1 ନିସ୍ତାର୍‌ ପଣ୍ତ୍‌ୟ ଇନି କମିର୍‌ସିଲି ରୁଟିଦି ପଣ୍ତ୍‌ୟ ଲାକ୍‌ତୁ ଆଜି ୱାଜିମାର୍ହାତ୍‌ । 2 ମାରି, ପେରି ଜାଜକର୍‌ ନି ସାସ୍ତ୍ରିର୍‍, ଏଣ୍ତେସ୍‌ ଜିସୁଙ୍ଗୁଁ ଏନ୍‌ ନେସ୍‌ଏଣ୍‌ଗା ସାୟାମାର୍‌ଗା ଡାକ୍‌ତେଙ୍ଗ୍‍ଁ ଆଟ୍‍ନାର୍‍, ଆବେଣି ଉପାୟ୍‌ ପଇଜି ମାର୍ହାର୍‌, ମାତର୍‌ ୱାର୍‌ ଲୋକାଙ୍ଗ୍‌ ତିଲାଜି ମାର୍ହାର୍‌ ।

3 ନାସ୍ତିୱାଲେ ବାରଲୋକ୍‌ ସିସୁରି ଲୋଇରାନ୍‌ ଇସ୍କାରିୟୋତିୟ ଦର୍‌ତି ଅରେନ୍‍ ଜିହୁଦାମାନୁ ସୟତାନ୍ ଡ଼ୁଗିତାତ୍‌; 4 ମାରି, ଜିହୁଦା ସୋର୍‌ଆନ୍‌ନୋ, ଇନି ଉପାୟ୍‌ତାନ୍‌ ୱାନିଙ୍ଗ୍‌ ପେରି ଜାଜକ ନି ସେନାପତିରି କିୟୁଦୁ ସପ୍ରେ କିଦେଙ୍ଗ୍‌ ଆଟ୍‍ନାନ୍‍, ଆକା ୱାରି ୱାଲେ ୱାର୍‌ଗିତାନ୍‌ । 5 ଆବେଟ୍‌ ୱାର୍‌ ୱେଡ଼ିକା ଆଜିମାରି ୱାନିଙ୍ଗ୍‌ ଡାବୁଙ୍ଗୁଁ ସିଦେଙ୍ଗ୍‍ ଇଜି ପାର୍‌ମାଣ୍‌ କିତାର୍‌ । 6 ମାରି, ଜିହୁଦା ରାଜି ଆତାନ୍‌ନୋ ଲୋକ୍‌ ୱିଜେରେ ଅରେନ୍‍ବା ସିଲିୱାଲେ ୱାନିଙ୍ଗ୍‌ ୱାରି କିୟୁଦୁ ସପ୍ରେ କିଜି ସିନି ଉଣ୍ତିଙ୍ଗ୍‌ ସାରି ପ‍ଇଦେଙ୍ଗ୍‌ ଆସ୍‌ତାନ୍‌ ।

7 ୱେନ୍‌କା ଏମେ ନାଣ୍ତିଙ୍ଗ୍‌ ନିସ୍ତାର୍‌ ପଣ୍ତୟ୍‌ତି ମେଣ୍ତାପିଲେକାଙ୍ଗ୍‌ କାତ୍‌ତେଙ୍ଗ୍‌ ଆନାତ୍‌, ଆୟା କମିର୍‌ସିଲି ରୁଟି ପଣ୍ତ୍‌ୟ ନାଣ୍ତିଙ୍ଗ୍‌ ୱାତାତ୍‍; 8 ମାରି, ଜିସୁ ପିତର୍‌ ନି ଜୋହନତିଙ୍ଗ୍‌ ଇକା ଇନ୍‌ଞ୍ଜି ପୋକ୍‌ତାନ୍‌, "ମାଡ୍‌ ଏଣ୍ତେସ୍‌ ଉଣ୍ତେଙ୍ଗ୍‌ ଆଟ୍‍ନିକା, ଆୟାଉଣ୍ତିଙ୍ଗ୍‌ ମିର୍‌ ସୋଲ୍‌ସ ମା ଉଣ୍ତିଙ୍ଗ୍‌ ନିସ୍ତାର୍‌ ପଣ୍ତ୍‌ୟତି ବୋଜି ତିଆର୍‌ କିଦୁ ।"

9 ଆବେଟ୍‌ ୱାର୍‌ ଜିସୁଙ୍ଗୁଁ ୱେନ୍‌ବାତାର୍‌, "ମାପ୍‌ ଇକା ଏମେ ବାଡିଦୁ ତିଆର୍‌ କିନାପ୍‍ ଇଜି ନିନ୍‌ ବଦା କିଜିନି ?"

10 ଜିସୁ ୱାରିଙ୍ଗ୍‌ ଇର୍‌ଆନ୍‌, "ସୁଡ଼ୁଦୁ, ମିର୍‌ ଗାଡ଼୍‌ତୁ ଡ଼ୁଗିତିଙ୍ଗାଁ, ଏରୁସାଟିଦୁ ଅସିମାନିକାତ୍‌ ଅରେତ୍‌ ଲୋକୁ ମିଙ୍ଗିଁ ବେଟ୍‌ଆନାତ୍‌; ୱାଦ୍‌ ଏମେ ଇଣ୍ତ୍ର ସନ୍‌ନାତ୍‌, ତାନି ୱେନ୍‌କା ୱେନ୍‌କା ଆୟା ଇଣ୍ତ୍ର ସୋଲ୍‌ସ ଇଲୁଦି ପେରିୱାନିଙ୍ଗ୍‌ ଇନିଦେର୍‌, 11 ଗୁରୁ ନିଙ୍ଗିଁ ୱେନ୍‌ବାଜିନାନ୍‌, ନାନ୍ ନା ସିସୁରି ୱାଲେ ଏମେମାନୁ ନିସ୍ତାର୍‌ ପଣ୍ତ୍‌ୟତି ବୋଜି କିନାପ୍‌, ଆୟା କୁଡ଼ାଆଙ୍ଗ୍‍ଁ ତେବାନି ବାକାର୍‌ ଆମାକା ? 12 ଆବେଟ୍‌ ୱାନ୍‌ ମିଙ୍ଗିଁ ନେଗେନ୍‌ ସଜେ କିତିମାନି ଉଣ୍ତ୍ରି ମୁସ୍‌କୁରି ମୋହଲାଦି ପେରି ବାକ୍‍ରା ତର୍‌ନାସିନାନ୍‌; ଆୟାବାଡିଦୁ ବୋଜି ତିଆର୍‌ କିଦୁ ।"

13 ମାରି, ପିତର୍‌ ନି ଜୋହନ ସର୍‌ଆର୍‌ନୋ, ଜିସୁ ୱାରିଙ୍ଗ୍‌ ଏଣ୍ତେସ୍‌ ଇର୍‌ଆ ମାର୍‌ଆନ୍‌, ଆୟାୱାଜା ସୁଡ଼ୁଜି ନିସ୍ତାର୍‌ ପଣ୍ତ୍‌ୟତି ବୋଜି ତିଆର୍‌ କିତାର୍‌ ।

14 ମାରି, ୱାର୍‌ ନିସ୍ତାର୍‌ ପଣ୍ତ୍‌ୟତି ବୋଜି ଉଣି ସମୟ ଆତାତ୍‌, ଜିସୁ ନି ୱାନି ୱାଲେ ପ୍ରେରିତ ସିସୁର୍‍ ଉଣ୍ତେଙ୍ଗ୍‌ ବାସ୍‌ତାର୍‌ । 15 ଜିସୁ ୱାରିଙ୍ଗ୍‌ ଇର୍‌ଆନ୍‌, ନାନ୍ ନା ଦୁକ୍‍ବଗାନି ଆଗିଡ଼ିନେ ନାନ୍ ମି ୱାଲେ ଅର୍‌ସେ ଇୟା ନିସ୍ତାର୍‌ ପଣ୍ତ୍‌ୟତି ବଜି ଉଣ୍ତେଙ୍ଗ୍‌ ଅରେନେ ବଦା କିତାମାର୍‌ଆ; 16 ମାତର୍‌ ନାନ୍ ମିଙ୍ଗିଁ ଇଜିନା, ମାପୁରୁଦି ରାଜିଦୁ ଇୟା ଅର୍ତ ପୁରା ଆଇ ସାନ୍ଧି ନାନ୍ ମାରି ଏସ୍‌କାଙ୍ଗ୍‌ବା ନିସ୍ତାର୍‌ ପଣ୍ତ୍‌ୟତି ବଜି ମାରି ଉଣୁଏ ।

17 ମାରି, ଜିସୁ ଉଣ୍ତ୍ରି କୁଡ଼ୁକାଦୁ ଅଙ୍ଗୁର୍‍ରସ୍‍ ଅତାନ୍‌ନୋ ମାପୁରୁଙ୍ଗୁଁ ଦନ୍ୟବାଦ୍‌ ସିଜି ଇର୍‌ଆନ୍‌, "ଇୟା କୁଡ଼ୁକା ଅସି, ଇବେନ୍‌ ମାନି ଅଙ୍ଗୁର୍‍ରସ୍‌ତିଙ୍ଗ୍‌ ନିଜେ ନିଜେଦି ମାନୁ ବାଟା କିଦୁ, 18 ମାତର୍‌ ନାନ୍ ମିଙ୍ଗିଁ ଇଜିନା, ମାପୁରୁଦି ରାଜି ରେଇ ସାନ୍ଦି ଇକା ନାନୁ ମାରି ଇୟା ଅଙ୍ଗୁର୍‍ରସ୍‍ ଉଣୁଏ ।"

19 ମାରି, ୱାନ୍‌ ରୁଟି ଅତାନ୍‌ନୋ ମାପୁରୁଙ୍ଗୁଁ ଦନ୍ୟବାଦ୍‌ ସିତାନ୍‌ ମାରି ରୁଟି ରୁକ୍‍ସି ସିଜି ୱାରିଙ୍ଗ୍‌ ଇର୍ହାନ୍‌, "ମି ଉଣ୍ତିଙ୍ଗ୍‌ ସିଆତିମାନି ଇକା ନା ମେନ୍ଧଲ୍‍; ନାଙ୍ଗିଁ ଏତ୍‌କିନି ଉଣ୍ତିଙ୍ଗ୍‌ ଇକା କିଦୁ ।" 20 ଉଟି ୱିସ୍‌ତି ୱେନ୍‌କା ଆୟାୱାଜା ୱାନ୍‌ ଅଙ୍ଗୁର୍‍ ରସ୍‌ତି ଉଣି ଡୁବାଇ ଆସ୍‌ତାନ୍‌ନୋ ଇର୍ହାନ୍‌, ଇୟା ଅଙ୍ଗୁର୍‍ରସ୍‍ ମି ଉଣ୍ତିଙ୍ଗ୍‌ ସିଆତିମାନି ନା ନେତେର୍‌ତି ପୁନି ନିୟମ୍‌ ।

21 ମାତର୍‌ ସୁଡ଼ୁଦୁ, "ଏନ୍‌ ନାଙ୍ଗିଁ ସାତ୍ରୁରିକିୟୁଦୁ ସର୍‍ପେ କିଜିନାନ୍‌, ୱାନି କିୟୁ ନା ୱାଲେ ଟେବୁଲ୍‌ ମୁସ୍‌କୁ ମାନାତ୍‌ । 22 ମାତର୍‌ ମାପୁରୁ ଏଣ୍ତେସ୍‌ କିତାମାନାନ୍‌, ମନୁସ୍ୟପୁତ୍ର ଜେ ନାନ୍ ଆୟାୱାଜା ସାନି ଦଣ୍ଡ୍‌ ପଇନା ସତ୍‌, ମାରି ଏମେ ଲୋକୁ ମାଣ୍‌କୁ ୱାନ୍‌ ସାତ୍ରୁରିକିୟୁଦୁ ସର୍ପେ ଆଜିନାନ୍‍, ଚି, ୱାନି ଉଣ୍ତିଙ୍ଗ୍‌ ଇକା ନାଣ୍ତ୍ କାରାବ୍‍ ଆନାତ୍‌ !"

23 ତାନେ ୱେନ୍‌କା ମା ଲୋଇରାନ୍‌ ଏନ୍‌ ଇକା କିଦେଙ୍ଗ୍‌ ସଲ୍‌ସିନାନ୍‌, ଆୟା ବିସୟ୍‌ତାନ୍‌ ସିସୁର୍‍ ନିଜେ ନିଜେଦିମାନୁ ୱେନ୍‌ବାଜି ସାଦେଙ୍ଗ୍‌ ଆସ୍‌ତାର୍‌ ।

24 ✝ମାରି, ସିସୁରି ଲୋଇ ଏନ୍‌ ପେରିକାନ୍‌ ଇଜି ୱେଙ୍ଗ୍‌ଁନାନ୍‌, ଆୟା ବିସୟ୍‌ତାନ୍‌ ୱାରିୱାରି ଲୋଇ ୱାରିଗିଜି ସାତାର୍‌ । 25 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, ଅଣଜିହୁଦି ରାଜାର୍‌ ୱାରି ମୁସ୍‌କୁ ସାସନ୍‍ କିନାର୍‌, ମାରି ଏର୍‌ ୱାରି ମୁସ୍‌କୁ ସାସନ୍‍ କିନିକା ମାନାତ୍‌, ୱାର୍‌ ଦେସ୍‍ତି ସାଙ୍ଗ୍‍ ଇଜି ୱେଙ୍ଗ୍‌ଁନାନ୍‌ । 26 ✝✝ମାତର୍‌ ମିର୍‌ ଆୟାୱାଜା ଆମାଟ୍‌, ଇରିଙ୍ଗ୍‌ ମି ମାଣ୍‌କୁ ଏନ୍‌ ପେରିକାନ୍‌, ୱାନ୍‌ ୱିଜେରି ମାଣ୍‌କୁ ଇସ୍ରିକାନ୍‌ ୱାଜା ଆପିନ୍‌, ମାରି ଏନ୍‌ ନେତା ମାନାନ୍‌, ୱାନ୍‌ ସେବାକିନି ୱାନି ୱାଜା ଆପିନ୍‌ । 27 ✝ମାତର୍‌ ୱିଜେରି ମାଣାନ୍‌ ପେରି ଲୋକୁ ଏନ୍‌ ? ଏନ୍‌ ଉଣ୍ତେଙ୍ଗ୍‌ ବାସ୍‌ତିମାନିକାର୍‌ ନୋ ୱାନିଙ୍ଗ୍‌ ୱେର୍‌ସିମାନି ଲୋକୁ ? ମିର୍‌ ଅଡ଼୍‍ବିନିଦେର୍‍ ଜେ ଉଣ୍ତେଙ୍ଗ୍‌ ବାସ୍‌ତିମାନି ଲୋକୁ, ୱାନ୍‌ ଇନିକା ପେରିକାନ୍‌ ଆଏନ୍‍ ? ଇରିଙ୍ଗ୍‌ ନାନ୍ ମି ଲୋଇରାନ୍‌ ଅରେନେ ସେବାକିନିୱାନି ୱାଜା ମାନା ।

28 ମାତର୍‌ ମିର୍‌ ନା ୱିଜୁ ପରିକାଦୁ ନା ୱାଲେ ମାନ୍‌ଞ୍ଜିୱାଜିନିଦେର୍‌; 29 ନା ବୁବା ଏଣ୍ତେସ୍‌ ନା ଉଣ୍ତିଙ୍ଗ୍‌ ରାଜି ତିଆର୍‌ କିତାନ୍‌, ନାନ୍ ବା ଆୟାୱାଜା ମି ଉଣ୍ତିଙ୍ଗ୍‌ ତିଆର୍‌ କିଜିନା, 30 ଏଣ୍ତେସ୍‌ ମିର୍‌ ନା ରାଜିଦୁ ନା ଟେବୁଲ୍‌ ମୁସ୍‌କୁ ଉଣିତିନିଦେର୍‌, ମାରି ମିର୍‌ ରାଜାବାସ୍‌ନିଗୋଦିଦି ମୁସ୍‌କୁ ବାସ୍‌ନିଦେର୍‌ନୋ ଇସ୍ରାଏଲ୍‌ତି ବାରଗୋଟା କୁଟୁମ୍‌ତି ମୁସ୍‌କୁ ସାସନ୍‍ କିନିଦେର୍‌ ।

31 "ସିମୋନ, ସିମୋନ, ସୁଡ଼ୁଆ, ପାଣିକିନିକାନ୍‌ ଗଦ୍‍ମୁଦାନ୍‍ ସପାଦିଙ୍ଗ୍‍ ୱେର୍‌ଏ କିଦେଙ୍ଗ୍‌ ଇଜି ସୋଲିଦୁ ଜଲ୍‍ପ୍‍ନି ୱାଜା ନେଗି ଲୋକାମାଣ୍‌କୁ ତାଗ୍‍ଇ ଲୋକାଙ୍ଗ୍‌ ୱେର୍‌ଏ କିନି ଉଣ୍ତିଙ୍ଗ୍‌ ସୟତାନ୍ ମିଙ୍ଗିଁ ପରିକା କିଦେଙ୍ଗ୍‌ ସାରିପୋଇତା ମାନାତ୍‌; 32 ମାତର୍‌ ମି ବିସ୍‌ବାସ୍‌ ଏଣ୍ତେସ୍‌ ମାର୍‌ଗେଏତ୍‌, ଇୟାଉଣ୍ତିଙ୍ଗ୍‌ ନାନ୍ ମି ଉଣ୍ତିଙ୍ଗ୍‌ ପାର୍‌ତନା କିତାମାନା; ମାରି, ନିନ୍‌ ଡ଼େସି ୱାତି ୱେନ୍‌କା ନିଜେଦି ତଡ଼ାନ୍‌କାଙ୍ଗ୍‌ ସାକ୍ତି କିଦୁ ।"

33 ମାତର୍‌ ପିତର୍‌ ଜିସୁଙ୍ଗୁଁ ୱେର୍‌ତାନ୍‌, "ଏ ପ୍ରବୁ, ନାନ୍ ନି ୱାଲେ ଜଇଲ୍‌ତୁ ସଣ୍ଡ୍ରେଙ୍ଗ୍‌ ମାରି ସାନିଦଣ୍ତ୍‌ ପ‍ଇଦେଙ୍ଗ୍‌ ବା ତିଆର୍‌ ଆତାମାନା ।"

34 ମାତର୍‌ ଜିସୁ ୱେର୍‌ତାନ୍‌, "ଏ ପିତର୍‌, ନାନ୍ ନିଙ୍ଗିଁ ଇଜିନା, ନେର୍‌ ନାଡ଼ା କରୁ କେଡ଼ିଇ ଆଗ୍‍ଡ଼ିନେ ନିନ୍‌ ନାଙ୍ଗିଁ ମୁଜା ନେସେଏ ଇଜି ଇନି ।"

35 ✝ତାନେ ୱେନ୍‌କା ଜିସୁ ସିସୁରିଙ୍ଗ୍‌ ଇର୍‌ଆନ୍‌, ଏସ୍ତିୱାଲେ ନାନ୍ ମିଙ୍ଗିଁ ଡାବୁଙ୍ଗୁଁ ମଣି, ମଣି ମାରି ଜୁତେଙ୍ଗ୍‌ ଡ଼ିସ୍‌ତିଙ୍ଗ୍‌ ପୋକ୍‌ତା ମାର୍‌ଆ, ନାସ୍ତିୱାଲେ ମିଙ୍ଗିଁ ଇନିକା ଉଣା ମାର୍‌ଆତ୍‌ ? ୱାର୍‌ ଇର୍ହାର୍‌, ଇନିକା ସିଲେ ।

36 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, "ମାତର୍‌ ଇଲେ, ଆମାୱାନିଦି ଡାବୁଙ୍ଗୁଁ ଇଡ୍‌ନି ମଣି ମାନାତ୍‌, ୱାନ୍‌ ଆକା ଅପିନ୍‌, ଆୟାୱାଜା ମଣି ବା ଅପିନ୍‌, ମାରି ଆମାୱାନିଙ୍ଗ୍‌ କୁଡ଼ାମ୍‍ ସିଲେତ୍‌, ୱାନ୍‌ ନିଜେଦି ସାଦର୍‌ ଉଣ୍ତ୍ରି ପୋର୍‌ଜ କାଣ୍ତା କଡ଼ିନ୍‍ । 37 ମାତର୍‌ ନାନ୍ ମିଙ୍ଗିଁ ୱେର୍‌ସିନା, ୱାନ୍‌ ପାପିଲୋକା ୱାଲେ ମିସାତାନ୍‌, ଇୟା ଏମେ ବାକ୍ୟ ରାସ୍‌ତା ମାନାତ୍‌, ଆକା ନା ମାନୁ ପୁରା ଆନିକା ମାନାତ୍‌; ଆଦେଙ୍ଗ୍‌ ନା ବିସୟ୍‌ତି ମାଟା ପୁରା ଆଜିନାତ୍‍ ।"

38 ଆବେଟ୍‌ ୱାର୍‌ ଇର୍ହାର୍‌, "ପ୍ରବୁ, ସୁଡ଼ୁଆ, ଇବେନୁ ରୁଣ୍ତି କାଣ୍ତେଙ୍ଗ୍‌ ମାନେ ।" ମାରି, ଜିସୁ ୱାରିଙ୍ଗ୍‌ ଇର୍‌ଆନ୍‌, ରୁଣ୍ତି କାଣ୍ତେଙ୍ଗ୍‌ ନାଣ୍ଡ୍ ।

39 ଜିସୁ ଗାଡ଼୍‌ତାନ୍‍ ସୋତା ସୋର୍‌ଆନ୍‌ନୋ ନିଜେଦି ଦିନ୍‍କେରିୱାଜା ଜିତ ଗରନ୍‌ ମୁସ୍‌କୁ ସୋର୍‌ଆନ୍‌, ମାରି ସିସୁର୍‍ ବା ୱାନି ୱାଲେ ୱାଲେ ସୋର୍ହାର୍‌ । 40 ଆୟା ବାଡିଦୁ ଇତାର୍‌ରୋ ଜିସୁ ସିସୁରିଙ୍ଗ୍‌ ଇର୍‌ଆନ୍‌, "ପରିକାଦୁ ଏଣ୍ତେସ୍‌ ଆର୍‌ଇଦେର୍‌, ଆୟାଉଣ୍ତିଙ୍ଗ୍‌ ପାର୍‌ତନା କିଦୁ ।"

41 ମାରି, ୱାନ୍‌ ୱାରିମାଣ୍‌କୁ କାଣ୍ତେକ୍‍ ଆକ ସୋର୍‌ଆନ୍‌ନୋ ମେଣ୍ତେଙ୍ଗ୍‌ ଗୋଟ୍‌ କିଜି ପାର୍‌ତନା କିଦେଙ୍ଗ୍‌ ଆସ୍‌ତାନ୍‌ । 42 ଏ ବୁବା, ଜଦି ନି ବଦା ମାନାତ୍‌, ଆୟା ଦୁଃକ୍‍ ନି କାସ୍ଟୁଦି ସାଟି ଆକ କିଆ; ଆରିଙ୍ଗ୍‌ ନା ବଦା ସିଲେ, ମାତର୍‌ ନି ବଦା ସତ୍‌ ଆପିତ୍‌ । 43 ମାରି, ମୁସ୍‌କୁପୁର୍‌ତାନ୍‌ ଅରେନ୍‍ ଦୁତ୍‍ ଦର୍ସନ୍‍ ସିଜି ୱାନିଙ୍ଗ୍‌ ସାକ୍ତି ସିତାତ୍‌ । 44 ମାରି, ଜିସୁ ନାଣ୍ତ ଦୁଃକ୍‍ ଆଜି ଉଣ୍ତ୍ରି ମନ୍‍ତାନ୍‍ ପାର୍‌ତନା କିଦେଙ୍ଗ୍‌ ଅତାନ୍ ମାରି ୱାନି ରୁନୁ ନେତେର୍‌ ଟିପା ୱାଜା ବୁମିଦୁ ୱାଙ୍ଗିଁତାତ୍‍ ।

45 ମାରି, ୱାନ୍‌ ପାର୍‍ତନା କିନିମାଣାନ୍‍ ନିଙ୍ଗିଁଜି ସିସୁରି ଲାକ୍‌ତୁ ୱାଜି ୱାରିଙ୍ଗ୍‌ ଦୁଃକ୍‍ ଉଣ୍ତିଙ୍ଗ୍‌ ସୁଜ୍‍ନିକା ସୁଡ଼ୁତାନ୍‌; 46 ମାରି, ଜିସୁ ୱାରିଙ୍ଗ୍‌ ଇର୍‌ଆନ୍‌, "ଏନ୍ଦା ସୁଜ୍‍ଜିନିଦେର୍‌ ? ପରିକାଦୁ ଏଣ୍ତେସ୍‌ ଆର୍‌ଇଦେର୍‌, ଆୟା ଉଣ୍ତିଙ୍ଗ୍‌ ନିଙ୍ଗ୍‍ଜ ପାର୍‌ତନା କିଦୁ ।"

47 ଜିସୁ ୱାର୍‍ଗିନିୱାଲେ, ସୁଡ଼ୁଦୁ, ଲୋକୁ ୱିଜେରେ ୱାଜି ଉଣ୍ତାତାର୍‌, ମାରି ବାରଲୋକ୍ ସିସୁରି ଲୋଇରାନ୍‌ ଜିହୁଦା ଦର୍‌ତି ଅରେନ୍‍ ୱାରି ଆଗ୍‌ଡ଼ି ଆଗ୍‌ଡ଼ି ୱାଜି ଜିସୁଙ୍ଗୁଁ ନଣ୍ତ୍‍ଦେଙ୍ଗ୍‍ ଇଜି ୱାନି ଲାକ୍‌ତୁ ସର୍‌ଆନ୍‌ । 48 ମାତର୍‌ ଜିସୁ ଜିହୁଦେଙ୍ଗ୍‍ ଇର୍‌ଆନ୍‌, "ଏ ଜିହୁଦା, ମନୁସ୍ୟପୁତ୍ରଦିଙ୍ଗ୍‍ ନଣ୍ତ୍‍ଜି ନୋ ସାତ୍ରୁରି କିୟୁଦୁ ସର୍‌ପେ କିଜି ସିଜିନି ?"

49 ଇବେଟ୍‍ ଇନିକା ଆନାତ୍‌, ଆକା ସୁଡ଼୍‌ଜି ୱାନି ତଡ଼୍‍କୁ ଇର୍ହାର୍‌, "ପ୍ରବୁ, ମାପ୍‌ ଇନିକା କାଣ୍ତାଦାନ୍‍ କାତ୍‍ନାପ୍‍ ?" 50 ମାରି, ୱାରି ଲୋଇ ଅରେନ୍‍ ୱିଜେରିଙ୍ଗ୍‌ପେରି ଜାଜକ୍‍ତିମାନୁ ପାଣିକିନି ଗତିମୁରୁଲିଦି ଉଣେରି ଗିତଣି କୟାତା ପୋକ୍‌ତାନ୍‌ ।

51 ମାତର୍‌ ଜିସୁ ଇର୍‌ଆନ୍‌, "ନିସନେ ଆନାତ୍‍ଲେ; ମାରି, ୱାନ୍‌ ୱାନି ଗିତଣି ମୁଟ୍‍ସି ୱାନିଙ୍ଗ୍‌ ନେଗେଣ୍ତ୍‍ କିତାନ୍‍ ।"

52 ମାରି, ଜିସୁ ୱାନି ବିରଦ୍‌ତାନ୍‌ ୱାତି ମାର୍‍ଇ ପେରି ଜାଜକ, ମନ୍ଦିର୍‌ତି ପେରି ପେରିକାର୍‌ ମାରି ପେରି ଡକ୍ରାରିଙ୍ଗ୍‍ ଇର୍‌ଆନ୍‌, "ଡଙ୍ଗାଁର୍‍ଏନ୍‍ ବିରଦ୍‌ତାନ୍‌ ସନିୱାନିୱାଜା କାଣ୍ତା ନି ଡୁଡୁ ଆସ୍‌ସି ମିର୍‌ ଇନିକା ସତିୱାତିଦେର୍‍ ? 53 ✝ନାନ୍ ଦିନାମି ମିୱାଲେ ମନ୍ଦିର୍‌ତୁ ମାନିୱାଲେ ମିର୍‌ ନା ବିରଦ୍‌ତାନ୍‌ କିୟୁ ପେର୍‍ଇତିଦେର୍‍, ମାତର୍‌ ଇକା ମି ସମୟ ମାରି ସିକାଟିଦି ସାସନ୍‍ ।"

54 ୱେନ୍‌କା ୱାର୍‌ ଜିସୁଙ୍ଗୁଁ ଆସ୍‌ସି ଅସି ୱିଜେରିଙ୍ଗ୍‌ପେରି ଜାଜକରି ଇଲ୍‌ତୁ ତାତାର୍‌; ମାତର୍‌ ପିତର୍‌ ଆକ ତେବାଜି ୱେନ୍‌କା ୱେନ୍‌କା ସର୍‌ଆନ୍‌ । 55 ମାରି, ୱାର୍‌ ଦୁଆର୍‌ତି ନାଡ଼୍‍ମି ସିସୁ କାସିସ୍‍କିଜି ଉଣ୍ତ୍ରେମାନୁ ବାସ୍‌ତାର୍‌, ପିତର୍‌ ୱାରିମାନୁ ବାସ୍‍ତା ମାର୍‌ଆନ୍‌ । 56 ଅରେତ୍‌ ପାଣି କିନି ଆଇମା ପିତର୍‍ତିଙ୍ଗ୍‍ ସିସୁ ଲାକ୍‌ତୁ ବାସ୍‍ତିମାର୍‍ଇକା ସୁଡ଼ୁଜି ଇର୍ହାତ୍‌, "ଇକାନ୍‌ ବା ଜିସୁୱାଲେ ମାର୍‌ଆନ୍‌ ।"

57 ମାତର୍‌ ପିତର୍‌ ଇୟା ମାଟାଦିଙ୍ଗ୍‌ ସିଲେଇଜି ଇର୍‌ଆନ୍‌, "ଏ ଆଇମା, ନାନ୍ ୱାନିଙ୍ଗ୍‌ ନେସେଏ ।"

58 ଏସୋ ସମୟ ୱେନ୍‌କା ମାରି ଅରେନ୍‍ ୱାନିଙ୍ଗ୍‌ ସୁଡ଼ୁଜି ଇର୍‌ଆନ୍‌, "ନିନ୍‌ ବା ଜିସୁୱାଲେ ମାର୍‍ଇ ଲୋକା ଲୋଇ ଅରେନ୍‍ ।" ମାତର୍‌ ପିତର୍‌ ଇର୍‌ଆନ୍‌, "ସିଲେ, ତଡ଼ାନ୍‍, ନାନ୍ ନେସେଏ ।"

59 ମାରି ଗଣ୍ଟା ୱେନ୍‌କା ମାରି ଅରେନ୍‍ ପୁରା ନେସ୍‌ସି ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, "ଇକାନ୍‌ ବା ସତେନେ ୱାନିୱାଲେ ମାର୍‌ଆନ୍‌, ଇରିଙ୍ଗ୍‌ ୱାନ୍‌ ତୋ ଗାଲିଲିଦି ଲୋକୁ ।"

60 ମାତର୍‌ ପିତର୍‌ ଇର୍‌ଆନ୍‌, "ତଡ଼ାନ୍‍, ନିନ୍‌ ଆମାକା ଇଜିନି, ନାନ୍ ଆକା ନେସେଏ ।" ଆୟାଦାପ୍ରେ ୱାନ୍‌ ମାଟା ଇନ୍‍ବୁ ଇନ୍‍ବୁ କରୁ କେଡ଼ିତାତ୍‍ । 61 ମାରି ପ୍ରବୁ ଡ଼େସି ମାର୍‍ଜି ପିତର୍‍ତିଙ୍ଗ୍‍ ସୁଡ଼ୁତାନ୍‌; "ଆବେଟ୍‌ ନେର୍‌ କର୍‌ରୁ କେଡ଼ିନି ଆଗ୍‍ଡ଼ିନେ ନିନ୍‌ ନାଙ୍ଗିଁ ମୁଜା ନେସେଏ ଇଜି ଇନି, ଇୟା ଆମା ମାଟା ପ୍ରବୁ ପିତର୍‍ତିଙ୍ଗ୍‍ ଇର୍‌ଆମାର୍‌ଆନ୍‌," 62 ଆକା ପିତର୍‌ ୱାନି ମୋନ୍‌ତୁ ଏତ୍‌କିତାନ୍‌, ମାରି ୱାନ୍‌ ଆତ୍ରେ ସଲ୍‌ସି ନାଣ୍ତ ଦୁଃକ୍‌ତାନ୍‍ ଆଡ଼୍‍ବାତାନ୍‍ ।

63 ମାରି, ଏମେ ଲୋକ୍‌ ଜିସୁଙ୍ଗୁଁ ଆସ୍‌ତା ଇଟ୍‍ତାମାର୍‍ଆର୍‍, ୱାର୍‌ ୱାନିଙ୍ଗ୍‌ ଡାକ୍‍ସି ଡାକ୍‍ସି ସେମାର୍‍ କିତାର୍‌, 64 ମାରି ୱାନି ମୋକମି ପାଗା କେର୍‍ପ୍‍ସି ୱାନିଙ୍ଗ୍‌ ୱେନ୍‌ବାତାର୍‌, ନିନ୍‌ ପରା ବାବବାଦି ! ଇନ୍‌ଆଁ ତୋ, ଏନ୍‌ ନିଙ୍ଗିଁ ଡାକ୍‍ତାର୍‍ ? 65 ମାରି, ୱାର୍‌ ନାଣ୍ତ ମାଟେଙ୍ଗ୍‌ ୱାନି ବିରଦ୍‌ତାନ୍‌ ଇଜି ୱାନିଙ୍ଗ୍‌ ନିନ୍ଦା କିଦେଙ୍ଗ୍‌ ଆସ୍‌ତାର୍‌ ।

66 ସାଲ୍‍ଦି ଆତିଦାପ୍ରେ ଲୋକା ପେରିଡକ୍‍ରାର୍‍, ମାରି ପେରି ଜାଜକର୍‌ ମାରି ସାସ୍ତ୍ରିର୍‍ ଉଣ୍ତାଜି ତାମେ ପେରି ଲୋକାମିଟିଙ୍ଗ୍‍ତୁ ଜିସୁଙ୍ଗୁଁ ଅସି ଇର୍ହାର୍‌, "ନିନ୍‌ ଜଦି କ୍ରିସ୍ତ, ଆରିଙ୍ଗ୍‌ ମାଙ୍ଗିଁ ଇନ୍‌ଆଁ ।" 67 ୱାର୍‍ ଇର୍ହାର୍‌, "ମାଙ୍ଗିଁ ଇନ୍‍ଆଁ, ନିନୁ ଇନିକା ମସିହ ?" ୱାନ୍‌ ୱାରିଙ୍ଗ୍‌ ଇର୍‌ଆନ୍‌, "ନାନ୍ ଜଦି ମିଙ୍ଗିଁ ଇନା, ମିର୍‌ ତୋ ବିସ୍‌ବାସ୍‌ କିଇଦେର୍‍; 68 ମାରି, ନାନ୍ ଜଦି ପ୍ରସ୍ନ ୱେନ୍‍ବାନା, ମିର୍‌ ୱେର୍‌ଇଦେର୍‌ । 69 ମାତର୍‌ ଇଲେଇରାନ୍‌ ମନୁସ୍ୟପୁତ୍ର ପେରି ସାକ୍ତିଦି ମାପୁରୁଦି ରାଜାଗାଦିଦି ଉଣେରି ତରିନ୍‌ ବାସ୍‍ନାନ୍‍ ।"

70 ଆବେଟ୍‌ ୱିଜେରେ ୱେନ୍‌ବାତାର୍‌, "ଆରିଙ୍ଗ୍‌ ନିନ୍‌ ଇନିକା ମାପୁରୁଦି ମାରିନ୍‌ ?" ଜିସୁ ୱାରିଙ୍ଗ୍‌ ଇର୍‌ଆନ୍‌, "ନାନ୍ ଆକାନେ ଇଜି ମିର୍‌ ଇଜିନିଦେର୍‌ ।"

71 ଆବେଟ୍‌ ୱାର୍‌ ଇର୍ହାର୍‌, "ଆରିଙ୍ଗ୍‌ ମାଙ୍ଗିଁ ସାକି ମାରି ଏନ୍ଦା ଦରକାର୍‍ ? ମାଡ୍‌ ତୋ ନିଜେନିଜେ ୱାନି ନିଜେଦି ୱେୟୁଦାନ୍‌ ୱେରିକା ।"