେସ୍‍ତାନ୍ ଏମେ କାନ୍ୟା ୱାଦେଙ୍ଗ୍‌ ୱାନି ଉଣ୍ତିଙ୍ଗ୍‌ କେଏତ୍‌, ଆର୍‌ତିଙ୍ଗ୍ ନିନୁ ନା ଇୟା ପାର୍‍ମାଣ୍‌ତାନ୍ ମୁକ୍‌ଡ଼ାନି; ମାତର୍‌ ନିନୁ ନା କଡ଼ଦିଙ୍ଗ୍ ଆୟା ଦେସ୍‍ତୁ ଅତେଙ୍ଗ୍‌ ଆଟ୍‌ଇ ।" 9 ଆବେଟ୍ ଆୟା ସାକର୍‌ ନିଜେଦି ମାଲିକ୍ ଅବ୍ରାହାମଦି କୁରୁଗୁଦୁ କିୟୁ ଇଡିଜି ଆୟା ବିସୟ୍‌ତାନ୍ ପାର୍‍ମାଣ୍ କିତାନ୍ ।

10 ତାନିୱେନେକା ଆୟା ସାକର୍‌ ନିଜେଦି ମାଲିକ୍‌ତି ଉଟ୍‌କା ଲୋଇରାନ୍‌ ଦାସ୍‌ଗୋଟା ଉଟ୍‌କୁ ମାରି ନିଜେଦି ମାଲିକ୍‌ତି ୱିଜୁ ଜାତିଦି ନେଗି ଜିନିସ୍‌ କିୟୁଦୁ ଆସ୍‌ସି ସଲ୍‌ସି ଅରାମନହରୟିମ୍ ଦେସ୍‍ତି ନାହୋର ଗାଡ଼୍‌ଦୁ ସର୍ହାନ୍ । 11 ତାନିୱେନେକା ୱେଡ଼ା ସନିୱାଲେ, ଏମେ ବେଡ଼ାଦୁ ଆଇଲିକ୍‌ ଏରୁ ତାଗି ୱାନେ, ଆୟା ବେଡ଼ାଦୁ ୱାନ୍ ଗାଡ଼୍‌ଦି ଆତ୍ରେ କୁଇଁ ଲାକୁତୁ ଉଟ୍‌କାଙ୍ଗ୍ ମେଣ୍ତେଙ୍ଗ୍ ଗଟ୍‌କିଜି ବାସିସ୍‍କିତାନ୍ । 12 ମାରି ଇୟା ପାର୍‌ତନା କିତାନ୍, "ନା ମାଲିକ୍ ଅବ୍ରହାମଦି ପ୍ରବୁ ମାପୁରୁ, ମାଡ଼ିସ୍‌ କିଜିନା, ନେରୁ ନା ଆଗିଡ଼ି ନେଗିଦିନ୍‌ ତାପିସ୍ କିଆ, ମାରି ନା ମାଲିକ୍‌ ଅବ୍ରହାମ ଉଣ୍ତିଙ୍ଗ୍ ଦୟା କିଆ । 13 ସୁଡ଼ୁଆ, ନାନୁ ଇୟା କୁଇଁ ଲାକୁତୁ ନିର୍ହା ମାନା, ମାରି ଇୟା ଗାଡ଼୍‌ତି ଲୋକା ରିପା ଆଇଲିକ୍‌ ଏରୁ ଅନି ଉଣ୍ତିଙ୍ଗ୍ ୱାଜିନେ; 14 ୱାନିକା ଲୋଇରାନ୍‌ ଏମେ ଆଇଲିଦିଙ୍ଗ୍‌, ନିନୁ ନି ନକି ପାଡ଼ିକ୍‍ସି ନାଙ୍ଗିଁ ଏରୁ ଉଟ୍‍ପିସ୍ କିଆ, ଇୟା ମାଟା ଇରିଙ୍ଗ୍‌ ଆୟା ଆଇଲି ଜଦି ଇନାତ୍‌, ଉଣୁଆ, ନାନୁ ନି ଉଟ୍‌କାଙ୍ଗ୍‌ ବା ଉଟ୍‍ପିସ୍‌ କିନା, ଆର୍‌ତିଙ୍ଗ୍ ୱାଦ୍ ନି ସାକର୍‌ ଇସ୍‍ହାକ୍ ଉଣ୍ତିଙ୍ଗ୍ ନି ବଦାଦି କାନ୍ୟା ଆପିତ୍; ଆବେଟ୍ ନିନୁ ନା ମାଲିକ୍‌ ଉଣ୍ତିଙ୍ଗ୍ ଦୟା କିତିମାନି, ଇକା ନାନୁ ନେସ୍‍ନା ।"

15 ଇୟା ମାଟା ଇନୁବୁ ଇନୁବୁ ଅବ୍ରାହାମଦି ନାହୋର ଦରୁଦି ତଡ଼ାନ୍‌ତି ଆଇମା ମିଲ୍‍କାଦି ମାରିନ୍‌ ଜେ ବତୁୟେଲ୍, ତାନି ଆଇଲି ରିବିକା ଜୁକିଦୁ ସାଟି ଆସ୍‌ସି ଆତ୍ରେ ୱାତାତ୍ । 16 ଆୟା ଆଇଲି ବେସି ସୁନ୍ଦିରି ମାରି ପେଡ଼ିଆଇକାତ୍‌ ମାର୍ହାତ୍‌, ମାରି ଆମା ମେମାରି ୱାଲେ ମିସାଏତା ମାର୍ହାତ୍‌, ୱାଦ୍‌ କୁଇଁ ଲାକ୍‌ତୁ ସଲ୍‌ସି ସାଟିଦୁ ଏରୁ ବର୍ତିକିଜି ଡ଼େସି ୱାଜିନାତ୍,

17 ଇୟା ବେଡ଼ାଦୁ ଆୟା ସାକର୍‌ ଉରୁକ୍‍ସି ସଲ୍‍ସି ତାନି ୱାଲେ ବେଟ୍‍ଆଜି ଇର୍ହାନ୍‌, "ନାନୁ ମାଡ଼ିସ୍‌ କିଜିନା, ନି ସାଟିଦି ଏରୁ ନାଙ୍ଗିଁ ଉଣ୍ତେଙ୍ଗ୍ ସିଦା ।"

18 ଆବେଟ୍ ୱାଦ୍ ଇର୍ହାତ୍, "ଆଜ୍ଞା, ଉଣୁଆ," ଇକା ଇନ୍‍ଜି ୱାଦ୍ ବେଗି ସାଟି କିୟୁଦାନ୍‌ ରେପ୍‌ସି ୱାନିଙ୍ଗ୍ ଉଣ୍ତେଙ୍ଗ୍ ସିତାତ୍ । 19 ମାରି ୱାନିଙ୍ଗ୍ ଉଟ୍‍ପିସ୍‌ତି ୱେନେକା ଇର୍ହାତ୍, "ମାରି ନି ଉଟ୍‌କୁ ୱିଜୁ ଏରୁ ଉଣ୍ତେଙ୍ଗ୍‌ ୱିସ୍‍ନି ସାନ୍ଦି ନାନୁ ଏରୁ ତାନାସିନା ।" 20 ଆବେଟ୍ ୱାଦ୍ ବେଗି କୁଣ୍ତଦୁ ସାଟିଦାନ୍ ଏରୁ ୱାକ୍‍ସି ଡ଼େସି ଏରୁ ତାନି ଉଣ୍ତିଙ୍ଗ୍ କୁଇଁ ଲାକୁତୁ ଉରୁକ୍‍ସି ସଲ୍‌ସି ୱିଜୁ ଉଟ୍‌କା ଉଣ୍ତିଙ୍ଗ୍ ଏରୁ ତାତାତ୍ । 21 ଆବେଟ୍ ଆୟା ମେମାରି ତାନି ଉଣ୍ତିଙ୍ଗ୍ ତିର୍‌ ଆଜି ସୁଡ଼ୁଜିମାର୍ହାନ୍; ମାରି, ସଦାପ୍ରବୁ ୱାନି ସନି ସାରିଦୁ ପୁରା କିନାନ୍ ନୋ ସିଲେ, ଆକା ନେସ୍‌ନି ଉଣ୍ତିଙ୍ଗ୍ ସୁପ୍‍ସାପ୍ ମାର୍ହାନ୍‌ ।

22 ମାରି, ଉଟ୍‌କୁ ଏରୁ ଉଟି ୱେନେକା ଆୟା ମେମାରି ତାନି ଉଣ୍ତିଙ୍ଗ୍ ଅଦ୍‌ତୁଲା ବାଙ୍ଗାରାମ୍‌ତି ମୁଜିଦୁ ଆରାନି ବାସ୍‌ୱା ମାରି କିୟୁଦି ଉଣ୍ତିଙ୍ଗ୍‌ ଏକ୍‌ତୁଲା ବାଙ୍ଗାରାମ୍‌ତି ଆରାନି ରୁଣ୍ତି ଗାଜୁଙ୍ଗ୍ ଅସି ଇର୍ହାନ୍‌, 23 ଆୟା ସାକର୍‌ ଇର୍ହାନ୍‌, ନିନୁ ଏ ଗାଡ଼ି, ନାଙ୍ଗିଁ ଇନ୍‍ଆଁ । ମି ବୁବା ଇନ୍‌ଡ୍ର ନାଙ୍ଗିଁ ନାଡ଼ା ମାନ୍‍ଡ୍ରେଙ୍ଗ୍ ଇନିକା ଜାଗା ମାନାତ୍ ? 24 ଆବେଟ୍ ୱାଦ୍ ଇର୍ହାତ୍, "ନାହୋରଦି କୁଡ଼ାଦାନ୍‌ ମିଲ୍‍କା ମାଡ଼ାନ୍‌ ଜନମ୍‌ଆତି ଗାଡ଼ି ଜେ ବତୁୟେଲ୍, ନାନୁ ୱାନି ଗାଡ଼ି ।" 25 ୱାଦ୍ ମାରି ଇର୍ହାତ୍, "ମା ପିରି ନି ପଡ଼ୁ ନାଣ୍ତ ମାନାତ୍, ମାରି ନାଡ଼ା ମାନ୍‍ଡ୍ରେଙ୍ଗ୍‌ ଜାଗା ମାନାତ୍ ।"

26 ନାସ୍ତିୱାଲେ ଆୟା ମେମାରି ତାଲା ପାଡ଼ିକ୍‍ସି ପ୍ରବୁଦି ଉଦେସ୍‍ତାନ୍‌ ମାଡ଼ିସ୍ କିଜି ଇର୍ହାନ୍‌, 27 "ନା ମାଲିକ୍ ଅବ୍ରହାମଦି ପ୍ରବୁ ମାପୁରୁ ଦନ୍ୟ ଆପିନ୍‌, ଏଣ୍ତେସ୍ ୱାନ୍ ନା ମାଲିକ୍ ଉଣ୍ତିଙ୍ଗ୍ ଦୟା ମାରି ନେଗିପାଣି କିନିଉଣ୍ତିଙ୍ଗ୍ ୱେନେକା ଆଏତାନ୍; ମାରି ପ୍ରବୁ ନାଙ୍ଗିଁ ନା ମାଲିକ୍‌ତି କୁଟୁମ୍‌ତି ଇଲୁସାରିଦୁ ତାତା ମାନାନ୍ ।"

28 ମାରି ଆୟା ରିପା ଆଇଲି ଉରୁକ୍‍ସି ସଲ୍‌ସି ନିଜେଦି ୟାୟାଦି ଇଲୁଦୁ ମାନି ଲୋକାଙ୍ଗ୍‌ ଇୟା ମାଟା ୱେର୍‍ତାତ୍ ।

29 ମାରି ରିବିକାଦି ଅରେନ୍‌ ତଡ଼ାନ୍‌ ମାର୍ହାନ୍‌, ୱାନି ଦରୁ ଲାବନ୍; ଆୟା ଲାବନ୍ ଆୟା ଲୋକ୍‌ତି ଉଣ୍ତିଙ୍ଗ୍‌ କୁଇଁ ଲାକୁତୁ ଉର୍‌କୁସି ସର୍ହାନ୍‌ । 30 ମାରି ଆୟା ଲୋକ୍‌ ନାଙ୍ଗିଁ ଇୟା ମାଟା ଇର୍ହାନ୍‌, ନିଜେଦି ତାଙ୍ଗିଁ ରିବିକା ୱେୟୁଦାନ୍ ଇକା ୱେନିଜି ମାରି ତାଙ୍ଗିଁଦି ମୁଜି ମାରି କିୟୁଦୁ ଗାଜୁଙ୍ଗ୍ ସୁଡ଼ୁଜି ଆୟା ଲୋକ୍‌ତି ଲାକ୍‌ତୁ ସର୍ହାନ୍‌, ମାରି ୱାନିଙ୍ଗ୍‌ କୁଇଁ ଲାକୁତୁ ଉଟ୍‌କା ୱାଲେ ନିର୍ହି ମାନିକା ସୁଡ଼ୁଜି ଇର୍ହାନ୍‌, 31 "ଏ ପ୍ରବୁଦି ଆର୍ସିବାଦ୍‌ଦି ଲୋକ୍‌, ଲୋଇ ରାଆ, ନିନୁ ଏନ୍ଦା ଆତ୍ରେ ନିର୍ହିମାନି ? ନାନୁ ତ ଇଲୁ ମାରି ଉଟ୍‌କା ଉଣ୍ତିଙ୍ଗ୍ ଜାଗା ତିଆର୍ କିତାମାନା ।"

32 ଆବେଟ୍ ଆୟା ମେମାରି ଇନ୍‌ଡ୍ର ଡ଼ୁଗିଜି ଉଟ୍‌କା ସାଜୁ କୁତ୍‍ତାନ୍‌, ୱାନ୍ ୱାନିକାଙ୍ଗ୍ ପିରି ମାରି ପଡ଼ୁ ସିତାନ୍, ମାରି, ୱାରି ସାଙ୍ଗରି କାଲୁକୁ ନର୍‌ବାନି ଉଣ୍ତିଙ୍ଗ୍‌ ଏରୁ ସିତାନ୍‌ । 33 ତାନିୱେନେକା ୱାନି ଆଗିଡ଼ି ଉଣି କାଦି ୱିଜୁ ତାତାନ୍‌; ମାତର୍‌ ୱାନ୍‌ ଇର୍ହାନ୍‌, "କାବୁର୍‌ ମାଟା ୱେର୍‌ର୍ହି ସାନ୍ଦି ନାନୁ ଉଣୁଏ ।" ଆବେଟ୍ ଲାବନ୍ ଇର୍ହାନ୍‌, "ଇନ୍‍ଆଁ ।"

34 ଆବେଟ୍ ୱାନ୍‌ ଇର୍ହାନ୍‌, "ନାନୁ ଅବ୍ରାହାମତି ସାକର୍‌ ।" 35 ସଦାପ୍ରବୁ ନା ମାଲିକ୍‌ତିଙ୍ଗ୍‌ ନାଣ୍ତ ଆର୍ସିବାଦ୍‌ କିତାମାନାନ୍, ଆଦେଙ୍ଗ୍ ୱାନ୍‌ ନାଣ୍ତ ମାଜନ୍‌ ଲୋକୁ ଆତାମାନାନ୍‌; ମାରି ପ୍ରବୁ ୱାନିଙ୍ଗ୍ ମାନ୍ଦା ମାନ୍ଦା ମେଣ୍ତେଙ୍ଗ୍ ମାରି ଗରିଏଙ୍ଗ୍‌, ୱେଣ୍ତି, ବାଙ୍ଗାଁରାମ୍‍ ମାରି ମେମାରି ନି ଆଇମା ସାକରଙ୍ଗୁ, ମାରି ଉଟ୍‌ ଗଦ ସିତାମାନାନ୍‌ । 36 ମାରି ନା ମାଲିକତି ଆଡ଼ି ସାରା ଡକିରି କାଡ଼ାଦୁ ୱାନି ଉଣ୍ତିଙ୍ଗ୍ ଅରେନ୍ କଡ଼ ଜନମ୍‌ କିତାମାନାତ୍‌ ମାରି ୱାନ୍ ୱାନିଙ୍ଗ୍ ନିଜେଦି ୱିଜୁ ସିତାମାନାନ୍ । 37 ମାରି ନା ମାଲିକ୍ ପାର୍‍ମାଣ୍ କିବିସ୍‍ସି ଇର୍ହାନ୍‌, ମାପୁ ଏମେୱାରିମାନୁ ବାସା କିଜିନାପ୍, ନିନୁ ମା କଡ଼ ପେଡ଼ି ଉଣ୍ତିଙ୍ଗ୍ ଆୟା କିଣାନ୍ ଦେସ୍‍ଦି ଲୋକା ମାଡ଼ାନ୍ ଏମେ କାନ୍ୟା ଆସ୍ କିମା; 38 ମାତର୍‌ ନା ବୁବାରି କୁଟୁମ୍‌ତି ଲୋକା ଲାକୁତୁ ସଲ୍‍ସି ନା ମାରିନ୍‌ ଉଣ୍ତିଙ୍ଗ୍ କାନ୍ୟା ତାଗା ।

39 ନାସ୍ତିୱାଲେ ନାନୁ ନା ମାଲିକତିଙ୍ଗ୍‌ ଇର୍ହା, "ନେସ୍‌ତି ଏମେ କାନ୍ୟା ନା ୱାଲେ ରେଉସୁଗି ।"

40 ଆବେଟ୍ ୱାନ୍ ଇର୍ହାନ୍‌, ମାପୁ ଏମେ ପ୍ରବୁଦି ଲାକ୍‌ତୁ ବୁଲାସାଲା କିଜିନାପ୍, ୱାନ୍ ନି ୱାଲେ ନିଜେଦି ଦୁତ୍ ପୋକ୍‍ସି ନି ସନିକା ରକିୟା କିନାନ୍; ଆବେଟ୍ ନିନୁ ନା ଲୋକାମାଣାନ୍‌, ନା ବୁବାଦି କୁଟୁମ୍‌ତାନ୍‌ ନା ମାରିନ୍‌ ଉଣ୍ତିଙ୍ଗ୍‌ କାନ୍ୟା ତାନି; 41 ମାରି ମିରୁ ମା କୁଟୁମ୍‌ତି ଲୋକା ଲାକୁତୁ ସରିଙ୍ଗ୍‌ ଇୟା ପାର୍‌ମାଣ୍‌ତାନ୍‌ ମୁକ୍‌ଡ଼ାନି; ଜଦି ୱାର୍‌ କାନ୍ୟା ସିଏର୍‌, ଆର୍‌ତିଙ୍ଗ୍‌ ପାର୍‍ମାଣ୍‌ତାନ୍‌ ମୁକ୍‌ଡ଼ାନି । 42 ଆବେଟ୍ ନେରୁ ନାନୁ ଇୟା କୁଇଁ ଲାକୁତୁ ସଲିସ୍ ଇୟା ପାର୍‌ତନା କିତା, ଏ ନା ମାଲିକ୍ ଅବ୍ରାହାମତି ପ୍ରବୁ ମାପୁରୁ, ନିନୁ ନା ତାତି କାବୁର୍‌ ସତ୍‌ କିନି, 43 ସୁଡ଼ୁଆ, ନାନୁ ଇଲେଇ ଇୟା ନେଗି କୁଇଁ ଲାକୁତୁ ନିର୍ହାମାନା । ଆବେଟ୍‌ ଏରୁ ତାଗି ୱାନି ଏମେ ରିପା ଆଇଲିଦିଙ୍ଗ୍‌ ନାନୁ ଇନା, ନି ସାଟିଦାନ୍‌ ନାଙ୍ଗିଁ ଉବୁଡ଼ି ଏରୁ ଉଣ୍ତେଙ୍ଗ୍ ସିଦା । 44 ମାରି ଆୟା ଆଇଲି ଜଦି ଇନାତ୍, ନିନୁ ଉଣୁଆ ମାରି ମି ଉଟ୍‌କା ଉଣ୍ତିଙ୍ଗ୍ ବା ଏରୁ ତାନାସିନା; ଆର୍‌ତିଙ୍ଗ୍ ୱାଦ୍ ନା ମାଲିକତି କଡ଼ ଉଣ୍ତିଙ୍ଗ୍ ପ୍ରବୁଦି ମାଡ଼ାନ୍ ଟିକ୍ କାନ୍ୟା ଆପିତ୍ ।

45 ଇୟା ମାଟା ନାନୁ ମନେ ମନେ ଇଜିମାର୍ହା, ଇୟା ବେଡ଼ାଦୁ ରିବିକା ଗୁଜାମି ସାଟି ଆସ୍‌ସି ଆତ୍ରେ ୱାତାତ୍ । ମାରି ୱାଦ୍‌ କୁଇଁ ଲୋଇ ସଲ୍‍ସି ଏରୁ ତାତାତ୍ ନାନୁ ଇର୍ହା, ମାଡ଼ିସ୍‌ କିଜିନା, ନାଙ୍ଗିଁ ଏରୁ ସିଦା ।

46 ଆବେଟ୍ ୱାଦ୍ ବେଗି ଜୁକ୍‌ତାନ୍‌ ସାଟି ରେପିସ୍‌ ଇର୍ହାତ୍‌, ଉଣୁଆ, ମାରି ମି ଉଟ୍‌ଆଙ୍ଗ୍ ବା ଉଟ୍‍ପିସ୍ କିଆ; ଆବେଟ୍ ନାନୁ ଉଟା, ମାରି ୱାଦ୍ ଉଟ୍‌ଆଙ୍ଗ୍ ଉଟ୍‍ପିସ୍‌ କିତାତ୍ । 47 ତାନିୱେନେକା ନାନୁ ତାନିଙ୍ଗ୍‌ ୱେନେବାତା, ନିନୁ ଏ ଗାଡ଼ି ? ଆବେଟ୍ ୱାଦ୍ ଇର୍ହାତ୍, ନାହୋରଦି କୁଡ଼ାଦି ମିଲ୍‍କାଦି ମାରିନ୍‌ ଜେ ବତୁୟେଲ୍, ନାନୁ ୱାନି ଗାଡ଼ି । ଆବେଟ୍ ନାନୁ ତାନି ମୁଜିଦୁ ବାସ୍‌ୱା ମାରି କିୟୁଦୁ ଗାଜୁଙ୍ଗ୍‌ ଆରିସ୍‍ କିତା । 48 ମାରି ନାନୁ ତାଲା ପାଡ଼ିକ୍‌ସି ପ୍ରବୁଦି ଉଦେସ୍‍ତାନ୍ ମାଡ଼ିସ୍ କିତା, ମାରି ଜଏନ୍‌ ନା ମାଲିକତି ମାରିନ୍‌ ଉଣ୍ତିଙ୍ଗ୍‌ ୱାନି ଲୋକା ଆଇଲି ଲୋସ୍‍ନି ଉଣ୍ତିଙ୍ଗ୍ ନାଙ୍ଗିଁ ଟିକ୍ ସାରିଦୁ ତାତାନ୍‌, ନା ମାଲିକ୍ ଅବ୍ରହାମଦି ଆୟା ପ୍ରବୁ ମାପୁରୁଦି ଦନ୍ୟବାଦ୍ କିତା । 49 ଆବେଟ୍ ମିରୁ ଜଦି ନା ମାଲିକତି ୱାଲେ ଦୟା ମାରି ସତ୍ ବ୍ୟବହାର୍‌ କିଦେଙ୍ଗ୍ ବଦା ଆନାତ୍, ଆର୍‌ତିଙ୍ଗ୍‌ ଆକା ଇନ୍‍ଡ୍ରୁ; ମାରି ଜଦି ଆଇଦେର୍‍, ଆକାବା ଇନ୍‍ଡ୍ରୁ; ଆବେଟ୍ ନାନୁ ଉଣିତୋରିନ୍‌ ସିଲେତିଙ୍ଗ୍‌ ଡେବିରିତୋରିନ୍‌ ଡ଼େସିସନା ।

50 ନାସ୍ତିୱାଲେ ଲାବନ୍ ମାରି ବତୁୟେଲ୍ ଇର୍ହାର୍‌, "ପ୍ରବୁଦି ମାଡ଼ାନ୍‌ ଇୟା ଗଟ୍‌ନା ଆତାମାନାତ୍, ଇବେଟ୍‌ ମାପୁ ନେଗିକା ନି ତାଗ୍‌ଇକା ଇନିକା ଇନ୍‌ଡ୍ରେଙ୍ଗ୍‌ ଆଟ୍ଏପ୍‌ । 51 ସୁଡ଼ୁଆ, ରିବିକା ଇବେ ମାନାତ୍, ତାନିଙ୍ଗ୍‌ ଆସ୍‌ସୋ ସାଙ୍ଗ୍‍ଆ, ପ୍ରବୁଦି ବାକ୍ୟ ଇସାବ୍‌ତାନ୍‌ ୱାଦ୍ ନି ମାଲିକତି ମାରିନ୍‌ଦି ଆଡ଼ି ଆପିତ୍ ।" 52 ନାସ୍ତିୱାଲେ ଅବ୍ରାହାମଦି ସାକର୍‌ ୱାରିମାଡ଼ାନ୍‍କୁ ଇୟା ମାଟା ୱେର୍ହି ଦାପ୍ରେ ପ୍ରବୁଦି ଉଦେସ୍‍ତାନ୍ ମାଡ଼ିସ୍ କିତାନ୍ । 53 ତାନିୱେନେକା ଆୟା ସାକର୍‌ ୱେଣ୍ତି ମାରି ବାଙ୍ଗାରାମ୍‌ତି ଆରାନିକେଙ୍ଗ୍‌ ମାରି ୱାତିଙ୍ଗ୍‌ ସପ୍‍ସି ରିବିକେଙ୍ଗ୍‌ ସିତାନ୍‌; ମାରି ତାନି ତଡ଼ାନ୍‌ତିଙ୍ଗ୍‌ ମାରି ୟାୟାଏଙ୍ଗ୍‍ ବା ଦାରାଦି ଜିନିସ୍‌ ସିତାନ୍ ।

54 ଆବେଟ୍‌ ୱାନ୍ ମାରି ୱାନି ସାଙ୍ଗର୍‌ ଉଣୁଜି ତିନିଜି ଆବେନୁ ନାଡ଼ାମାର୍ହାର୍‌, ଆବେଟ୍ ୱାର୍ ସାଲିଦିନେ ନିଙ୍ଗିଁଜି, ଆୟା ସାକର୍‌ ଇର୍ହାନ୍‌, "ନା ମାଲିକତି ଲାକୁତୁ ସନି ଉଣ୍ତିଙ୍ଗ୍‌ ନାଙ୍ଗିଁ ସାରି ସିଦାଟ୍ ।"

55 ଆବେଟ୍ ରିବିକାଦି ତଡ଼ାନ୍‌ ମାରି ୟାୟା ଇର୍ହାର୍‌, "ଇୟା ଗାଡ଼ି ମା ଲାକୁତୁ ଉଡ୍ରି ୱାରାମ୍‌, ସିଲେତିଙ୍ଗ୍‌ ଦାସ୍‌ଦିନ୍‍ ମାନିତ୍, ଆବେଟ୍ ୱାଦ୍ ସଲିତ୍ ।"

56 ମାତ୍ର ୱାନ୍‌ ୱାରିଙ୍ଗ୍ ଇର୍ହାନ୍‌, "ନାଙ୍ଗିଁ ୱେଡ଼ା କିବିସ୍ କିମାଟ୍‌, ଏଣ୍ତେସ୍ ପ୍ରବୁ ନା ସନି ସାରି ପୁରା କିତାମାନାନ୍‌; ଇଲେଇ ନିଜେ ମାଲିକତି ଲାକୁତୁ ସନି ଉଣ୍ତିଙ୍ଗ୍ ନାଙ୍ଗିଁ ପୋକ୍‍ତୁ ।"

57 ଆବେଟ୍ ୱାର୍ ଇର୍ହାର୍‌, "ମାପୁ ଆଇଲିଦିଙ୍ଗ୍‌ କୁକ୍‍ସି ତାନିଙ୍ଗ୍ ୱେନ୍‍ବାନାଟ୍‌ ।" 58 ତାନିୱେନେକା ୱାର୍ ରିବିକାଙ୍ଗେ କୁକ୍‍ସି ୱେନ୍‌ବାତାର୍‌, "ନିନୁ ଇନିକା ଇୟା ଲୋକ୍‌ତି ୱାଲେ ସନି ?" ଆବେଟ୍ ୱାଦ୍ ଇର୍ହାତ୍‌, "ହୁଁ ନାନୁ ସନା ।"

59 ନାସ୍ତିୱାଲେ ୱାର୍ ନିଜେଦି ତାଙ୍ଗିଁ ରିବିକେଙ୍ଗ୍ ମାରି ତାନି ଦାସ୍‌ଙ୍ଗ୍‌, ମାରି ଅବ୍ରହାମଦି ସାକର୍‌ ମାରି ୱାରି ଲୋକାଙ୍ଗ୍ ସପ୍‍ତା ସିତାର୍‌ 60 ମାରି ରିବିକେଙ୍ଗ୍ ଆର୍ସିବାଦ୍‌ କିଜି ଇର୍ହାନ୍‌,

"ନିନୁ ମା ତାଙ୍ଗିଁ, ଆଜାର୍‌ ଆଜାର୍‌ ଲୋକାରି ୟାୟା ଆନି;

ମି କୁଟୁମ୍‌ ନିଜେଦି ସାତ୍ରୁରି ଗାଡ଼୍‌ ଅଦିକାର୍ କିନାର୍‌ ।"

61 ତାନିୱେନେକା ରିବିକା ମାରି ତାନ ତାନି ସାକର୍‌ଙ୍ଗୁଁ ନିଙ୍ଗିଁଜି ଉଟ୍‌ ମୁସୁକୁ ଏକ୍‌ସି ଆୟା ଲୋକ୍‌ତି ୱେନେକା ୱେନେକା ସର୍ହାର୍‌ । ଇୟାୱାଜା ଆୟା ସାକର୍‌ ରିବିକେଙ୍ଗ୍ ଆସ୍‌ସି ସର୍ହାନ୍‌ । 62 ଆୟା ବେଡ଼ାଦୁ ଇସ୍‍ହାକ୍ ଉଣେରି ତରିଟି ଦେସ୍‍ଦୁ ବାସା କିଜିମାର୍ହାନ୍‌ ବେର ଲହୟ ରୋୟି ଦରୁଦି ବାଡିଦୁ ସଲିସି ଡ଼େସି ୱାତାମାର୍ହାନ୍‌ । 63 ମାରି, ୱାନ୍‌ ମିଲିମିଲିକା ବୁଲାନି ଉଣ୍ତିଙ୍ଗ୍ କିଡ଼ିଇଦୁ ସର୍ହାମାର୍ହାନ୍‌; ଆବେଟ୍ ମାରିଜି ବେସ୍‌ସି ଉଟ୍‌କୁ ୱାନିକା ସୁଡ଼ୁତାନ୍‌ । 64 ନାସ୍ତିୱାଲେ ରିବିକା ମାରିଜି ବେସ୍‌ସି ଇସ୍‍ହାକ୍‍ଦିଙ୍ଗ୍ ସୁଡ଼ୁଜି ଉଟ୍‌ ମୁସୁକୁରାନ୍ ରେତାତ୍ । 65 ମାରି ୱାଦ୍ ଆୟା ଅବ୍ରାହାମତିଙ୍ଗ୍‌ ୱେନ୍‍ବାତାତ୍, "ମା ୱାଲେ ବେଟ୍‍ଆଦେଙ୍ଗ୍ ଜେ କିଡ଼ିଇ ତରିନ୍‌ ୱାଜିନାନ୍, ଆୟା ଲୋକୁ ଏନ୍ ?" ଆବେଟ୍ ସାକର୍‌ ଇର୍ହାନ୍‌, "ୱାନ୍ ନା ମାଲିକ୍," ଆବେଟ୍ ରିବିକା ଅଡ଼ଣି ଅସି ନିଜେଦିଙ୍ଗ୍ ପିଡ଼ିଗାତାତ୍ ।

66 ତାନିୱେନେକା ଆୟା ସାକର୍‌ ଇସ୍‍ହାକ୍‌ଦିଙ୍ଗ୍‌ ନିଜେ ପାଣିଦି ୱିଜୁ କାତା ୱେର୍‌ତାନ୍‌ । 67 ନାସ୍ତିୱାଲେ ଇସ୍‍ହାକ୍ ରିବିକେଙ୍ଗ୍ ଆସ୍‌ସି ନିଜେଦି ୟାୟା ସାରାଦି ଗୁଡ଼ାଦୁ ଆସ୍‌ସି ଅସି ତାନିଙ୍ଗ୍ ପେଡ଼ି ଆତାନ୍; ମାରି ୱାଦ୍ ୱାନିଙ୍ଗ୍ ଜିବନ୍‌ନୋତାତ୍ । ଆବେଟ୍ ଇସ୍‍ହାକ୍ ଆଇସି ସାତି ଦୁକ୍‌ତାନ୍‌ ସାନ୍ତି ପୋଇତାନ୍ ।