ଜିସୁ କାଣା ବିକାରିଙ୍ଗ୍ ନେଗେଣ୍ତ୍ କିତାନ୍
35 ଜିସୁ ଜିରିହୋଦି ଲାକ୍ତୁ ଆଜିମାରି ୱାଲେ ଅରେନ୍ କାଣା ସାରି ପାଡ଼ି ବାସ୍ତାନ୍ ବିକ୍ୟା ଲସ୍ସି ମାର୍ଆନ୍ । 36 ୱାନ୍ ଲୋକୁ ବୁଲାନି ସେଉଡ଼ୁ ୱେନ୍ଜି ମାଟା ଇନିକା ଇଜି ୱେନ୍ବାଦେଙ୍ଗ୍ ଆସ୍ତାନ୍ ।
37 ୱାର୍ ୱାନିଙ୍ଗ୍ ଇର୍ହାର୍, ନାଜରିୟତିୟ ଜିସୁ ଇୟା ସାରି ସିଜି ସଲ୍ସିନାନ୍ ।
38 ଆବେଟ୍ ୱାନ୍ ନାଣ୍ତ୍ ଆଉଲି ଆଜି ଇର୍ଆନ୍, "ଏ ଜିସୁ, ଦାଉଦ୍ତି ମାରିନ୍, ନାଙ୍ଗିଁ ଦୟା କିଆ ।"
39 ମାତର୍ ଆଗିଡ଼ି ସଲ୍ସିମାରି ଲୋକୁ ୱାନିଙ୍ଗ୍ ଆଲେଜ ମାନ୍ଡ଼୍ରେଙ୍ଗ୍ ଇଜି ଆଦିରିସ୍ତେଙ୍ଗ୍ ଆସ୍ତାର୍, ମାତର୍ ୱାନ୍ ମାରି ନାଣ୍ତ ଆଉଲି ଆଜି ଇନ୍ଡ୍ରେଙ୍ଗ୍ ଆସ୍ତାନ୍, "ଏ ଦାଉଦତି ମାରିନ୍, ନାଙ୍ଗିଁ ଦୟା କିଆ ।"
40 ଆବେଟ୍ ଜିସୁ ନିଲ୍ଜି ୱାନିଙ୍ଗ୍ ନିଜେଦି ଲାକ୍ତୁ ତାତେଙ୍ଗ୍ ଇଜି ଆଦେସ୍ ସିତାନ୍; ମାରି, ୱାନ୍ ଲାକ୍ତୁ ୱାତାନ୍ଆକା, ଜିସୁ ୱାନିଙ୍ଗ୍ ୱେନ୍ବାତାନ୍, 41 "ନାନ୍ ନି ଉଣ୍ତିଙ୍ଗ୍ ଇନିକା କିନା ଇଜି ନିନ୍ ବଦା କିଜିନି ?" ୱାନ୍ ଇର୍ଆନ୍, "ଏ ପ୍ରବୁ, ନାନ୍ ଏଣ୍ତେସ୍ମାରି ସୁଡ଼ୁଦେଙ୍ଗ୍ ଆଟ୍ନା ।"
42 ଜିସୁ ୱାନିଙ୍ଗ୍ ଇର୍ଆନ୍, "ଆରିଙ୍ଗ୍ ସୁଡ଼ୁଆ; ନି ବିସ୍ବାସ୍ ନିଙ୍ଗିଁ ନେଗେନ୍ କିତାମାନାତ୍ ।"
43 ଆୟାଦାପ୍ରେ ୱାନ୍ ସୁଡ଼ୁଦେଙ୍ଗ୍ ଆଟ୍ତାନ୍ନୋ ମାପୁରୁଙ୍ଗୁଁ ଦନ୍ୟବାଦ୍ କିଜି କିଜି ୱାନି ୱାଲେୱାଲେ ବୁଲାଦେଙ୍ଗ୍ ଆସ୍ତାନ୍ ମାରି ଲୋକୁ ୱିଜେରେ ଆକା ସୁଡ଼ୁଜି ମାପୁରୁଦି ପ୍ରସଂସା କିତାର୍ ।
/images/a/b7d72741-6189-4a89-94c2-43952d9f2700)
/images/a/6c03efee-c76a-4ab8-fe2e-555683f90900)