1 ମାରି, ଜାକୁବ ମା ବୁବାଦି ୱିଜୁ ଦନ୍‌ ରେତା ଅତାମାନାନ୍ ମାରି ମା ବୁବାଦି ଦନ୍‌ତାନ୍ ୱାନି ଇୟା ୱିଜୁ ଦନ୍‌ ନାଣ୍ତ ଆତାମାନାତ୍‌, ଲାବନଦି କଡ଼ରି ଇୟା ୱାର୍‌ଗିନି ମାଟା ଜାକୁବ ୱେର୍ହାନ୍ । 2 ମାରି ଲାବନ ୱାନି ଉଣ୍ତିଙ୍ଗ୍ ଆଗ୍‌ଡ଼ିରି ୱାଜା ସିଲେ, ଇକା ଜାକୁବ ୱାନି ମୋକମ୍‌ ସୁଡ଼ିଜି ନେସ୍‍ତାନ୍ । 3 ତାନିୱେନେକା ପ୍ରବୁ ଜାକୁବଙ୍ଗ୍ ଇର୍ହାନ୍‌, "ନିନୁ ମି ବୁବାଦି ଦେସ୍‍ତି ଲୋକା ଲାକୁତୁ ଡ଼େସି ସାଙ୍ଗ୍‍ଆ, ନାନୁ ନି ସାକା ଆନା ।"

4 ଆବେଟ୍‌ ଜାକୁବ କିଡ଼ିଇଦୁ ଡ଼ାକୁକଡିଙ୍ଗ୍‌ ଲାକୁତୁ ରାହେଲ ନି ଲେୟାଦିଙ୍ଗ୍ କୁକିସ୍‌ସି ଇର୍ହାନ୍‌, 5 ନାନୁ ସୁଡ଼ୁଜିନା, ମି ବୁବାଦି ମୋକମ୍‌ ନା ଉଣ୍ତିଙ୍ଗ୍ ଆଗିଡ଼ିରି ୱାଜା ସିଲେ; ମାତର୍‌ ନା ବୁବାଦି ମାପୁରୁ ନା ସାକା ମାନାନ୍ । 6 ନାନୁ ନିଜେଦି ୱିଜୁ ବପୁ ସିଜି ମି ବୁବା ଲାକୁତୁ ଗତିପାଣି କିତାମାନା, ଇକା ମିରୁ ରିଇଦେର୍‌ ନେସ୍‍ତିମାନିଦେର୍‌ । 7 ଆତିଙ୍ଗ୍‌ବା ମି ବୁବା ନାଙ୍ଗିଁ ଟକେ କିଜି ଦାସ୍‍ ଦେବେଙ୍ଗ୍ ନା କୁଲି ବାଦ୍‌ଲେ କିତାମାନାନ୍‌; ମାତର ମାପୁରୁ ୱାନିଙ୍ଗ୍ ନାଙ୍ଗି ନାଷ୍ଟୁ କିଦେଙ୍ଗ୍‌ ସିଏନ୍ । 8 ଏଣ୍ତେସ୍ ସିତ୍ରାକାବ୍ରା ଗୋରିଏଙ୍ଗ୍‌ ନି କୁଲି ୱାଜା ଆନେ, ୱାନ୍ ନିଜେ ଏସ୍ତିୱାଲେ ଇୟା ମାଟା ଇର୍ହାନ୍‌, ନାସ୍ତିୱାଲେ ୱିଜୁ ଗୋରିଏଙ୍ଗ୍‌ ସିତ୍ରାକାବ୍ରା ପିଲେକ୍ ଜନମ୍‌ କିତେ; ମାରି, ଗାର୍‌ମାନି ଗୋରିଏଙ୍ଗ୍‌ ମି କୁଲି ୱାଜା ଆନେ, ୱାନ୍ ଏସ୍ତିୱାଲେ ଇକା ଇର୍ହାନ୍‌, ନାସ୍ତିୱାଲେ ୱିଜୁ ଗୋରିଏଙ୍ଗ୍‌ ଟିପା ମାନି ପିଲେକ୍ ଜନମ୍‌ କିତେ । 9 ଇୟାୱାଜା ମାପୁରୁ ମି ବୁବାଦି ଡ଼ାକୁଦନ୍‌ ଅସି ନାଙ୍ଗି ସିତାନ୍ ।

10 ଇରିଙ୍ଗ୍‌ ଗୋରିଏଙ୍ଗ୍‌ ଗାର୍ବୁଦି ବେଡ଼ାଦୁ ନାନୁ ଲବେରୁ ଡ଼େସି ମୁସ୍‌କୁ ସୁଡ଼ୁତା, ସୁଡୁଦୁ, ଗୋରିଏଙ୍ଗ୍‌ ମିସାନି ୱିଜୁ ପତୁ ଗୋରିଏଙ୍ଗ୍‌ ଗାର୍‌ମାନି ମାରି କାବ୍ରାସିତ୍ରା ମାରି ଟିପା । 11 ନାସ୍ତିୱାଲେ ମାପୁରୁଦି ଦୁତ୍ ଲବେରୁ ନାଙ୍ଗିଁ ଜାକୁବ ଇଜି କୁକ୍‍ତାନ୍, ନାନୁ ଇର୍ହା, "ସୁଡୁଆ, ନାନୁ ଇବେନୁ ମାନା ।" 12 ଆବେଟ୍ ୱାନ୍ ଇର୍ହାନ୍‌, "ଇଲେଇ ମାରିଜି ସୁଡୁଆ, ଗୋରିଏଙ୍ଗ୍‍ ମାନ୍ଦା ମିସାନି ୱିଜୁ ପତୁ ଗୋରିଏଙ୍ଗ୍‌ ଗାର୍‌ ମାରି କାବ୍ରାସିତ୍ରା ମାରି ଟିପା । ଏଣ୍ତେସ୍ ମି ଉଣ୍ତିଙ୍ଗ୍ ଲାବନ ଏଣ୍ତେସ୍ ପାଣି କିତାନ୍, ଆକା ନାନୁ ସୁଡୁତା । 13 ଏମେମାନୁ ନିନୁ ଉଣ୍ତ୍ରି ମୁଣ୍ତା ଇଟ୍‌ତିମାନି ମାରି ନିୟୁଦାନ୍‌ ଉସ୍‌ସି ପାର୍‌ମାଣ୍‌ କିତିମାନି, ଆୟା ବେତେଲଦି ମାପୁରୁ ମାପୁ; ଇଲେଇ ନିଙ୍ଗ୍‌ଜି ଇୟା ଦେସ୍‍ ଡ଼ିସ୍‍ସି ନିଜେଦି କୁଟୁମ୍‌ତି ଦେସ୍‍ତୁ ଡ଼େସି ସାଙ୍ଗ୍‍ଆ !"

14 ଆବେଟ୍ ରାହେଲ ମାରି ଲେୟା ଇର୍ହେ, "ବୁବାଦି ଇନ୍‌ଡ୍ର ମା ଇନିକା ମାରି ଇନି ବାଗ୍‌ଦି ମାରି ଅଦିକାର୍‌ ମାନାତ୍‌ ? 15 ମାପୁ ନ ୱାନି ଲାକୁତୁ ଆଇ ଦେସ୍‍ତି ଲୋକୁ ୱାଜା ସିଲେ ? ଏଣ୍ତେସ୍ ୱାନ୍ ମାଙ୍ଗିଁ ପୋରିଜି ମା ମୁଲ୍ ପୁରା ବୋଗାତା ମାନାନ୍ । 16 ଏଣ୍ତେସ୍ ମାପୁରୁ ମା ବୁବାମାଡ଼ାନ୍ ଏମେ ୱିଜୁ ଦନ୍‌ ଅତାମାନାନ୍, ଆୟାୱିଜୁ ମାଦି ମାରି ମା କଡ଼ରିୱି । ଆଦେଙ୍ଗ୍‌ ମାପୁରୁ ମିଙ୍ଗିଁ ଇନିକା ଇର୍ହାନ୍‌, ନିନୁ ଆକା କିଆ ।"

17 ଆବେଟ୍ ଜାକୁବ ନିଙ୍ଗିଁଜି କଡ଼ରିଙ୍ଗ୍ ମାରି ଆଇମେକାଙ୍ଗ୍ ଉଟ୍‌ ମୁସୁକୁ ବାସାକିତାନ୍; 18 ମାରି ନିଜେଦି ଉଣ୍ତାକିତି ୱିଜୁ ଦନ୍‌, ଅର୍ତାତ୍, ପଦନ ଅରାମଦୁ ଏମେ ଡ଼ାକୁ ମାରି ଏମେ ଦନ୍‌ ଉଣ୍ତା କିତାମାର୍ହାନ୍, ଆକା ଆସ୍‌ସି କିଣାନ୍ ଦେସ୍‍ତୁ ନିଜେଦି ବୁବା ଇସ୍‍ହାକ୍ ଲାକୁତୁ ସର୍ହାନ୍ । 19 ଆୟା ବେଡ଼ାଦୁ ଲାବନ ମେଣ୍ତାଦି ବୁର୍‌ବୁସେଙ୍ଗ୍‌ କଇଦେଙ୍ଗ୍ ସର୍ହାମାର୍ହାନ୍‌; ମାରି, ରାହେଲ ନିଜେଦି ବୁବାଦି ଦିୟାମ୍‌କାଙ୍ଗ୍‌ ଡଙ୍ଗାଁ କିତାତ୍‌ । 20 ମାରି ଜାକୁବ ନିଜେଦି ଉର୍‍କୁନି ଇନି କାବୁର୍ ସିଏଜି ଅରାମିୟ ଲାବନତିଙ୍ଗ୍‌ ପୁଲାପୁଲିକିତାନ୍ । 21 ଇୟାୱାଜା ୱାନ୍‌ ନିଜେଦି ୱିଜୁ ଆସ୍‌ସି ଉର୍‍କୁତାନ୍, ମାରି ନିଙ୍ଗିଁଜି ପରାତ୍ ଗାଡା ନାସ୍‍ସି ଗିଲିୟଦ୍ ଗରନ୍‌ ତୋରିନ୍‌ ସୁଡ଼ିଜି ସର୍ହାନ୍‌ ।

22 ଆବେଟ୍‌ ମୁନେଟି ୱେନ୍‌କା ଲାବନ୍‍ତିଙ୍ଗ୍‌ ଜାକୁବଦି ଉରୁକ୍‌ନି କାବୁର୍ ସିତାର୍ । 23 ଆବେଟ୍ ୱାନ୍ ନିଜେଦି କୁଟୁମ୍‌ତିଙ୍ଗ୍‌ ଅର୍‌ସେ ଆସ୍‌ସି ୱାରି ୱେନ୍‌କା ୱେନ୍‌କା ସାତ୍‌ ଦିନ୍‍ତି ସାରି ଉରୁକ୍‍ସି ସୋଲ୍‌ସି ଗିଲିୟଦ୍ ଗରତି ଲାକୁତୁ ୱାନିଙ୍ଗ୍‌ ଆସ୍ତାନ୍ । 24 ମାତର୍‌ ମାପୁରୁ ନାଡ଼ା ବେଡ଼ାଦୁ ଲବେରୁ ଅରାମିୟ ଲାବନ ଲାକୁତୁ ଇଗାସଲ୍‌ସି ୱାନିଙ୍ଗ୍ ଇର୍ହାନ୍‌, "ଜାଗାର୍‌ତା, ଜାକୁବଙ୍ଗ୍ ନେଗିମାଟା ତାଗିଇମାଟା ଇନିକା ଇନ୍‍ମା ।" 25 ତାନିୱେନେକା ଲାବନ ଜାକୁବଦି ସାଙ୍ଗ୍ ଆସ୍‍ନି ବେଡ଼ାଦୁ ଜାକୁବଦି ଗୁଡ଼ା ଗରନ୍ ମୁସୁକୁ ତିଆର୍ ଆତାମାର୍ହାତ୍‍; ଆବେଟ୍ ଲାବନ ବା କୁଟୁମ୍‌ତି ୱାଲେ ଗିଲିୟଦ୍ ଗରନ୍‌ତୁ ଗୁଡ଼ା ତିଆର୍ କିତାନ୍ ।

26 ମାରି, ଲାବନ ଜାକୁବଙ୍ଗ୍‌ ଇର୍ହାନ୍‌, "ନିନୁ ଏନ୍ଦା ଇୟାୱାଜା ପାଣି କିତି ? ନାଙ୍ଗିଁ ପୁଲାପୁଲିକିତି, ମାରି ନା ଆଇଲିକାଙ୍ଗ୍ ଜୁଜ୍‌ତାନ୍‌ ରେନିଅନି ଲୋକା ୱାଜା ଆସ୍‌ସି ୱାତି । 27 ନିନୁ ନାଙ୍ଗିଁ ପୁଲାପୁଲି କିଜି ଏନ୍ଦା ମାରିଗିଜି ଉର୍‍କୁତାତି ? ଏନ୍ଦା ନାଙ୍ଗିଁ କାବୁର୍ ସିଏତି ? ସିତିମାରିଙ୍ଗ୍, ନାନୁ ନିଙ୍ଗିଁ ୱେଡ଼ିକା ମାରି ପାଟା, ମାରି ଡାପୁ ମାରି ମରିବାଜା ୱାଲେ ପୋକ୍‌ତାମାନ୍ଦି । 28 ନିନୁ ନା ନାତିରିଙ୍ଗ୍‌ ମାରି ଆଇଲିକାଙ୍ଗ୍‌ ନଣ୍ତଦେଙ୍ଗ୍ ବା ନାଙ୍ଗିଁ ସାରି ସିଏତି, ଇକା ନାଣ୍ତ ତାଗିଇପାଣି । 29 ନିଙ୍ଗିଁ ନାସ୍ଟୁ କିଦେଙ୍ଗ୍ ନା କିୟୁଦି ସାସ୍‌ ମାର୍ହାତ୍‌, ମାତର୍‌ ଇଏନ୍‌ ନାଡ଼ା ମି ବୁବାଦି ମାପୁରୁ ନାଙ୍ଗିଁ ଇର୍ହାନ୍‌, ଜାଗାର୍‌ତା, ଜାକୁବଙ୍ଗ୍ ନେଗିକା ତାଗିଇକା ଇନିକା ଇନ୍‍ମା । 30 ମାରି ନି ବୁବାଦି ଇଲୁଦିଙ୍ଗ୍‌ ଜଦି ଏତ୍‍କିତିଙ୍ଗ୍ ନିନୁ ସନି ଦରକାର୍ ମାର୍ହାତ୍‌, ଆର୍‌ତିଙ୍ଗ୍‌ ନା ଦିୟାମ୍‌କାଙ୍ଗ୍‌ ଏନ୍ଦା ଡଗାଁ କିତି ?"

31 ଆବେଟ୍ ଜାକୁବ ଲାବନଦିଙ୍ଗ୍ ଇର୍ହାନ୍‌, "ନାନୁ ତିଲାତା; ଇରିଙ୍ଗ୍‌ ନେସ୍‍ତି ନିନୁ ନା ମାଡ଼ାନ୍ ନି ଆଇଲିକାଙ୍ଗ୍ ବପୁଦାନ୍‌ ରେନିଅନି, ଇୟାୱାଜା ଅଡ଼୍‌ବିତା । 32 ମାତର୍‌ ନିନୁ ଏମେ ଲାକୁତୁରାନ୍ ନି ଦିୟାମ୍‌କୁ ପୋଇନି, ୱାନ୍ ଜିଏନ୍‍ନି; ନାମାନୁ ନି ଏମେକା ମାନାତ୍, ଆକା ମା କୁଟୁମ୍‌ଦି ଆଗିଡ଼ି ସିନେ କିଜ ଅଆ," ଏଣ୍ତେସ୍‌କି ଜାକୁବ ରାହେଲ ଆୟା ଡଙ୍ଗାଁ କିନି ବିସୟ୍‌ତାନ୍ ନେସ୍‍ଏନ୍‌ ମାର୍ହାନ୍‌ । 33 ଆବେଟ୍ ଲାବନ ଜାକୁବଦି ଗୁଡ଼ା ଇଲୁ ମାରି ଲେୟାଦି ଗୁଡ଼ା ଇଲୁ ମାରି ରୁଣ୍ତି ସାକରାଣିକା ଗୁଡ଼ା ଇଲୁ ଲୋଇ ସଲ୍‍ସି ପୋଇତାନ୍; ମାତର୍‌ ପୋଇଏତାନ୍ । ଆବେଟ୍ ୱାନ୍ ଲେୟାଦି ଗୁଡ଼ା ଇଲୁ ଡ଼ିସ୍‍ସି ରାହେଲ ଗୁଡ଼ା ଇଲୁଦୁ ଡ଼ୁଗିତାନ୍‌ । 34 ମାତର୍‌ ରାହେଲ ଆୟା ଦିୟାମ୍‌କାଙ୍ଗ୍‌ ଅସି ଉଟ୍‌ଦି ମୁଟାମିଦି ମଣି ଲୋଇ ଇଡ୍‌ଜି ତାନି ମୁସୁକୁ ବାସ୍‌ତାତ୍‌ । ଆବେଟ୍ ଲାବନ ତାନି ଗୁଡ଼ା ଇଲୁତୁ ୱିଜୁ ବାଡି ପୋଇତାନ୍ ବା ଆକା ପୋଇଏତାନ୍ । 35 ନାସ୍ତିୱାଲେ ରାହେଲ ବୁବେଙ୍ଗ୍‌ ଇର୍ହାତ୍‌, "ନାନୁ ନି ଆଗିଡ଼ି ନିଙ୍ଗ୍‌ଦେଙ୍ଗ୍‌ ଆଟ୍‍ଏତା ଇଜି ନା ମାଲିକ୍‌ ରିସା ଆମା, ଇରିଙ୍ଗ୍‌ ନାନୁ ସୁତୁକ୍‌* ଆତାମାନା ।" ଇୟା ୱାଜା ୱାନ୍ ପୋଇତିଙ୍ଗ୍ ବା ଦିୟାମ୍‌କାଙ୍ଗ୍‌ ପୋଇଏତାନ୍ । 36 ଆବେଟ୍ ଜାକୁବ ରିସା ଆଜି ଲାବନତିଙ୍ଗ୍‌ ଲାଗାତାନ୍; ମାରି, ଜାକୁବ ଲାବନତିଙ୍ଗ୍ ମାଟା ସିଜି ଇର୍ହାନ୍‌, "ନା ଇନି ଦୋସ୍‌ ମାରି ଇନି ପାପ୍‌ ଆତାତ୍ ଜେ, ନିନୁ ରିସା ଆଜି ନା ୱେନ୍‌କା ୱେନ୍‌କା ଉର୍‍କୁତାଜି ୱାତି ? 37 ନିନୁ ତ ନା ୱିଜୁ ଜିନିସ୍‌ ପୋଇତି, ମାରି ମି ଇଲୁଦି ଇନି ଜିନିସ୍‌ ପୋଇତି ନ ? ଆକା ନା ମାରି ମି ଇୟା କୁଟୁମ୍‌ଦି ଆଗିଡ଼ି ଇଡ୍‌ଆ, ଇୟାକାର୍ ମା ରିଏରିଙ୍ଗ୍ ବିସାର୍ କିପିର୍‌ । 38 ଇୟା କୋଡ଼େ ବାର୍ସୁ ଆତାତ୍ ନି ୱାଲେ ତେବାତା । ମି ମେଣ୍ତେଙ୍ଗ୍ ମାରି ଗରିଏଙ୍ଗ୍‍ ବାଞ୍ଜି ଆଉନି, ବା ନାନୁ ମି ମାନ୍ଦାଦି ମେଣ୍ତେଆଙ୍ଗ୍ ତିନ୍‍ଏ । 39 ବନ୍‌ତି ନରେସ୍‌ ଏମେୱାନିକାଙ୍ଗ୍ କାଣ୍ତିଆ କିତାତ୍, ଆକା ବା ନି ଲାକ୍‌ତୁ ତେଏତାନି; ଆୟା କାସ୍ଟୁ ନିଜେ ବଗାତା; ୱେଡ଼େ ଡଙ୍ଗାଁ ସଲିତ୍‌ କି ନାଡ଼ା ଡଙ୍ଗାଁ ସଲିତ୍‌, ଆକା ନିନୁ ନା କିୟୁଦାନ୍ ଅତି । 40 ୱେଡ଼େ ତେର୍‍ୱେଲ୍‌, ନାଡ଼ା ପିନି, ନାନୁ କସ୍ଟପୋଇତା; ନା କାଣ୍‌ଗାଦାନ୍ ସୁସ୍‌କାଣ୍‌କୁ ସର୍‌ଏ; ଇୟାୱାଜା ନାନୁ ମାର୍ହା; 41 ନାନୁ କୋଡ଼େ ବାର୍ସୁ ସାନ୍ଦି ମି ଇନ୍‌ଡ୍ର ମାର୍ହା; ମି ରୁଣ୍ତି ଆଇଲିକା ଉଣ୍ତିଙ୍ଗ୍ ସଉଦ ବାର୍ସୁ ମାରି ଡ଼ାକୁକଡିଙ୍ଗ୍‌ ଉଣ୍ତିଙ୍ଗ୍‌ ସଅ ବାର୍ସୁ ଗତିପାଣି କିତା; ଇୟାଉଣ୍ତିଙ୍ଗ୍ ନିନୁ ଦାସ୍‍ଦେବେଙ୍ଗ୍‌ ନା କୁଲି ବାଦେଲେ କିତି । 42 ନା ବୁବାଦି ମାପୁରୁ, ଅବ୍ରାହାମଦି ମାପୁରୁ ମାରି ଇସ୍‍ହାକଦି ମାପୁରୁ ଜଦି ନା ସାକା ଆଏତାନ୍‌ ମାନ୍ଦି, ଆର୍‌ତିଙ୍ଗ୍ ସତେନେ ଇଲେଇ ନିନୁ ନାଙ୍ଗିଁ ୱାର୍ହି କିୟୁଦୁ ପୋକତିମାନ୍ଦି । ମାପୁରୁ ନା ଦୁଃକ୍‌ ମାରି କିୟୁଦି ପାଣି ସୁଡ଼ୁତାମାନାନ୍; ଆଦେଙ୍ଗ୍‌ ଇଏନ୍‌ ନାଡ଼ା ନିଙ୍ଗିଁ ଆଦ୍‍ରିସ୍‍ କିତାନ୍ ।"

43 ଆବେଟ୍ ଲାବନ ଜାକୁବଙ୍ଗ୍ ଇର୍ହାନ୍‌, "ଇୟା ଆଇଲିକ୍‌ ନା ଆଇଲିକ୍‌ ମାରି ଇୟା କଡ଼ର୍ ନା କଡ଼ର୍ ମାରି ଡ଼ାକୁକଡିଙ୍ଗ୍‌, ନା ଡ଼ାକୁକଡିଙ୍ଗ୍ ମାରି ଏମେକା ଏମେକା ସୁଡ଼ିଜିନି, ଆୟାୱିଜୁ ନାୱି; ଆଦେଙ୍ଗ୍‌ ନା ଇୟା ଆଇଲିକାଙ୍ଗ୍‌ ମାରି ୱେନିକା ଜନମ୍‌ କଡ଼ରିଙ୍ଗ୍ ନାନୁ ଇନିକା କିନା ? 44 ରାଦୁ, ମାଡୁ ରିଅଟ୍ ନିୟମ ତିର୍‌ କିନାଟ୍‌, ଆକା ମା ସାକି ଆପିତ୍ ।" 45 ନାସ୍ତିୱାଲେ ଜାକୁବ କାଣ୍ତେକ୍ କାଲୁ ଆସ୍‌ସି ମୁଣ୍ତା ୱାଜା ନିଲ୍‌ପ୍‌ତାନ୍‌ । 46 ମାରି ଜାକୁବ ନିଜେଦି କୁଟୁମ୍‌ତିଙ୍ଗ୍ ଇର୍ହାନ୍‌, ମିରୁ କାଲୁକୁ ଉଣ୍ତାକିଦୁ; ଆବେଟ୍ ୱାର୍ କାଲୁକୁ ତାସି ଉଣ୍ତ୍ରି ମୁଣ୍ତା କିତାର୍, ୱିଜେରେ ଆୟା ବାଡିଦୁ ଆୟା ଗାଦି ମୁସୁକୁ ଉଟାର୍ । 47 ତାନିୱେନେକା ଲାବନ ତାନି ଦରୁ *ଜିଗର-ସାହଦୁତା ଇଟ୍‍ତାନ୍‌, ମାତର୍‌ ଜାକୁବ ତାନି ଦରୁ *ଗଲୟଦ୍‌ ଇଟ୍‌ତାନ୍ । 48 ନାସ୍ତିୱାଲେ ଲାବନ ଇର୍ହାନ୍‌, "ଇୟା କାଲୁ ଗାଦି ନେରୁ ମି ମା ସାକି ଆଜି ମାନାତ୍; ଆଦେଙ୍ଗ୍ ତାନି ଦରୁ ଗଲୟଦ୍ ମାରି *ମିସ୍‍ପା ଇଟ୍‌ତାନ୍‌," 49 ଏଣ୍ତେସ୍‌କି ୱାନ୍ ଇର୍ହାନ୍‌, "ମାଡୁ ନିଜେ ନିଜେ ଅଲଗା ଆତିଙ୍ଗ୍‌, ପ୍ରବୁ ନାଙ୍ଗିଁ ମାରି ନିଙ୍ଗିଁ କାପ୍‌କିଜି ମାନାନ୍ । 50 ନିନୁ ଜଦି ନା ଆଇଲିକାଙ୍ଗ୍ ଦୁଃକ୍‌ ସିନି, ବା ନା ଆଇଲିକ୍‌ ମାନୁବୁ ମାନୁବୁ ଆଇ ଆଇଲିକାଙ୍ଗ୍‌ ପେଡ଼ି ଆନି, ଆର୍‌ତିଙ୍ଗ୍‌ ଆୟା ବେଡ଼ାଦୁ ଏମେ ଲୋକୁ ମା ଲାକୁତୁ ମାନ୍ଏନ୍, ମାତର୍‌ ସୁଡ଼ୁଆ, ମାପୁରୁ ମା ମାରି ମି ନାଡ଼୍‌ମି ସାକି ଆନାନ୍ ।" 51 ମାରି ଲାବନ ଜାକୁବଙ୍ଗ୍ ଇର୍ହାନ୍‌, "ଇୟା କାଲୁ ମୁଣ୍ତା ସୁଡୁଆ, ମାରି, ମା ରିଏରିଙ୍ଗ୍ ନାଡ଼୍‌ମି ନା ନିଲ୍‌ପ୍‌ତି ଇୟା ମୁଣ୍ତା ସୁଡୁଆ । 52 ନାନୁ ଅନ୍ୟାୟ କିନି ଉଣ୍ତିଙ୍ଗ୍ ଇୟା କାଲୁ ମୁଣ୍ତା ନାସି ନି ଲାକୁତୁ ସଲ୍ଏ, ବା ନିନୁ ଇୟା ମୁଣ୍ତା ମାରି ଇୟା ଏତ୍‌କିନି ମୁଣ୍ତା ନାସ ନା ଲାକୁତୁ ରାମା; ଇବେଣି ସାକି ଇୟା କାଲୁ ମୁଣ୍ତା ମାରି ଇବେଣି ସାକି ଇୟା ମୁଣ୍ତା । 53 ଇୟା ବିସୟ୍‌ତାନ୍‌ ଅବ୍ରାହାମଦି ମାପୁରୁ, ନାହୋରଦି ମାପୁରୁ ମାରି ୱାରି ବୁବାରି ମାପୁରୁ ନା ମାରି ନି ନାଡ଼୍‌ମି ବିସାର୍ କିନାନ୍," ନାସ୍ତିୱାଲେ ଜାକୁବ ନିଜେଦି ବୁବା ଇସ୍‍ହାକ୍ ତିଲାଜି ମାନି ବାଡିଦି ଦର୍‌ତାନ୍‌ ପାର୍‍ମାଣ୍ କିତାନ୍ । 54 ତାନିୱେନେକା ଜାକୁବ ଆୟା ଗରନ୍‌ତୁ ପୁଜାସିଜି କାଦି ଉଣି ଉଣ୍ତିଙ୍ଗ୍‌ ନିଜେଦି କୁଟୁମ୍‌ତିଙ୍ଗ୍ କୁକୁତାନ୍, ଆବେଟ୍ ୱାର୍ ଉଣିଜି ଗରନ୍‌ତୁ ନାଡ଼ାୱିଗ୍‌ଜି ତେବାତାର୍ । 55 ଆବେଟ୍‍କୁ ଲାବନ ସାଲିଦିନେ ନିଙ୍ଗିଁଜି ନିଜେଦି ଗାଡ଼ିକାଙ୍ଗ୍‌ ମାରି ନାତିରିଙ୍ଗ୍‌ ନଣ୍ତଜି ଆର୍ସିବାଦ୍‌ କିତାନ୍; ଇୟାୱାଜା ଲାବନ ନିଜେଦି ବାଡିଦୁ ଡ଼େସି ସର୍ହାନ୍ ।