1 ଆୟାୱାଲେ ଜିସୁ ବାର ଲୋକୁ ସିସୁରିଙ୍ଗ୍‌ କୁକ୍‌ସି ଉନ୍‌ଡ୍ରେମାନୁ ଉଣ୍ତା କିଜି ୱାରିଙ୍ଗ୍‌ ୱିଜୁ ଦୁବେଙ୍ଗାଁ ଡ଼ିସ୍‍ତେଙ୍ଗ୍‍ଁ, ମାରି ରୋଗ୍‍ତିଙ୍ଗ୍‍ ନେଗେଣ୍ତ୍‌ କିଦେଙ୍ଗ୍‌ ସାକ୍ତି ମାରି ଅଦିକାର୍‍ ସିତାନ୍‌ । 2 ମାରି, ୱାନ୍‌ ୱାରିଙ୍ଗ୍‌ ମାପୁରୁଦି ରାଜିଦି ନେଗିକାବୁର୍‌ ୱେର୍‌ତେଙ୍ଗ୍‌ ମାରି ରୋଗ୍‍ତୁମାନି ଲୋକାଙ୍ଗ୍‌ ନେଗେଣ୍ତ୍‍ କିଦେଙ୍ଗ୍‌ ପୋକ୍‌ତାନ୍‌, 3 ମାରି ୱାରିଙ୍ଗ୍‌ ଇର୍‌ଆନ୍‌, ମିର୍‌ ସନିୱାଲେ ବାଡିଗା ନୋ ମଣି ନୋ ରୁଟି ନୋ ଡାବୁଙ୍ଗୁଁ ଇନିକା ବା ଅମାଟ୍‌, ବା ରୁଣ୍ତି ଆଙ୍ଗିଁଙ୍ଗ୍‌ ଅର୍‌ସେ ଅମାଟ୍‌ । 4 ମାରି, ମିଙ୍ଗିଁ ଆମା ଇନ୍‌ଡ୍ରଣିକାର୍‌ କୁକ୍‍ନାର୍‍, ଆୟା ବାଡିଦାନ୍‍ ଡ଼େସି ରେଇ ସାନ୍ଦି ଆବେ ତେବାଦୁ । 5 ✝୯:୫ ପ୍ରେରିତ ୧୩:୫୧.✝୯:୫ ଲୁକ ୧୦:୪-୧୧.ମାରି, ଏସୋ ଲୋକୁ ମିଙ୍ଗିଁ ମାନାଏର୍‌, ଆୟା ଗାଡ଼୍‌ତାନ୍‍ ୱାନିୱାଲେ ଲୋକ୍‌ତି ବିରୁଦ୍‍ତାନ୍‍ ସାକି ସିଦେଙ୍ଗ୍‍ ଇଜି ମି ପାଦାମ୍‍କାଣି ଦୁଡ଼ି ସାଡ଼୍‍ଦୁ ।

6 ଆବେଟ୍‌ ସିସୁର୍‍ ସଲ୍‌ସି ୱିଜୁ ତରିନ୍‌ ନେଗିକାବୁର୍‌ ୱେର୍‌ତାର୍‌ ମାରି ରୋଗ୍‌ତାନ୍‌ ନେଗେଣ୍ତ୍‌ କିଜି କିଜି ନାର୍‍କାଙ୍ଗ୍‍ଁ ନାର୍‍କାଙ୍ଗ୍‍ଁ ସରଆର୍‌ ।

7 ✝ ୯:୭ ମାତିଉ ୧୬:୧୪; ମାର୍କ ୮:୨୮; ଲୁକ ୯:୧୯. ଆୟାୱାଲେ ଗାଲିଲିଦି ସାସନ୍‌କିନି ସାମନ୍ତରାଜା ହେରୋଦ ଇୟାୱିଜୁ ମାଟା ୱେନ୍‌ଜି ବାୟାଆତା ସର୍‌ଆନ୍‌, ଇରିଙ୍ଗ୍‌ ଡୁବନ୍‌ସିନି ଯୋହନ ମାରିଡ଼େସିଜିବନ୍‌ ଆତାମାନାନ୍‌ ଇଜି ଏର୍‌ ଏର୍‌ ଇଜିମାର୍‌ଆର୍‌ । 8 ମାରି, ଏର୍‌ ଏର୍‌ ଏଲିୟ୍‌ ତରାଇଆତାମାନାନ୍‍ ଇଜିମାର୍‌ଆର୍‌ ମାରି ଆଇକାର୍‌ ପୁର୍ବେଦି ବାବବାଦିର୍ ଲୋଇ ଅରେନ୍‍ ସାତିମାଣାନ୍‌ ଡ଼େସି ନିଙ୍ଗିଁତାମାନାନ୍‍ ଇଜି ଇଜିମାର୍‌ଆର୍‌ । 9 ମାତର୍‌ ହେରୋଦ ରାଜା ଇର୍‌ଆନ୍‌, "ଡୁବନ୍‌ସିନି ଜୋହନତି ତାଲା ତୋ ନାନ୍ କଇସ୍‍ତାମାନା, ମାତର୍‌ ଆମାୱାନି ବିସୟ୍‌ତାନ୍‌ ନାନ୍ ଇୟାୱାଜା ମାଟା ୱେନ୍‍ଜିନା, ଇକାନ୍‌ ଏନ୍‌ ?" ମାରି, ହେରୋଦ ଜିସୁଙ୍ଗୁଁ ସୁଡ଼ୁଦେଙ୍ଗ୍‍ ବଦା କିଜିମାର୍‍ଆନ୍‍ ।

10 ୱେନ୍‌କା ସିସୁର୍‍ ଡ଼େସିୱାଜି, ଆମାକା ଆମାକା କିତାମାର୍‍ଆର୍‍, ଆୟାୱିଜୁ ଜିସୁଙ୍ଗୁଁ ୱେର୍‌ତାର୍‌ । ମାରି, ୱାନ୍‌ ଆଇମାନୁ ମାନ୍‌ଡ଼୍ରେଙ୍ଗ୍‌ ୱାରିଙ୍ଗ୍‌ ୱାନିୱାଲେ ଅସି ବେତ୍‍ସାଇଦା ଦର୍‌ତି ଗାଡ଼୍‌ତୁ ସରଆର୍‌ । 11 ମାତର୍‌ ଲୋକ୍‌ ୱିଜେରେ ଆକା ନେସ୍‍ତାରୋ ୱାନିୱାଲେ ସନ୍‌ଡ଼୍ରେଙ୍ଗ୍‌ ଆସ୍‌ତାର୍‌; ମାରି, ଜିସୁ ଜିବନ୍‌ ନଜି ୱାରିଙ୍ଗ୍‌ ମାପୁରୁଦି ରାଜିଦି ବିସୟ୍‌ତାନ୍‌ ୱାରିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, ମାରି ଆମାୱାରିଙ୍ଗ୍‍ ରୋଗ୍‌ତାନ୍‌ ନେଗେଣ୍ତ୍‍ ଆନିକା ମାର୍‌ଆତ୍‌, ୱାରିଙ୍ଗ୍‌ ନେଗେଣ୍ତ୍‍ କିତାନ୍‌ ।

12 ନାସ୍ତିୱାଲେ ୱେଡ଼ା ଆଜି ୱାଜିମାର୍‍ଆର୍‍; ଆବେଟ୍‌ ବାର୍‍ ଲୋକୁ ସିସୁର୍‍ ଜିସୁ ଲାକ୍‌ତୁ ୱାଜି ଇର୍ହାର୍‌, "ଲୋକୁ ଏଣ୍ତେସ୍‌ ସାରିବେଡ଼୍‍ତି ନାର୍‍କାଙ୍ଗ୍‍ଁ ମାରି ଇସ୍ରିନାର୍‍କାଙ୍ଗ୍‍ ତେବାନାର୍‌ ମାରି କାଦି ଉଣ୍ତେଙ୍ଗ୍‌ ପୋଇଦେଙ୍ଗ୍‍ ଆଟ୍‍ନାର୍‍, ଆୟାଉଣ୍ତିଙ୍ଗ୍‌ ୱାରିଙ୍ଗ୍‌ ପୋକ୍‌ଆ, ଇରିଙ୍ଗ୍‌ ମାଡ୍‌ ଇବେ ସିମ୍ରା ବାଡିଦୁ ମାନିକା ।"

13 ମାତର୍‌ ଜିସୁ ୱାରିଙ୍ଗ୍‌ ଇର୍ହାନ୍‌, "ମିର୍‌ ୱାରିଙ୍ଗ୍‌ ଉଟ୍‍ପିସ୍‍କିଦୁ ।" ୱାର୍‌ ଇର୍ହାର୍‌, "ମା ଲାକ୍‌ତୁ ପାସ୍‌ଗୋଟା ରୁଟିଙ୍ଗ୍‌ ମାରି ରୁଣ୍ତି ମିନ୍‍କାଣ୍‍ ନାଣ୍ତ ସିଲୁ; ଆରିଙ୍ଗ୍‌ ମାପ୍‌ ଇନିକା ସନାପ୍‌ ଇୟାୱିଜୁ ଲୋକା ଉଣ୍ତିଙ୍ଗ୍‌ କାଦି କଣାପ୍‍ ?" 14 ଇରିଙ୍ଗ୍‌ ୱାର୍‌ , ହାଜାର୍‌ ମେମାରୁଙ୍ଗୁଁ ମାର୍‌ଆର୍‌ । ମାରି, ଜିସୁ ୱାନି ସିସୁରିଙ୍ଗ୍‌ ଇର୍‌ଆନ୍‌, "ପଚାସ୍‍ ପଚାସ୍‍ କିଜି ୱାରିଙ୍ଗ୍‌ ଦଲ୍‌ ଦଲ୍‌ କିଜି ବାସିସ୍‍ କିଦୁ ।"

15 ଆବେଟ୍‌ ୱାର୍‌ ଆୟାୱାଜା ୱିଜେରିଙ୍ଗ୍‍ ବାସିସ୍‍ କିତାର୍‌ । 16 ମାରି, ଜିସୁ ଆୟା ପାସ୍‌ଗୋଟା ରୁଟିଙ୍ଗ୍‌ ମାରି ରୁଣ୍ତି ମିନ୍‌କୁ ଅସି ମୁସ୍‌କୁ ତରିନ୍‌ ସୁଡ଼ୁଜି ଆୟାୱିଜୁ ଆସିର୍ବାଦ୍‌ କିତାନ୍‌, ମାରି ରୁକ୍‍ସି ଲୋକାଙ୍ଗ୍‌ ବାଟା କିଜି ସିଦେଙ୍ଗ୍‍ ଇଜି ସିସୁରିଙ୍ଗ୍‌ ସିତାନ୍‌ । 17 ଆବେଟ୍‌ ୱିଜେରେ ତିର୍‌ଆରୋ ପଟାପାଜିତାର୍‍, ମାରି ୱାର୍‌ ୱାରି ଲାକ୍‌ତୁ ଏଜିତି ମାର୍‍ଇ ବାରଗୋଟା ଡାଡ଼ିଙ୍ଗ୍‍ ଉଣ୍ତାକିତାର୍‍ ।

18 ଅର୍‍ଲେନ୍‍ ଜିସୁ ଅରେନ୍‌ ପାର୍‌ତନା କିନିୱାଲେ ସିସୁର୍‍ ୱାନିୱାଲେ ମାର୍‌ଆର୍‌, ମାରି ୱାନ୍‌ ୱାରିଙ୍ଗ୍‌ ୱେନ୍‌ବାତାନ୍‌, "ନାନ୍ ଏନ୍‌ ଇଜି ଲୋକୁ ୱିଜେରେ ଇନିକା ଇନାର୍‌ ?"

19 ✝ ୯:୧୯ ମାତିଉ ୧୪:୧,୨; ମାର୍କ ୬:୧୪,୧୫; ଲୁକ ୯:୭,୮. ଆବେଟ୍‌ ୱାର୍‌ ଇର୍ହାର୍‌, "ଡୁବନ୍‌ସିନି ଜୋହନ, ମାତର୍‌ ଏର୍‌ ଏର୍‌ ଇନାର୍‌, ଏଲିୟ୍‌, ମାରି ଏର୍‌ ଏର୍‌ ଇନାର୍‌, ପୁର୍ବେଦି ବାବବାଦିରି ଲୋଇ ଅରେନ୍‍ ଜିବନ୍‌ଆଜି ନିଙ୍ଗିଁତାମାନାନ୍‍ ।"

20 ✝ ୯:୨୦ ଜୋହନ ୬:୬୮,୬୯. ଜିସୁ ୱାରିଙ୍ଗ୍‌ ୱେନ୍‍ବାନ୍‍, "ମାତର୍‌ ନାନ୍ ଏନ୍‌ ଇଜି ମିର୍‌ ଇନିକା ଇଜିନିଦେର୍‌ ?" ପିତର ଇର୍‌ଆନ୍‌, "ନିନ୍‌ ମାପୁରୁଦି କ୍ରିସ୍ତ ।"

21 ଆବେଟ୍‌ ଜିସୁ ଇକା ଏଙ୍ଗ୍‌ବା ଇନ୍‌ମାଟ୍‌ ଇଜି ୱାରିଙ୍ଗ୍‌ ଆଟ୍‌ୱାଦାନ୍‍ ୱେର୍‌ତାନ୍‌, 22 "ମନୁସ୍ୟପୁତ୍ରଦିଙ୍ଗ୍‍ ନାଣ୍ତ ଦୁଃକ୍‌ ପୋଇଦେଙ୍ଗ୍‍ ଆନାତ୍‌ ମାରି ନେତାର୍‍, ପେରିଜାଜକ୍‍କୁ ମାରି ସାସ୍ତ୍ରିର୍‍ ସେମାର୍‌ କିଜି ଡାକ୍‌ନାର୍‌, ମାରି ମୁନେଟାନ୍‍ ମାରିଡ଼େସିଜିବନ୍‌ ଆଜି ନିଙ୍ଗିଁନାନ୍‍ ।" 23 ✝୯:୨୩ ମାତିଉ ୧୦:୩୮; ଲୁକ ୧୪:୨୭.ନାସ୍ତିୱାଲେ ଜିସୁ ୱିଜେରିଙ୍ଗ୍‍ ଇର୍‌ଆନ୍‌, ଏନ୍‌ ଜଦି ନା ୱାଲେ ୱାଦେଙ୍ଗ୍‌ ବଦାକିନାନ୍‌, ଆରିଙ୍ଗ୍‌ ୱାନ୍‌ ନିଜେଦି ଡ଼ିସିନ୍‍, ମାରି ଦିନାମି ନିଜେଦି ଦୁଃକ୍‌ କସ୍ଟଦିଙ୍ଗ୍‍ ପିନ୍‍ଣ୍ତ୍‍ଜି ନା ୱେନ୍‌କା ରାପିନ୍‍ । 24 ✝୯:୨୪ ମାତିଉ ୧୦:୩୯; ଲୁକ ୧୭:୩୩; ଜୋହନ ୧୨:୨୫.ଇରିଙ୍ଗ୍‌ ଏନ୍‌ ନିଜେଦି ଜିବନ୍‌ତିଙ୍ଗ୍‌ ରକିୟା କିଦେଙ୍ଗ୍‌ ବଦାକିନାନ୍‌, ୱାନ୍‌ ଆକା ଆରାକିନାନ୍‌, ମାତର୍‌ ଏନ୍‌ ନା ଉଣ୍ତିଙ୍ଗ୍‌ ୱାନି ଜିବନ୍‌ ଆରାକିନାନ୍‌, ୱାନ୍‌ ଆକା ରକିୟା କିନାନ୍‌ । 25 ମାରି, ଅରେନ୍‌ ଲୋକୁ‌ ସାରାଦୁନିଆଦିଙ୍ଗ୍‌ ଜିଣାଜି ନିଜେଦିଙ୍ଗ୍‍ ସାପିସ୍‍କିନାନ୍‍ ବା ଆରାନାନ୍‌, ଆରିଙ୍ଗ୍‌ ୱାନି ଇନି ଲାବ୍‍ ? 26 ଆଦେଙ୍ଗ୍‌ ଏନ୍‌ ନାଙ୍ଗିଁ ମାରି ନା ବାକ୍ୟ ବିସୟ୍‌ତାନ୍‌ ସେମାର୍‍ ଆନାନ୍‌, ମନୁସ୍ୟପୁତ୍ର ଏସ୍ତିୱାଲେ ବୁବାୱାଲେ, ମାରି ମୁସ୍‌କୁପୁର୍‌ତି ପବିତ୍ର ଦୁତ୍‍କାୱାଲେ ମହିମାଦାନ୍‌ ୱାନାନ୍‌, ନାସ୍ତିୱାଲେ ୱାନ୍‌ ୱାରି ବିସୟ୍‌ତାନ୍‌ ସେମାର୍‍ କିନାନ୍‌ । 27 ମାତର୍‌ ନାନ୍ ମିଙ୍ଗିଁ ସତ୍‌ ଇଜିନା, "ମାପୁରୁଦି ରାଜି ସୁଡ଼ିଇ ସାନ୍ଦି ଇବେ ନିର୍‍ଇ ମାନି ଲୋକା ଲୋଇ ଏସୋ ଲୋକୁ ଏଣ୍ତେସ୍‌ବା ସାଏର୍‌ ।"

28 ଇୟାୱିଜୁ ଗଟାନି ପୁରା ଆଟ୍‍ଦିନ୍‍ ୱେନ୍‌କା ଜିସୁ ପିତର, ଜୋହନ ମାରି ଜାକୁବଙ୍ଗ୍‍ ୱାନିୱାଲେ ଅସି ପାର୍‌ତନା କିଦେଙ୍ଗ୍‌ ଇଜି ଗରନ୍‌ତୁ କୁକ୍‍ତାଅତାନ୍‍ । 29 ମାରି, ୱାନ୍‌ ପାର୍‌ତନା କିନିୱାଲେ ୱାନି ମୋକମ୍‍ତି ମୁର୍‍ତି ବାଦ୍‍ଲେ ଆତାତ୍‌ ମାରି ୱାନି ଆଙ୍ଗିଁ ଅଡ଼ିନିକା ମାରି ନାଣ୍ତ ଜାୟ୍‌ ଆତାତ୍‌ । 30 ମାରି ସୁଡ଼ୁଦୁ, ଆୟାଦାପ୍ରେ ମୋସା ନି ଏଲିୟ୍‌, ଇୟା ରିଏର୍‌ ଲୋକୁ ୱାନିୱାଲେ ୱାର୍‌ଗିଜିସାଦେଙ୍ଗ୍‌ ଆସ୍‌ତାର୍‌ । 31 ୱାରି ମୁସ୍‌କୁପୁର୍‌ତି ଗୌରବ୍‍ତାନ୍‍ ତରାଜିମାର୍‍ଆର୍‍, ୱାର୍‌ ଜିସୁୱାଲେ ଜିରୁସାଲାମ୍‍ତୁ ଗଟାଦେଙ୍ଗ୍‍ ମାନି ୱାନି ସାନି ବିସୟ୍‌ତାନ୍‌ ୱାର୍‌ଗିଜି ସାଜି ମାର୍‍ଆର୍‍ । 32 ନାସ୍ତିୱାଲେ ପିତର୍‌ ମାରି ୱାନି ତଡ଼୍‍କୁ ସୁଜ୍‍ଜିମାର୍‍ଆର୍‍; ମାତର୍‌ ୱାର୍‌ ଏସ୍ତିୱାଲେ ନିଙ୍ଗିଁତାର୍‍ ୱାନି ମହିମା ମାରି ୱାନିୱାଲେ ନିର୍‍ଇ ମାର୍‍ଇ ଆୟା ରିଏର୍‌ ଲୋକାଙ୍ଗ୍‌ ସୁଡ଼ୁତାର୍‌ । 33 ମାରି, ମୋସା ନି ଏଲିୟ୍‌ ସନ୍‌ଡ଼୍ରେଙ୍ଗ୍‌ ସନିୱାଲେ ପିତର ଜିସୁଙ୍ଗୁଁ ଇର୍ହାନ୍‌, "ଏ ଗୁରୁ, ମାଡ୍‌ ଜେ ଇବେ ମାନିକା, ଇକା ନେଗେଣ୍ତ୍‍ ଆତାତ୍‌; ମାପ୍‌ ମୁଡ୍ରି ଗୁଡ଼େଙ୍ଗ୍‍ ତିଆର୍‌ କିନାପ୍‍, ନି ଉଣ୍ତିଙ୍ଗ୍‌ ଉନ୍‌ଡ୍ରି, ମୋସାଦି ଉଣ୍ତିଙ୍ଗ୍‌ ଉନ୍‌ଡ୍ରି ମାରି ଏଲିୟ୍‌ଦି ଉଣ୍ତିଙ୍ଗ୍‌ ଉନ୍‌ଡ୍ରି । ମାତର୍‌ ୱାନ୍‌ ଇନିକା ଇଜିନାନ୍‌, ଆକା ନେସ୍‌ଏତାର୍‌ ।"

34 ପିତର ଇକା ଇନ୍‍ବୁ ଇନ୍‍ବୁ କାଣ୍ତେକ୍‍ ବାଦଡ଼୍‍ ଇମ୍‌ଜି ୱାତା ଦୋ ୱାରିଙ୍ଗ୍‌ ବାଦଡ଼୍‍ତି ନିଡ଼୍‍ଗା ପିଡ଼ିକ୍‍ତାତ୍‍, ମାରି ୱାରିଙ୍ଗ୍‌ ବାଦଡ଼୍‍ କେର୍‍ପ୍‍ନିୱାଲେ ପିତର, ଜୋହନ ମାରି ଜାକୁବ ତିଲାତାର୍‌ । 35 ✝୯:୩୫ ମାତିଉ ୩:୧୭; ୧୨:୧୮; ମାର୍କ ୧:୧୧; ଲୁକ ୩:୨୨.✝୯:୩୫ ୨ ପିତର ୧:୧୭,୧୮.ମାରି, ଆୟା ବାଦଡ଼୍‍ତାନ୍‍ ଉଣ୍ତ୍ରି ବଲ୍ ୱାତାତ୍‍, "ଇକାନ୍‌ ନା ମାରିନ୍‌, ନାନ୍ ୱେନିଙ୍ଗ୍‌ ବାସେକିତାମାନା, ୱେନି ମାଟା ୱେନ୍‍ଆ ।"

36 ମାରି, ଆୟା ବଲ୍ ୱାତି ୱେନ୍‌କା ଜିସୁ ଅରେନ୍‍ନେ ତରାଆତାନ୍‍ । ମାରି, ୱାର୍‌ ଆଲେତା ମାର୍ହାର୍‌, ମାରି ଆମାକା ଆମାକା ସୁଡ଼ୁତାମାର୍‍ଆର୍‍, ଆୟା ମାଟାଦି ବିସୟ୍‌ ଏଙ୍ଗ୍‌ବା ଇନ୍‍ଏତାର୍‍ ।

37 ମାର୍‍ନାଣ୍ଡିଙ୍ଗ୍ ଜିସୁ ନି ୱାନି ମୁଏର୍‌ ସିସୁର୍‍ ଗରନ୍‌ତାନ୍‍ ରେତାୱାତାର୍‍, ମାରି ନାଣ୍ତଲୋକ୍‍ ୱାଜି ଜିସୁଙ୍ଗୁଁ ମିସତାର୍‍ । 38 ମାରି ସୁଡ଼ୁଦୁ, ଲୋକା ଲୋଇ ଅରେନ୍‍ ନାଣ୍ତ ଆଉଲି ଆଜି ଇର୍‌ଆନ୍‌, "ଏ ଗୁରୁ, ନାନ୍ ନିଙ୍ଗିଁ ମାଡ଼ିସ୍‌ କିଜିନା, ନା କଡ଼ଦିଙ୍ଗ୍‌ ଦୟା କିଆ, ଇରିଙ୍ଗ୍‌ ୱାନ୍‌ ନା ଅରେନେ ମାରିନ୍‌; 39 ସୁଡ଼ୁଆ, ୱାନିଙ୍ଗ୍‌ ଉଣ୍ତ୍ରି ଦୁବା ଆସ୍‌ନାତ୍‌, ମାରି ୱାନ୍‌ ଦାପ୍ରେନେ ଆଉଲି ଆଜି ନିଙ୍ଗିଁନାନ୍‍, ମାରି ଦୁବା ୱାନିଙ୍ଗ୍‌ ଇୟାୱାଜା ତିର୍‍ପ୍‍ନାପୋକ୍‍ନାତ୍‍ ଜେ, ୱାନି ୱେୟୁଦାନ୍‌ ପେପଲ୍‍ ସନାତ୍‌, ମାରି ୱାଦ୍‌ ୱାନିଙ୍ଗ୍‌ ସିତାରାକାବ୍‍ରା କିଜି କାସ୍ଟୁଦାନ୍‍ ସନାସନାତ୍‍ ।" 40 ୱାନିଙ୍ଗ୍‌ ଦୁବା ଡ଼ିସିସ୍‍ତେଙ୍ଗ୍‍ ଇଜି ନାନ୍ ନି ସିସୁରିଙ୍ଗ୍‌ ମାଡ଼ିସ୍‍କିତା, ମାତର୍‌ ୱାର୍‌ ଆଟ୍‍ଏତାର୍‍ ।

41 ଜିସୁ ୱାରିଙ୍ଗ୍‌ ଇର୍ହାନ୍‌, "ଆରେ ଅଡ଼ପ୍‍ ବିସ୍‍ବାସିର୍‍ ମାରି ତାଗ୍‍ଇସାରିଦୁ ସନି କୁଟୁମ୍‌, ଏସୋଦିନ୍‍ ନାନ୍‌ ମି ୱାଲେ ତେବାଜି ମି ବ୍ୟବହାର୍‌ କିନା ? ନି ମାରିନ୍‌ତିଙ୍ଗ୍‍ ଇବେ ତାଗା ।"

42 ୱାନ୍‌ ୱାବୁ ୱାବୁ ଦୁବା ୱାନିଙ୍ଗ୍‌ ଆଡ୍‍ଗି ଆର୍‍ପ୍‍ସି ପୋକ୍‌ସି ବୟ୍‌ଙ୍କାର୍‍ତାନ୍‍ ତିର୍‍ପ୍‍ତା ପୋକ୍‌ତାତ୍‌, ମାତର୍‌ ଜିସୁ ଆୟା ତାଗିଇ ଆତ୍ମାଦିଙ୍ଗ୍‌ ଆଦ୍‌ରିସ୍‌ତାନ୍‍ ମାରି କଡ଼ଦିଙ୍ଗ୍‌ ନେଗେନ୍‌ କିଜି ୱାନିଙ୍ଗ୍‌ ତାମେ ବୁବାସି କିଦୁ ସିତାନ୍‌ ।

43 ଆବେଟ୍‌ ୱିଜେରେ ମାପୁରୁଦି ପେରିସାକ୍ତି ଉଣ୍ତିଙ୍ଗ୍‌ କାବାଆତାର୍‌ । ମାତର୍‌ ୱାନି କିତି ୱିଜୁ ପାଣିଦି ଉଣ୍ତିଙ୍ଗ୍‌ ୱିଜେରେ କାବା ଆନିୱାଲେ ଜିସୁ ୱାନି ସିସୁରିଙ୍ଗ୍‌ ଇର୍‌ଆନ୍‌,

44 "ଇୟାୱିଜୁ ମାଟା ମି ଗିତଣିଆଙ୍ଗ୍‍ଁ ୱେନ୍‌ଡ୍ରୁ; ଇରିଙ୍ଗ୍‌ ମନୁସ୍ୟପୁତ୍ର ଲୋକା କିୟୁଦୁ ସର୍‍ପେ ଆଦେଙ୍ଗ୍‌ ସଲ୍‌ସିନାନ୍‌ ।" 45 ମାତର୍‌ ସିସୁର୍‍ ଆୟାମାଟା ବୁଜାଦେଙ୍ଗ୍‌ ଆଟ୍‍ଏତାର୍‍, ମାରି ଆୟାକା ୱାରି ମାଣାନ୍‌ ମାର୍‍ଗିତା ମାର୍‌ଆତ୍‌, ଏଣ୍ତେସ୍‌ ଆକା ୱାର୍‌ ବୁଜାଦେଙ୍ଗ୍‌ ଆଟ୍‍ଏତିଙ୍ଗ୍‍ ବା, ମାରି ୱାର୍‌ ଆୟା ମାଟାଦି ବିସୟ୍‌ତାନ୍‌ ୱାନିଙ୍ଗ୍‌ ୱେନ୍‍ବାଦେଙ୍ଗ୍‍ ତିଲାଜି ମାର୍‌ଆର୍‌ ।

46 ✝ ୯:୪୬ ଲୁକ ୨୨:୨୪. ୱାରି ମାଣାନ୍‌ ଏନ୍‌ ପେରିକାନ୍‌, ଆୟା ବିସୟ୍‌ତାନ୍‌ ୱାରି ଲୋଇ ୱାର୍‌ଗିଜି ସାତାର୍‌ । 47 ମାତର୍‌ ଜିସୁ ୱାରି ମୋନ୍‌ତୁ ୱାର୍‌ଗିଜିସାନିକା ନେସ୍‌ତାନ୍‌ନୋ ଅରେନ୍‍ ଇସ୍ରି କଡ଼ଦିଙ୍ଗ୍‌ ତାତାନ୍‍ ନୋ ନିଜେଦି ଲାକ୍‌ତୁ ନିଲ୍‍ପିସ୍‍ କିତାନ୍‍ନୋ ୱାରିଙ୍ଗ୍‌ ଇର୍‌ଆନ୍‌, 48 ✝୯:୪୮ ମାତିଉ ୧୦:୪୦; ଲୁକ ୧୦:୧୬; ଜୋହନ ୧୩:୨୦."ଏନ୍‌ଆପିନ୍‌ ନା ଦର୍‌ତାନ୍‌ ଇୟା ଇସ୍ରି କଡ଼ଦିଙ୍ଗ୍‌ ମାନାନାନ୍‍, ୱାନ୍‌ ନାଙ୍ଗିଁ ମାନାନାନ୍‍, ମାରି ଏନ୍‌ଆପିନ୍‌ ନାଙ୍ଗିଁ ମାନାନାନ୍‍, ୱାନ୍‌ ନା ପୋକ୍‌ତିମାନି ମାଲିକ୍‌ତିଙ୍ଗ୍‌ ମାନାନାନ୍‍; ଇରିଙ୍ଗ୍‌ ମି ୱିଜେରି ମାଣ୍‌କୁ ଏନ୍‌ ଇସ୍ରିକାନ୍‌, ୱାନ୍‌ ପେରିକାନ୍‌ ।"

49 ଆବେଟ୍‌ ଜୋହନ ଇର୍‌ଆନ୍‌, "ଏ ଗୁରୁ, ମାପ୍‌ ଅରେନ୍‍ ୱାନିଙ୍ଗ୍‌ ନି ଦର୍‌ତାନ୍‌ ଦୁବା ଡ଼ିସିସ୍‍କିନିକା ସୁଡ଼ୁତାପ୍‍, ମାରି ୱାନ୍‌ ମା ଦଲ୍‍ତିକାନ୍‍ ଆଏନ୍‍ଆକା ୱାନିଙ୍ଗ୍‌ ତେବା କିତାପ୍‍ ।"

50 ମାତର୍‌ ଜିସୁ ଜୋହନତିଙ୍ଗ୍‍ ଇର୍‌ଆନ୍‌, "ୱାନିଙ୍ଗ୍‌ ମନା କିମାଟ୍‌, ଇରିଙ୍ଗ୍‌ ଏନ୍‌ ମି ତରିନ୍‌ ଆଏନ୍‍, ୱାନ୍‌ ମି ତରିନ୍‌ ।"

51 ୱେନ୍‌କା ଏସ୍ତିୱାଲେ ଜିସୁଦି ଆଡ୍‍ଗିପୁର୍‍ ଡ଼ିସ୍‌ସି ମୁସ୍‌କୁପୁର୍‌ ସନି ୱେଡ଼ା ଆଜି ୱାଜି ମାର୍‌ଆତ୍‌, ନାସ୍ତିୱାଲେ ଜିସୁ ଜିରୁସାଲାମ୍‍ତୁ ସନ୍‌ଡ଼୍ରେଙ୍ଗ୍‌ ବଦାକିତାନ୍‍, 52 ୱାନ୍‌ ୱାନି ଆଗ୍‌ଡ଼ି କାବୁର୍‌ ଅନିୱାରିଙ୍ଗ୍‍ ପୋକ୍‌ତାନ୍‌ । ୱାର୍‌ ସଲ୍‌ସି ୱାନି ଉଣ୍ତିଙ୍ଗ୍‌ ତିଆର୍‌ କିଦେଙ୍ଗ୍‌ ସମିରୋଣୟରିଦି ଉଣ୍ତ୍ରି ନାର୍‍ତୁ ସର୍‌ଆ ଡ଼ୁଗିତାର୍‌; 53 ମାତର୍‌ ୱାନ୍‌ ଜିରୁସାଲାମ୍‍ତୁ ସନି ଉଣ୍ତିଙ୍ଗ୍‌ ବଦା କିତାମାନାନ୍‍ ଇଜି ନେସ୍‌ସି ୱାର୍‌ ୱାନିଙ୍ଗ୍‌ ମାନାଏତାର୍‍ । 54 ଇକା ସୁଡ଼ୁଜି ଜାକୁବ ନି ଜୋହନ, ଇୟା ରିଏର୍‌ ସିସୁର୍‍ ଇର୍ହାର୍‌, "ପ୍ରବୁ, ଏଲିୟ୍‌ ବା ଏଣ୍ତେସ୍‌ କିତାମାର୍‍ଆନ୍‍, ଆୟାୱାଜା ବାଦଡ଼୍‍ତାନ୍‍ ସିସୁ ଆର୍‍ଜି ୱାରିଙ୍ଗ୍‌ ସାପିସ୍‌ କିପିତ୍‍, ଇକା ମାପ୍‌ ଇନାପ୍‍ ଇଜି ଇନିକା ନି ବଦା ନୋ ?"

55 ମାତର୍‌ ୱାନ୍‌ ମାର୍‍ଜି ବେସ୍‍ସି ୱାରିଙ୍ଗ୍‌ ଲାଗାତାନ୍‍ ମାରି ଇର୍‌ଆନ୍‌, ମିର୍‌ ଏଣ୍ତେସ୍‌ ନାନି ଆତ୍ମାଦି ଲୋକୁ, ଇକା ନେସ୍‌ଏଜିନା । ମନୁସ୍ୟପୁତ୍ର ଲୋକାଦି ଜିବନ୍‌ ସାପିସ୍‌ କିଦେଙ୍ଗ୍ ରେଏଣ୍ତ୍‍ ମାତର୍‌ ରକିୟା କିଦେଙ୍ଗ୍‌ ୱାତାମାନାନ୍‍ । *୯:୫୫ ଏସ ରାସ୍‍ତିମାନୁ ସିଲେତ

56 ତାନିୱେନ୍‍କା ୱାର୍‌ ମାରି ଉଣ୍ତ୍ରି ନାଟ ସରଆର୍‌ ।

57 ୱାର୍‌ ସାରିଦୁ ସନିୱାଲେ ଅରେନ୍‍ ଲୋକୁ ଜିସୁଙ୍ଗୁଁ ଇର୍‌ଆନ୍‌, "ନିନ୍‌ ଏମେ ବାଡିଦୁ ସନି, ନାନ୍ ନି ୱେନ୍‌କା ୱେନ୍‌କା ୱାନା ।"

58 ଜିସୁ ୱାନିଙ୍ଗ୍‌ ଇର୍ହାନ୍‌, "ଗଲୁଦିଙ୍ଗ୍‍ ତେବାଦେଙ୍ଗ୍‍ ସାରାଆ ମାନାତ୍‌, ବାଦଡ଼୍‍ତି ପଟିଦିଙ୍ଗ୍‍ ତେବାଦେଙ୍ଗ୍‍ ଜାଲୁ ମାନାତ୍‌, ମାତର୍‌ ମନୁସ୍ୟପୁତ୍ରଦିଙ୍ଗ୍ ତାଲା ଇଡ୍‌ଦେଙ୍ଗ୍‌ ବାଡି ସିଲେତ୍‌ ।"

59 ମାରି, ୱାନ୍‌ ମାରି ଅରେନ୍‍ୱାନିଙ୍ଗ୍‍ ଇର୍‌ଆନ୍‌, "ନା ୱେନ୍‌କା ରାଆ ।" ମାତର୍‌ ୱାନ୍‌ ଇର୍‌ଆନ୍‌, "ଆଗ୍‌ଡ଼ି ସଲ୍‍ସୋ ନା ବୁବେଙ୍ଗ୍‌ ମୁସ୍‍ତେଙ୍ଗ୍‍ ଇଜି ନାଙ୍ଗିଁ ସାରି ସିଦା ।"

60 ମାତର୍‌ ଜିସୁ ୱାନିଙ୍ଗ୍‌ ଇର୍‌ଆନ୍‌, "ସାତି ୱାରିଙ୍ଗ୍‌ ନିଜେ ନିଜେଦି ସାତି ଲୋକାଙ୍ଗ୍‌ ମୁସ୍‍ତେଙ୍ଗ୍‍ ଇଜି ଡ଼ିସ୍‍ତୁ, ଇରିଙ୍ଗ୍‌ ମିର୍‌ ସଲ୍‍ସୋ ମାପୁରୁଦି ରାଜି ପ୍ରଚାର୍‌ କିଦୁ ।"

61 ମାରି ଅରେନ୍‍ ବା ଇର୍‌ଆନ୍‌, "ପ୍ରବୁ, ନାନ୍ ନି ୱେନ୍‌କା ୱାନା, ମାତର୍‌ ଆଗ୍‌ଡ଼ି ନା ଇଲ୍‌ତୁ ମାନି ଲୋକାମାଣ୍‌କୁ ନି ୱାଲେ ୱାନି ବିସୟ୍‌ ମାଡ଼ିସ୍‍କିଦେଙ୍ଗ୍‍ ନାଙ୍ଗିଁ ସାରି ସିଦା ।"

62 ମାତର୍‌ ଜିସୁ ୱାନିଙ୍ଗ୍‌ ଇର୍ହାନ୍‌, "ଏନ୍‌ ନାଙ୍ଗେଲ୍‍ ମେଡ଼ିଦୁ କିୟୁ ଆସ୍‌ସି ୱେନ୍‌କା ବେସ୍‍ନାନ୍‍, ୱାନ୍‌ ମାପୁରୁଦି ରାଜିଦୁ ଜୋଗ୍‍ ସିଲେନ୍‌ ।"