1 ଜିସୁ ଜେ ଜୋହନତି ବାଦ୍‌ଲୁ ନାଣ୍ତ ସିସୁର୍‍ କିଜିନାନ୍‌ ମାରି ୱାରିଙ୍ଗ୍‌ ଡୁବନ୍‌ ସିଜିନାନ୍‌ ଇଜି ପାରୁସିର୍‌ ୱେର୍‌ଆର୍‌ । 2 ଜଦିବା ଜିସୁ ନିଜେନେ ଡୁବନ୍‌ ସିଏଜିମାର୍ହାନ୍‌, ୱାନି ସିସୁର୍‍ ସିଜିମାର୍ହାର୍‌ । 3 ଇକା ପାରୁସିର୍‌ ୱେର୍‌ସିନାର୍‌ ଇଜି ଏସ୍ତିୱାଲେ ଜିସୁ ୱେର୍‌ଆନ୍‌, ନାସ୍ତିୱାଲେ ୱାନ୍‌ ଜିହୁଦା ଦେସ୍‌ ଡ଼ିସ୍‌ସିତାନ୍‌ନୋ ମାରିଡ଼େସି ଗାଲିଲିଦୁ ସର୍ହାନ୍‌ । 4 ସମିରୋଣ ନାଡ଼୍‍ମି ସାରି ସିଜି ୱାନିଙ୍ଗ୍‌ ସନ୍‌ଡ଼୍ରେଙ୍ଗ୍‌ ପଡ଼ାତାତ୍‌ ।

5 ଆଦେଙ୍ଗ୍‌ ୱାନ୍‌ ସଲ୍‌ସି ଜାକୁବ ନିଜେଦି ମାରିନ୍‌ ଜୋସେପ୍‌ତିଙ୍ଗ୍‌ ଆମା ବୁମିକାଣ୍ତେକ୍‌ ଦାନ୍‌ ସିତାମାର୍ହାନ୍‌, ଆବେଣି ଲାକ୍‌ତୁରି ସମିରୋଣଦି ସୁକାର ଦର୍‌ତି ଉଣ୍ତ୍ରି ନାର୍‍ତୁ ଇତାନ୍‌; 6 ଆୟା ବାଡିଦୁ ଜାକୁବଦି କୁଇକାଲ୍‌ ମାର୍ହାତ୍‌ । ମାରି, ଜିସୁ ବୁଲାଜି ବୁଲାଜି ୱାଦିତାନୋ ଆୟା କୁଇକାଲ୍‌ ଲାକ୍‌ତୁ ବାସ୍‌ତାନ୍‌ । ନାସ୍ତିୱାଲେ ମାଦ୍‍ଲାମ୍‍ୱେଡ଼ା ଆତାମାର୍ହାତ୍‌ ।

7 ଅରେତ୍‌ ସମିରୋଣିୟା ଆଇମା ଏରୁ ଅତେଙ୍ଗ୍‌ ୱାତାତ୍‍, ଜିସୁ ତାନିଙ୍ଗ୍‌ ଇର୍ହାନ୍‌, ନାଙ୍ଗିଁ ଏରୁ ଉଣ୍ତେଙ୍ଗ୍‌ ସିଦା । 8 ନାସ୍ତିୱାଲେ ୱାନି ସିସୁର୍‍ ଉଣ୍ତେଙ୍ଗ୍‌ କାଦି କଣ୍ତେଙ୍ଗ୍‌ ଗାଡ଼୍‌ତୁ ସର୍‍ହାମାର୍ହାର୍‌ ।

9 ଆବେଟ୍‌ ସମିରୋଣିୟା ଆଇମା ଜିସୁଙ୍ଗୁଁ ଇର୍ହାତ୍‌, ନିନ୍‌ ଅରେନ୍‍ ଜିହୁଦି ମାରି ନାନ୍ ସମିରୋଣିୟା ଏଣ୍ତେସ୍‌ ନା କିୟୁଦାନ୍‌ ଏର୍‌ ଉଣ୍ତେଙ୍ଗ୍‌ ଲସ୍‌ସିନି ? ଇରିଙ୍ଗ୍‌ ସମିରୋଣିୟରି ୱାଲେ ଜିହୁଦିର୍‌ ମିସାଜିସାଏର୍‌ ।

10 ଜିସୁ ତାନିଙ୍ଗ୍‌ ଇର୍ହାନ୍‌, ମାପୁରୁ ଇନିକା ସିଦେଙ୍ଗ୍‍ ଆଟ୍‍ନାନ୍‍, ନିନ୍‌ ଜଦି ନେସ୍‍ତିମାନ୍ଦି ମାରି ଏନ୍‌ ନି କିୟୁଦାନ୍‌ ଏର୍‌ ଉଣ୍ତେଙ୍ଗ୍‌ ବଦାକିଜିନାନ୍‌ ଆରିଙ୍ଗ୍‌ ଜଦି ନିନ୍‌ ୱାନିଙ୍ଗ୍‌ ଲସ୍‌ତିମାନ୍ଦି, ମାରି ୱାନ୍‌ ନିଙ୍ଗିଁ ଜିବନ୍‌ତି ଏରୁ ସିତାନ୍‌ମାନ୍ଦି ।

11 ଆୟା ଆଇମା ୱାନିଙ୍ଗ୍‌ ଇର୍ହାତ୍‌, ଆଜ୍ଞା, ଏରୁ ଆନ୍‌ନି ଉଣ୍ତିଙ୍ଗ୍‌ ନି ଲାକ୍‌ତୁ ଇନି ଗିନା ବା ସିଲେତ୍‍, ମାରି କୁଇକାଲ୍‌ ତୋ ନାଣ୍ତ ଆଡ୍‍ଗି; ଆଦେଙ୍ଗ୍‌ ନିନ୍‌ ଏମେମାଣ୍‌କୁ ଆୟା ଜିବନ୍‌ତି ଏରୁ ପଇତିମାନି ? 12 ମା ଏମେ ପୁର୍ବେଦି ଡକ୍ରାଦାଦା ଜାକୁବ୍‌ ମାଙ୍ଗିଁ ଇୟା କୁଇକାଲ୍‌ ସିତାମାର୍ହାନ୍‌, ମାରି ନିଜେ, ମାରି ୱାନି କଡ଼ର୍‌ ମାରି ଜାତୁଙ୍ଗ୍‌ମାନ୍ଦା ଇବେଣ୍‌କୁ ଉଟେ ମାର୍‌ଏ, ୱାନିମାଣ୍‌କୁ ଇନିକା ନିନ୍‌ ପେରିକିନ୍ଦା ?

13 ଜିସୁ ତାନେଙ୍ଗ୍‌ ଇର୍ହାନ୍‌, ଏନ୍‌ଆପିନ୍‌ ଇୟା ଏରୁ ଉଣାନ୍‌, ୱାନ୍‌ ମାରିଡ଼େସି ଏର୍‍କିଆନାନ୍‌; 14 ମାତର୍‌ ନାନ୍ ଏମେ ଏରୁ ସିନା, ଆକା ଏନ୍‌ଆପିନ୍‌ ଉଣାନ୍‌, ୱାନ୍‌ ଏସ୍‌କାଙ୍ଗ୍‌ବା ଏର୍‌କିସାଏନ୍‌, ମାରି ନାନ୍ ସିଜିମାନି ଏର୍‌ ୱାନି ଜିବନ୍‌ତୁ ଉଣ୍ତ୍ରି ଜିବନ୍‌ ସିନି ୱାଙ୍ଗ୍‍ଁନି ୱାଜା ଆନାତ୍‌ । ଆବେଟ୍‌କୁ ଉଟିଙ୍ଗ୍‍ ୱାନ୍‌ ଏସ୍‍କାଙ୍ଗ୍‍ୱିଜ୍‍ଇ ଜିବନ୍‌ ପୋଇନାନ୍‌ ।

15 ଆଇମା ୱାନିଙ୍ଗ୍‌ ଇର୍ହାତ୍‌, ଆଜ୍ଞା, ଆୟାଉଣ୍ତିଙ୍ଗ୍‌ ନାଙ୍ଗିଁ ଆୟା ଏର୍‌ ସିଦା, ନାଙ୍ଗିଁ ଏଣ୍ତେସ୍‌ ଏର୍‌କି କାଟ୍‌ଏତ୍‌, ମାରି ଏରୁ ଆନ୍‌ନି ଉଣ୍ତିଙ୍ଗ୍‌ ନିସା ଆକ ସାରି ଇବେନୁ ୱାଦେଙ୍ଗ୍‌ ପଡ଼ାଏତ୍‌ ।

16 ଜିସୁ ତାନେଙ୍ଗ୍‌ ଇର୍ହାନ୍‌, "ସାଙ୍ଗ୍ଆ, ନି କୋନ୍‌ଲିଙ୍ଗ୍‌ କୁକ୍‌ସ ଇବେନୁ ତାଗା ।"

17 ଆଇମା ୱାନିଙ୍ଗ୍‌ ଇର୍ହାତ୍‌, ନା କୋନ୍‌ଲି ସିଲେନ୍‌ । ଜିସୁ ତାନେଙ୍ଗ୍‌ ଇର୍ହାନ୍‌, ନା କୋନ୍‌ଲି ସିଲେନ୍‌ ଇଜି, ସତ୍‌ ୱେର୍‌ତି; 18 ଇରିଙ୍ଗ୍‌ ନି କୋନ୍‌ଲିର୍‌ ପାସ୍‌ଲୋକ୍‌ ମାର୍ହାର୍‌, ମାରି ଇଲେଇ ନିନ୍‌ ଆମାୱାନିୱାଲେ ମାନି, ମାରି ନି ଲାକ୍‌ତୁ ଏନ୍‌ ମାନାନ୍‌, ଇକା ସତ୍‌ ୱେର୍‌ତିମାନି ।

19 ଆଇମା ୱାନିଙ୍ଗ୍‌ ଇର୍ହାତ୍‌, ଆଜ୍ଞା, ନିନ୍‌ ଜେ ଅରେନ୍‍ ବାବବାଦି, ଇକା ନାନୁ ସୁଡ଼ୁଦେଙ୍ଗ୍‍ ଆଟ୍‍ସିନା । 20 ମା ପୁର୍ବେଦିଡକ୍‌ରାଦାଦାର୍‌ ଇୟା ଗରନ୍‌ତୁ ଉପାସନା କିତାର୍‌, ମାରି, ମିର୍‌ ଜିହୁଦିର୍‌ ଇଜିନିଦେର୍‌, ଏମେ ବାଡିଦୁ ଉପାସନା କିନି ନିୟମ୍‌, ଆକା ଜିରୁସାଲାମ୍‌ ମନ୍ଦିର ।

21 ଜିସୁ ତାନିଙ୍ଗ୍‌ ଇର୍‌ଆନ୍‌, ଏ ଆଇମା, ନା ମାଟା ବିସ୍‌ବାସ୍‌ କିଆ, ଇୟାୱାଜା ସମୟ ୱାଜିନାତ୍‍, ଏମେ ସମୟତୁ ମିର୍‌ ଇୟା ଗରନ୍‌ତୁ ମାରି ଜିରୁସାଲାମ୍‌ତୁ ବୁବାଦି ଉପାସନା କିଇଦେର୍‍ । 22 ମିର୍‌ ସମିରୋଣିୟର୍‍ ଆମାୱାନିଙ୍ଗ୍‌ ସତ୍‌ତାନ୍‌ ନେସ୍‌ଇଦେର୍‌, ଆକା ଉପାସନା କିଜିମାନିଦେର୍‍; ମାତର୍‌ ମାପ୍‌ ଜିହୁଦିର୍‌ ଆମାୱାନିଙ୍ଗ୍‌ ନେସ୍‌ନାପ୍‌, ୱାନି ଉପାସନା କିଜିମାନାପ୍‍, ଇରିଙ୍ଗ୍‌ ରକିୟା ଜିହୁଦିର୍‌ ମାଣ୍‌କୁ ୱାନାତ୍‌ । 23 ମାତର୍‌ ଏମେ ସମୟତୁ ସତ୍‌ ଉପାସନା କିନିକାର୍‍ ଆତ୍ମାଦୁ ନି ସତ୍‌ତାନ୍‌ ବୁବାଦି ଉପାସନା କିନାର୍‌, ଆୟାୱାଜା ସମୟ୍ ୱାଜିନାତ୍‍; ମାରି, ଇଲେଇବା ଇଗା ୱାତାତ୍‍; ଇରିଙ୍ଗ୍‌ ବୁବା ଇୟାୱାଜା ଉପାସନା କିନିୱାରିଙ୍ଗ୍‍ ବଦାକିନାନ୍‌ । 24 ମାପୁରୁ ଆତ୍ମା, ମାରି କେବଲ୍‌ ଆତ୍ମାଦି ସାକ୍ତି ନି ସତ୍‌ତାନ୍‌ ୱାନି ଉପାସନା କିନିକାର୍‍ ୱାନି ଉପାସନା କିଦେଙ୍ଗ୍ ଆଟ୍‍ନାର୍‍ ।

25 ଆଇମା ଜିସୁଙ୍ଗୁଁ ଇର୍ହାତ୍‌, "ମସିହ, ଆମାୱାନିଙ୍ଗ୍‌ କ୍ରିସ୍ତ ଇନାର୍‌, ୱାନ୍‌ ୱାଜିନାନ୍‍ ଇଜି ନାନ୍ ନେସ୍‌ନା; ଏସ୍ତିୱାଲେ ୱାନ୍‌ ୱାନାନ୍‌, ୱାନ୍‌ ମାଙ୍ଗିଁ ୱିଜୁ ବିସୟ୍‌ ୱେର୍‌ନାନ୍‌ ।"

26 ଜିସୁ ତାନିଙ୍ଗ୍‌ ଇର୍‌ଆନ୍‌, "ନି ୱାଲେ ୱାର୍‍ଗିଜିନା ଜେ ନାନ୍, ନାନ୍ ଆୟାକାନ୍‌ ।"

27 ନାସ୍ତିୱାଲେ ଜିସୁଦି ସିସୁର୍‍ ୱାଜି ୱାନ୍‌ ଅରେତ୍‌ ଆଇମାଦି ୱାଲେ ୱାର୍‌ଗିସାନିକା ସୁଡ଼ୁଜି କାବା ଆତାର୍‌, "ଆତିବା ନିନ୍‌ ଇନିକା ବଦାକିନି, ମାରି ଏନ୍ଦା ତାନି ୱାଲେ ୱାର୍‍ଗିଜିନାନ୍‍, ଇକା ଏନ୍‌ ଜିସୁଙ୍ଗୁଁ ୱେନ୍‍ବାଦେଙ୍ଗ୍‍ ସାସ୍‌ କିଏତାର୍‌ ।"

28 ଆବେଟ୍‌ ଆୟା ଆଇମା ନିଜେଦି ଏର୍‌ ସାଟି ଇଡ୍‌ଜି ଗାଡ଼୍‌ତୁ ସଲ୍‌ସି ଲୋକାଙ୍ଗ୍‌ ଇର୍ହାତ୍‌, 29 "ରାଦୁ, ଅରେନ୍‍ୱାନିଙ୍ଗ୍‍ ସୁଣିଦେର୍‍, ନାନ୍ ଆମା ଆମାକା କିତାମାନା, ଆୟାୱିଜୁ ୱାନ୍‌ ନାଙ୍ଗିଁ ଇର୍‌ଆନ୍‌, ୱାନ୍‌ ଏମୋ କ୍ରିସ୍ତ ଆନାନ୍‌ ସୁଜି ?" 30 ଆବେଟ୍‌ ଲୋକୁ ଗାଡ଼୍‌ତାନ୍‍ ସହସି ୱାନି ଲାକ୍‌ତୁ ସନ୍‌ଡ଼୍ରେଙ୍ଗ୍‌ ଆସ୍‌ତାନ୍‌ ।

31 ଆୟାଦାପ୍ରେ ସିସୁର୍‍ ଜିସୁଙ୍ଗୁଁ ମାଡ଼ିସ୍‌ କିତାର୍‌, "ଏ ଗୁରୁ, କାଣ୍ତେକ୍‍ ଉଣୁଆ ।"

32 ମାତର୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, "ଉଣ୍ତେଙ୍ଗ୍‌ ଇଜି ଏମେ କାଦି ନାବାନ୍‍ ମାନାତ୍‌, ଆୟା ବିସୟ୍‌ତାନ୍‌ ମିର୍‌ ଇନିକା ନେସ୍‌ଇଦେର୍‌ ।"

33 ଆବେଟ୍‌ ସିସୁର୍‍ ତାମେଲୋଇ ୱାର୍‍ଗିଦେଙ୍ଗ୍‍ ଆସ୍‌ତାର୍‌, "ଏନ୍‌ ୱାନିଙ୍ଗ୍‌ କାଦି ତାତା ସିତା ମାନାନ୍‌ ସୁଗି ?"

34 ଜିସୁ ୱାରିଙ୍ଗ୍‌ ଇର୍‌ଆନ୍‌, "ନାଙ୍ଗିଁ ପକ୍‍ତିମାନିୱାନିଦି ବଦା ପୁରା କିଦେଙ୍ଗ୍‌ ମାରି ୱାନି ସିତିମାନି ପାଣିୱିଜୁ ୱିସ୍‍ତେଙ୍ଗ୍‍ ଇକାନେ ନା କାଦି । 35 ମିର୍‌ ଇଜିମାନିଦେର୍‍, ପାସି କୟ୍‍ଦେଙ୍ଗ୍‍ ମାରି ନାଲ୍‍ଗି ଲେଜ୍‌କୁ ମାନେ, ମାତର୍‌ ନାନ୍ ମିଙ୍ଗିଁ ଇଜିନା, ପାସି କିଡ଼ିଇ ଆଙ୍ଗ୍‍ଁ ନେଗେନ୍‌ କିଜି ସୁଡ଼ୁଦୁ; ଆୟାୱିଜୁ କୟ୍‍ଦେଙ୍ଗ୍‍ ଇଜି ପାଣ୍ତିତେନି । 36 ଇଲେଇବା କୟ୍‍ନିକାନ୍‍ ମୁଲ୍‌ ପୟ୍‍ଜିନାନ୍‍ ମାରି ଏସ୍‌କାଙ୍ଗ୍‌ୱିଜ୍‍ଇ ଜିବନ୍‌ ଉଣ୍ତିଙ୍ଗ୍‌ ପଲ୍‌ ଉଣ୍ତା କିଜିନା, ଏଣ୍ତେସ୍‌ ୱିତ୍‍ନିକାନ୍‍ ମାରି କୟ୍‍ନିକାନ୍‍ ରିଏର୍‌ ମିସାଜି ୱେଡ଼ିକା କିନାର୍‌ । 37 ଇରିଙ୍ଗ୍‌ ଅରେନ୍‍ ୱିତ୍‍ନାନ୍‍ ମାରି ଆଇକାନ୍‍ କୟ୍‍ନାନ୍‍, ଇୟା ମାଟା ସତ୍‌ । 38 ମିର୍‌ ଆମା ଉଣ୍ତିଙ୍ଗ୍‌ ପାଣି କିଇଦେର୍‍, ଆକା କୟ୍‍ଦେଙ୍ଗ୍‍ ଇଜି ନାନ୍ ମିଙ୍ଗିଁ ପକ୍‍ତା; ଆଇକାର୍‌ ପାଣିକିତାମାନାର୍‍, ମାରି ମିର୍‌ ୱାରି ପାଣିକିତି ପଲ୍‌ ପୟ୍‌ଜିନିଦେର୍‌ ।"

39 ନାନ୍ ଆମା ଆମାକା କିତାମାନା, ଆୟାୱିଜୁ ୱାନ୍‌ ନାଙ୍ଗିଁ ଇର୍‌ଆନ୍‌ ଇଜି ଏମେ ଆଇମା ସାକି ସିତାମାର୍‍ଆତ୍‍, ତାନି ମାଟା ଉଣ୍ତିଙ୍ଗ୍‌ ଆୟା ଗାଡ଼୍‌ତି ସମିରୋଣଦି ଲୋକା ଲୋଇ ନାଣ୍ତ ଲୋକୁ ଜିସୁମାନୁ ବିସ୍‌ବାସ୍‌ କିତାର୍‍ । 40 ମାରି ସମିରୋଣୟଦି ଲୋକୁ ୱାନି ଲାକ୍‌ତୁ ୱାଜି ୱାରି ୱାଲେ ତେବାଦେଙ୍ଗ୍‍ ଇଜି ୱାନିଙ୍ଗ୍‌ ମାଡ଼ିସ୍‌ କିତାର୍‍, ମାରି ୱାନ୍‌ ରିନେନ୍‍ ଆୟା ବାଡିଦୁ ତେବାତାନ୍‌ ।

41 ମାରି ଜିସୁଦି ବାକ୍ୟ ୱେନ୍‌ଞ୍ଜି ମାରି ନାଣ୍ତ ଲୋକୁ ବିସ୍‌ବାସ୍‌ କିତାର୍‍, 42 ମାରି, ୱାର୍‌ ଆୟା ଆଇମାଦିଙ୍ଗ୍‍ ଇର୍ହାର୍‌, "ଇଲେଇ ନି ମାଟାଦି ଉଣ୍ତିଙ୍ଗ୍‌ ମାପ୍‌ ବିସ୍‌ବାସ୍‌ କିଏପ୍‍, ଇରିଙ୍ଗ୍‌ ମାପ୍‌ ନିଜେନିଜେ ୱେର୍‍ଆମାନାପ୍‍, ମାରି ଇକାନ୍‌ ଜେ ସତେନେ ଦୁନିଆଦି ରକିୟା କିନିକାନ୍‍, ଇକା ମାପ୍‌ ନେସ୍‌ତାମାନାପ୍‌ ।"

43 ରିନେନ୍‍ ୱେନ୍‌କା ଜିସୁ ଆବେଟ୍‌ତାନ୍‌ ସହସି ଗାଲିଲିଦୁ ସର୍‌ଆନ୍‌ । 44 ✝ଇରିଙ୍ଗ୍‌ ବାବବାଦି ନିଜେଦି ଦେସ୍‌ତୁ ସମ୍ମାନ୍‍ ପୟ୍‌ଏର୍‌ ଇଜି ଜିସୁ ନିଜେ ସାକି ସିତାମାର୍‍ଆନ୍‍ । 45 ମାରି, ୱାନ୍‌ ଗାଲିଲିଦୁ ଇଗା ୱାତାନ୍‌, ନିସ୍ତାର ପଣ୍ତୟ୍‌ତିୱାଲେ ୱାନ୍‌ ଜିରୁସାଲାମ୍‍ତୁ ଇନି ଇନିକା କିତାମାର୍‍ଆନ୍‍, ଆୟାୱିଜୁ ସୁଡ଼ୁତାମାର୍‍ଆର୍‍ଆକା ଗାଲିଲିଦିକାର୍‍ ୱାନିଙ୍ଗ୍‌ ମାନାତାର୍‍, ଇରିଙ୍ଗ୍‌ ୱାନ୍‌ ବା ପଣ୍ତୟ୍‌ତୁ ସର୍‍ଆମାର୍‍ଆନ୍‍ ।

46 ✝ଆବେଟ୍‌ ଗାଲିଲିଦି ଆମା କାନା ଗାଡ଼୍‌ତୁ ୱାନ୍‌ ଏର୍‍ତିଙ୍ଗ୍‍ ଅଙ୍ଗୁର୍‍ରସ୍‍ କିତାମାର୍‍ଆନ୍‍, ଆୟା ବାଡିଦୁ ଜିସୁ ମାରିଡ଼େସି ସର୍ହାନ୍‌ । ମାରି ଆବେନ୍‌ ଅରେନ୍‍ ରାଜାଦି ପାଣିକିନିକାନ୍‌ ମାର୍ହାନ୍‌, ୱାନି ମାରିସି କପର୍‍ନାହୁମ୍‍ତୁ ନବ୍‌ ଆତାମାର୍‍ଆନ୍‍ । 47 ଜିସୁ ଜିହୁଦା ଦେସ୍‍ତାନ୍‍ ଗାଲିଲିଦୁ ସତାୱାତାମାନାନ୍‍, ଇକା ୱେନ୍‌ଜି ୱାନ୍‌ ୱାନି ଲାକ୍‌ତୁ ସଲ୍‌ସି ୱାନ୍‌ ଏଣ୍ତେସ୍‌ ୱାଜି ୱାନି ମାରିସିଙ୍ଗ୍‌ ନେଗେଣ୍ତ୍‍ କିନାନ୍‌, ଆୟାଉଣ୍ତିଙ୍ଗ୍‌ ୱାନିଙ୍ଗ୍‌ ମାଡ଼ିସ୍‌ତେଙ୍ଗ୍‍ ଆସ୍‌ତାନ୍‌, ଇରିଙ୍ଗ୍‌ ୱାନ୍‌ ସାନିୱାଜା ଆତାମାର୍‍ଆନ୍‍ । 48 ଆବେଟ୍‌ ଜିସୁ ୱାନିଙ୍ଗ୍‌ ଇର୍‌ଆନ୍‌, "ସିନା ନି କାବାଆନିପାଣିଙ୍ଗ୍‍ଁ ସୁଡ଼ୁଏତିଙ୍ଗ୍‍ ମିର୍‌ ଏଣ୍ତେସ୍‌ବା ବିସ୍‌ବାସ୍‌ କିଇଦେର୍‍ ।"

49 ରାଜାଦି ପାଣିକିନିକାନ୍‌ ଜିସୁଙ୍ଗୁଁ ଇର୍‌ଆନ୍‌, "ଏ ଗୁରୁ," ନା କଡ଼ ସାନି ଆଗ୍‍ଡ଼ିନେ ରାଆ ।

50 ଜିସୁ ୱାନିଙ୍ଗ୍‌ ଇର୍‌ଆନ୍‌, ସାଙ୍ଗ୍‍ଆ, ନି କଡ଼ ଜିତାନ୍‍ନି । ଆୟା ଲୋକୁ ଜିସୁ ୱେର୍‍ତିମାନି ମାଟାଦିଙ୍ଗ୍‌ ବିସ୍‌ବାସ୍‌ କିଜି ସର୍‌ଆନ୍‌ । 51 ମାରି, ୱାନ୍‌ ସଲ୍‍ପୁ ସଲ୍‍ପୁ ତାନି ଗତିମୁରୁଲିରି ୱାନିଙ୍ଗ୍‌ ବେଟ୍‍ବୁଡ଼ାଜି ୱାନି କଡ଼ ଜିତାନ୍‍ନି ଇଜି ଇର୍ହାର୍‌ ।

52 ଆଦେଙ୍ଗ୍‌ ଏସ୍ତିୱାଲେ ୱାନି କଡ଼ଦିଙ୍ଗ୍‌ ନବ୍‌ ଡ଼ିସ୍‍ତାତ୍‍, ଆକା ୱାନ୍‌ ୱାରିଙ୍ଗ୍‌ ୱେନ୍‌ବାତାନ୍‌ । ଆବେଟ୍‌ ୱାର୍‌ ୱାନିଙ୍ଗ୍‌ ଇର୍ହାର୍‌, "ଇଏନ୍‌ ଗନ୍‍ଣ୍ଟେ ୱେଡ଼ାଦୁ ୱାନିଙ୍ଗ୍‌ ନବ୍‌ ଡ଼ିସ୍‍ତାତ୍‍ ।" 53 ଆବେଟ୍‌ ୱାନି ବୁବାସି ବୁଜାତାନ୍‍ ଜେ, ଜିସୁ ଏସ୍ତିୱାଲେ ନି କଡ଼ ଜିତାନ୍‍ନି ଇଜି ୱାନିଙ୍ଗ୍‌ ଇର୍‌ଆମାର୍‌ଆନ୍‌, ଟିକ୍‌ ନାସ୍ତିୱାଲେ ଇୟା ଗଟାନା ଗଟାତାତ୍‍ । ମାରି, ୱାନ୍‌ ନିଜେ ନି ୱାନି ୱିଜୁ ଇଲୁଦିକାର୍‍ ଜିସୁଙ୍ଗୁଁ ବିସ୍‌ବାସ୍‌ କିତାର୍‍ ।

54 ଜିହୁଦାଦାନ୍‍ ମାରିଡ଼େସି ଗାଲିଲିଦୁ ୱାତି ୱେନ୍‌କା ଇକା ଜିସୁଦି ମାରିଅର୍ସୁ କାବାଆନି ପାଣି ।