10 ଅର୍‍ଲେନ୍‍ ଜିସୁ ରମ୍‌ନିନାଣ୍ତିଙ୍ଗ୍‌ ଉଣ୍ତ୍ରି ପାର୍‌ତନା ଇଲୁଦୁ ସିକିୟା ସିଜିମାର୍ହାନ୍‍ । 11 ମାରି ସୁଡ଼ୁଦୁ, ଅଟ୍ର ବାର୍ସେକ୍‍ ଆତାତ୍‌ ଉନ୍‍ଣ୍ତ୍ରି ତାଗ୍‍ଇଆତ୍ମା ଆସ୍‌ସି ଅରେତ୍‌ ଆଇମାଦିଙ୍ଗ୍‍ ସାକିସିଲିୱାଜା କିତାମାର୍‍ଆତ୍‍, ୱାଦ୍‌ କୁବ୍‍ଡ଼ି ଆଜି ଏଣ୍ତେସ୍‌ବା ନିଜେଦିଙ୍ଗ୍‍ ସିଦା କିଜି ବୁଲାଦେଙ୍ଗ୍‌ ଆଟ୍‍ଏଜିମାର୍ହାତ୍‍ । 12 ଜିସୁ ତାନିଙ୍ଗ୍‌ ସୁଡ଼ୁଜି ଲାକ୍‌ତୁ କୁକ୍‌ସି ଇର୍‌ଆନ୍‌, ଏ ଆଇମା, ନି ରୋଗ୍‍ଜିବନ୍‍ତାନ୍‌ ନେଗେଣ୍ତ୍‍ ଆତି । 13 ମାରି, ୱାନ୍‌ ତାନି ମୁସ୍‌କୁ କିୟୁ ଇଟ୍‌ତାନ୍‌, ଆବେଟ୍‌ ୱାଦ୍‌ ଆୟାଦାପ୍ରେ ସାଡ଼୍‌କୁ ଆଜି ମାପୁରୁଦି ଦନ୍ୟବାଦ୍‌ କିଦେଙ୍ଗ୍‌ ଆସ୍‌ତାତ୍‌ ।

14 ମାତର୍‌ ଜିସୁ ରମ୍‌ନିନାଣ୍ତିଙ୍ଗ୍‌ ନେଗେଣ୍ତ୍‌ କିତାନ୍‍ଆକା ପାର୍‌ତନା ଇଲୁଦି ପେରିକାନ୍‌ ରିସା ଆଜି ଲୋକାଙ୍ଗ୍‌ ଇର୍ହାନ୍‌, "ପାଣି କିନି ଉଣ୍ତିଙ୍ଗ୍‌ ସଅଦିନ୍‍ ମାନାତ୍‌, ଆଦେଙ୍ଗ୍‌ ଆୟାୱିଜୁ ଦିନ୍‌ ୱାଜି ନେଗେଣ୍ତ୍‍ ଆଦୁ, ରମ୍‌ନିନାଣ୍ତିଙ୍ଗ୍‌ ରାମାଟ୍‍ ।"

15 ମାତର୍‌ ପ୍ରବୁ ୱାନିଙ୍ଗ୍‌ ଇର୍‌ଆନ୍‌, "ରେ କପଟିର୍‍, ମିର୍‌ ୱିଜେରେ ଇନିକା ରମ୍‌ନିନାଣ୍ତିଙ୍ଗ୍‌ ନିଜେ ନିଜେଦି ଡ଼ାନ୍‍ ମାରି ଗଦ ସାଡ଼ାଦାନ୍‍ କୁତ୍‌ସିଅସି ଏରୁ ଉଟ୍‍ପିସ୍‍ କିଇଦେର୍‍ ? 16 ମାରି ସୁଡ଼ୁଦୁ ଅଟ୍ର ବାର୍‍ସେକ୍‍ ଆତାତ୍‌ ସୟତାନ୍ ମାଣ୍‌କୁ ତରାଜି ଅବ୍ରାହାମତି ଗାଡ଼୍‌ସି ଇୟା ଆଇମାଲୋକ୍‍ ଇନିକା ରମ୍‌ନିନାଣ୍ତିଙ୍ଗ୍‌ ନିଜେଦି ରୋଗ୍‍ତି ଗାଟିଦାନ୍‍ କୁଦାଦେଙ୍ଗ୍‍ ଦର୍‌କାର୍‌ ସିଲେତାତ୍‍ ନୋ ?" 17 ମାରି, ୱାନ୍‌ ଇୟା ମାଟା ୱିଜୁ ଇର୍ହାନ୍‍ଆକା, ୱାନି ବିରୁଦ୍‍ତିକାର୍‌ ୱିଜେରେ ସେମାର୍‌ ଆତାର୍‌, ମାତର୍‌ ଲୋକୁ ୱିଜେରେ ୱାନି କିତି ୱିଜୁ ପେରି ପାଣି ଉଣ୍ତିଙ୍ଗ୍‌ ୱେଡ଼ିକା କିଦେଙ୍ଗ୍‌ ଆସ୍‌ତାର୍‌ ।