1 ✝ଅର୍‍ଲେନ୍‍ ଜିସୁ ଗିନେସରତ ଗାଡା ପାଡ଼ି ନିର୍‌ଆ ମାର୍ହାନ୍‌, ମାରି ଲୋକୁ ମାପୁରୁଦି ବାକ୍ୟ ୱେନ୍‍ଣ୍ତ୍ରେଙ୍ଗ୍‍ ୱାନି ମୁସ୍‌କୁ ମାଟ୍‍ସିସାଜି ମାର୍‌ଆର୍‌ । 2 ମାରି, ଜିସୁ ଗାଡାପାଡ଼ି ରୁଣ୍ତି ଡଙ୍ଗେଆଙ୍ଗ୍‌ ମାନିକା ସୁଡ଼ୁତାନ୍‌; ମିନୁକୁଆସ୍‌ନିକାର୍‌ ଆବେଟ୍‌କୁ ରେସିୱାଜି ଜାଡ଼ି ନର୍‌ଜି ମାର୍ହାର୍‌ । 3 ଆୟା ଡଙ୍ଗେଆଙ୍ଗ୍‌ ମାଣ୍‌କୁ ଏମେମାନୁ ସିମୋନ୍‌ତିଦି ମାର୍ହାତ୍‌, ଆବେନୁ ଜିସୁ ଏକ୍‌ସି ଆଡ୍‍ଗିରାନ୍‌ କାଣ୍ତେକ୍‌ ଆକ ସନି ଉଣ୍ତିଙ୍ଗ୍‌ ୱାନିଙ୍ଗ୍‌ ୱେର୍‌ତାନ୍‌; ମାରି, ୱାନ୍‌ ଡଙ୍ଗାଁଦୁ ବାସ୍‌ସି ଲୋକାଙ୍ଗ୍‌ ସିକିୟା ସିଦେଙ୍ଗ୍‍ ଆସ୍‌ତାନ୍‌ ।

4 ଜିସୁ ମାଟା ଇଣ୍ତ୍ରେଙ୍ଗ୍‌ ୱିସ୍‍ସି ସିମୋନ୍‌ତିଙ୍ଗ୍‌ ଇର୍ହାନ୍‌, "ନିର୍‌ଇଗୁମିଦୁ ସୋଲ୍‌ସ ମିନ୍‌କୁ ଆସ୍‌ନି ଉଣ୍ତିଙ୍ଗ୍‌ ମି ଜାଡ଼ି ପୋକ୍‌ତୁ ।" ମିନ୍‌କୁ ଆସ୍‌ନିକାନ୍‌ ଡଙ୍ଗାଁ ମୁସ୍‌କୁ ତେବାଜି ମିନ୍‌କୁ ଆସ୍‌ସିମାନି ପଟ୍‌

5 ✝ସିମୋନ୍‌ ଇର୍‌ଆନ୍‌, "ଏ ଗୁରୁ, ମାପ୍‌ ନାଡାୱିଗ୍‍ଜି ୱାନ୍ଦ୍‍ଜି ଏସୋବା ଆସ୍‌ଏତାପ୍‌; ମାତର୍‌ ନି ମାଟାଦାନ୍‌ ନାନ୍ ଜାଡ଼ି ପୋକ୍‌ନା ।" 6 ✝ମାରି, ୱାର୍‌ ଜାଡ଼ି ପୋକ୍‌ସି ନାଣ୍ତ ମିନ୍‌କୁ ଆସ୍‌ତାର୍‌, ମାରି ୱାରି ଜାଡ଼ି ତେଉଦେଙ୍ଗ୍‌ ଆସ୍‌ତାତ୍‌ । 7 ଆବେନୁ ୱାରି ଏମେ ସାଙ୍ଗର୍‌ ଆଇ ଡଙ୍ଗାଁଦୁ ମାର୍‌ଆର୍‌, ୱାର୍‌ ଏଣ୍ତେସ୍‌ ୱାଜି ସାହାଜ୍ୟ କିନାର୍‌, ଆୟା ଉଣ୍ତିଙ୍ଗ୍‌ ୱାର୍‌ ୱାରିଙ୍ଗ୍‌ କୁକ୍‌ତାର୍‌ । ଆବେଟ୍‌ ୱାର୍‌ ୱାଜି ରୁଣ୍ତି ଡଙ୍ଗେଆଙ୍ଗାଁ ଇୟାୱାଜା ମିନ୍‌କୁ ଆସ୍‌ସି ବର୍ତି କିତାର୍‌ ଜେ, ରୁଣ୍ତି ଡଙ୍ଗେଆଙ୍ଗ୍‌ ମୁଡ଼ୁଗିତି ୱାଜା ଆତେ । 8 ମାତର୍‌ ସିମୋନ ପିତର୍‌ ଇକା ସୁଡ଼ୁଜି ଜିସୁଦି କାଲ୍‌କା ଆଡ୍‍ଗି ପାଡ଼୍‌ଗିଜି ଇର୍ହାର୍‌, "ଏ ପ୍ରବୁ, ନା ଲାକ୍‌ତୁରାନ୍‌ ନିନ୍‌ ସାଙ୍ଗ୍‌ଆ, ଇରିଙ୍ଗ୍‌ ନାନ୍ ଅରେନ୍‍ ପାପି ଲୋକୁ ।"

9 ଇରିଙ୍ଗ୍‌ ୱାର୍‌ ଆୟା ଦାପ୍ରେ ନିସା ମିନ୍‌କୁ ଆସ୍‌ତାମାର୍ହାର୍‌ ଜେ, ଆକା ସୁଡ଼ୁଜି ୱାନ୍‌ ମାରି ୱାରି ତଡ଼୍‍କୁ ୱିଜେରେ କାବାତା ସର୍ହାର୍‌; 10 ମାରି, ଜେବଦିରି ରିଏର୍‌ ମାର୍‌ସିର୍‌ ଜାକୁବ ମାରି ଜୋହନ, ଏର୍‌ ସିମୋନ୍‌ତି ୱାଲେ ମାର୍ହାର୍‌, ୱାନ୍‌ ବା ଆୟାୱାଜା କାବାତା ସୋର୍‌ଆର୍‌ । ମାରି, ଜିସୁ ସିମୋନତିଙ୍ଗ୍‌ ଇର୍ହାନ୍‌, "ତିଲାମା, ନେର୍‍ହାନ୍‌ ନିନ୍‌ ମିନ୍‌କୁ ଆସ୍‌ନି ବାଦ୍‌ଲୁ ଲୋକାଙ୍ଗ୍‌ ମାପୁରୁ ଲାକ୍‌ତୁ ତାନି ।"

11 ତାନେ ୱେନ୍‌କା ୱାର୍‌ ଡଙ୍ଗେଆଙ୍ଗ୍‌ ପାଡ଼ିତାସି ୱିଜୁ ଡ଼ିସ୍‍ସି ଜିସୁୱାଲେ ୱାଲେ ସର୍ହାର୍‌ ।

12 ଅର୍‍ସୁ ଜିସୁ ଉଣ୍ତ୍ରି ଗାଡ଼୍‌ତୁ ମାନିୱାଲେ, ସୁଡ଼ୁଦୁ, ଅରେନ୍‍ କୁସ୍ଟରୋଗ୍‌ ଲୋକୁ ଆୟା ବାଡିଦୁ ମାର୍‌ର୍ହାନ୍‌, ୱାନ୍‌ ଜିସୁଙ୍ଗୁଁ ସୁଡ଼ୁଜି ମୋକମ୍‌ ପାଡ଼୍‍କ୍‍ସି ଜିସୁଙ୍ଗୁଁ ମାଡ଼ିସ୍‌ କିଜି ଇର୍ହାନ୍‌, "ଏ ପ୍ରବୁ, ନିନ୍‌ ଜଦି ବଦା କିନି, ଆତିଙ୍ଗ୍‌ ନାଙ୍ଗିଁ ନେଗେଣ୍ତ୍‌ କିଦେଙ୍ଗ୍‌ ଆଟ୍‌ନି ।"

13 ଆବେନୁ ଜିସୁ କିୟୁ ପେର୍‌ଜି ୱାନିଙ୍ଗ୍‌ ମୁଟ୍‌ସି ଇର୍ହାନ୍‌, "ନାନ୍ ବଦା କିଜିନା, ନେଗେଣ୍ତ୍‌ ଆଆ ।" ଆୟାଦାପ୍ରେ କୁସ୍ଟରୋଗ୍‌ ୱାନିମାଣୁକୁ ଆକ ଆତାତ୍‌ । 14 ମାରି, ଜିସୁ ୱାନିଙ୍ଗ୍‌ ଆଦେସ୍‌ ସିଜି ଇର୍ହାନ୍‌, "ଏଙ୍ଗ୍‌ବା ଇନିକା ଇନ୍‍ମା, ମାତର୍‌ ସିଦା ସୋଲ୍‌ସ ଜାଜକଦି ଲାକ୍‌ତୁ ସାଙ୍ଗ୍‍ଆ ମାରି ୱାନ୍‌ ନିଙ୍ଗିଁ ପରିକା କିଜି ସୁଡ଼ିନ୍‍, ତାନିୱେନ୍‍କା ନିନ୍‌ ନେଗେନ୍‌ ଆତିମାନି ଇଜି ଆଇୱାରି ଲାକ୍‌ତୁ ସାକି ସିଦେଙ୍ଗ୍‍ ଇଜି ମୋସାଦି ସିତିମାନି ନିୟମ୍‍ତାନ୍‍ ପୁଜା ସିଆ ।"

15 ମାତର୍‌ ୱାନି ବିସୟ୍‌ତି ମାଟା ମାରି ନାଣ୍ତ ୱେଙ୍ଗିଁତାତ୍‌, ମାରି ନାଣ୍ତ ଲୋକୁ ୱେନି ଉଣ୍ତିଙ୍ଗ୍‌ ମାରି ନିଜେ ନିଜେଦି ରୋଗ୍‌ତାନ୍‌ ନେଗେନ୍‌ ଆନି ଉଣ୍ତିଙ୍ଗ୍‌ ଉଣ୍ତ୍ରେମାନୁ ଆଦେଙ୍ଗ୍‌ ଆସ୍‌ତାର୍‌; 16 ମାତର୍‌ ଜିସୁ ସୁନ୍‌ସାନ୍‌ ବାଡିଦୁ ମାନ୍‌ଞ୍ଜି ପାର୍‌ତନା କିଜିମାର୍ହାନ୍‌ ।

17 ଅର୍‍ଲେନ୍‍ ଜିସୁ ସିକିୟା ସିଜି ମାର୍ହାନ୍‌, ମାରି ଗାଲିଲିଦି ୱିଜୁ ନାର୍‌କୁ, ମାରି ଜିହୁଦା ଦେସ୍‍ ମାରି ଜିରୁସାଲମତାନ୍‌ ୱାତି ମାର୍ହି ପାରୁସି ମାରି ଜିହୁଦି ଦାର୍ମୁଗୁରୁରି ଲାକ୍‌ତୁ ବାସ୍‌ତା ମାର୍ହାର୍‌, ମାରି, ୱାନ୍‌ ଏଣ୍ତେସ୍‌ ରୋଗିରିଙ୍ଗ୍‍ ନେଗେନ୍‌ କିନାନ୍‌, ଇୟାଉଣ୍ତିଙ୍ଗ୍‌ ପ୍ରବୁଦି ସାକ୍ତି ୱାତା ମାନାତ୍‌ । 18 ମାରି ସୁଡ଼ୁଦୁ, ଏସ ଲୋକୁ ଅରେନ୍‍ ପକିୟାଗାତି ରୋଗ୍‌ ଲୋକ୍‌ତିଙ୍ଗ୍‌ କାଟେଲ୍‍ତୁ ପିଣ୍ତିଜି ତାତାର୍ ୱାନିଙ୍ଗ୍‌ ଲୋଇ ଅତେଙ୍ଗ୍‌ ଇଜି ମାରି ଜିସୁ ଆଗ୍‌ଡ଼ି ଇଡ୍‌ଦେଙ୍ଗ୍‌ ଇଜି ବଦା କିଜିମାର୍ହାର୍‌ । 19 ମାତର୍‌ ନାଣ୍ତ ଲୋକୁ ଗୋଲି ଉଣ୍ତିଙ୍ଗ୍‌ ୱାନିଙ୍ଗ୍‌ ଲୋଇ ଅତେଙ୍ଗ୍‌ ଇଜି ସାରି ପଇଏତାର୍‌ଆକା ୱାର୍‌ ଇଲୁ ମୁସ୍‌କୁ ଏକ୍‌ତାର୍‌ରୋ ରେକାମ୍‌ତି ଟାଇଲି କୁତ୍‌ତାର୍‌ରୋ ବର୍‌ କିତାର୍‌ ଆୟା ବର୍‌ଦି ସାରିସିଜି କାଟେଲ୍‌ତି ୱାଲେ ୱାନିଙ୍ଗ୍‌ ନେଗିନାଣ୍‌ମି ବାଡିଦୁ ଜିସୁଦି ଆଗିଡ଼ି ରେପ୍‌ତାର୍‌ । 20 ୱାନ୍‌ ୱାରି ବିସ୍‌ବାସ୍‌ ସୁଡ଼ୁଜି ଇର୍ହାନ୍‌, "ଏ ମାରିନ୍‌, ନି ପାପ୍‌ୱିଜୁ କେମା ଆତାମାନାତ୍‌ ।"

21 ଆବେଟ୍‌ ସାସ୍ତ୍ରିର୍‍ ମାରି ପାରୁସିର୍‌ ନିଜେ ନିଜେଦିମାନୁ ୱାର୍‌ଗିଜିସାଜି ଇର୍ହାର୍‌, "ଇକାନ୍‌ ଜେ ମାପୁରୁଙ୍ଗୁଁ ନିଦା କିଜିନାନ୍‌, ଇକାନ୍‌ ଏନ୍‌ ? କେବଲ୍‌ ମାପୁରୁଙ୍ଗୁଁ ଡ଼ିସ୍‌ତିଙ୍ଗ୍‌ ମାରି ଏନ୍‌ ପାପ୍‌କେମା କିଦେଙ୍ଗ୍‌ ଆଟ୍‍ନାନ୍‍ ?"

22 ମାତର୍‌ ଜିସୁ ୱାରି ୱାର୍‌ଗିଜିସାନିକା ନେସ୍‌ସି ୱାରିଙ୍ଗ୍‌ ଇର୍‌ଆନ୍‌, ମିର୍‌ ନିଜେ ନିଜେଦି ମନ୍‍ତୁ ଇନିକା ୱାର୍‌ଗିଜି ସାଜିନିଦେର୍‌ ? 23 ଇନିକା ଉସାସ୍‌ ? ନି ପାପ୍‌ୱିଜୁ କେମା ଆତାତ୍‌ ଇଜି ଇନିକା, ମାରି, ନିଙ୍ଗିଁଆ, ବୁଲାଆ ଇଜି ଇନିକା ? 24 ମାତର୍‌ ସାରାଦୁନିଆଦୁ ପାପ୍‌କେମା କିଦେଙ୍ଗ୍‌ ମନୁସ୍ୟପୁତ୍ରଦିଙ୍ଗ୍‌ ଜେ ଅଦିକାର୍‌ ମାନାତ୍‌, ଇକା ଏଣ୍ତେସ୍‌ ମିର୍‌ ନେସ୍‌ତେଙ୍ଗ୍‌ ଆଟ୍‌ନିଦେର୍‌ ଇୟାଉଣ୍ତିଙ୍ଗ୍‌ ଆୟା ପକିୟାଗାତି ରୋଗିଙ୍ଗ୍‌ ଇର୍ହାନ୍‌, "ନାନ୍ ନିଙ୍ଗିଁ ଇଜିନା, ନିଙ୍ଗିଁଆ, ନିଜେଦି ଟାଟି ଆସ୍‌ସି ମି ଇଣ୍ତ୍ରସାଙ୍ଗ୍‍ଆ ।"

25 ଆବେଟ୍‌ତାନ୍‌ ୱାନ୍‌ ଆୟାଦାପ୍ରେ ୱାରି ଆଗିଡ଼ିରାନ୍‌, ନିଙ୍ଗ୍‌ଜି, ଏମେ କାଟେଲ୍‍ ମୁସ୍‌କୁ ୱାନ୍‌ ଡରିତା ମାର୍ହାନ୍‌, ଆୟା କାଟେଲ୍‌ ଆସ୍‌ଇ ମାପୁରୁଙ୍ଗୁଁ ଦନ୍ୟବାଦ୍‌ ପ୍ରସଂସା କିଜି କିଜି ନିଜେଦି ଇଣ୍ତ୍ର ସୋର୍ହାନ୍‌ । 26 ଆବେଟ୍‌ ୱିଜେରେ କାବାତାରୋ ମାପୁରୁଙ୍ଗୁଁ ଦନ୍ୟବାଦ୍‌ ପ୍ରସଂସା କିଦେଙ୍ଗ୍‌ ଆସ୍‌ତାର୍‌ ମାରି ନାଣ୍ତ ତିଲାତାରୋ ଇର୍ହାର୍‌, "ନେରୁ ମାପ୍‌ କାବାଆନି ଗଟ୍‌ଣା ସୁଡ଼ୁତାପ୍‌ !"

27 ତାନେୱେନ୍‌କା ଜିସୁ ସୋତା ସର୍ହାନ୍‌ନୋ ଲେବି ଦର୍‌ତି ଅରେନ୍‍ ୱାନିଙ୍ଗ୍‌ ସିସ୍‍ଟୁ ଲସ୍‌ନି ବାଡିଦୁ ବାସ୍‌ତି ମାରିକା ସୁଡ଼ୁଜି ୱାନିଙ୍ଗ୍‌ ଇର୍ହାନ୍‌, "ନା ୱେନ୍‌କା ରାଆ ।" 28 ଆବେଟ୍‌ ଲେବି ୱିଜୁ ଡ଼ିସ୍‌ତାନ୍‌ନୋ ନିଙ୍ଗିଁଜି ୱାନି ୱେନ୍‌କା ସଣ୍ଡ୍ରେଙ୍ଗ୍‌ ଆସ୍‌ତାନ୍‌ ।

29 ମାରି, ଲେବି ନିଜେଦି ଇନ୍‌ଡ୍ର ୱାନି ଉଣ୍ତିଙ୍ଗ୍‌ ଉଣ୍ତ୍ରି ପେରି ବଜି କିତାନ୍‌, ମାରି ନାଣ୍ତଲୋକୁ ସିସ୍‍ଟୁ ଲସ୍‌ନିକାର୍‌ ମାରି ଆଇ ଆଇ ଲୋକୁ ୱାରି ୱାଲେ ଉଣ୍ତେଙ୍ଗ୍‌ ବାସ୍‌ତାର୍‌ । 30 ✝ଆବେଟ୍‌ ପାରୁସିର୍‌ ମାରି ୱାରି ଦଲ୍‌ତି ସାସ୍ତ୍ରିର୍‍ ଜିସୁଦି ସିସୁରି ବିରଦ୍‌ତାନ୍‌ ବାସେ କିଜି ଇଣ୍ତ୍ରେଙ୍ଗ୍‌ ଆସ୍‌ତାର୍‌, "ମିର୍‌ ଏନ୍ଧା ସିସ୍‍ଟୁ ଲସ୍‌ନିକାର୍‌ ମାରି ପାପିଲୋକା ୱାଲେ ଉଣୁଞ୍ଜିତିଞ୍ଜିନିଦେର୍‌ ?"

31 ଜିସୁ ୱାରିଙ୍ଗ୍‌ ୱେର୍‌ତାନ୍‌, "ନେଗି ଲୋକାଙ୍ଗ୍‌ ଡାକ୍‌ତର୍‌ମାନୁ ଦର୍‌କାର୍‌ ସିଲେ, ମାତର୍‌ ରୋଗ୍‍ତି ଲୋକାଙ୍ଗ୍‌ ଡାକ୍‌ତର୍‌ତି ମାନୁ ଦର୍‌କାର୍‌ ମାନାତ୍‌ । 32 ନାନ୍ ଦାର୍ମୁ ଲୋକାଙ୍ଗ୍‌ କୁକ୍‌ନି ଉଣ୍ତିଙ୍ଗ୍‌ ରେଏ, ମାତର୍‌ ମୋନ୍‌ତିଙ୍ଗ୍‌ ଡ଼େପ୍‍ନି ଉଣ୍ତିଙ୍ଗ୍‌ ପାପି ଲୋକାଙ୍ଗ୍‌ କୁକ୍‌ତେଙ୍ଗ୍‌ ଇଜି ୱାତାମାନା ।"

33 ଏସୋଲୋକ୍‍ ଜିସୁଙ୍ଗୁଁ ୱେନ୍‍ବାତାର୍‌, "ଡୁବନ୍‌ ସିନି ଜୋହନତି ସିସୁର୍‍ ମାରି ଅର୍‍ସୁ ମାରି ଉପାସ୍‌ ମାରି ପାର୍‍ତନା କିନାର୍‌, ପାରୁସିର୍‌ ସିସୁର୍‍ ବା ଆୟାୱାଜା କିନାର୍‌, ମାତର୍‌ ନି ସିସୁର୍‍ ଉଣାର୍‍ତିନାର୍‌ ।"

34 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, "କାନ୍ୟାମୁରୁଲିରି ୱାଲେ ମୁରୁଲି ମାନିୱାଲେ ମିର୍‌ ଇନିକା ୱାରିଙ୍ଗ୍‌ ଉପାସ୍‌ ତେବାକିଦେଙ୍ଗ୍‌ ଆଟ୍‌ନିଦେର୍‌ ? ମୁଡ଼ୁକେ ସିଲେ । 35 ମାତର୍‌ ସମୟ ୱାନାତ୍‌, ମାରି, ଏସ୍ତିୱାଲେ ୱାରିମାଣାନ୍‌ ମୁରୁଲିଙ୍ଗ୍‌ ୱେର୍‌ଏ କିନାର୍‌, ନାସ୍ତିୱାଲେ ଆୟାୱାଲେ ୱାର୍‌ ଉପାସ୍‌ କିନାର୍‌ ।"

36 ମାରି, ୱାନ୍‌ ୱାରିଙ୍ଗ୍‌ ଉଣ୍ତ୍ରି କାତାବା ଇର୍‌ଆନ୍‌, "ଏନ୍‌ ପୁନି ୱାତିଦି ଇସ୍ରି ଅଟିଦିଙ୍ଗ୍‍ ଅସି ପାଡ଼ିଇ ୱାତିଦୁ ଗୁତ୍‌ଏନ୍‌; ଗୁତ୍‌ତିଙ୍ଗ୍‌ ଆୟା ପୁନି ୱାତିଦି ଅଟି ପାଡ଼ିଇ ୱାତିଦିଙ୍ଗ୍‌ କିଜିସ୍‌କିନାତ୍‌, ମାରି ପୁନି ୱାତିଦି ଅଟି ବା ପାଡ଼ିଇ ୱାତିଦି ୱାଲେ ମିସାଏତ୍‌ । 37 ମାରି, ଏନ୍‌ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ପାଡ଼ିଇ ସାଟିଦୁ ଇଡ୍‍ଏନ୍‍; ଜଦି ଇଟ୍‌ତିଙ୍ଗ୍‌ ପୁନି ଅଙ୍ଗୁର୍‍ରସ୍‍ ସାଟିଦିଙ୍ଗ୍‌ ପାଡିସ୍‌ କିଜି ପଗ୍‌ନାସୋନାତ୍‌, ମାରି ସାଟିବା ନାସ୍ଟୁ ଆନାତ୍‌ । 38 ମାତର୍‌ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ପୁନି ସାଟିଦୁ ଇଡ୍‌ନିକା ମାନାତ୍‌ । 39 ମାରି, ଏନ୍‌ ପାଡ଼ିଇ ଅଙ୍ଗୁର୍‍ ରସ୍‌ତିଙ୍ଗ୍‌ ଉଣାନ୍‌ନୋ ପୁନି ଅଙ୍ଗୁର୍‍ ରସ୍‌ତିଙ୍ଗ୍‌ ଉଣ୍ତେଙ୍ଗ୍‌ ବଦା କିଏନ୍‌, ଇରିଙ୍ଗ୍‌ ୱାନ୍‌ ଇନାନ୍‌, ପାଡ଼ିଇ ଅଙ୍ଗୁର୍‍ ରସ୍‌ନେ ନେଗିକା ।"