1 ସାରାଦି ସହେ କଡ଼େ ସାତ୍ ନମ୍ୱର୍‌ତି ବାର୍ସେକ୍‌ ଜିତାତ୍‌ । 2 ଆବେଟ୍‌କୁ ସାରା କିଣାନ୍ ଦେସ୍‍ତୁ କିରିୟତ ଅର୍ବଦୁ, ଅର୍ତାତ୍, ହିବ୍ରୋଣଦୁ ସାତାତ୍ । ଆବେଟ୍ ଅବ୍ରହାମ ସାରା ଉଣ୍ତିଙ୍ଗ୍ ସିନ୍ତାକିଜି ମାରି ଆଡ଼୍‍ବାଦେଙ୍ଗ୍ ସର୍ହାନ୍‌ ।

3 ତାନିୱେନେକା ଅବ୍ରହାମ ନିଜେଦି ସାତି ଆଡ଼ି ଲାକୁତୁରାନ୍‌ ନିଙ୍ଗିଁଜି ସଲିସ୍ ହେତଦି କଡ଼ରିଙ୍ଗ୍ ଇର୍ହାନ୍‌, 4 "ନାନୁ ମି ମାନୁ ଆଇ ଦେସ୍‍ ମାରି ଆଇ ଲୋକ୍‌; ମି ଲୋଇ ନାଙ୍ଗିଁ ମୁସୁନି ବାଡି ଉଣ୍ତିଙ୍ଗ୍‌ କାଣ୍ତେକ୍‌ ସିଦାଟ୍, ମାରି ନାଙ୍ଗିଁ ଏସ ବୁମି ପର୍‌ଦୁ ନାନୁ କୋଡ଼୍‌ଜି ନା ଆଡ଼ିଦି ସାତିମାଡ଼ାଦିଙ୍ଗ୍ ମୁସ୍‍ନା ।"

5 ଆବେଟ୍ ହେତ୍‌ତି ମାରିନ୍‌କୁ ଅବ୍ରହାମଦିଙ୍ଗ୍‌ ଇର୍ହାର୍, 6 "ଏ ମାଲିକ୍, ମା ମାଟା ୱେନ୍‌ଆ; ନିନୁ ମା ନାଡ଼ିମି ସାକ୍ତିଦି ରାଜା; ଇଲେଇ ମା ନେଗି ମୁସ୍‍ନି ଗୁଟା ନାଡ଼ିମି ନିଜେଦି ସାତି ଆଡ଼ିଦି ମାଡ଼ାଦିଙ୍ଗ୍‌ ମୁସ୍‍ଆ; ମା ଲୋଇ ଏନ୍ ନିଜେ ସାତିମାଡ଼ାଦି ନିଜେଦି ସାତି ଆଡ଼ିଦିଙ୍ଗ୍ ଇଡ୍‌ଦେଙ୍ଗ୍ ମନା କିଏରେ ।"

7 ନାସ୍ତିୱାଲେ ଅବ୍ରହାମ ନିଙ୍ଗିଁଜି ତଦ୍ଦେସିୟ ଲୋକାଙ୍ଗ୍, ହେତର କଡ଼ରିଙ୍ଗ୍‌ ମାଡ଼ିସ୍ କିତାର୍ । 8 ମାରି, ୱାର୍‌ଗିଜିସାଜି ଇର୍ହାନ୍‌, "ନା ଆଗିଡ଼ିରାନ୍ ନା ସାତି ଆଡ଼ିଦି ମାଡ଼ା ଇଡ୍‌ଦେଙ୍ଗ୍ ଜଦି ୱିଜେରି ଇଛା ଆନାତ୍, ଆର୍‌ତିଙ୍ଗ୍‌ ନା ମାଟା ୱେଣ୍ତୁରୁ; ମିରୁ ନା ଉଣ୍ତିଙ୍ଗ୍ ସୋହରଦି କଡ଼ ଇପ୍ରୋଣ ଲାକୁତୁ କାବୁର୍ ସିଦୁ । 9 ୱାନ୍ ମି ନାଡ଼୍‌ମି ନା ମୁସ୍‍ନିଗୁଟା ଅଦିକାର୍ ଉଣ୍ତିଙ୍ଗ୍ ମକ୍‍ପେଲାଦୁ ୱାନି କିଡ଼ିଇ ଜାଗାଦୁ ମାନି ସାର୍‌ରା ନାଙ୍ଗିଁ ସିପିନ୍; ଆବେଟ୍‍କୁ ଏସ ଡାବୁଙ୍ଗୁ ଆନେ, ନାସ ଅସ ସିଦୁ ।" 10 ନାସ୍ତିୱାଲେ ଇପ୍ରୋଣ ହେତର କଡ଼ରି ନାଡ଼୍‌ମି ବାସ୍‌ତାମାର୍ହାର୍‌; ଆବେଟ୍ ହେତିୟ ଇପ୍ରୋଣ ନିଜେଦି ଗାଡ଼-ଗେଟ୍‍ଦୁ ଡ଼ୁଙ୍ଗୁନି ହେତର କଡ଼ର୍ ୱିଜେରି ଆଗ୍‌ଡ଼ି ଅବ୍ରହାମ ଇର୍ହାନ୍‌, 11 "ପ୍ରବୁ, ଆୟାୱାଜା ଆମାକିତ୍, ନା ମାଟା ୱେନ୍‍ଆ; ନାନୁ ନିଙ୍ଗିଁ ଆୟା ଜାଗା ମାରି ନାଡ଼ିମି ସାର୍‌ରା ସିତାପ୍‌; ନାନୁ ନିଜେଦି କୁଟୁମ୍‌ଦି କଡ଼ରି ଆଗିଡ଼ି ଆକା ନିଙ୍ଗିଁ ସିତାପ୍‌, ନିନୁ ନିଜେ ସାତିମାଡ଼ାଦିଙ୍ଗ୍ ମୁସ୍‍ଆ ।" 12 ମାତର୍‌ ଅବ୍ରହାମ ଆୟା ଦେସ୍‌ତି ଲୋକା ଆଗିଡ଼ି ମାଡ଼ିସ୍ କିତାନ୍ । 13 ମାରି ଆୟା ଦେସ୍‌ତି ଲୋକୁ ୱିଜେରେ ୱେନିୱାଜା ଇପ୍ରୋଣତିଙ୍ଗ୍ ଇର୍ହାନ୍‌, "ନିନୁ ଜଦି ନାଙ୍ଗିଁ ଆକା ସିନି, ଆର୍‌ତିଙ୍ଗ୍‌ ଅନୁରଦ୍ କିଜିନା, ନା ମାଟା ୱେନ୍ଆ; ନାନୁ ଆୟା କିଡ଼ିଇଦିଙ୍ଗ୍‌ ଡାବୁଙ୍ଗୁ ସିଜିନା, ନିନୁ ଆକା ଆସ୍‍ଆ; ଆୟାୱେନ୍‌କା ନାନୁ ଆୟା ଜାଗାଦୁ ନା ଆଡ଼ିଦି ସାତିମାଡ଼ାଦିଙ୍ଗ୍‌ ମୁସ୍‍ନା ।" 14 ଆବେଟ୍ ଇପ୍ରୋଣ ଅବ୍ରହାମତିଙ୍ଗ୍‌ ଇର୍ହାନ୍‌, 15 "ପ୍ରବୁ, ନା ମାଟା ୱେନ୍‌ଆ; ବୁମି କାଣ୍ତେକ୍‍ତି ଦାରା ସାରସ ଗୋଟା ୱେଣ୍ତି ଅଦୁଲିଙ୍ଗ୍‌, ନିଙ୍ଗିଁ ମାରି ମା ମାନୁ ଆକା ଏସ ନାଣ୍ତ ? ଆଦେଙ୍ଗ୍ ନିନୁ ନିଜେଦି ଆଡ଼ିଦି ସାତି ମାଡ଼ାଦିଙ୍ଗ୍ ମୁସ୍‍ଆ ।"

16 ଇପ୍ରୋଣଦି ଇୟା ମାଟା ୱେନ୍‍ଜି ଅବ୍ରହାମ ହେତିୟ ମାରିନ୍‌କୁ ୱିଜେରେ ୱେନ୍‌ଜି ଇପ୍ରୋଣ ମାଡ଼ାନ୍‌ ଉଣ୍ତ୍ରି ଇସାପ୍‍ତାନ୍ ବେପାର୍‌କିନିୱାରି ନାଣିମି ସାଲାତି ସାର୍‌ସ ୱେଣ୍ତି ଅଦୁଲି ଲେକିସ୍‌କିଜି ଇପ୍ରୋଣଦିଙ୍ଗ୍ ସିତାନ୍‌ ।

17 ଆବେଟ୍ ମମ୍ରିଦି ଆଗ୍‌ଡ଼ି ତରିନ୍‌ ମକ୍‍ପେଲାଦୁ ଇପ୍ରୋଣଦି ଏମେ କିଡ଼ିଇ ମାର୍ହାତ୍‌, ଆୟା କିଡ଼ିଇ ମାରି ନାଡ଼ିମି ସାର୍‌ରା ମାରି ଆବେଣି ସାରିବେଡ଼୍‌ତି ମାରାକ୍‍ମାନେ, 18 ଇୟା ୱିଜୁ ହେତ୍‍ର ମାରିନ୍‌କା ଆଗ୍‌ଡ଼ି, ୱାନି ଗାଡ଼୍‌ଦୁ ସନିକାର୍‌ ୱିଜେରି ଆଗ୍‌ଡ଼ି ଅବ୍ରହାମତି ଅଦିକାର୍‌ ତିର୍ କିତାର୍ ।

19 ତାନିୱେନେକା ଅବ୍ରହାମ ମମ୍ରିଦି ଆଗ୍‌ଡ଼ିମାନି ମକ୍‍ପେଲା କିଡ଼ିଇଦି ସାର୍‌ରାଦୁ ନିଜେଦି ଆଡ଼ି ସାରାଦିଙ୍ଗ୍ ମୁସ୍‍ତାନ୍ । ଆୟା ବାଡି କିଣାନ୍‌ ଦେସ୍‌ତି ହିବ୍ରୋଣ । 20 ଇୟାୱାଜା ମୁସୁନି ଜାଗାଦି ଅଦିକାରି ଉଣ୍ତିଙ୍ଗ୍‌ ଆୟା କିଡ଼ିଇ ମାରି ଆବେନୁ ମାନୁ ସାର୍‌ରା ଅବ୍ରହାମଦି ଅଦିକାର୍ ହେତ୍‌ଦି ମାରିନ୍‌କା ମାଡ଼ାନ୍ ତିର୍ ଆତାତ୍ ।