1 ତାନିୱେନେକା ଜାକୁବ ସନିୱାଲେ, ମାପୁରୁଦି ଦୁତ୍‍କୁ ୱାନି ୱାଲେ ବେଟ୍‌ଆତେ । 2 ନାସ୍ତିୱାଲେ ଜାକୁବ ୱାରିଙ୍ଗ୍‌ ସୁଡ଼ିଜି ଇର୍ହାନ୍‌, "ଇୟାକାର୍ ମାପୁରୁଦି ମାନ୍ଦା; ଆଦେଙ୍ଗ୍ ଆୟା ବାଡିଦି ଦରୁ *ମହନିୟମ୍‌ ଇଟ୍‍ତାନ୍ ।"

3 ତାନିୱେନେକା ଜାକୁବ ନିଜେଦି ଆଗିଡ଼ି ସେୟିର ଦେସ୍‍ତି ଇଦୋମ ଗାଡ଼ଦୁ ତୋଡ଼ାନ୍‌ ଏସୌ ଲାକ୍‌ତୁ କାବୁର୍‌ ସିନିୱାରିଙ୍ଗ୍ ପୋକ୍‌ତାନ୍ । 4 ମାରି, ୱାନ୍‌ ୱାରିଙ୍ଗ୍ ଇୟା ମାଟା ଇର୍ହାନ୍‌, "ମିରୁ ନା ମାଲିକ୍ ଏସୌଦିଙ୍ଗ୍ ଇନିଦେର୍, ନି ସାକର୍‌ ଜାକୁବ ନିଙ୍ଗିଁ ୱେର୍‍ତାନ୍, ନାନୁ ଲାବନ ଲାକୁତୁ ବାସାଜି ମାର୍ହା, ନେରୁ ସାନ୍ଦି ନାନୁ ୱେଡ଼ାକିତା । 5 ନା ଡ଼ାକୁକଡିଙ୍ଗ୍‌, ଗଦ, ମେଣ୍ତେଙ୍ଗ୍‌ ମାନ୍ଦା, ଗୋରିଏଙ୍ଗ୍‌, ମାରି ସାକର୍‍ଙ୍ଗୁ ମାନାର୍‌, ମାରି, ନାନୁ ନିଜେଦି ମାଲିକ୍ ଆଗିଡ଼ି ଦୟା ପୋଇନି ଉଣ୍ତିଙ୍ଗ୍ ନି ଲାକୁତୁ କାବୁର୍ ପୋକ୍‍ତା ।"

6 ତାନିୱେନେକା କାବୁର୍‌ ସିନିକାର୍‌ ଡ଼େସି ୱାଜି ଜାକୁବଙ୍ଗ୍ ଇର୍ହାର୍‌, "ମାପୁ ନି ତୋଡ଼ାନ୍ ଏସୌ ଲାକୁତୁ ସର୍ହାମାରାପ୍, ୱାନ୍ ସାର୍‌ସ ଲୋକାଙ୍ଗ୍ ଆସ୍‌ସି ନି ୱାଲେ ବେଟ୍‍ଗାଟ୍‌ ଆଦେଙ୍ଗ୍ ୱାଜିନାନ୍‌ ।" 7 ତାନିୱେନେକା ଜାକୁବ ନାଣ୍ତ ତିଲାଜି ମାରି ତିର୍‍ଗିଜି ତିର୍‍ଗିଜି ତିଲାତାନ୍, ମାରି ସାଙ୍ଗ ଲୋକାଙ୍ଗ୍ ମାରି ମେଣ୍ତେଙ୍ଗ୍‌ ଡ଼ାକୁକଡିଙ୍ଗ୍ ୱିଜୁ ମାନ୍ଦା ମାରି ଉଟ୍‌ଆଙ୍ଗ୍‌ ୱେର୍‌ଏ ୱେର୍‌ଏ ରୁଣ୍ତି ମାନ୍ଦା କିଜି ଇର୍ହାନ୍‌, 8 "ଏସୌ ୱାଜି ଜଦି ଉଣ୍ତ୍ରି ଦଲଦିଙ୍ଗ୍ ସାପିସ୍ କିନାନ୍, ଆତିଙ୍ଗ୍‌ ଆଇ ମାନ୍ଦା ଜିଜି ଉରୁକ୍‍ସି ସନେ ।"

9 ନାସ୍ତିୱାଲେ ଜାକୁବ ଇର୍ହାନ୍‌, "ଏ ନା ବୁବା ଅବ୍ରହାମଦି ମାପୁରୁ, ଏ ନା ବୁବା ଇସ୍‍ହାକଦି ମାପୁରୁ, ଏ ପ୍ରବୁ, ନିନୁ ନିଜେ ନାଙ୍ଗିଁ ଇର୍ହିମାର୍ହି, ନିନୁ ନିଜେଦି ଦେସ୍ ମାରି କୁଟୁମ୍‌ ଲାକୁତୁ ଡ଼େସିସାଙ୍ଗ୍‍ଆ, ଆବେଟ୍‌ ମାପୁ ମି ନେଗିକା କିନାପ୍ । 10 ନିନୁ ଇୟା ଦାସ୍ ଉଣ୍ତିଙ୍ଗ୍ ଏମେ ଦୟା ମାରି ଏମେ ୱିଜୁ ବିସ୍‍ବାସ୍ ୱିକ୍‍ତିମାନି, ନାନୁ ଆବେଣି ଇସ୍‍ରିକା ବା ପୋଇନିକା ଜଗ୍ ସିଲେତ୍; ଏଣ୍ତେସ୍‌କି ନାନୁ ନିଜେଦି ବାଡିଗା ଆସ୍‌ସି ଇୟା ଜର୍ଦନ ନାତାମାର୍ହା, ମାତର୍‌ ଇଲେଇ ନାନୁ ରୁଣ୍ତିଦଲ ଆତାମାନା । 11 ମାଡ଼ିସ୍‌ କିଜିନା, ନା ଦାଦାଦି କିୟୁଦାନ୍, ଏସୌଦି କିୟୁଦାନ୍ ନାଙ୍ଗିଁ ରକିଆ କିଆ; ଇରିଙ୍ଗ୍‌ ନାନୁ ୱାନିଙ୍ଗ୍ ତିଲାଜିନା, ନେସ୍‍ତି ୱାନ୍ ୱାଜି ନାଙ୍ଗିଁ ମାରି ଆଇସିକାଙ୍ଗ୍‌ ମାରି କଡ଼ରିଙ୍ଗ୍ ସାପିସ୍ କିନାନ୍ । 12 ନିନୁ ତ ଇର୍ହିମାନି, ମାପୁ ଏଣ୍ତେସ୍‌ବା ନି ନେଗିକା କିନା, ମାରି ସାମୁଦୁର୍ ପାଡ଼ିଦି ଏମେ ବାଲି ଲେକିସ୍ କିଦେଙ୍ଗ୍ ଆଏତ୍‌, ତାନି ୱାଜା ମି କୁଟୁମ୍‌ ପିରିସ୍ କିନାପ୍ । 13 ମାରି ଜାକୁବ ଆୟା ବାଡିଦୁ ଆୟା ନାଡ଼ା ତେବାତାନ୍; ମାରି ୱାନି ଲାକୁତୁ ଇନିକା ମାର୍ହାତ୍‌, ଆବେଟାନ୍‌ ନିଜେଦି ଦାଦା ଏସୌ ଉଣ୍ତିଙ୍ଗ୍ ଦାନ୍‌ ତିଆର୍ କିତାନ୍; 14 ଅର୍ତାତ୍, ଦୁଇସ ମୁଣ୍ତ୍ ତାଡ଼ି ଗୋରିଏଙ୍ଗ୍‌ ମାରି କୋଡ଼େ ମୁଣ୍ତ୍‌ ପତୁ ଗୋରିଏଙ୍ଗ୍‌, ଦୁଇସ ମୁଣ୍ତ୍‌ ତାଡ଼ି ମେଣ୍ତେଙ୍ଗ୍ ମାରି କୋଡ଼େ ମୁଣ୍ତ୍‌ ପତୁ ମେଣ୍ତେଙ୍ଗ୍‌, 15 ମାରି ପାଲୁସିନି ତିରିସ୍‌ ମୁଣ୍ତ୍‌ ତାଡ଼ି ଉଟ୍‌କୁ ମାରି ପିଲେକ୍‌ ମାରି ଚାଲିସ୍ ମୁଣ୍ତ୍‌ ଡ଼ାକୁ ମାରି ଦାସ୍ ମୁଣ୍ତ୍‌ କଡିଙ୍ଗ୍‌, ମାରି କୋଡ଼େ ମୁଣ୍ତ୍‌ ତାଡ଼ି ଗଦଙ୍ଗ୍ ମାରି ଦାସ୍‌ ମୁଣ୍ତ୍‌ ପତୁ ଗଦଙ୍ଗ୍‌ ଉଣ୍ତାକିତାନ୍ । 16 ତାନିୱେନେକା ମାନ୍ଦା ୱିଜୁ ୱେର୍‌ଏ ୱେର୍‌ଏ କିଜି ନିଜେଦି ଦାସରି କିୟୁଦୁ ଉଣ୍ତ୍ରି ମାନ୍ଦା ସର୍ପେକିଜି ୱାରିଙ୍ଗ୍ ଆଦେସ୍ ସିତାନ୍, ମିରୁ ନା ଆଗିଡ଼ି ଆଗିଡ଼ି ସାନ୍‌ଡ୍ରୁ, ମାରି ନାଡ଼ିମି ନାଡ଼ିମି ବାଡି ଇଡ୍‌ଜି ୱିଜୁ ମାନ୍ଦାଦିଙ୍ଗ୍‌ ୱେର୍‌ଏ କିଦୁ ।" 17 ମାରି ୱାନ୍ ପାର୍‌ତୁମ୍‌ ଦାସତିଙ୍ଗ୍ ଇୟା ଆଦେସ୍ ସିତାନ୍, "ନା ଦାଦା ଏସୌ ବେଟ୍‍ ବୁଡ଼ାତିଙ୍ଗ୍‌, ୱାନ୍ ଜଦି ୱେନ୍‍ବାନାନ୍‌, ନିନୁ ଏମେୱାନି ସାକର୍‌ ? ଏମେ ତୋରିଙ୍ଗ୍ ସଲ୍‌ସିନି ? ମାରି ମି ଆଗିଡ଼ିମାନି ଇୟା ୱିଜୁ ଏମେୱାନିନ୍ଦି ? 18 ନିନୁ ୱେର୍‌ନି, ଇୟା ୱିଜୁ ନି ସାକର୍‌ ଜାକୁବୱି, ଇୟାୱିଜୁ ଦାନ୍‌ ମା ମାଲିକ୍ ଏସୌଦି ଉଣ୍ତିଙ୍ଗ୍ ପୋକ୍‍ତାମାନାନ୍; ସୁଡୁଆ, ୱାନ୍ ୱେନେକା ୱେନେକା ୱାଜିନାନ୍ ।" 19 ଇୟାୱାଜା ୱାନ୍ ରୁଣ୍ତି ମାରି ମୁଣ୍ତ୍ରି ମାନ୍ଦାଦି ୱେନେକା ୱାନି ୱିଜୁ ଦାସରିଙ୍ଗ୍ ଆଦେସ୍ ସିଜି ଇର୍ହାନ୍‌, "ଏସୌ ୱାଲେ ବେଟ୍ ଆତିଙ୍ଗ୍‌, ମିରୁ ଇୟାୱାଜା ମାଟା ଇନିଦେର୍‌ ।" 20 ମାରି ଇନିଦେର୍‌, "ସୁଡୁଆ, ନି ସାକର୍‌ ଜାକୁବ ନି ୱେନେକା ୱାଜିନାନ୍; ଇରିଙ୍ଗ୍‌ ୱାନ୍ ଅଡ଼୍‍ବିତାନ୍, ଆଗିଡ଼ି ଦାନ୍‌ ପୋକ୍‍ସି ୱାନିଙ୍ଗ୍ ସାନ୍ତି କିଜି ୱେନେକା ୱାନି ୱାଲେ ବେଟ୍ ଆନାନ୍‌, ଆବେଟ୍ ୱାନ୍ ନା ଉଣ୍ତିଙ୍ଗ୍ କେମା କିତିଙ୍ଗ୍ କିଦେଙ୍ଗ୍ ଆଟ୍‍ନାନ୍ ।" 21 ଇୟାୱାଜା ୱାନି ଆଗିଡ଼ି ଦାନ୍‌ ଜିନିସ୍‌ ସର୍ହାତ୍, ମାତର୍‌ ୱାନ୍ ନିଜେ ଆୟା ନାଡ଼ା ନିଜେ ଦଲତୁ ତେବାତାନ୍‌ ।

22 ତାନିୱେନେକା ୱାନ୍ ନାଡ଼ାକାନେ ନିଙ୍ଗିଁଜି ନିଜେଦି ରୁଣ୍ତି ଆଡ଼ିକାଙ୍ଗ୍‌ ମାରି ରୁଣ୍ତି ଇସ୍ରି ଆଡ଼ିକାଙ୍ଗ୍‌ ମାରି ଏଗାର୍ ଲୋକ୍ କଡ଼ରିଙ୍ଗ୍ ଜବକ୍‌ ଗାଡାଦୁ ନାପ୍‍ସି ସିନି ଉଣ୍ତିଙ୍ଗ୍ ଅର୍‌ସେ ଅତାନ୍ । 23 ମାରି, ୱାରିଙ୍ଗ୍ ଗାଡା ନାପିସି ସିଜି ନିଜେଦି ୱିଜୁ ଜିନିସ୍‌ ଆୟା ପାଡ଼ାକା ପୋକ୍‍ତାନ୍ 24 ନାସ୍ତିୱାଲେ ଜାକୁବ ଆବେନୁ ଅରେନ୍‌ନେ ମାର୍ହାନ୍‌; ଆବେଟ୍ ଅରେନ୍‌ ଲୋକୁ ସାଲିଦି ସାନ୍ଦି ୱାନି ୱାଲେ ଜୁଦ୍‌ କିତାନ୍ । 25 ମାତର୍‌ ୱାନିଙ୍ଗ୍ ଜିଣାଦେଙ୍ଗ୍ ଆଟ୍‍ଏତାନ୍ ୱାନ୍ ଜାକୁବଦି ସୁତୁଡ଼୍‌ ପେଡ଼େନ୍‌ତି ସାନ୍ଦି ବାଡିଦୁ ଡାକ୍‌ତାନ୍; ୱାନି ୱାଲେ ଇୟାୱାଜା ଜୁଦ୍‌ କିତାନ୍‌ଆକା ଜାକୁବଦି ସୁତୁଡ଼ୁସାନ୍ଦି ପିସ୍‍ଡ଼ାତାତ୍‌ । 26 ତାନିୱେନ୍‌କା ଆୟା ଲୋକୁ ଇର୍ହାନ୍‌, "ନାଙ୍ଗିଁ ଡ଼ିସ୍‍ଆ," ଇରିଙ୍ଗ୍‌ ୱିଗିତାତ୍ । ଆବେଟ୍ ଜାକୁବ ଇର୍ହାନ୍‌, "ନିନୁ ନାଙ୍ଗିଁ ଆର୍ସିବାଦ୍‌ କିଏତିଙ୍ଗ୍, ନାନୁ ନିଙ୍ଗିଁ ଡ଼ିସ୍‍ଏ ।"

27 ଡ଼େସି ଆୟା ଲୋକୁ ଇର୍ହାନ୍‌, "ନି ଦରୁ ଇନିକା ?" ୱାନ୍ ଇର୍ହାନ୍‌, "ଜାକୁବ ।"

28 ୱାନ୍ ଇର୍ହାନ୍‌, "ନିନୁ ଜାକୁବ ଦରୁଦାନ୍‌ ମାରି ୱିଙ୍ଗ୍ଇଁ, ମାତର୍‌ ଇସ୍ରାଏଲ ମାପୁରୁଦି ୱାଲେ ଜଦା ଦରୁଦାନ୍‌ ୱିଙ୍ଗିଁନି; ଇରିଙ୍ଗ୍‌ ନିନୁ ମାପୁରୁ ମାରି ଲୋକା ୱାଲେ ଜୁଦ୍‌ କିଜି ଜିଣାତିମାନି ।"

29 ନାସ୍ତିୱାଲେ ଜାକୁବ ୱେନ୍‍ବାଜି ଇର୍ହାନ୍‌, "ନାନୁ ମାଡ଼ିସ୍‌ କିଜିନା, ନି ଦରୁ ଇନ୍‍ଆଁ ।" ୱାନ୍ ଇର୍ହାନ୍‌, "ନିନୁ ଏନ୍‍ଦାନିଙ୍ଗ୍ ଜେ ନା ଦରୁ ୱେନ୍‌ବାଜିନି ?" ଆବେଟ୍‍କୁ ୱାନ୍ ଆବେନୁ ଜାକୁବଙ୍ଗ୍ ଆର୍ସିବାଦ୍‌ କିତାନ୍ ।

30 ନାସ୍ତିୱାଲେ ଆୟା ବାଡିଦି ଦରୁ ପନୁଏଲ ମାପୁରୁଦି ମୋକମ୍ ଇଟ୍‍ତାନ୍; ଏଣ୍ତେସ୍‌କି ଜାକୁବ ଇର୍ହାନ୍‌, "ନାନୁ ମାପୁରୁଦି ମୋକମ୍‌ ସାମ୍‌ନାସାମ୍‌ନି ସୁଡ଼ୁତିଙ୍ଗ୍ ବା ନା ଜିବନ୍‌ ଜିତାତ୍‌ ।" 31 ତାନିୱେନେକା ଜାକୁବ ପନୁଏଲ ନାତି ୱେନେକା, ୱେଡ଼ା ସତାତ୍; ମାତର୍‌ ୱାନ୍ ସୁତୁଡ଼୍‌ସାନ୍ଦି ପିସ୍‌ଡ଼ାତି ଉଣ୍ତିଙ୍ଗ୍‌ ସଟା ଆଜି ବୁଲାତାନ୍ । 32 ଇୟାଉଣ୍ତିଙ୍ଗ୍‌ ଇସ୍ରାଏଲଦି ଲୋକୁ ନେରୁ ସାନ୍ଦି ଏମେ ସୁତୁଡ଼୍‌ସାନ୍ଦି ପେଡ଼େତି ମୁସ୍‌କୁରି କୁରୁଗୁକାଣ୍ତା ତିନ୍‌ଏର୍‌, ଇରିଙ୍ଗ୍‌ ୱାନ୍‌ ଜାକୁବଦି କୁରୁଗୁଦି ସାନ୍ଦିସିରାଦୁ ଡାକ୍‌ତା ମାର୍ହାନ୍‌ ।