1 ଅର୍‍ଲେନ୍‍ ରମ୍‍ନିଦିନ୍‍ତୁ ଜିସୁ ପାସି କିଡ଼ିଇ ସିଜି ସନି ୱାଲେ ୱାନି ସିସୁର୍‍ ସେରେନ୍‍କୁ ତେଉଜି ତେଉଜି କିୟୁଦୁ ରାସ୍‌ଇ ତିନ୍‌ଜି ମାର୍ହାର୍‌ । 2 ମାତର୍‌ ପାରୁସିର୍ ମାଣ୍‌କୁ ଏସ ଲୋକୁ ଇର୍ହାର୍‌, "ରମ୍‌ନିଦିନ୍‍ତୁ ଏମେକା କିଦେଙ୍ଗ୍‌ ନିୟମ୍‌ ସିଲେତ୍‌, ଆକା ମିର୍‌ ଏନ୍ଧା କିଜିନିଦେର୍‌ ?"

3 ଜିସୁ ୱାରିଙ୍ଗ୍‌ ଇର୍ହାନ୍‌, "ଦାଉଦ ମାରି ୱାନି ସାଙ୍ଗର୍‌ ବାଙ୍ଗାଁ ଆତିୱାଲେ ୱାନ୍‌ ଇନିକା କିତାମାର୍‌ଆନ୍‌, ଆକାବା ଇନିକା ମିର୍‌ ପଡ଼ାଇଦେର୍‍ ନୋ ? 4 ଦାଉଦ ଏଣ୍ତେସ୍‌ ମାପୁରୁଦି ଇଲୁତୁ ଡ଼ୁଗିତାନ୍‌ନୋ, ଆମା ପୁଜାସିନି ରୁଟି ଜାଜକରିଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ବା ତିଣ୍ତ୍ରେଙ୍ଗ୍‌ ନିୟମ୍‌ ସିଲେତ୍‌, ଆକା ଅତାନ୍‌ନୋ ତିରାଆ ମାର୍‌ଆନ୍‌, ମାରି ୱାନି ତଡ଼୍‌ ଲୋକାଙ୍ଗ୍‌ ବା ସିତା ମାର୍‌ଆନ୍‌ ।"

5 ମାରି, ଜିସୁ ୱାରିଙ୍ଗ୍‌ ଇର୍‌ଆନ୍‌, "ମନୁସ୍ୟପୁତ୍ର ରମ୍‌ନିଦିନ୍‍ତି ପ୍ରବୁ ଆନାନ୍‌ ।"

6 ଜିସୁ ମାରି ଅର୍‍ଲେନ୍‍ ରମ୍‌ନିନାଣ୍ତିଙ୍ଗ୍‌ ପାର୍‌ତନା ଇଲୁତୁ ଡ଼ୁଗିତାନ୍‌ନୋ ସିକିୟା ସିଜି ମାର୍‌ଆନ୍‌, ଆବେଟ୍‌ ଅରେନ୍‍ ଲୋକୁ ମାର୍‌ଆନ୍‌, ୱାନି ଉଣି କିୟୁ ୱାର୍‌ତା ମାର୍‌ଆତ୍‌ । 7 ମାରି, ୱାନ୍‌ ଏଣ୍ତେସ୍‌ ରମ୍‌ନିନାଣ୍ତିଙ୍ଗ୍‌ ନେଗେଣ୍ତ୍‌ କିନାନ୍‌ନୋ ସିଲେ, ଇକା ସୁଡ଼ୁଦେଙ୍ଗ୍‍ ଇଜି ସାସ୍ତ୍ରିରି ମାରି ପାରୁସିର୍‌ ୱାନିଙ୍ଗ୍‌ ସୁଡ଼ୁଜି ମାର୍‌ଆର୍‌, ଏଣ୍ତେସ୍‌କି ୱାର୍‌ ୱାନି ବିରୁଦ୍‍ତାନ୍‍ ଦୋସ୍‌ କିଦେଙ୍ଗ୍‌ ଆଟ୍‍ନାର୍‍ । 8 ମାତର୍‌ ୱାନ୍‌ ୱାରି ମନ୍‌ତୁ ଅଡ଼୍‍ବିନିକା ନେସ୍‌ତାନ୍‌ନୋ, ଏମେ ଲୋକ୍‌ତି କିୟୁ ୱାର୍‌ତା ସୋର୍‌ଆ ମାର୍‌ଆତ୍‌, ୱାନିଙ୍ଗ୍‌ ଇର୍‌ଆନ୍‌, "ନିଙ୍ଗିଁଆ, ନାଣ୍‌ମି ନିଲ୍‌ଆ ।" ମାରି, ୱାନ୍‌ ନିଙ୍ଗ୍‌ଜି ନିର୍‌ଆନ୍‌ । 9 ଆବେଟ୍‌ ଜିସୁ ୱାରିଙ୍ଗ୍‌ ଇର୍‌ଆନ୍‌, "ନାନ୍ ମିଙ୍ଗିଁ ୱେନ୍‌ବାଜିନା, ରମ୍‌ନି ନାଣ୍ତିଙ୍ଗ୍‌ ଇନିକା କିଦେଙ୍ଗ୍‌ ନିୟମ୍‌ ସିଲେତ୍‌ ? ନେଗେନ୍‌ କିଦେଙ୍ଗ୍‌ ନୋ ସେଏଣ୍ତ୍‍ କିଦେଙ୍ଗ୍‌ ? ଜିବନ୍‌ ରକିୟା କିନିକା ନୋ ସାପିସ୍‌ନିକା ?" 10 ମାରି, ଜିସୁ ସାରିବେଡ଼୍‍ତି ୱିଜେରିଙ୍ଗ୍‌ ସୁଡ଼୍‌ଜି ୱାନିଙ୍ଗ୍‌ ଇର୍‌ଆନ୍‌, "ନି କିୟୁ ପେର୍‌ଆ ।" ଆବେଟ୍‌ ୱାନ୍‌ ୱାନି କିୟୁ ପେର୍‍ତାନ୍‍, ମାରି ୱାନି କିୟୁ ନେଗେନ୍‌ ଆତାତ୍‌ ।

11 ମାତର୍‌ ୱାର୍‌ ନାଣ୍ତ ରିସା ଆତାର୍‌, ମାରି ଜିସୁଦି ବିରଦ୍‌ତାନ୍‌ ଇନିକା କିଦେଙ୍ଗ୍ ଆଟ୍‍ନାର୍‍, ଆୟା ବିସୟ୍‌ତାନ୍ ନିଜେ ନିଜେଦିମାନୁ ୱାର୍‌ଗିଜି ସାତାର୍‌ ।

12 ଆୟାୱାଲେ ଜିସୁ ଅର୍‍ଲେନ୍‍ ପାର୍‌ତନା କିଦେଙ୍ଗ୍‌ ଇଜି ଗରନ୍‌ତୁ ସର୍‌ଆନ୍‌ । ଆବେ ମାପୁରୁଦିମାନୁ ପାର୍‌ତନା କିବୁ କିବୁ ନାଡ଼ାୱିଗ୍‌ଜି ତେବାତାନ୍‌ । 13 ମାର୍‌ନାଣ୍ତିଙ୍ଗ୍‌ ସାଲ୍‍ଦି ଆତାତ୍‌, ଜିସୁ ନିଜେଦି ସିସୁରିଙ୍ଗ୍‌ ଲାକ୍‌ତୁ କୁକ୍‌ସି ୱାରି ମାଣାନ୍‌ ବାରଲୋକାଙ୍ଗ୍‌ ଆସ୍‌କିତାନ୍‍, ୱାନ୍‌ ୱାରିଙ୍ଗ୍‌ ପ୍ରେରିତ ଦର୍‌ ସିତାନ୍‌; 14 ୱାର୍‌ ଆତାର୍‌, ସିମୋନ, ଆମାୱାନିଙ୍ଗ୍‌ ୱାନ୍‌ ପିତର୍‌ ଇଜି ଦର୍‌ ସିତାନ୍‌, ମାରି ୱାନି ତଡ଼ାନ୍‌ ଆନ୍ଦ୍ରିୟ, ଜାକୁବ ମାରି ଜୋହନ, ପିଲିପ୍‌ ମାରି ବାର୍ତଲମି, 15 ମାତିଉ ମାରି ତୋମା, ଆଲପିତି ମାରିସ୍‌ ଜାକୁବ ମାରି ସିମୋନ, ଆମାୱାନିଙ୍ଗ୍‌ ୱେଡ଼ିକାକିନିକାନ୍‌ ଇଜି ଇନାର୍‌, 16 ଜାକୁବଦି ମାର୍‌ନି ଜିହୁଦା ମାରି ଇସ୍କାରିୟୋତିୟ ଜିହୁଦା, ଏନ୍‌ ଜିସୁଙ୍ଗୁଁ ସାତ୍ରୁରି କିୟୁଦୁ ସପ୍ରେକିତା ସିତାନ୍‌ ।

17 ମାରି, ଜିସୁ ସିସୁରି ୱାଲେ ଗରନ୍‌ତାନ୍‍ ରେସି ୱାତାନ୍‌ । ମାରି ସାର୍‍ଦିତି ବୁମିଦୁ ନିଜେଦି ନାଣ୍ତ ଲୋକୁ ସିସୁରି ୱାଲେ ନିର୍‍ଆନ୍‍ । ମାରି ୱିଜୁ ଜିହୁଦା ଦେସ୍‍, ଜିରୁସାଲାମ୍‍, ମାରି ସାମ୍‌ଦୁର୍‌ତିପାଡ଼ିଦି ସୋର୍‍ ନି ସିଦନ୍‍ ଗାଡ଼୍‍ତି ନାଣ୍ତ ଲୋକୁ ୱାନି ଲାକ୍‌ତୁ ୱାତାର୍‌ । 18 ୱାର୍‌ ୱାନି ବାକ୍ୟ ୱେନ୍‌ଡ୍ରେଙ୍ଗ୍‌ ମାରି ନିଜେ ନିଜେଦି ରୋଗ୍‌ତାନ୍‌ ନେଗେନ୍‌ ଆଦେଙ୍ଗ୍‌ ୱାତା ମାର୍‌ଆର୍‌, ମାରି ଏର୍‌ ତାଗିଇଦୁବେଙ୍ଗ୍‌ ମାଣ୍‌କୁ କାସ୍ଟୁ ପଇଜି ମାର୍‌ଆର୍‌, ୱାରିଙ୍ଗ୍‌ ୱାନ୍‌ ନେଗେନ୍‌ କିତାନ୍‍; 19 ମାରି ଲୋକୁ ୱିଜେରେ ୱାନିଙ୍ଗ୍‌ ମୁଟ୍‌ତେଙ୍ଗ୍‌ ଇଜି ବଦାକିଜି ମାର୍‌ଆର୍‌, ମାତର୍‌ ୱାନିମାଣାନ୍‌ ସାକ୍ତି ସୋସି ଲୋକାଙ୍ଗ୍‌ ନେଗେଣ୍ତ୍‌ କିଜିମାର୍‌ଆତ୍‌ ।

20 ଆୟାୱାଲେ ଜିସୁ ନିଜେଦି ସିସୁରି ତରିଣ୍ତ୍‌ ସୁଡ଼ୁଜି ଇର୍‌ଆନ୍‌,

କାକୁର୍ତିଲୋକୁ ଜେ ମିର୍‌, ମିର୍‌ ଦନ୍ୟ,

ଇରିଙ୍ଗ୍‌ ମାପୁରୁଦି ରାଜି ମିଦି ।

21 ଇଲେଇ ବାଙ୍ଗାଁଦୁ ମାନିଦେର୍‌ ଜେ ମିର୍‌, ମିର୍‌ ଦନ୍ୟ,

ଇରିଙ୍ଗ୍‌ ମିର୍‌ ପଟା ପାଜ୍‌ନିଦେର୍‌,

ଇଲେଇ ଆଡ଼୍‍ବାଜିନିଦେର୍‍ ଜେ ମିର୍‌, ମିର୍‌ ଦନ୍ୟ,

ଇରିଙ୍ଗ୍‌ ମିର୍‌ ସିକ୍‍ନିଦେର୍‍ ।

22 ✝ ୬:୨୨ ୧ ପିତର ୪:୧୪. ଲୋକୁ ଏସ୍‌କାଙ୍ଗ୍‌ ମନୁସ୍ୟପୁତ୍ର ଉଣ୍ତିଙ୍ଗ୍‌ ମିଙ୍ଗିଁ କାଡ଼୍‍ନାର୍‌ ମାରି ୱେର୍‌ଏ କିନାର୍‌, ମାରି ନିନ୍ଦା କିନାର୍‌, ମାରି ମି ଦର୍‌ତିଙ୍ଗ୍‌ ତାଗିଇକା ଇଜି ମାନାଏର୍‌, ଆରିଙ୍ଗ୍‌ ମିର୍‌ ଦନ୍ୟ । 23 ✝୬:୨୩ ପ୍ରେରିତ ୭:୫୨.ଆୟା ନାଣ୍ତିଙ୍ଗ୍‌ ୱେଡ଼ିକା କିଜି ଗାତ୍‌ତୁ, ମାତର୍‌ ସୁଡ଼ୁଦୁ, ମି ଉଣ୍ତିଙ୍ଗ୍‌ ମୁସ୍‌କୁପୁର୍‌ତୁ ମି ପୁରସ୍‌କାର୍‌ ନାଣ୍ତ ମାନାତ୍‌, ମାରି, ଆୟାୱାଜା ତୋ ୱାରି ପୁର୍ବେଦି ଡକ୍ରାଦାଦାର୍‌ରି ବାବବାଦିରି ଉଣ୍ତିଙ୍ଗ୍‌ କିଜିମାର୍‌ଆର୍‌ ।

24 ମାତର୍‌ ଚି, ଦଣ୍ଡ୍‌ ପଇନି ମାଜନ୍‌ ଲୋକୁ ଜେ ମିର୍‌,

ଇରିଙ୍ଗ୍‌ ମିର୍‌ ନିଜେ ନିଜେଦି ସୁକ୍‌ ପ‍ଇଜିନିଦେର୍‌ ।

25 ଚି, ଦଣ୍ଡ୍‌ ପଇନି ଲୋକୁ ଇଲେଇ ପଟାପାଜ୍‍ଜିନିଦେର୍‍ ଜେ ମିର୍‌,

ଇରିଙ୍ଗ୍‌ ମିର୍‌ ବାଙ୍ଗାଁ ଆନିଦେର୍‌,

ଚି, ଦଣ୍ଡ୍‌ ପଇନି ଲୋକୁ ଇଲେଇ ସିକ୍‌ସିନିଦେର୍‌ ଯେ ମିର୍‌,

ଇରିଙ୍ଗ୍‌ ମିର୍‌ ଏତ୍‍କିଜିଆଡ୍‌ବାନିଦେର୍‍ ମାରି ଆଡ଼୍‌ବାନିଦେର୍‌ ।

26 ଏସ୍ତିୱାଲେ ଲୋକୁ ୱିଜେରେ ମିଙ୍ଗିଁ ୱେଙ୍ଗିଁସ୍‍ କିନାର୍‌, ନାସ୍ତିୱାଲେ ଚି, ମିର୍‌ ଦଣ୍ଡ୍‌ ପଇନି ଲୋକୁ; ଆୟାୱାଜା ତୋ ୱାରି ପୁର୍ବେଦି ଡକ୍ରାଦାଦାର୍‍ ବଣ୍ତ ବାବବାଦିରିଙ୍ଗ୍ ବା ନେଗିକାର୍‍ ଇଜିମାର୍‌ଆର୍‌ ।

27 ମାତର୍‌ ୱେନ୍‌ଞ୍ଜିନିଦେର୍‌ ଜେ ମିର୍‌, ମିଙ୍ଗିଁ ନାନ୍ ଇଜିନା, ମି ସାତ୍ରୁରିଙ୍ଗ୍ ଜିବନ୍‍ନୋଦୁ; ଏର୍‌ ମିଙ୍ଗିଁ କାଡ଼୍‌ନାର୍‌, ୱାରିଙ୍ଗ୍‌ ଆର୍ସିବାଦ୍‌ କିଦୁ; 28 ଏର୍‌ ମିଙ୍ଗିଁ ଆନାଦୁରିଆ କିନାର୍‌, ୱାରିଙ୍ଗ୍‌ ଆର୍ସିବାଦ୍‌ କିଦୁ; ଏର୍‌ ମିଙ୍ଗିଁ ନିନ୍ଦା କିନାର୍‌, ୱାରି ଉଣ୍ତିଙ୍ଗ୍‌ ପାର୍‌ତନା କିଦୁ । 29 ଏନ୍‌ ମିଙ୍ଗିଁ ଉଣ୍ତ୍ରି ବୁଗୁଲିଦୁ ଚାପ୍‌ଡ଼ା ଡାକ୍‌ନାନ୍‍, ୱାନି ଉଣ୍ତିଙ୍ଗ୍‌ ଆଇ ବୁଗୁଲି ବା ତର୍‌ସୋ ସିଦୁ; ମାରି, ଏନ୍‌ ମି ସାଦର୍‌ ଅନାନ୍‍, ୱାନିଙ୍ଗ୍‌ ମି ଆଙ୍ଗିଁ ବା ଅତେଙ୍ଗ୍‌ ମାନା କିମାଟ୍‌ । 30 ଏନ୍‌ଆପିନ୍‌ ମିଙ୍ଗିଁ ଇନି ଜିନିସ୍‌ ଲୋସ୍‍ନାନ୍‍, ୱାନିଙ୍ଗ୍‌ ସିଦୁ; ମାରି, ଏନ୍‌ ମି ଦନ୍‌ ଅନାନ୍‍, ୱାନିମାଣ୍‌ନା ଆକା ମାରିଡ଼େସି ଲସ୍‌ମାଟ୍‌ । 31 ✝୬:୩୧ ମାତିଉ ୭:୧୨.ଲୋକୁ ମି ଉଣ୍ତିଙ୍ଗ୍‌ ଏଣ୍ତେସ୍‌ବା ମାନାପିର୍‌ ଇଜି ବଦା କିନିଦେର୍‌, ମିର୍‌ ୱାରି ଉଣ୍ତିଙ୍ଗ୍‌ ଆୟାୱାଜା କିଦୁ ।

32 ମାରି, ଏର୍‌ ମିଙ୍ଗିଁ ଜିବନ୍‌ନୋନାର୍‌, ମିର୍‌ ଜଦି ୱାରିଙ୍ଗ୍‌ନେ ଜିବନ୍‌ନୋତିଙ୍ଗ୍‌ ମିର୍‌ ଇନିକା ଦୟା ପଇନିଦେର୍‌ ? ଇରିଙ୍ଗ୍‌ ପାପି ଲୋକ୍‌ ବା ନିଜେ ନିଜେଦି ଲାଡ଼୍‌କିନିୱାରିଙ୍ଗ୍‌ ଲାଡ୍‌ କିନାର୍‌ । 33 ମାରି, ଏର୍‌ ମିଙ୍ଗିଁ ଆର୍ସିବାଦ୍‌ କିନାର୍‌, ଜଦି ମିର୍‌ କେବଲ୍‌ ୱାରିଙ୍ଗ୍‌ନେ ନେଗେନ୍‌ କିନିଦେର୍‌, ଆରିଙ୍ଗ୍‌ ମିର୍‌ ଇନିକା ଦୟା ପଇନିଦେର୍‌ ? ଇରିଙ୍ଗ୍‌ ପାପି ଲୋକ୍‌ ବା ଆୟାୱାଜା କିନାର୍‌ । 34 ମାରି, ଏମେୱାରିମାଣ୍‌କୁ ମି ପଇନି ଆସା ତେବାତାନ୍‌, ୱାରିଙ୍ଗ୍‌ନେ ରୁଣୁ ସିତିଙ୍ଗ୍‌ ମିର୍‌ ଇନିକା ଦୟା ପଇନିଦେର୍‌ ? ପାପିଲୋକ୍‌ ଆକା ସାମାନ୍‌ତାନ୍‌ନେ ଡ଼େସି ପଇନି ଉଣ୍ତିଙ୍ଗ୍‌ ପାପି ଲୋକାଙ୍ଗ୍‌ ରୁଣୁ ସିନାର୍‍ । 35 ମାତର୍‌ ମି ସାତ୍ରୁରିଙ୍ଗ୍‌ ଜିବନ୍‌ନଦୁ ମାରି ୱାରିଙ୍ଗ୍‌ ଆର୍ସିବାଦ୍‌ କିଦୁ, ମାରିଡ଼େସି ପ‍ଇଦେଙ୍ଗ୍‌ ଆସ୍‌ଏଣ୍ତା ରୁଣୁ ସିଦୁ; ଆଦେଙ୍ଗ୍‌ ମି ପୁରସ୍କାର୍‍ ନାଣ୍ଡ୍ ଆନାତ୍‌ ମାରି ମିର୍‌ ପେରି ମାପୁରୁଦି ମାରିନ୍‌ ଆନିଦେର୍‌, ଇରିଙ୍ଗ୍‌ ୱାନ୍‌ ସାଲାକି ନି ତାଗିଇୱାରି ଉଣ୍ତିଙ୍ଗ୍‌ ବା ଦୟା କିନାନ୍‌ । 36 ମି ବୁବା ଏଣ୍ତେସ୍‌ କାର୍ମୁଦିକାନ୍‍, ମିର୍‌ ଆୟାୱାଜା କାର୍ମୁଦିକାର୍‍ ଆଦୁ ।

37 "ମାରି, ବିସାର୍‌ କିମାଟ୍‌, ଆଦେଙ୍ଗ୍‌ ମିର୍‌ ବିଚାର୍‌କିଆୟ୍‌ ଆଇଦେର୍‍; ଏମେ ଲୋକ୍‌ତିଙ୍ଗ୍‌ ବା ଦସ୍‍ କିମାଟ୍‌, ଆତିଙ୍ଗ୍‌ ମିର୍‌ ଦସି କିଆୟ୍‌ଆଇଦେର୍‌ । ଆଇୱାନିଙ୍ଗ୍‍ କେମା କିଦୁ, ଆଦେଙ୍ଗ୍‌ ମିଙ୍ଗିଁ ବା କେମା କିନାନ୍‌; 38 ଆଇୱାନିଙ୍ଗ୍‍ ଦାନ୍‌ ସିଦୁ, ଆଦେଙ୍ଗ୍‌ ମିଙ୍ଗିଁ ଦାନ୍‌ ସିନାର୍‍; ମାପୁରୁ ଅଡିଦୁ ପୁରା କିଜି ତାନିଙ୍ଗ୍‌ ତିଗ୍‌ଜି ଦୁକ୍‌ସି ବର୍ତି କିଜି ମି ଅଟିଦୁ ସିନାର୍‍; ଇରିଙ୍ଗ୍‌ ଏମେ ଅଡିଦାନ୍‌ ଇସାବ୍‌ କିଜ ଇସାବ୍‌ କିଦୁ, ଆୟା ଅଡିଦାନ୍‌ ମିଙ୍ଗିଁ ମାରି ଇସାବ୍‌ କିନାସିନାର୍‍ ।"

39 ✝ ୬:୩୯ ମାତିଉ ୧୫:୧୪. ଜିସୁ ୱାରିଙ୍ଗ୍‌ ଉଣ୍ତ୍ରି ମାଟା ବା ୱେର୍‌ତାନ୍‌, ଅରେନ୍‍ କାଣା ଇନିକା ମାରି ଅରେନ୍‍ କାଣାଦିଙ୍ଗ୍‌ ସାରି ତର୍‌ତେଙ୍ଗ୍‍ଁ ଆଟ୍‍ନାନ୍‍ ? ଜଦି ୱାନ୍‌ ଆୟାୱାଜା କିନାନ୍‍, ଆରିଙ୍ଗ୍‌, ୱାର୍‌ ଇନିକା ରିଏର୍‌ବା ଗୁଟାଦୁ ଆର୍‌ଏର୍‌ ନୋ ? 40 ✝୬:୪୦ ମାତିଉ ୧୦:୨୪,୨୫; ଜୋହନ ୧୩:୧୬; ୧୫:୨୦.ଗୁରୁମାଣାନ୍‍ ସିସୁ ପେରିକାନ୍‌ ଆଏନ୍‍; ଇରିଙ୍ଗ୍‌ ୱିଜେରେ ସିସୁ ସିକିୟା ଅଜାତି ୱେନ୍‌କା ନିଜେଦି ଗୁରୁଦି ସାମାନ୍‍ ଆନାନ୍‌ ।

41 ମାରି, ଏନ୍ଧା ମି ତଡ଼ାନ୍‌ତି କାଣ୍‌ଗାଦୁ ମାନି ଇସ୍ରିକାସ୍ରାଦିଙ୍ଗ୍‌ ସୁଡ଼ୁଜିନିଦେର୍‍, ମାତର୍‌ ମି ନିଜେଦି କାଣ୍‌ଗାଦୁ ଏମେ ପେରି କାସ୍‌ରା ମାନାତ୍‌, ଆକା ଅଡ଼୍‍ବିଜି ସୁଡ଼ୁଦେଙ୍ଗ୍‍ ଆଟ୍‍ଏଜିନିଦେର୍‍ ? 42 ନିନୁ ନିଜେଦି କାଣ୍‌ଗାଦୁ ମାନି ଇସ୍ରିକାସ୍ରା ସୁଡ଼ୁଏଣ୍‌ଗା ଏଣ୍ତେସ୍‌ ନିଜେଦି ତଡ଼ାନ୍‌ତିଙ୍ଗ୍‌ ଇଣ୍ତ୍ରେଙ୍ଗ୍‌ ଆଟ୍‌ନି, ତଡ଼ାନ୍‌, ରାଆ, ନି କାଣ୍‌ଗାଦୁ ମାନି ଇସ୍ରିକାସ୍ରା କୁତ୍‌ନା ସିନା ?ଏ ପୁଲାପୁଲି କିନିକିନ୍ଦେର୍‍, ଆଗିଡ଼ି ନିଜେଦି କାଣ୍‌ଗାଦାନ୍‌ ପେରି କାସ୍‌ରା କୁତ୍‌ସ ପୋକ୍‌ଆ, ତାନିୱେନ୍‌କା ନିଜେଦି ତଡ଼ାନ୍‌ତି କାଣ୍‌ଗାଦୁ ମାନି ଇସ୍ରିକାସ୍ରା କୁତ୍‌ନି ଉଣ୍ତିଙ୍ଗ୍‌ ନେଗ୍ରେଣ୍ତା ସୁଡ଼ୁଦେଙ୍ଗ୍‍ ଆଟ୍‌ନି ।

43 ମାତର୍‌ ଇୟାୱାଜା ମାରାନ୍‌ ସିଲେତ୍‍, ଆମାକାକି ତାଗିଇ ମାରାନ୍‌ ନେଗି ପଲ୍‌ ଆସ୍‌ଏତ୍‌, ବା ନେଗି ମାରାନ୍‌ ତାଗିଇ ପଲ୍‌ ଆସ୍‌ଏତ୍‌ । 44 ✝୬:୪୪ ମାତିଉ ୧୨:୩୩.ଇରିଙ୍ଗ୍‌ ୱିଜୁ ମାରାକା ନିଜେଦି ପଲ୍‌ଦାନ୍‌ ଚିନିସ୍‌ନାର୍‌; ସାମ୍‌ମାରାନ୍‌ତାନ୍‌ ତୋ ଲୋକୁ ତଗା କୟ୍‌ଏର୍‌, ମାରି ସାମ୍‌ ଦୁପାଦାନ୍‌ ଅଙ୍ଗୁର୍‍କୋଡ଼ି କୟ୍‌ଏର୍‌ । 45 ✝୬:୪୫ ମାତିଉ ୧୨:୩୪.ଅରେନ୍‍ ନେଗି ଲୋକ୍‌ଦି ମୋନ୍‌ ଲୋଇ ନେଗି ବିସୟ୍‌ ଉଣ୍ତାତିମାନିକା, ଆଦେଙ୍ଗ୍‌ ୱାନି ମୋନ୍‌ ଲୋଇରାନ୍‌ ନେଗି ବିସୟ୍‌ ସୋନାତ୍‌ । ମାତର୍‌ ଅରେନ୍‍ ତାଗିଇ ଲୋକ୍‌ଦି ମୋନ୍‌ ଲୋଇ ତାଗିଇ ବିସୟ୍‌ ଉଣ୍ତାତିମାନିକା, ଆଦେଙ୍ଗ୍‌ ୱାନି ମୋନ୍‌ ଲୋଇରାନ୍‌ ତାଗିଇ ବିସୟ୍‌ ସୋନାତ୍‌, ଅରେନ୍‍ ଲୋକ୍‌ଦି ମୋନ୍‌ ଲୋଇ ଆମାକା ତେବାତାନ୍‌, ୱାନ୍‌ ଆକା ଇନାନ୍‌ ।

46 "ମାରି, ମିର୍‌ ଏନ୍ଧା ନାଙ୍ଗିଁ ପ୍ରବୁ, ପ୍ରବୁ ଇଜି କୁକ୍‌ସିନିଦେର୍‌, ମାତର୍‌ ନା ମାଟା ମାନାଇଜିନିଦେର୍‌ ? 47 ଏନ୍‌ଆପିନ୍‌ ନା ଲାକ୍‌ତୁ ୱାଜି ନା ମାଟା ୱେନ୍‌ଞ୍ଜି ଆୟାୱିଜୁ ମାନାନାର୍‌, ୱାନ୍‌ ଏୱାଜା ଆନାନ୍‌, ଆକା ନାନ୍ ମିଙ୍ଗିଁ ୱେର୍‌ନା । 48 ୱାନ୍‌ ଇୟାୱାଜା ଅରେନ୍‍ ଇଲୁ ତିଆର୍‌କିନି ଲୋକୁ ୱାଜା, ୱାନ୍‌ ନାଣ୍ତ ଗୁଟା କିଜି କାର୍‌ନାନ୍‌ନୋ ମୁଲ୍‍କାଲୁ ମୁସ୍‌କୁ ବାସାକିନାନ୍‌; ମାରି, ପିରୁ ୱାଜି, ଏରୁ ଆୟା ଇଲୁଦିଙ୍ଗ୍‌ ଦେଲେପ୍‍ସୋ ଅତେଙ୍ଗ୍‌ ନାଣ୍ତ୍‌ଦାନ୍‌ ଡୁକାତାତ୍‌, ମାତର୍‌ ଆକା ଦୁକ୍‌ତେଙ୍ଗ୍‌ ଆଟ୍‍ଏତାତ୍‌, ଇରିଙ୍ଗ୍‌ ଇଲୁ ଡାଟ୍‌ତାନ୍‌ ତିଆର୍‌ ଆତାମାର୍‌ଆତ୍‌ । 49 ମାତର୍‌ ଏନ୍‌ ମାଟା ୱେନ୍‌ଞ୍ଜି ମାନାଏନ୍‌, ୱାନ୍‌ ମୁଲ୍‍କାଲୁ ବାସାକିଏଣ୍ତା ସିକ୍‌ଲା ମୁସ୍‌କୁ ଇଲୁ ତିଆର୍‌କିନି ଲୋକୁ ୱାଜା; ଏରୁ ଆୟା ଇଲୁଦିଙ୍ଗ୍‌ ନାଣ୍ତ୍‌ଦାନ୍‌ ଡୁକାତିଙ୍ଗ୍‌, ଆୟାଦାପ୍ରେ ଇଲୁ ୱିର୍‌ଜିତାତ୍‌ ମାରି ତାନି ୱିର୍‍ଜିତିକା ବୟ୍‌ଙ୍କାର୍‌ ଆତାତ୍‌ ।"