1 ତାନିୱେନେକା ମିଲିମିଲିକା ବେଡ଼ାଦୁ ଆୟା ରୁଣ୍ତି ସ୍ୱର୍ଗ ଦୁତ୍‍କୁ ସଦୋମଦୁ ଇଗାସର୍ହେ; ନାସ୍ତିୱାଲେ ଲୋଟ ସଦୋମ ଗାଡ଼୍‌ତି ଦୁୱାର୍‌ତୁ ବାସ୍‌ତା ମାର୍ହାନ୍‌ । ୱାରିଙ୍ଗ୍ ସୁଡ଼ୁଜି ୱାରି ୱାଲେ ବେଟ୍‍ ବୁଡ଼ାଦେଙ୍ଗ୍‌ ସର୍ହାନ୍, ମାରି ବୁମିଦୁ ମାଡ଼ିସ୍ କିଜି ଇର୍ହାନ୍‌ । 2 "ଏ ନା ପ୍ରବୁରୁ, ନାନୁ ମାଡ଼ିସ୍‌ କିଜିନା, ନେରୁ ନାଡ଼ା ନିଜେଦି ଇୟା ଦାସଦି ଇନ୍‌ଡ୍ର କାଲୁ ଇଡ୍‌ଜି ବାସା କିଦୁ ମାରି କାଲୁକୁ ନର୍‌ବାଦୁ; ଆବେଟ୍‍କୁ ନାଡ଼ାକାନେ ନିଙ୍ଗିଁଜି ସାଣ୍ତ୍ରୁଗାନି ।" ଆବେଟ୍ ୱାର୍ ଇର୍ହାର୍, "ସିଲେ; ମାପୁ ଦୁୱାର୍‌ତୁ ନାଡ଼ା ସୁଜ୍‌ନାପ୍ ।"

3 ମାତର୍‌ ଲୋଟ ବାର ବାର୍ ୱାରିଙ୍ଗ୍ କୁକ୍‍ନି ଉଣ୍ତିଙ୍ଗ୍‌ ୱାର୍ ୱାନି ୱାଲେ ସଲିସ୍ ୱାରି ଇନ୍‌ଡ୍ର ଡ଼ୁଗିତାର୍‌; ଆବେଟ୍ ୱାନ୍ ୱାରି ଉଣ୍ତିଙ୍ଗ୍ ସୟ୍‌ନିକା ମିସାଇ ରୁଟି ୱିଜୁ କାଦି ୱାର୍‌ତାର୍‌, ୱାର୍ ଉଟାର୍ । 4 ମାତର୍‌ ୱାର୍ ସୁଜିନି ଆଗିଡ଼ି ଆୟା ଗାଡ଼୍‌ତି ଲୋକୁ, ଅର୍ତାତ୍, ସଦୋମତି ମୁରୁକଡ଼ର ଡକ୍ରା ୱିଜୁ ଲୋକୁ ସାରିବେଡ଼ିତି ୱାଜି ୱାନି ଇନ୍‌ଡ୍ର ଗେରେଆତାର୍ । 5 ମାରି ଲୋଟଙ୍ଗ୍ କୁକ୍‍ସି ଇର୍ହାନ୍‌, "ନେରୁ ନାଡ଼ା ଏମେ ଲୋକୁ ମି ଇନ୍‌ଡ୍ର ୱାତାର୍, ୱାର୍ ଏମେ ? ୱାରିଙ୍ଗ୍ ସପ୍‌ସି ତାସି ମା ଲାକୁତୁ ତାଗାଟ୍‌ । ମାପୁ ୱାରିମାନୁ ପାପ୍‌ପାଣି କିନାପ୍ ।"

6 ଆବେଟ୍‍କୁ ଲୋଟ ଆତ୍ରେ ୱାଜି ସେର୍‍ଲା କେର୍‌ସି ଇର୍ହାନ୍‌, 7 "ଏ ତଡ଼ାନ୍‌କୁ, ନାନୁ ମାଡ଼ିସ୍‌ କିଜିନା, ଇୟାୱାଜା ପାପ୍‌ପାଣି କିମାଟ୍ । 8 ସୁଡ଼ୁଦୁ, ମେମାର୍‍ଙ୍ଗୁ ନା ରୁଣ୍ତି ଆଇଲିକ୍‌ ମାନେ, ୱାନିକାଙ୍ଗ୍‌ ମି ଲାକୁତୁ ତାସିନା, ମି ଆଗିଡ଼ି ଏମେକା ନେଗିକା, ଆକା ୱାନିକା ଉଣ୍ତିଙ୍ଗ୍‌ କିଦୁ, ମାତ୍ର ଆୟା ଲୋକା ଉଣ୍ତିଙ୍ଗ୍ ଇନିକା କିମାଟ୍, ଇରିଙ୍ଗ୍‌ ୱାର୍‌ କୁଡ଼ାଙ୍ଗ୍‌ ନା ଇନ୍‌ଡ୍ର ତେବାତା ମାନାର୍ ।" 9 ନାସ୍ତିୱାଲେ ୱାର୍ ଇର୍ହାର୍, "ଗୁସାଆ ।" ମାରି ଇର୍ହାନ୍‌, "ଇୟା ଲୋକୁ ମା ମାନୁ ବାସା କିଦେଙ୍ଗ୍ ୱାଜି ମା ବିସାର୍ କିନିକାନ୍‌ ଆଦେଙ୍ଗ୍ ବଦା କିଜିନାନ୍; ଇଲେଇ ୱାରିମାଡ଼ାନ୍ ନି ଉଣ୍ତିଙ୍ଗ୍‌ ମାରି ତାଗ୍‌ଇପାଣି କିନାଟ୍‌ ।" ଆବେଟ୍‌ ୱାର୍‌ ଆୟା ଲୋକୁ, ଅର୍ତାତ୍, ଲୋଟ ଉଣ୍ତିଙ୍ଗ୍‌ ଡାଟ୍‌ଆଜି ସେର୍‍ଲା ରୁକ୍‍ତେଙ୍ଗ୍‌ ସର୍ହାର୍‌ । 10 ମାତ୍ର ଆୟା ରିଏରି କିକୁ ସାକ୍‍ସି ଲୋଟଙ୍ଗ୍‍ ଇନ୍‌ଡ୍ର ଲୋଇ ନିଜେଦି ଲାକୁତୁ ରେଲିଜି ଅସି ସେର୍‍ଲା କେର୍‌ତାର୍ । 11 ମାରି, ସେର୍‍ଲା ଲାକୁତୁ ମାର୍‌ଇ ଇସ୍ରିକାର୍‌ ନି ପେରି ୱିଜେରିଙ୍ଗ୍ କାଣା କିବିସ୍‍ତାନ୍‌; ଆବେଟ୍‍କୁ ୱାର୍ ସେର୍‍ଲା ପୋଇଜି ପୋଇଜି ୱାନ୍ଦିତା ସର୍ହାର୍‌ ।

12 ତାନିୱେନେକା ଆୟା ରିଏର୍‌ ଲୋଟଙ୍ଗ୍ ଇର୍ହାର୍, "ଇୟାବାଡିଦୁ ମି ଲୋକୁ ମାରି ଏନ୍‌ ଏନ୍‌ ମାନାର୍ ? କନ୍‍ଲିର୍‌ ମାରି ମି କଡ଼ର୍ ଆଇଲିକ୍‌ ଏସୋଲୋକୁ ଇୟା ଗାଡ଼୍‌ଦୁ ମାନାର୍‌, ଆୟା ୱିଜେରିଙ୍ଗ୍ ଇୟା ବାଡିଦାନ୍ ଅତୁ; 13 ଏଣ୍ତେସ୍ ମାପୁ ଇୟା ଜାଗା ଦଂସ କିନାପ୍‌ । ପ୍ରବୁ ଲାକ୍‌ତୁ ଇୟା ଗାଡ଼୍‌ ବିରୁଦ୍‍ତାନ୍ ନାଣ୍ତ ତାଗ୍‌ଇକା ଆତା ମାନାତ୍‌, ଆଦେଙ୍ଗ୍ ମାପୁରୁ ଇୟା ଗାଡ଼୍‌ ନାଷ୍ଟୁ କିନି ଉଣ୍ତିଙ୍ଗ୍ ମାଙ୍ଗିଁ ପୋକ୍‌ତା ମାନାନ୍‌ ।"

14 ଆବେଟ୍ ଲୋଟ ଆତ୍ରେ ସଲିସ୍ ନିଜେଦି ଆଇଲିକା ୱାଲେ ପେଡ଼ି କିନି ଉଣ୍ତିଙ୍ଗ୍ ତିଆର୍‌ ଆତି କନ୍‍ଲିରିଙ୍ଗ୍‌ ଇର୍ହାନ୍‌, "ନିଙ୍ଗ୍‌ଦୁ, ଇବେଟ୍‍ତାନ୍ ସତୁ, ପ୍ରବୁ ଇୟା ଗାଡ଼୍‌ ନାଷ୍ଟୁ କିନାନ୍," ମାତର କନ୍‍ଲିର୍ ୱାନି ମାଟା ବାଣ୍ତିସ୍‌ ଇଜି ୱେନ୍‌ଏତାର୍‌ । 15 ମାରି ମାର୍‌ ନାଣ୍ତିଙ୍ଗ୍‌ ସାଲିଦି, ଦୁତ୍‍କୁ ଲୋଟଙ୍ଗ୍ ଦାନ୍ଧା କିଜି ଇରେଏ, "ନିଙ୍ଗ୍‌ଆ, ନିଜେଦି ଆଡ଼ି ମାରି ଇୟା ଏମେ ରୁଣ୍ତି ଆଇଲିକ୍‌ ଇବେନୁ ମାନେ, ୱାନିକାଙ୍ଗ୍ ଆସ୍‌ସି ସାଙ୍ଗ୍‍ଆ; ସିଲେତିଙ୍ଗ୍ ଗାଡ଼୍‌ତି କାସ୍ଟୁଦାନ୍ ନାଷ୍ଟୁ ଆନିଦେର୍‌ ।" 16 ଆବେଟ୍ ବା ୱାନ୍ ୱେଡ଼ା କିତାନ୍; ଆବେଟ୍ ୱାନି ଉଣ୍ତିଙ୍ଗ୍ ସଦାପ୍ରବୁଦି ଦୟା ଉଣ୍ତିଙ୍ଗ୍ ୱାର୍ ୱାନି ମାରି ୱାନି ଆଡ଼ିଦି ମାରି ରୁଣ୍ତି ଆଇଲିକା କିୟୁ ଆସ୍‌ସି ୱାନିକାଙ୍ଗ୍ ଗାଡ଼୍‌ତି ଆତ୍ରେ ସପ୍‍ତାନ୍ । 17 ଇୟାୱାଜା ୱାନିକାଙ୍ଗ୍‌ ସପ୍‍ସି ତାତି ୱେନେକା ୱାନିକା ମାଡ଼ାନ୍ ଅରେନ୍ ଲୋଟଙ୍ଗ୍ ଇର୍ହାନ୍‌, "ଜିବନ୍‌ ରକିଆ କିନି ଉଣ୍ତିଙ୍ଗ୍‌ ଉରୁକ୍‍ତୁ; ୱେନେକା ମାର୍‌ଜି ସୁଡ଼ୁମାଟ୍ ମାରି ଇୟା ୱିଜୁ ଗାଡ଼୍‌କାଙ୍ଗ୍ ବା ମାନ୍‍ମାଟ୍; ଗରକାଙ୍ଗ୍ ଉର୍‍କୁତୁ; ସିଲେତିଙ୍ଗ୍ ଦଂସ ଆନିଦେର୍‌ ।"

18 ଆବେଟ୍ ଲୋଟ ଇର୍ହାନ୍‌, "ଏ ନା ପ୍ରବୁ, ଇୟା ୱାଜା ଆମାକିତ୍; 19 ଇଲେଇ ଇୟା ସାକର୍‌ ଉଣ୍ତିଙ୍ଗ୍‌ ଦୟା ମାରି ନାଣ୍ତ ଦୟା କିଜି ଜିବନ୍‌ ରକିଆ କିତିଙ୍ଗ୍‌; ନାନୁ ଗରନ୍‌ତୁ ଉର୍‍କୁସି ସନ୍‍ଡ଼େଙ୍ଗ୍ ଆଟ୍‍ଏ; ନେସ୍‍ତି ରାୟୁ ୱାତିଙ୍ଗ୍ ଗରନ୍‌ତୁ ଇଗା ସଲ୍‌ଏତିଙ୍ଗ୍‌ ସାନାସନା । 20 ସୁଡ଼ୁଦୁ, ଉର୍‌କୁନି ଉଣ୍ତିଙ୍ଗ୍ ଆୟା ଗାଡ଼୍‌ ଲାକୁତୁ, ଆକା ଇସ୍‍ରିକା; ଆୟା ଜାଗାଦୁ ସନଡ଼୍ରେଙ୍ଗ୍ ମାଟା ସିଦା, ଆବେନୁ ନା ଜିବନ୍‌ ରକିଆ ପୋଇନାତ୍; ଆକା ଇନିକା ଇସ୍‍ରିକା ଆଏତ୍ ।"

21 ଆବେଟ୍ ୱାନ୍ ଇର୍ହାନ୍‌, "ନେଗିକା, ମାପୁ ଇୟା ବିସୟ୍‌ତାନ୍ ମି ଉଣ୍ତିଙ୍ଗ୍‌ ଦୟା କିଜି, ଆୟା ଏମେ ଗାଡ଼୍‌ତି ମାଟା ନିନୁ ଇର୍ହି, ଆକା ନାଷ୍ଟୁ କିଏପ୍ । 22 ନିନୁ ବେଗି ଆୟା ଜାଗାଦୁ ଉର୍‌କୁଆ, ଏଣ୍ତେସ୍‌କି ନିନୁ ଆବେନୁ ଇଗା ସଲ୍‌ଏତିଙ୍ଗ୍, ମାପୁ ଇନିକା କିଦେଙ୍ଗ୍ ଆଟ୍ଏପ୍ ।" ଆଦେଙ୍ଗ୍‌ ଆୟା ଜାଗାଦି ଦରୁ ସୋୟର ଆତାତ୍ ।

23 ତାନିୱେନେକା ଦେସ୍‌ତୁ ୱେଡ଼ା ସତାତ୍, ଲୋଟ ସୋୟର ଗାଡ଼୍‌ଦୁ ଇଗା ସର୍ହାନ୍ । 24 ଆର୍‌ତିଙ୍ଗ୍ ପ୍ରବୁ ବାଦଡ଼ତାନ୍ ପ୍ରବୁଦି ଲାକୁତୁରାନ୍‌ ସଦୋମ ମାରି ହମରା ମୁସୁକୁ ଗନ୍ଦକ ମାରି ସିସୁ ପିରୁ ୱାକ୍‍ସି 25 ମାରି ଆୟାୱିଜୁ ଗାଡ଼୍‌କୁ ମାରି ବାଲିବାଡି ମାରି ଆବେମାନି ଲୋକୁ ମାରି ଆୟା ବୁମିଦୁ ଜନମ୍‌ ଆତି ୱିଜୁ ଦଂସ କିତାନ୍‌ । 26 ମାତର୍‌ ଲୋଟଦି ଆଡ଼ି ୱେନେକା ସୁଡ଼ୁତାତ୍ଆକା ୱାଦ୍ ସରୁମୁଣ୍ତା ଆତାତ୍ ।

27 ମାରି ଅବ୍ରାହାମ ସାଲିଦିନେ ନିଙ୍ଗିଁଜି ପୁର୍ବେ ଏମେ ଜାଗାଦୁ ସଦାପ୍ରବୁଦି ଆଗିଡ଼ି ଆୟା ଜାଗାଦୁ ନିର୍ହାମାର୍ହାନ୍ 28 ସଦୋମ ମାରି ହମରା ମାରି ଗାଡ଼୍‌ଦି ୱିଜୁ ନାରୁକାଙ୍ଗ୍ ସୁଡ଼ୁତାନ୍, ଆୟା ଗାଡ଼୍‌ତାନ୍ ବାଟିଦି ଗୋଇ ୱାଜା ଗୋଇ ସନିକା ସୁଡ଼ୁତାନ୍‌ । 29 ଇୟାୱାଜା ଆୟା ବାଲିବାଡିଦୁ ମାନି ୱିଜୁ ଗାଡ଼୍‌କୁ ନାଷ୍ଟୁ ବେଡ଼ାଦୁ ମାପୁରୁ ଅବ୍ରାହାମତିଙ୍ଗ୍ ଏତ୍‌କିତାନ୍, ମାରି, ଲୋଟ ଏମେ ଏମେ ଗାଡ଼୍‌ତୁ ବାସା କିତାମାର୍ହାନ୍, ଆୟା ଆୟା ଗାଡ଼୍‌ ନାସ୍ଟୁ ବେଡ଼ାଦୁ ନାସ୍ଟୁ ଲୋଇରାନ୍‌ ଲୋଟଙ୍ଗ୍ ସପ୍‍ତାନ୍‌ ।

30 ତାନିୱେନେକା ଲୋଟ ସୋୟରଦୁ ବାସା କିଦେଙ୍ଗ୍‌ ତିଲାଜି ଆବେଣାନ୍ ସୋସି ନିଜେଦି ରୁଣ୍ତି ଆଇଲିକାଙ୍ଗ୍‌ ଆସ୍‌ସି ଗୋରନ୍‌ତୁ ବାସା କିତାନ୍; ଆବେଟ୍ ୱାନ୍ ମାରି ୱାନି ରୁଣ୍ତି ଆଇଲିକ୍‌ ଗୋରନ୍‌ ସାରାଦୁ ବାସା କିତାର୍‌ । 31 ତାନିୱେନେକା ତାନି ପେରି ଗାଡ଼ିସି ଇସ୍ରି ତାନିଙ୍ଗ୍‌ ଇର୍ହାତ୍‌, "ମା ବୁବା ଡକ୍ରା, ମାରି, ଦୁନିଆଦି ରିତିନିତି ଇସାବ୍‌ତାନ୍‌ ମା ୱାଲେ ପେଡ଼ି କିନି ଉଣ୍ତିଙ୍ଗ୍‌ ଇୟା ଦେସ୍‌ତୁ ଏମେଲୋକୁ ସିଲେର୍‌ । 32 ରାଦୁ, ମାଡୁ ବୁବେଙ୍ଗ୍‌ ଅଙ୍ଗୁର୍‌ରସ ଉଟ୍‍ପିସ୍‍ସି ବୁବାଦି କୁଟୁମ୍‌ ରକିଆ କିନି ଉଣ୍ତିଙ୍ଗ୍‌ ୱାନି ୱାଲେ ଡର୍‌ନାଟ୍‌ ।" 33 ଆବେଟ୍ ଆୟା ନାଡ଼ା ୱାଦ୍‌ ନିଜେଦି ବୁବେଙ୍ଗ୍‌ ଅଙ୍ଗୁର୍‌ରସ ଉଟ୍‍ପିସ୍‌ସି, ପେରିଆଇଲି ନିଙ୍ଗିଁଜି ସଲିସି ବୁବା ୱାଲେ ଡରିତାତ୍; ମାତର୍‌ ତାନି ଡରିନିକା ମାରି ନିଙ୍ଗିଁଜି ସନିକା ଲୋଟ ନେସ୍ତେଙ୍ଗ୍ ଆଟ୍‍ଏତାନ୍ ।

34 ମାରି ଉଡ୍ରି ନାଣ୍ତିଙ୍ଗ୍ ଆୟା ପେରିଆଇଲି ଇସ୍ରି ଆଇଲିଙ୍ଗ୍ ଇର୍ହାତ୍‌, "ସୁଡ଼ୁଆ, ନାନୁ ଇଏନ୍‌ ନାଡ଼ା ବୁବା ୱାଲେ ଡରିତା, ରାଆ, ନେରୁନାଡ଼ା ବା ବୁବେଙ୍ଗ୍‌ ଅଙ୍ଗୁର୍‌ରସ ଉଟ୍‍ପିସ୍‍ କିନାଟ୍; ଆବେଟ୍ ନିନୁ ସଲିସ୍ ବୁବାଦି କୁଟୁମ୍‌ ରକିଆ ଉଣ୍ତିଙ୍ଗ୍ ୱାନି ୱାଲେ ସୁଜୁଆ ।" 35 ଆବେଟ୍ ୱାକ୍ ଆୟା ନାଡ଼ା ବା ବୁବେଙ୍ଗ୍ ଅଙ୍ଗୁର୍‌ରସ ଉଟ୍‍ପିସ୍‍ସି, ପେରିଆଇଲି ନିଙ୍ଗିଁଜି ୱାନି ୱାଲେ ଡରିତାତ୍; ମାତର୍‌ ତାନି ଡରିନିକା ମାରି ନିଙ୍ଗିଁଜି ସନିକା ଲୋଟ ନେସ୍‍ତେଙ୍ଗ୍‌ ଆଟେଏତାନ୍ । 36 ଇୟା ୱାଜା ଲୋଟଦି ରୁଣ୍ତି ଆଇଲିକ୍‌ ନିଜେଦି ବୁବା ୱାଲେ ମେନ୍ଦଲତୁ ତେବାତେ । 37 ପେରି ଆଇଲି କଡ଼ ଜନମ୍‌ କିଜି ୱାନି ଦରୁ ମୋୟାବ ସିତାତ୍; ୱାଦ୍ ଇଲେଇତି ବେଡ଼ାଦୁ ମୋୟାବିୟ ଲୋକାଦି ପୁର୍ବେଦିବୁବା । 38 ମାରି ଇସ୍ରି ଆଇଲି କଡ଼ ଜନମ୍‌ କିଜି ୱାନି ଦରୁ ବିନ୍ନ-ଅମ୍ମି ସିତାତ୍; ୱାଦ୍ ଇଲେଇତି ବେଡ଼ାଦୁ ଅମ୍ମୋନିୟ ଲୋକାରି ପୁର୍ବେଦିବୁବା ।