1 ଇୟାୱେନ୍‌କା ପୁରା ରୁଣ୍ତି ବାର୍ସେକ୍‌ ୱେନେକା ପାରୋ ରାଜା ଇୟା ଲବୁ ସୁଡ଼ୁତାନ୍‌; ସୁଡ଼ୁଦୁ, ୱାନ୍ ନିଡ଼ି ଗାଡା ପାଡ଼ି ନିର୍‌ଆମାନାନ୍ । 2 ମାରି ସୁଡ଼ୁଦୁ, ଗାଡା ଲୋଇରାନ୍ ସାତ୍‌ଗଟା ବାଲ୍‌ସ୍ତି ନେଗି ଡ଼ାକୁ ନିଙ୍ଗିଁଜି ଲାଟାଦୁ ସାରାଦେଙ୍ଗ୍ ଆସ୍‌ତେ । 3 ଆୟାୱାନିକା ୱେନେକା ସୁଡ଼ୁଦୁ, ଆଇ ସାତ୍‌ଗଟା ସାକିସିଲି ମାରି ୱାର୍‌ତି ଡ଼ାକୁ ଗାଡାଦାନ୍‌ ସୋସି ଗାଡାପାଡ଼ିଦୁ ଆୟା ଡ଼ାକା ଲାକୁତୁ ନିରେଏ । 4 ଆବେଟ୍ ଆୟା ସାକିସିଲି ନି ୱାର୍‌ତି ଡ଼ାକୁ ଆୟା ସାତ୍‌ଗଟା ଦୁମା ନେଗି ଡ଼ାକାଙ୍ଗ୍ ତିର୍ହେ ପକ୍‍ତେ । ଇୟା ବେଡ଼ାଦୁ ପାର ରାଜାଦି ସୁସ୍‍କାଣୁକୁ ରୁଙ୍ଗିତେ ସର୍ହେ । 5 ତାନିୱେନେକା ୱାନ୍ ସୁଜ୍‌ଜି ମାରିଉଣ୍ତ୍ରିଦେବା ଲବୁ ସୁଡ଼ୁତାନ୍; ଉଣ୍ତ୍ରି କେଡ଼୍‌ତୁ ସାତୋଗଟା ପୁରାଦିକା ନି ନେଗି ପାଣ୍ତିତି ସାତ୍‌ଗଟା ପୁରାଦି ନି ପାଣ୍ତିତି ନେଗି ସେରେନ୍‌କୁ ସତେ । 6 ତାନିୱେନ୍‌କା ମୋକମ୍‌ ତରିଟି ଗାଲିଦାନ୍‌ ୱାର୍‌ତି ମାରି ସାତଗୋଟା ପାତଲ୍‌ ପାସି ପାଣ୍ତିତାତ୍‌ । 7 ମାରି, ଆୟା ସାତଗୋଟା ପାତଲ୍‌ ପାସି ଇୟା ସାତଗୋଟା ମୋଟାଦି ମାରି ପୁରାଦି ପାସିଦିଙ୍ଗ୍‌ ଡ଼ିଙ୍ଗିଁତାତ୍‌ । ଇୟାୱାଜା ସମୟତୁ ପାରୋ ରାଜାଦି ସୁସ୍‌କାଣ୍‌କୁ ରୁଙ୍ଗିଁତେ ଆକା, ଲୋବୁ ଇଜି ନେସ୍‌ତାନ୍‌ । 8 ମାରି, ସାଲ୍‌ଦି ୱାନି ମୋନ୍‌ ତିର୍‌ଗିତାତ୍‌, ଆବେଟ୍‌ ୱାନ୍‌ ଲୋକାଙ୍ଗ୍‌ ପୋକ୍‌ସି ମିସର ଦେସ୍‌ତି ଗୁଣିଆ ନି ପଣ୍ତିତ୍‌ ୱିଜେରିଙ୍ଗ୍‌ କୁକିସ୍‌ତାନ୍‌; ମାତର୍‌ ପାରୋ ରାଜା ୱାରି ଲାକ୍‌ତୁ ନିଜେଦି ଲୋବୁ ସୁଡ଼ୁତି ମାଟା ୱେର୍‌ତାନ୍‌, ୱାରି ଲୋଇ ଏନ୍‌ ପାରୋ ରାଜେଙ୍ଗ୍‌ ତାନି ଅର୍ତ ୱେର୍‌ତେଙ୍ଗ୍‌ ଆଟ୍‌ଏତାନ୍‌ । 9 ନାସ୍ତିୱାଲେ ପେରି ଅଙ୍ଗୁର୍‌ରସ୍‌ ସିନିକାନ୍‌ ପାରୋ ରାଜାଦି ଆଗ୍‌ଡ଼ି ମାଡ଼ିସ୍‌ କିତାନ୍‌, ନେରୁ ନାନୁ ନିଜେଦି ଦସ୍‌ ଏତ୍‌ କିଜିନା । 10 ପାରୋ ରାଜା ନି ଦାସ୍‌ ନା ଉଣ୍ତିଙ୍ଗ୍‌ ମାରି ପେରି ୱାର୍‌ନିୱାନି ଉଣ୍ତିଙ୍ଗ୍‌ ରିସା ଆଜି ମାଙ୍ଗିଁ ରକିୟା କିନି ସେନାପତିଦି ଜଇଲ୍‌ତୁ କେର୍‌ପ୍‌ସି ଇଟ୍‌ତାମାର୍ହାନ୍‌ । 11 ଆବେଟ୍‌ ମାପୁ ରିଅପ୍‌ ଉନ୍‌ଡ୍ରି ନାଡ଼ା ଲୋବୁ ସୁଡ଼୍‌ତାପ୍‌; ମାରି, ରିଏରି ଲୋବୁ ରୁଣ୍ତି ରକମ୍‌ତି ଅର୍ତ ଆତାତ୍‌ । 12 ଆବେନୁ ମା ୱାଲେ ରକିୟା କିନି ସେନାପତିଦି ସାକର୍‌ ଅରେନ୍‌ ଏବ୍ରିୟ ମୁରୁଲି ମାର୍ହାନ୍‌; ମାପୁ ୱାନିଙ୍ଗ୍‌ ଲୋବୁଦି ମାଟା ୱେର୍‌ତାପ୍‌, "ୱାନ୍‌ ମାଙ୍ଗିଁ ତାନି ଅର୍ତ ୱେର୍‌ତାନ୍‌, ରିଏରି ଲୋବୁ ଇସାବ୍‌ତାନ୍‌ ଅର୍ତ ୱେର୍‌ତାନ୍‌ । 13 ଆବେଟ୍‌ ୱାନ୍‌ ମା ରିଏରିଙ୍ଗ୍‌ ଏଣ୍ତେସ୍‌ ଅର୍ତ ୱେର୍‌ତାମାର୍ହାନ୍‌, ଆୟାୱାଜା ଗଟାତାତ୍‌; ନାନୁ ଆଗିଡ଼ିରି ପଦଦୁ ଦାୟିତ୍‌ ପୋଇତା ମାରି ୱାନ୍‌ ପାସି ପୋଇତାନ୍‌ ।" 14 ନାସ୍ତିୱାଲେ ପାରୋ ରାଜା ଜୋସେପ୍‌ତିଙ୍ଗ୍‌ କୁକ୍‌ସିତେଙ୍ଗ୍‌ ପୋକ୍‌ତାନ୍‌, ଲୋକୁ ଜଇଲ୍‌ତାନ୍‌ ୱାନିଙ୍ଗ୍‌ ବେଗି ତାତାର୍‌; ୱାନି ମେସାମ୍‌କୁ ସିନ୍‌ପାଜି ମାରି ନେଗି ଆଙ୍ଗିଁ ଆରାଜି ପାରୋ ରାଜାଦି ଆଗିଡ଼ି ନିର୍ହାନ୍‌ । 15 ଆବେଟ୍‌ ପାରୋ ରାଜା ଜୋସେପ୍‌ତିଙ୍ଗ୍‌ ଇର୍ହାନ୍‌, "ନାନୁ ଉଣ୍ତ୍ରି ଲୋବୁ ସୁଡ଼ୁତାମାନା, ଏନ୍‌ ତାନି ଅର୍ତ ୱେର୍‌ତେଙ୍ଗ୍‌ ଆଟ୍‌ଏଜିନାର୍‌; ମାତର୍‌ ନାନୁ ନି ବିସୟ୍‌ତାନ୍‌ ୱେର୍ହାମାନା, ଜେ ନିନୁ ଲୋବୁ ୱେରିଙ୍ଗ୍‌, ତାନି ଅର୍ତ ୱେର୍‌ତେଙ୍ଗ୍‌ ଆଟ୍‌ନି ।" 16 ଆବେଟ୍‌ ଜୋସେପ୍‌ ଇର୍ହାନ୍‌, "ଆକା ନା ଅଦିକାର୍‌ ସିଲେ, ମାତର୍‌ ମାପୁରୁ ପାରୋ ରାଜେଙ୍ଗ୍‌ ନେଗି ମାଟା ୱେର୍‌ନାନ୍‌ ।" 17 ଆବେଟ୍‌ ପାରୋ ରାଜା ଜୋସେପ୍‌ତିଙ୍ଗ୍‌ ୱେର୍‌ତାନ୍‌, "ନା ଲୋବୁଦୁ, ସୁଡ଼୍‌ଆ, ନାନୁ ଗାଡା ପାଡ଼ି ନିର୍ହାମାର୍ହା ।" 18 ଆବେଟ୍‌ ଗାଡା ଲୋଇରାନ୍‌ ସାତ୍‌ଗୋଟା ବାଲ୍‌ସ୍ତି ନେଗି ଡ଼ାକୁ ସଅସି ପାଡ଼ିଦି ଲାଟାଦୁ ସାରାଦେଙ୍ଗ୍‌ ଆସ୍‌ତେ । 19 ଇୟାୱେନ୍‌କା ତାମେ ୱେନ୍‌କା ମାରି ସାତ୍‌ଗୋଟା ପାତାଲା ନି ପେଡ଼େକ୍‌ସତି ଡ଼ାକୁ ସଅସି ୱାତେ; ନାନୁ ତାମେନାନି ସାକିସିଲି ଡ଼ାକୁ ୱିଜୁ ମିସର ଦେସ୍‌ତୁ ଏସାଙ୍ଗ୍‌ ସୁଡ଼୍‌ଏ । 20 ମାରି, ଆୟା ଦାପ୍ରେ ପାତଲ୍‌ ଡ଼ାକୁ ଆଗିଡ଼ିରି ବାଲ୍‌ସିତି ଆୟା ସାତ୍‌ଗୋଟା ଡ଼ାକାଙ୍ଗ୍‌ଁ ତିର୍ହେପୋକ୍‌ତେ । 21 ମାତର୍‌ ତିର୍ହି ୱେନ୍‌କା ତାମେ ପଟା ତିର୍ହି ୱାଜା ତର୍‌ଏତାତ୍‌; ୱାକୁ ଆଗିଡ଼ିରି ୱାଜା ପାତଲ୍‌ ତେବାତେ । ଇୟାନାନି ବେଡ଼ାଦୁ ନା ସୁସ୍‌କାଣୁକୁ ରୁଙ୍ଗିଁତେ । 22 ଇୟାୱେନ୍‌କା ନାନୁ ଲୋବୁଦୁ ସୁଡ଼୍‌ତା ଜେ, ସୁଡ଼୍‌ଆ, ଉନ୍‌ଡ୍ରି ସେରେନ୍‌ଦୁ ସାତ୍‌ଗୋଟା ପୁରାମାନି ମାରି ନେଗି ସେରେନ୍‌ ସତାତ୍‌ । 23 ଆୟା ୱେନେକା ଆଗିଡ଼ିରି ଗାଲିଦାନ୍ ୱାର୍‌ତିକା, ପାତଲ୍‌ ସାତଗୋଟା ସେରେନ୍‌କୁ ସତେ । 24 ମାରି, ଆୟା ପାତଲ୍‌ତି ସେରେନ୍‌, ଆୟା ନେଗି ସାତ୍‌ଗଟା ସେରେନ୍‌କାଙ୍ଗ୍‌ ଡ଼ିଙ୍ଗିଁତାତ୍‌ । ଇୟା ଲବୁ ସୁଡ଼ୁତିକା ନାନୁ ଗୁଣିଆରିଙ୍ଗ୍ ଇର୍ହା, ମାତର୍‌ ଏନ୍‌ ଇବେଣି ଅର୍ତ ମାଙ୍ଗିଁ ୱେର୍‌ତେଙ୍ଗ୍‌ ଆଟ୍‍ଏତାର୍ ।

25 ଆର୍‌ତିଙ୍ଗ୍‌ ଜୋସେପ୍‌ ପାରଙ୍ଗ୍ ଇର୍ହାନ୍‌, "ପାରୋ ରାଜାଦି ରୁଣ୍ତି ଲବୁ ସୁଡ଼ୁତିକା ଉନ୍‌ଡ୍ରେ; ମାପୁରୁ ଏମେକା କିଦେଙ୍ଗ୍ ବଦା, ଆକା ପାରଦି ଉଣ୍ତିଙ୍ଗ୍‌ ୱେର୍‌ତା ମାନାନ୍ । 26 ଆୟା ସାତ୍‌ଗୋଟା ନେଗି ଡ଼ାକୁ ସାତ୍‌ ବାର୍ସେକ୍‌ ଆୟାୱାଜା, ମାରି, ଆୟା ସାତ୍‌ଗୋଟା ନେଗି ସେରେନ୍‌କୁ ବା ସାତ୍‌ ବାର୍ସେକ୍‌ ଆୟାୱାଜା, ଲବୁ ସୁଡ଼ୁତିକା ଉନ୍‌ଡ୍ରେନେ । 27 ଆୟା ୱେନ୍‌କା ନିଙ୍ଗିଁତି ଆୟା ସାତ୍‌ଗୋଟା ଡ଼ାକୁ ପାତଲ୍‌ତି ସାକିସିଲି ଡ଼ାକୁ ମାରି ଆଗିଡ଼ିରି ଗାଲିଦାନ୍‌ ୱାରିତି ସାତ୍‌ଗୋଟା ସେରେନ୍‌କୁ ଦୁର୍ବିକଦି ସାତ୍‌ ବାର୍ସେକ୍‌ ସମାନ୍‌ । 28 ନାନୁ ପାରୋଙ୍ଗ୍ ୱେର୍‌ତାମାନା, ମାପୁରୁ ଏମେକା କିଦେଙ୍ଗ୍ ବଦା, ଆକା ପାରୋଙ୍ଗ୍ ତର୍‍ତାମାନାନ୍‌ । 29 ସୁଡ଼ୁଦୁ, ୱିଜୁ ମିସର ଦେସ୍‍ତୁ ସାତ୍‌ ବାର୍ସେକ୍‌ ନେଗେନ୍‌ ପାସି ଆନାତ୍‌ । 30 ତାନିୱେନ୍‌କା ସାତ୍‌ ବାର୍ସେକ୍‌ ପାସି ଆଏତ୍‌; ଆୟା ନେଗି ସାତ୍‌ ବାର୍ସେକ୍‌ତିଙ୍ଗ୍‌ ମିସର ଦେସ୍‌ତି ଲୋକୁ ବାଣାନାର୍‌; ମାରି ଦୁର୍ବିକ ଦେସ୍‍ତିଙ୍ଗ୍‌ ନାଷ୍ଟୁ କିନାତ୍‌ । 31 ମାରି ୱେନ୍‍କାରି ଦୁର୍ବିକ ମାଡ଼ାନ୍ ଦେସ୍‍ତୁ ଦୁର୍ବିକ ନେସ୍‍ତେଙ୍ଗ୍‌ ଆଏତ୍; ମାତର ଆକା ବେସି କାସ୍ଟୁଦିକା ଆନାତ୍ । 32 ପାରୋ ରାଜା ରୁଣ୍ତିଦେବେଙ୍ଗ୍ ଲବୁ ସୁଣିନି ମାଟା ଇକା ଜେ, ମାପୁରୁ ମାଡ଼ାନ୍ ଆକା ସତ୍‌ ଆତାମାନାତ୍, ମାରି ମାପୁରୁ ଆକା ବେଗି ଗଟେକିବିସ୍‍ନାନ୍ ।

33 "ଆଦେଙ୍ଗ୍ ଇଲେଇ ପାରୋ ରାଜା ଅରେନ୍ ବୁଦି ମାନି ଲୋକୁ ସୁଡ଼ୁଜି ମିସର ଦେସ୍‍ ମୁସୁକୁ ଦାୟିତ୍‌ ସିଆ । 34 ପାରୋ ରାଜା ଇକା କିଆ, ମାରି ଦେସ୍‍ତୁ ବୁଦିମାନି ଲୋକାଙ୍ଗ୍‌ ବାସେକିଜି ସାତ୍‍ଗୋଟା ବାର୍ସୁ ଦୁର୍ବିକ ଆଇ ବେଡ଼ାଦୁ ମିସର ଦେସ୍‍ତୁ ପାସିଦି ପାସ୍‌ବାଗ୍‌ତାନ୍‌ ଉନ୍‌ଡ୍ରି ବାଗ୍‌ ଉଣ୍ତାକିପିନ୍ । 35 ଅର୍ତାତ୍, ୱାର୍ ଆୟା ୱାନି ନେଗି ବାର୍ସୁଦି ୱିଜୁ ପାସି ଉଣ୍ତାକିପିରି, ମାରି ୱିଜୁ ଗାଡ଼୍‌କାଙ୍ଗ୍ ଉଣି କାଦି ଉଣ୍ତିଙ୍ଗ୍ ପାରୋ ରାଜାଦି ଅଦିକାର୍‍ତାନ୍‌ ପାସି ଉଣ୍ତାକିଜି ରକିୟା କିଜି ଇଡିର୍ 36 ଇୟାୱାଜା ମିସର ଦେସ୍‍ତୁ ୱାନିଦିନ୍‌ତି ଦୁର୍ବିକଦି ସାତ୍ ନମ୍ୱର୍‌ତି ବାର୍ସୁ ଉଣ୍ତିଙ୍ଗ୍ ଦେସ୍‍ତି ଜିନି ଉଣ୍ତିଙ୍ଗ୍‌ ଆୟା ଉଣି କାଦି ଉଣ୍ତାତିମାରିଙ୍ଗ୍, ଦୁର୍ବିକ୍ୟ ମାଡ଼ାନ୍ ଦେସ୍ ନାଷ୍ଟୁ ଆଏତ୍‍ନି ।"

37 ନାସ୍ତିୱାଲେ ପାରୋ ରାଜା ମାରି ୱାନି ଦାସରି ଆଗିଡ଼ି ଇୟା ମାଟା ନେଗିକା ତରିତାତ୍ । 38 ଆବେଟ୍ ପାରୋ ରାଜା ନିଜେଦି ଦାସରିଙ୍ଗ୍‌ ଇର୍ହାନ୍‌, "ମାଡୁ ନ ଇୟାୱେନି ୱାଜା ମେମାରି ମାରି ପୋଇଦେଙ୍ଗ୍ ଆଟ୍‍ନିକା ? ଇୟାୱେନିମାନୁ ମାପୁରୁଦି ଆତ୍ମା ମାନାତ୍ ।" 39 ଆବେଟ୍ ପାରୋ ରାଜା ଜୋସେପ୍‍ତିଙ୍ଗ୍ ଇର୍ହାନ୍‌, "ମାପୁରୁ ନିଙ୍ଗିଁ ଇୟାୱିଜୁ ୱେର୍‍ତାମାନାନ୍, ଆଦେଙ୍ଗ୍ ନି ୱାଜା ବୁଦିମାନିକାନ୍ ମାରି ବୁଜାନିକାନ୍‌ ଏନ୍‌ ସିଲେନ୍; 40 ନିନୁ ମା ଦେସ୍‌ତି ମାଲିକ୍ ଆଆ; ମା ୱିଜୁ ଲୋକୁ ନି ମାଟା ମାନାପିର୍, କେବଲ ସିଂହାସନଦୁ ମାପୁ ନି ମାଡ଼ାନ୍ ମାପୁ ପେରିକାନ୍ ମାନାପ୍ ।" 41 ପାରୋ ରାଜା ଜୋସେପ୍‍ତିଙ୍ଗ୍ ମାରି ଇର୍ହାନ୍‌, "ସୁଡ଼ୁଆ, ନାନୁ ନିଙ୍ଗିଁ ୱିଜୁ ମିସର ଦେସ୍ ମୁସୁକୁ ସାସନ୍ କିଦେଙ୍ଗ୍‌ ଦାୟିତ୍‌ ସିତାପ୍ ।" 42 ତାନିୱେନେକା ପାରୋ ରାଜା ନିଜେଦି କିୟୁଦାନ୍ ନିଜେଦି ସନ୍ତକ କିତି ୱେତରି କୁତୁସି ଜୋସେପ୍‍ତି କିୟୁଦୁ ସିଜି ୱାନିଙ୍ଗ୍ ଅଡ଼ିନି ଆଙ୍ଗିଁ ଆରିସ୍‍ସି ୱାନି କକ୍‍ଲାଦୁ ବାଙ୍ଗାରାମ୍‍ତି ସେନ୍ ଆରିସ୍‍ତାନ୍ । 43 ମାରି, ୱାନିଙ୍ଗ୍ ନିଜେଦି ମାରିଉଣ୍ଡ୍ରି ରତଦୁ ଏକିସ୍‍କିତାନ୍; ମାରି ଲୋକୁ ୱାରି ଆଗିଡ଼ି ଆଗିଡ଼ି ମେଣ୍ତେଙ୍ଗ୍ ଗୁତ୍‌ତୁ ମେଣ୍ତେଙ୍ଗ୍ ଗୁତ୍‌ତୁ ଇଜି ୱେର୍‍ତାର୍ । ଇୟା ୱାଜା ୱାନ୍ ୱାନିଙ୍ଗ୍ ୱିଜୁ ମିସର ଦେସ୍ ମୁସୁକୁ ସାସନ୍ କିଦେଙ୍ଗ୍‌ ବାସେ କିତାନ୍ । 44 ତାନିୱେନେକା ପାରୋ ଜୋସେପ୍‍ତିଙ୍ଗ୍ ଇର୍ହାନ୍‌, "ନାନୁ ପାର ମାନା, ଇଲେଇ ନି ଆଦେସ୍ ସିଲେଣ୍ତା ଇୟାୱିଜୁ ମିସର ଦେସ୍‍ତୁ ଏମେ ଲୋକୁ କିୟୁ କାଲୁ ନିକ୍‍ତେଙ୍ଗ୍ ଆଟ୍‍ଏରେ ।" 45 ମାରି ପାରୋ ରାଜା ଜୋସେପ୍‍ତି ଦରୁ ସାପନତ୍ ପାନେହ ଇଟ୍‍ତାନ୍‌; ମାରି ଓନ୍ ଗାଡ଼୍‌ତୁ ବାସାନି ପୋଟିପେର ଦରୁଦି ଜାଜକତି ଆସନତ୍ ଦରୁଦି ଆଇଲି ୱାଲେ ୱାନି ପେଡ଼ି କିବିସ୍‌କିତାନ୍‌ । ତାନିୱେନେକା ଜୋସେପ୍ ଇୟାୱିଜୁ ମିସର ଦେସ୍‍ତୁ ବୁଲାସାଲା କିଜି ସୁଡ଼ୁତାନ୍ । 46 ଜୋସେପ୍ ତିରିସ୍ ବାର୍ସୁ ବୟସ୍ ବେଡ଼ାଦୁ ମିସ୍ରିୟ ରାଜା ପାରୋ ରାଜାଦି ଆଗିଡ଼ି ନିର୍ହାନ୍ ମାର୍ହାନ୍‌; ଆୟାଦାପ୍ରେ ଜୋସେପ୍ ପାର ରାଜାଦି ଲାକୁତୁରାନ୍ ସଲ୍‍ସି ମିସର ଦେସ୍‍ତି ୱିଜୁ ତରିନ୍‌ ବୁଲାସାଲା କିତାନ୍ । 47 ଆୟା ଦାପ୍ରେ ଆୟା ଦୁର୍ବିକ ଆଇ ସାତ୍ ନମ୍ୱର୍‌ତି ବାର୍ସୁ ବୁମିଦୁ ନାଣ୍ତଦାନ୍ ନାଣ୍ତ ପାସି ଆତାତ୍ । 48 ଜୋସେପ୍ ଆୟା ସାତ୍ ନମ୍ୱର୍‌ତି ବାର୍ସୁ ମିସର ଦେସ୍‍ତୁ ପାଣ୍ତିତି ପାସି ଉଣ୍ତା କିଜି ୱିଜୁ ଗାଡ଼୍‍କାନ୍ ଉଣ୍ତାକିତାନ୍; ମାରି ଏମେ ଏମେ ଗାଡ଼୍‍କୁ ୱିଜୁ ତରିଙ୍ଗ୍ ବୁମିଦୁ ଏସ ପାସି ପାଣ୍ତିତାତ୍, ଆକା ୱିଜୁ ଆୟା ଆୟା ଗାଡ଼୍‍କାନ୍ ଉଣ୍ତା କିତାର୍ । 49 ଇୟା ୱାଜା ଜୋସେପ୍ ସାମ୍‌ଦୁର୍‌ଦି ବାଲି ୱାଜା ନିସ ପାସି ନାଣ୍ତଦାନ୍ ଉଣ୍ତା କିତାନ୍ ଜେ, ଆକା ମାରି ଲେକିସ୍‍ କିଏତାର୍; ଇରିଙ୍ଗ୍‌ ଆକା ଲେକିସ୍‌ କିଦେଙ୍ଗ୍‌ ଆଟ୍‌ଇକା ମାର୍ହାତ୍‌ ।

50 ମାରି ଦୁର୍ବିକ୍‌ ବାର୍ସୁ ଆଗିଡ଼ି ଜୋସେପ୍‍ତିଙ୍ଗ୍ ରିଏର୍ କଡ଼ର୍ ଜନମ୍‌ ଆତାମାର୍ହାର୍‌, ଓନ୍ ଗାଡ଼୍‌ତୁ ବାସାନି ପୋଟିପେର ଜାଜକ ଆସନତ୍ ଦରୁଦି ଆଇଲି ୱାରିଙ୍ଗ୍ ଜନମ୍‌ କିତାମାର୍ହାତ୍ । 51 ଆବେଟ୍ ଜୋସେପ୍ ପେରିୱାନି ଦରୁ ମନଃସି* ଇଟ୍‍ତାର୍, ମାତର ୱାନ୍‌ ଇର୍ହାନ୍‌, "ମାପୁରୁ ନା ୱିଜୁ ଦୁଃକ୍‌ ମାରି ନିଜେଦି ପୁର୍ବେଦି ଇଲୁଦୁ କାସ୍ଟୁ ବାଣା କିତାମାନାନ୍‌ ।" 52 ମାରି ୱେନ୍‍କାରି କଡ଼ଦି ଦରୁ ଇପ୍ରୟିମ୍* ଇଟ୍‍ତାନ୍‌, ମାତର ୱାନ୍ ଇର୍ହାନ୍‌, "ନା ଦୁଃକ୍‌ ବଗାତି ଦେସ୍‍ତୁ ମାପୁରୁ ନାଙ୍ଗିଁ କଡ଼ର୍‌ ସିତାମାନାନ୍ ।"

53 ତାନିୱେନେକା ମିସର ଦେସ୍‍ତୁ ଗଟାତି ଦୁର୍ବିକ୍‌ ଆଇ ସାତ୍ ନମ୍ୱର୍‌ତି ବାର୍ସୁ ସେସ୍ ଆତାତ୍ । 54 ମାରି ଜୋସେପ୍‍ତି ମାଟା ଇସାପ୍‍ତାନ୍ ଦୁର୍ବିକ୍‌ଦି ସାତ୍ ନମ୍ୱର୍‌ତି ବାର୍ସୁ ଆରାମ୍‌ ଆତାତ୍; ଆବେଟ୍ ଆଇ ୱିଜୁ ଦେସ୍‍ତୁ ଦୁର୍ବିକ୍ୟ ୱାତାତ୍, ମାତର୍‌ ୱିଜୁ ମିସର ଦେସ୍‍ତୁ ଉଣିକା ମାର୍ହାତ୍‌ । 55 ମାରି, ୱିଜୁ ମିସର ଦେସ୍‍ତୁ ଦୁର୍ବିକ୍ୟ ଆର୍‍ତାତ୍, ଲୋକୁ ଉଣିତାନିଙ୍ଗ୍ ପାର ରାଜାଦି ଲାକୁତୁ ଆଡ଼୍‌ବାତାର୍‌; ଆବେଟ୍ ପାର ରାଜା ୱିଜୁ ମିସ୍ରିୟ ଲୋକାଙ୍ଗ୍ ଇର୍ହାନ୍‌, ମିରୁ ଜୋସେପ୍ ଲାକୁତୁ ସାନ୍‌ଡ୍ରୁ; ୱାନ୍ ଏମେକା ଇନାନ୍, ମିରୁ ଆକା କିଦୁ । 56 ନାସ୍ତିୱାଲେ ୱିଜୁ ଦେସ୍‍ତୁ ଦୁର୍ବିକ୍ୟ ଆତାତ୍, ଜୋସେପ୍ ୱିଜୁ ଜାଗାଦି ଗୁଦାମ୍ ରେସି ମିସ୍ରିୟ ଲୋକାଙ୍ଗ୍ ପାସି ପର୍‍ଦେଙ୍ଗ୍ ଆସ୍‍ସ୍ତାନ୍; ଇରିଙ୍ଗ୍‌ ମିସର ଦେସ୍‍ତୁ ନାଣ୍ତଦାନ୍ ନାଣ୍ତ ଦୁର୍ବିକ୍ୟ ଆତାତ୍ । 57 ମାରି ୱିଜୁ ଦେସ୍‍ତୁ ଲୋକୁ ମିସର ଦେସ୍‍ତୁ ପାସି କଣ୍ତେଙ୍ଗ୍ ଇଜି ଜୋସେପ୍ ଲାକୁତୁ ୱାତାର୍ । ଇରିଙ୍ଗ୍‌ ୱିଜୁ ଦେସ୍‍ତୁ ଦୁର୍ବିକ୍ୟ ନାଣ୍ତ ମାର୍ହାତ୍‌ ।