ଏଜ୍ରା 9

ଏଜ୍ରା ଅଣଜିହୁଦିରି ୱାଲେ ପେଡ଼ି କିନିକା

1 ଇୟାୱିଜୁ ପାଣି ୱିସ୍‌ତି ୱେନ୍‌କା ଅଦିପତିର୍‌ ମା ଲାକ୍‌ତୁ ୱାଜି ଇର୍ହାର୍‌, "ଇସ୍ରାଏଲ ଲୋକୁ ନି ଜାଜକର୍‌ ନି ଲେବିୟର୍‌ ଆଇ ଦେସ୍‌ତି ଗୋସ୍ଟିଦିୱାରି ମାଣାନ୍‌ ଆପ୍‌ଣାଦିୱାରିଙ୍ଗ୍‌ ୱେରେଏ କିଏଣ୍‌ଗା ୱାରିଦି, ମାରି, କିଣାନିୟ, ହିତ୍ତୀୟ, ପରିସିୟ, ଜିବୁସିୟ, ଅମ୍ମୋନିୟ, ମୋୟାବିୟ, ମିସ୍ରିୟ ନି ଇମୋରିୟରି କାଡ଼ାନି ଜଗ୍‌ ପାଣି ଇସାବ୍‌ତାନ୍‌ କିଜିନାର୍‌ । 2 ଇରିଙ୍ଗ୍‌ ୱାର୍‌ ନିଜେଦିୱାରିଙ୍ଗ୍‌ ନି ନିଜେଦି ମାରିନ୍‌କା ଉଣ୍ତିଙ୍ଗ୍‌ ୱାରି ଗାଡ଼ିସ୍‌କାଙ୍ଗ୍‌ ମାନାତାମାନାର୍‌; ଇୟାୱାଜା ପବିତ୍ର କୁଟୁମ୍‌ ଆଇ ଦେସ୍‌ତି ଗୋସ୍ଟିଦିୱାରି ୱାଲେ ନିଜେଦିୱାରିଙ୍ଗ୍‌ ମିସା କିତାମାନାର୍‌; ମାରିବା ଇୟା ତାଗ୍‌ଇମାନୁ ଅଦିପତି ନି ସାସନ୍‌କିନିୱାରି କିୟୁ ପେରିକା ଆତାମାନାତ୍‌ ।" 3 ଆବେଟ୍‌ ନାନୁ ଇୟା ମାଟା ୱେର୍‌ଆମାନା, ନିଜେଦି ଆଙ୍ଗିଁପାସିୟା ନି ଚଗା କିସ୍‌ସି ନିଜେଦି ତାଲା ନି ମେସାମ୍‌କାଣି କୁକୁଟି ରେଲ୍‌ଜି ଦୁଃକ୍‌ ଆଜି ବାସାତା । 4 ନାସ୍ତିୱାଲେ ଡ଼େସିୱାତି ଲୋକା ଡଙ୍ଗାଁ ଉଣ୍ତିଙ୍ଗ୍‌ ଇସ୍ରାଏଲତି ମାପୁରୁଦି ମାଟାଦୁ ତିଲାତି ୱିଜେରେ ଲୋକୁ ନା ଲାକ୍‌ତୁ ଉଡ୍ରେମାନୁ ଆତାର୍‌; ମାରି, ନାନୁ ମିଲିମିଲିକା ପୁଜାସିନି ବେଡ଼ାଦି ସାନ୍ଧି ଦୁଃକ୍‌ ଆଜି ବାସାତା । 5 ଆବେଟ୍‌ ମିଲିମିଲିକା ପୁଜାସିନି ବେଡ଼ାଦୁ ନାନୁ ନିଜେଦି ଦୁଃକ୍‌ତି ଅବସ୍ତାଦାନ୍‌ ନିଙ୍ଗିଁତା, ନା ମେନ୍ଦଲ୍‌ତୁ ନା କିଜିତି ଆଙ୍ଗିଁପାସିୟା ନି ନିର୍ହିଆଙ୍ଗିଁ ମାର୍ହାତ୍‌; ମାରି, ନାନୁ ନିଜେଦି ମେଣ୍ତେଙ୍ଗ୍‌ ଗଟ୍‌ କିଜି ସଦାପ୍ରବୁ ନା ମାପୁରୁଦି ତରିନ୍‌ କିୟୁ ପେରିଜି ଇର୍ହା, 6 ଏ ନା ମାପୁରୁ, ନାନ୍‌ ସେମାର୍‌ ଆତାମାନା, ଏ ନା ମାପୁରୁ, ନାନୁ ନି ତରିନ୍‌ ମକମ୍‌ ପେର୍‌ଦେଙ୍ଗ୍‌ ଆଟ୍‌ଏ; ଇରିଙ୍ଗ୍‌ ମା ପାପ୍‌ ମା ତାଲାଦି ମୁସ୍‌କୁ ପିରିତାମାନାତ୍‌ ମାରି ମା ଦୋସ୍‌ ବାଦଡ଼୍‌ ସାନ୍ଦି ଇତାମାନାତ୍‌ । 7 ମା ପୁର୍ବେଦିଡକ୍‌ରାଦାଦାରି ବେଡ଼ାଦାନ୍‌ ନେରୁ ସାନ୍ଧି ମାପୁ ନାଣ୍ତ ଦୋସ୍‌ ଆତାମାନାପ୍‌; ମି ଡଙ୍ଗାଁପାଣି ଉଣ୍ତିଙ୍ଗ୍‌ ନେରୁଦି ନ୍ୟାୟ୍‌ ମାଡୁ, ମା ରାଜାର୍‌ ନି ମା ଜାଜକର୍‌ ଆଇଆଇ ଦେସ୍‌ତି ରାଜାରି କିୟୁଦୁ, କାଣ୍ତାଦୁ, ଜଇଲ୍‌ତୁ ମାରି ଡଙ୍ଗାଁପାଣିଦୁ ମାରି ମକମ୍‌ ସିମ୍ରାକିଜି ସର୍‌ପେ ଆତାମାନାପ୍‌ । 8 ମାରି, ମା ମାପୁରୁ ଏଣ୍ତେସ୍‌ ମା କାଣୁକୁ ରେପିସ୍‌ କିନାନ୍‌ ମାରି ମା ଜଇଲ୍‌ତୁମାନି ଅବସ୍ତାଦାନ୍‌ ମାଙ୍ଗିଁ ଅଡ଼ପ୍‌ ଆସା ସିନାନ୍‌, ଇୟାଉଣ୍ତିଙ୍ଗ୍‌ ରକିୟାଦିଙ୍ଗ୍‌ ମାଙ୍ଗିଁ ସାରାସାରି ଇଡ୍‌ଦେଙ୍ଗ୍‌ ମାରି ନିଜେଦି ପବିତ୍ର ବାଡିଦୁ ମାଙ୍ଗିଁ ଉନ୍‌ଡ୍ରି ଜିବନ୍‌ ସିଦେଙ୍ଗ୍‌ ଇଲେଇ ପ୍ରବୁ ମା ମାପୁରୁଦି ମାଣାନ୍‌ ଏସବେଡ଼ା ଦୟା ତରିତାମାନାତ୍‌ । 9 ଇରିଙ୍ଗ୍‌ ମାଡୁ ଜଇଲ୍‌ତୁ ମାନି ଲୋକୁ । ମାରିବା ମା ଜଇଲ୍‌ତୁମାନି ଅବସ୍ତାଦାନ୍‌ ମା ମାପୁରୁ ମାଙ୍ଗିଁ ଡ଼ିସ୍‌ଏନ୍‌, ମାତର୍‌ ମାଙ୍ଗିଁ ଆସା ସିନି ଉଣ୍ତିଙ୍ଗ୍‌, ମା ମାପୁରୁଦି ଇଲୁ ତିଆର୍‌ କିନି ଉଣ୍ତିଙ୍ଗ୍‌ ମାରି ଆବେଣି ରୁଙ୍ଗିଁତି ବାଡି ପୁନା ତିଆର୍‌ କିନି ଉଣ୍ତିଙ୍ଗ୍‌, ମାରି ଜିହୁଦା ନି ଜିରୁସାଲମତୁ ମାଙ୍ଗିଁ ଉନ୍‌ଡ୍ରି ବାଉଡ୍ରି ସିନି ଉଣ୍ତିଙ୍ଗ୍‌ ୱାନ୍‌ ପାରସ୍ୟ ରାଜାରି କାଣ୍‌କାଙ୍ଗ୍‌ ମା ଉଣ୍ତିଙ୍ଗ୍‌ ଦୟା ତର୍‌ତା ମାନାନ୍‌ ।

10 ଇଲେଇ ଏ ମା ମାପୁରୁ, ଇୟାୱେନ୍‌କା ମାପୁ ମାରି ଇନିକା ଇନାପ୍‌ ? 11 ମିରୁ ନିଜେଦି ସାକର୍‌ ବବିସ୍ୟତ୍‌ବକ୍ତାରି ମାଣାନ୍‌ ମାଟା କିଜି ୱେର୍‌ତିମାର୍‌ଇଦେର୍‌, ମିରୁ ଏମେ ଦେସ୍‌ ଅଦିକାର୍‌ କିଦେଙ୍ଗ୍‌ ସୋଲ୍‌ସିନିଦେର୍‌, ଆକା ଆଇଦେସ୍‌ତି ଗୋସ୍ଟିଦିୱାରି ଅସୁଚି ମାଣାନ୍‌ ଅସୁଚି ଦେସ୍‌ ଇକା, ୱାରି କାଡ଼ାନି ଜଗ୍‌ ପାଣି ଦେସ୍‌ତିଙ୍ଗ୍‌ ଉନ୍‌ଡ୍ରି ରାଜିଦାନ୍‌ ଆଇ ରାଜି ସାନ୍ଧି ୱାରି ଅସୁଚିଦୁ ପୁରା କିତାମାନା । 12 ଇୟାଉଣ୍ତିଙ୍ଗ୍‌ ମିରୁ ନିଜେଦିୱାରି ଆଇଲିକଡ଼୍‌କାଙ୍ଗ୍‌ ୱାରି ମାରିନ୍‌କା ୱାଲେ ପେଡ଼ି ଆଦେଙ୍ଗ୍‌ ସିମାଟ୍‌, ମାରି ମି ମାରିନ୍‌କା ଉଣ୍ତିଙ୍ଗ୍‌ ୱାରି ଆଇଲିକଡ଼କାଙ୍ଗ୍‌ ମାନାମାଟ୍‌, ମାରିବା ୱାରି ସାନ୍ତି ନି ପେରାନିକା ଏସ୍‌କାଙ୍ଗ୍‌ବା ସେସ୍ଟା କିମାଟ୍‌; ଆବେଟ୍‌ ମିରୁ ଡାଟ୍‌ ଆନିଦେର୍‌ ମାରି ଦେସ୍‌ତି ନେଗି ଜିନିସ୍‌ ଉଣିଦେର୍‌ ମାରି ୱିଜୁଦିନ୍ ନିଜେଦି ମାରିନ୍‌କା ଅଦିକାର୍‌ ଉଣ୍ତିଙ୍ଗ୍‌ ଆକା ଇଡ୍‌ନିସନିଦେର୍‌ । ମାତର୍‌ ମାପୁ ମି ଇୟା ମାଟାୱିଜୁ ଡ଼ିସ୍‌ତାମାନାପ୍‌ । 13 ଏ ମା ମାପୁରୁ, ମା ଦାରିପାଣି ମାରି ପେରି ଦୋସ୍‌ ଉଣ୍ତିଙ୍ଗ୍‌ ମା ଉଣ୍ତିଙ୍ଗ୍‌ ଇୟାୱିଜୁ ଗଟାତିଙ୍ଗ୍‌ ବା ନିନୁ ଜେ ମା ଡଙ୍ଗାଁପାଣିଦି ନାଣ୍ତ ଦଣ୍ତ୍‌ତାନ୍‌ ଉଣା ଦଣ୍ତ୍‌ ମାଙ୍ଗିଁ ସିତିମାନି ମାରି ମା ଇୟାୱାଜା ସାରାସାରିଦି ଲୋକାଙ୍ଗ୍‌ ଇଟ୍‌ତିମାନି, 14 ଇକା ସୁଡ଼ୁଜି ମାପୁ ଇନିକା ମାରିଡ଼େସି ନି ମାଟା ମାଟ୍‌ନାପ୍‌ ମାରି ଇୟା କାଡ଼ାନି ଜଗ୍‌ ପାଣିକିନିୱାରି ଆଇ ଗୋସ୍ଟିଦିୱାରି ୱାଲେ କୁଟୁମ୍‌ କିନାପ୍‌ ? କିତିଙ୍ଗ୍‌ ମିରୁ ଇନିକା ମାଙ୍ଗିଁ ସାରାସାରି କିନି ସାନ୍ଧି ରିସା ଆଏତ୍‌ ? ଆବେଟ୍‌ ଏନ୍‌ ସାରାସାରି କି ରକି‌ୟା ତେବାଏର୍‌ । 15 ଏ ପ୍ରବୁ, ଇସ୍ରାଏଲତି ମାପୁରୁ, ମିରୁ ଦାର୍ମୁଦିକା; ଇରିଙ୍ଗ୍‌ ମାପୁ ନେରୁ ସାନ୍ଧି ରକିୟା ପୟ୍‌ଜି ସାରାସାରି ମାନାପ୍‌; ସୁଡ଼ୁଦୁ, ମାପୁ ନି ଆଗ୍‌ଡ଼ି ନିଜେଦି ଦୋସ୍‌ତୁ ଦୋସ୍‌ ଆତାମାନାପ୍‌; ଇରିଙ୍ଗ୍‌ ଆୟା ଉଣ୍ତିଙ୍ଗ୍‌ ଏନ୍‌ ମି ଲାକ୍‌ତୁ ନିଲ୍‌ତେଙ୍ଗ୍‌ ଆଟ୍‌ଏନ୍‌ ।