1 ତାନେୱେନ୍‌କା ଜିସୁ ତିବିରିୟା ଗାଡା ପାଡ଼ି ସିସୁରିଙ୍ଗ୍‌ ମାରିଡ଼େସି ତର୍‌ୟାଆତାନ୍‌ । ୱାନ୍‌ ଇୟାୱାଜା ତର୍‌ୟାଆତାନ୍‌; 2 ସିମୋନ ପିତର୍‌, ତୋମା, ଏଙ୍ଗ୍‌ ଦିଦୁମ ଇନାର୍‌, ଗାଲିଲିଦି କାନାଦିକାନ୍‌ ନିତନିଏଲ୍‍, ଜେବଦିରି ମାରିସିର୍‌ ମାରି ୱାନି ସିସୁରି ମାଣ୍‌କୁ ମାରି ରିଏର୍‌ ଉନ୍‌ଡ୍ରେମାନୁ ମାର୍ହାର୍‌ । 3 ✝୨୧:୩ ଲୁକ ୫:୫.ସିମୋନ ପିତର୍‌ ୱାରିଙ୍ଗ୍‌ ଇର୍ହାନ୍‌, "ନାନ୍ ମିନ୍‌କୁ ଆସ୍‌ତେଙ୍ଗ୍‌ ସୋଲ୍‌ସିନା ।" ଆଇ ସିସୁର୍‍ ୱାନିଙ୍ଗ୍‌ ଇର୍ହାର୍‌, "ମାପ୍‌ ବା ନି ୱାଲେ ସନାପ୍‌ ।" ୱାର୍‌ ସୋସିସଲ୍‌ସି ଡଙ୍ଗାଁଦୁ ଏକ୍‌ତାର୍‌ ମାରି ଜାଡ଼ି ପକ୍‌ତାର୍‌ ମାତର୍‌ ଆୟା ନାଡ଼ା ଇନିକା ଆସ୍‌ତେଙ୍ଗ୍‌ ଆଟ୍‍ଏତାର୍‍ । 4 ମାତର୍‌ ମାର୍‌ନାଣ୍ତିଙ୍ଗ୍‌ ଉଟ୍‌ଲା ନାଡ଼ାକାଦେ ଜିସୁ ଗାଡା ପାଡ଼ି ନିର୍‌ଆଁମାର୍ହାନ୍‌; ମାତର୍‌ ୱାନ୍‌ ଜିସୁ ଇଜି ସିସୁର୍‍ ନେସ୍‌ଏତାର୍‌ । 5 ଜିସୁ ୱାରିଙ୍ଗ୍‌ ଇର୍ହାନ୍‌, "କଡ଼ର୍‌ ମି ଲାକ୍‌ତୁ ଇନିକା ଉଣିକା ମାନାତ୍‌ ?"

ୱାର୍‌ ୱାନିଙ୍ଗ୍‌ ଇର୍ହାର୍‌, "ସିଲେ ।"

6 ✝ ୨୧:୬ ଲୁକ ୫:୬. ଜିସୁ ୱାରିଙ୍ଗ୍‌ ଇର୍ହାନ୍‌, "ଡଙ୍ଗାଁଦି ଉଣେରି ତରିନ୍‌ ଜାଡ଼ି ପୋକ୍‌ତୁ, ମାରି ମିର୍‌ ଏସ ଆସ୍‌ନିଦେର୍‌ ।" ଆବେଟ୍‌ ୱାର୍‌ ଜାଡ଼ି ପୋକ୍‌ତାର୍‌, ମାରି ଉଣା ମିନ୍‌କୁ ୱାତେ ଜେ, ୱାର୍‌ ଜାଡ଼ି ରେଲ୍‌ଦେଙ୍ଗ୍‌ ଆଟ୍‍ଏତାର୍‍ ।

7 ଆବେଟ୍‌ ଜିସୁ ଆମା ସିସୁଙ୍ଗୁଁ ଜିବନ୍‌ନୋଜି ମାର୍ହାନ୍‌, ୱାନ୍‌ ପିତରତିଙ୍ଗ୍‌ ଇର୍ହାନ୍‌, "ଇକାନ୍‌ ତୋ ପ୍ରବୁ ।" ସିମୋନ ପିତର୍‌ ଇକାନ୍‌ ତୋ ପ୍ରବୁ ଇଜି ୱେନ୍‌ଜି ଡୁମ୍‍ଡା ମେନ୍ଧଲ୍‍ ଆତିମାନିଙ୍ଗ୍‌ ନିଜେଦି ଆଙ୍ଗିଁ ଆରାଜି ଏର୍‌ତୁ ଗାତ୍‌ତାନ୍‍; 8 ମାତର୍‌ ଆଇ ସିସୁର୍‍ ମିନ୍‌କୁ ବର୍ତି ଆତିମାନି ଜାଡ଼ିଦିଙ୍ଗ୍‌ ରେଲ୍‌ଜି ରେଲ୍‌ଜି ଇସ୍ରି ଡଙ୍ଗାଁଦୁ ୱାତାର୍‌, ଇରିଙ୍ଗ୍‌ ୱାର୍‌ ପାଡ଼ିରାନ୍‌ ନାଣ୍ତ ଆକ ସିଲେତାର୍‌, କେବଲ୍‌ ଦୁଇସ ମୁରା ଆକ ମାର୍ହାନ୍‌ । 9 ୱାର୍‌ ପାଡ଼ି ରେତାର୍‌ରୋ ଆବେନୁ ଡିବ୍‌କାଣି ସିସୁ, ମାରି ତାନି ମୁସ୍‌କୁ ୱେକ୍‌ତି ମିନ୍‌କୁ ମାରି ରୁଟି ଇଟ୍‌ତିମାରିକା ସୁଡ଼ୁତାର୍‌ । 10 ଜିସୁ ୱାରିଙ୍ଗ୍‌ ଇର୍ହାନ୍‌, "ମିର୍‌ ଇଲେଇ ଏମେ ମିନ୍‌କୁ ଆସ୍‌ତିମାନିଦେର୍‌, ଆବେନୁ ଏସ ତାଗାଟ୍‌ ।"

11 ସିମୋନ ପିତର୍‌ ସୋଲ୍‌ସି ସଏ ପସାସ୍‌ତିନି ପେରି ପେରି ମିନ୍‌କୁ ବର୍ତି ଆତିମାନି ଜାଡ଼ିଦିଙ୍ଗ୍‌ ପାଡ଼ି ରେଲ୍‌ଜିତାତାନ୍‌; ମାରି ନିସା ମିନୁୱାତିଙ୍ଗ୍‌ବା ଜାଡ଼ି ତେଉଏତାତ୍‌ । 12 ଜିସୁ ୱାରିଙ୍ଗ୍‌ ଇର୍ହାନ୍‌, "ୱାଜ ଉନ୍‌ଡ୍ରୁ ।" ସିସୁରି ମାଣ୍‌କୁ ଏନ୍‌ ନିନୁ ଇଜି ୱାନିଙ୍ଗ୍‌ ୱେନ୍‌ବାଦେଙ୍ଗ୍‌ ସାହାସ୍‌ କିଏଜିମାର୍ହାର୍‌, ଇରିଙ୍ଗ୍‌ ୱାନ୍‌ ଜେ ପ୍ରବୁ, ଇକା ୱାର୍‌ ନେସ୍‌ତାମାର୍ହାର୍‌ । 13 ଜିସୁ ୱାଜି ରୁଟି ଅସି ୱାରିଙ୍ଗ୍‌ ସିତାନ୍‌, ମାରି ଆୟାୱାଜା ମିନ୍‌କୁ ବା ସିତାନ୍‌ ।

14 ସାତିୱାରି ମାଣ୍‌କୁ ଜିବନ୍‌ଆଜି ନିଙ୍ଗିଁତି ୱେନ୍‌କା ଜିସୁ ସିସୁରିଙ୍ଗ୍‌ ଇକା ମୁନ୍‌ଡ୍ରି ଦେବେଙ୍ଗ୍‌ ତର୍‌ୟାଆତାନ୍‌ ।

15 ୱାର୍‌ ଉଟି ୱେନ୍‌କା ଜିସୁ ସିମୋନ ପିତରତିଙ୍ଗ୍‌ ୱେନ୍‌ବାତାନ୍‌, "ଏ ଜୋହନତି ମାରିନ୍‌ ସିମୋନ, ନିନୁ ଇନିକା ନାଙ୍ଗିଁ ୱାରିମାଣ୍‌କୁ ନାଣ୍ତ ଜିବନ୍‌ନୋଜିନି ?"

ୱାନ୍‌ ୱାନିଙ୍ଗ୍‌ ଇର୍ହାନ୍‌, "ହୁଁ, ପ୍ରବୁ," ନାନ୍ ଜେ ନିଙ୍ଗିଁ ଜିବନ୍‌ନୋଜିନା, ଆକା ନିନ୍‌ ନେସ୍‌ନି ।

ଜିସୁ ୱାନିଙ୍ଗ୍‌ ଇର୍ହାନ୍‌, "ନା ମେଣ୍ତାପିଲେକାଙ୍ଗ୍‌ ସାରାକିଆ ।" 16 ଜିସୁ ମାରିଡ଼େସି ରୁଣ୍ତି ଦେବେଙ୍ଗ୍‌ ୱାନିଙ୍ଗ୍‌ ୱେନ୍‌ବାତାନ୍‌, "ଏ ଜୋହନତି ମାରିନ୍‌ ସିମୋନ, ନିନ୍‌ ଇନିକା ନାଙ୍ଗିଁ ଜିବନ୍‌ନୋଜିନି ?"

ୱାନ୍‌ ୱାନିଙ୍ଗ୍‌ ଇର୍ହାନ୍‌, "ହୁଁ, ପ୍ରବୁ," ନାନ୍ ଜେ ନିଙ୍ଗିଁ ଜିବନ୍‌ନୋଜିନା, ଆକା ନିନ୍‌ ନେସ୍‌ନି ।

ଜିସୁ ୱାନିଙ୍ଗ୍‌ ଇର୍ହାନ୍‌, "ନା ମେଣ୍ତେଆଙ୍ଗ୍‌ ନେଗେନ୍‌କିଜି ସାରାକିଆ ।" 17 ଜିସୁ ମୁନ୍‌ଡ୍ରି ଦେବେଙ୍ଗ୍‌ ୱାନିଙ୍ଗ୍‌ ୱେନ୍‌ବାତାନ୍‌, "ଏ ଜୋହନତି ମାରିନ୍‌ ସିମୋନ, ନିନ୍‌ ଇନିକା ନାଙ୍ଗିଁ ଜିବନ୍‌ନୋଜିନି ?"

ନିନ୍‌ ଇନିକା ନାଙ୍ଗିଁ ଜିବନ୍‌ନୋଜିନି, ଇକା ଇନ୍‌ଜି ୱାନ୍‌ ମୁନ୍‌ଡ୍ରି ଦେବେଙ୍ଗ୍‌ ପିତରତିଙ୍ଗ୍‌ ୱେନ୍‌ବାନିଙ୍ଗିଁ ୱାନ୍‌ ଦୁଃକ୍‌ ଆଜି ୱାନିଙ୍ଗ୍‌ ଇର୍ହାନ୍‌, "ପ୍ରବୁ, ନିନ୍‌ ୱିଜୁ ବିସୟ୍‌ ନେସ୍‌ନି; ନାନ୍ ଜେ ନିଙ୍ଗିଁ ଜିବନ୍‌ନୋଜିନା, ଆକା ନିନ୍‌ ନେସ୍‌ନି ।"

ଜିସୁ ୱାନିଙ୍ଗ୍‌ ଇର୍ହାନ୍‌, "ନା ମେଣ୍ତେଆଙ୍ଗ୍‌ ସାରାକିଆ । 18 ସତ୍‌ ସତ୍‍ନେ ନାନ୍ ନିଙ୍ଗିଁ ୱେର୍‌ସିନା, ମୁରୁଲି ମାନିୱାଲେ ନିନ୍‌ ନିଜେଦି ଜୁକିଦୁ ଗାଟି ତରାଜ ଏମେ ତରିନ୍‌ ବଦା, ଆୟା ତରିନ୍‌ ବୁଲାଜିମାର୍‌ଇ, ମାତର୍‌ ଡକ୍ରା ଆତିଙ୍ଗ୍‌ ନିନ୍‌ ନିଜେଦି କିୟୁ ପେରିନି ମାରି ଆଇକାନ୍‍ ଅରେନ୍‍ ନି ଜୁକିଦୁ ଗାଟି ତର୍‌ନାନ୍‌ନୋ, ଏମେ ତରିନ୍‌ ନିଙ୍ଗିଁ ବଦା ସିଲେତ୍‍, ଆୟା ତରିନ୍‌ ନିଙ୍ଗିଁ ଅନାନ୍‍ ।" 19 ପିତର୍‌ ଏଣ୍ତେସ୍‌ୱାଜା ସାନିଦଣ୍ତୋତି ମାଣ୍‌କୁ ମାପୁରୁଙ୍ଗୁଁ ଦନ୍ୟବାଦ୍‌ କିନାନ୍‌, ଆବେଣି ମାଟା ସିଜି ୱାନ୍‌ ଇକା ଇର୍ହାନ୍‌ । ତାନେୱେନ୍‌କା ଜିସୁ ୱାନିଙ୍ଗ୍‌ ଇର୍ହାନ୍‌, "ନା ୱେନ୍‌କା ରାଆ ।"

20 ✝ ୨୧:୨୦ ଜୋହନ ୧୩:୨୫. ଜିସୁ ଏମେ ସିସୁଙ୍ଗୁଁ ଜିବନ୍‌ନୋଜି ମାର୍ହାନ୍‌ ମାରି ଏନ୍‌ବା ନାଡ଼ାରିବଜିଦି ବେଡ଼ାଦୁ ଜିସୁଦି ବକାପାଡ୍‌କାଦୁ ଗେକାତାନ୍‌ନୋ, "ପ୍ରବୁ, ନିଙ୍ଗିଁ ଏନ୍‌ ସାତ୍ରୁରି କିୟୁଦୁ ସର୍‌ପେ କିନାନ୍‌ ଇଜି ୱେନ୍‌ବାତା ମାର୍ହାନ୍‌, ଆୟା ସିସୁଙ୍ଗୁଁ ପିତର୍‌ ମାର୍‌ଜିବେସ୍‌ସି ୱେନ୍‌କା ୱାଜିମାରିକା ସୁଡ଼ୁତାନ୍‌ ।" 21 ପିତର୍‌ ୱାନିଙ୍ଗ୍‌ ସୁଡ଼ୁଜି ଜିସୁଙ୍ଗୁଁ ୱେନ୍‌ବାତାନ୍‌, "ପ୍ରବୁ, ଇୟାୱାନି ବିସୟ୍‌ତାନ୍‌ ଇନିକା ଇଜିନି ?"

22 ଜିସୁ ୱାନିଙ୍ଗ୍‌ ଇର୍ହାନ୍‌, "ନାନ୍ ମାରିଡ଼େସିୱାନି ସାନ୍ଦି ୱାନ୍‌ ଜିଜ ମାନିନ୍‌ ଇଜି ଜଦି ନାନ୍ ବଦା କିନା, ଆର୍‌ତିଙ୍ଗ୍‌ ଆବେଟ୍‌ ନିଙ୍ଗିଁ ଇନିକା ମାନାତ୍‌ ? ନିନୁ ନା ୱାଲେ ରାଆ ।"

23 ଆବେଟ୍‌ ଆୟା ସିସୁ ଜେ ସାଏନ୍‌, ତଡ଼ାନ୍‌କା ଲୋଇ ଇୟା ମାଟା ୱେଙ୍ଗିଁତାତ୍‌, ମାତର୍‌ ୱାନ୍‌ ସାଏନ୍‌ ଇଜି ଜିସୁ ୱାନିଙ୍ଗ୍‌ ଇନ୍‌ଏନ୍‌ ମାର୍ହାନ୍‌, ମାତର୍‌ ନାନ୍ ଡ଼େସିୱାନି ସାନ୍ଦି ୱାନ୍‌ ଜିଜ ମାନିନ୍‌ ଇଜି ଜଦି ନାନ୍ ବଦା କିନା, ଆର୍‌ତିଙ୍ଗ୍‌ ଆବେଟ୍‌ ମିଙ୍ଗିଁ ଇନିକା ମାନାତ୍‌ ଇଜି ୱେର୍‌ତାମାର୍ହାନ୍‌ ।

24 ଏନ୍‌ ଇୟାୱିଜୁ ବିସୟ୍‌ତି ସାକ୍ୟ ସିଜିନାନ୍‌ ମାରି ଇୟାୱିଜୁ ରାସ୍‌ତାମାନାନ୍‌, ୱାନ୍‌ ଆୟା ସିସୁ; ମାରି, ୱାନି ସାକୟ୍ ଜେ ସତ୍‌, ଆକା ମାପ୍‌ ନେସ୍‌ନାପ୍‌ ।

25 ମାରି, ଜିସୁ ମାରି ନାଣ୍ତ ପାଣି ବା କିତାମାର୍ହାନ୍‌, ଆୟାୱିଜୁ ଜଦି ଉନ୍‌ଡ୍ରି ଉନ୍‌ଡ୍ରି କିଜି ରାସାତିଙ୍ଗ୍‌ ମାନ୍ଦି, ଆର୍‌ତିଙ୍ଗ୍‌ ନିସ ବଇଙ୍ଗ୍‌ ରାସାତେ ମାନ୍ଦି ଜେ, ନା ବିସାର୍‌ତୁ ସାରାଦୁନିଆଦୁ ଆୟାୱିଜୁ ବଇଙ୍ଗ୍‌ ଇଡ୍‌ନି ଉଣ୍ତିଙ୍ଗ୍‌ ବାଡି ଆଏତାତ୍‌ମାନ୍ଦି ।