1 ଏଜ୍ରା ମାପୁରୁଦି ପାର୍‌ତନା ଇଲୁ ଆଗ୍‌ଡ଼ି ପାର୍‌ତନା ନି ପାପ୍‌ ମାନାନିକା, ଆଡ଼ାବାନିକା ମାରି ମାଡ଼ିସ୍‌ କିନି ୱାଲେ ଇସ୍ରାଏଲ ଲୋଇରାନ୍‌ ମେମାର୍‌ଙ୍ଗୁଁ ନି ଆଇମେକ୍‌ ମାରି କଡ଼ର୍‌ ଆଇଲିକା ଦଲ୍‌ ୱାନି ଲାକ୍‌ତୁ ଉଣ୍ତାତା ମାର୍ହାର୍‌; ଇରିଙ୍ଗ୍‌ ଲୋକୁ ନାଣ୍ତ ଆଡ଼ାବାତାର୍‌ । 2 ଇବେନୁ ଏଲମ୍‌ତି ମାରିନ୍‌କା ଲୋଇରାନ୍‌ ଯିହିୟେଲଦି ମାରିନ୍‌ ଶଖନିୟ ଏଜ୍ରାଦିଙ୍ଗ୍‌ ଇର୍ହାନ୍‌, "ମାପୁ ନିଜେଦି ମାପୁରୁଦି ବିରୁଦ୍‌ତାନ୍‌ ଅମାନ୍ୟ କିଜି ଆଇ ଦେସ୍‌ତି ଗୋସ୍ଟିଦିୱାରି ଆଇମେକାଙ୍ଗ୍‌ ପେଡ଼ି କିତାମାନାପ୍‌; ମାରିବା ଇୟା ବିସୟ୍‌ତାନ୍‌ ଇଲେଇ ବା ଇସ୍ରାଏଲ ତରିନ୍‌ ଆସା ମାନାତ୍‌ । 3 ଇୟାଉଣ୍ତିଙ୍ଗ୍‌ ମାପୁ ଇଲେଇ ମା ପ୍ରବୁଦି ନି ମା ମାପୁରୁଦି ମାଟାଦାନ୍‌ ତିଲାତି ଲୋକା ମାଟା ଇସାବ୍‌ତାନ୍‌ ଇୟା ୱିଜୁ ଆଇମା ମାରି ଇୟାୱାନିକାମାଣାନ୍‌ ଜନମ୍‌ଆତି ୱିଜେରିଙ୍ଗ୍‌ ଆକ କିଜି ସିନି ଉଣ୍ତିଙ୍ଗ୍‌ ମା ମାପୁରୁଦି ୱାଲେ ନିୟମ୍‌ କିନାପ୍‌; ମାରି, ଇକା ନିୟମ୍‌ ଇସାବ୍‌ତାନ୍‌ କିଆୟ୍‌ଆପିତ୍‌ । 4 ନିଙ୍ଗିଁଦୁ, ଇରିଙ୍ଗ୍‌ ନି ମୁସ୍‌କୁ ଇୟା ପାଣିଦି ବଜୁ ମାନାତ୍‌ ମାରି ମାପୁ ନି ୱାଲେ ଅର୍‌ସେ ମାନାପ୍‌; ସାହାସ୍‌ ଆଜି ଇୟା ପାଣି କିଦୁ ।"

5 ଇବେନୁ ଏଜ୍ରା ନିଙ୍ଗିଁଜି ଇୟା ବାକ୍ୟ ଇସାବ୍‌ତାନ୍‌ ପାଣି କିନି ଉଣ୍ତିଙ୍ଗ୍‌ ଜାଜକରି, ଲେବିୟରି ମାରି ୱିଜୁ ଇସ୍ରାଏଲତି ପେରିୱାରିଙ୍ଗ୍‌ ପାର୍‌ମାଣ୍‌ କିବିସ୍‌ତାର୍‌ । ଆବେଟ୍‌ ୱାର୍‌ ପାର୍‌ମାଣ୍‌ କିତାର୍‌ । 6 ଆବେଟ୍‌ ଏଜ୍ରା ମାପୁରୁଦି ପାର୍‌ତନା ଇଲୁ ଆଗ୍‌ଡ଼ିରାନ୍‌ ନିଙ୍ଗିଁଜି ଇଲିୟାସିବଦି ମାରିନ୍‌ ଯିହୋହାନନ୍‌ଦି ବାକ୍‌ରାଦୁ ସର୍ହାନ୍‌; ମାରି, ଆବେନୁ ଇତାନ୍‌, ରୁଟି ତିନ୍‌ଏତାନ୍‌ କି ଏରୁ ଉଣୁଏତାନ୍‌; ଇରିଙ୍ଗ୍‌ ୱାନ୍‌ ଜଇଲ୍‌ତୁମାନି ଲୋକୁ ମାନାଇ ଉଣ୍ତିଙ୍ଗ୍‌ ଆଡ଼୍‌ବାଜି ଦୁଃକ୍‌ କିଜି ମାର୍ହାନ୍‌ ।

7 ଇୟାୱେନ୍‌କା ଲୋକୁ ଜିହୁଦା ନି ଜିରୁସାଲମତି ୱିଜେରେ ଜଇଲ୍‌ତୁମାନି ମାରିନ୍‌କୁ ୱିଜେରି ଲାକ୍‌ତୁ ୱେର୍‌ସି ଇର୍ହାନ୍‌ ଜେ, "ୱାର୍‌ ଜିରୁସାଲମତୁ ଉଡ୍ରେମାନୁ ଉଣ୍ତାନାର୍‌; 8 ମାରି, ଅଦିପତି ମାରି ନେତାର୍‌ ମାଟା ଇସାବ୍‌ତାନ୍‌ ଏନ୍‌ଆପିନ୍‌ ମୁନେନ୍‌ ଲୋଇ ଇଦାଏନ୍‌, ୱାନି ୱିଜୁ ଜିନିସ୍‌ ଡଙ୍ଗାଁ କିନାଅନାର୍‌ ମାରି ୱାନ୍‌ ନିଜେ ଜଇଲ୍‌ତି ଲୋକାମାଣାନ୍‌ ୱେର୍‌ଏ କିନାର୍‌ ।" 9 ଆବେଟ୍‌ ଜିହୁଦା ନି ବିନ୍ୟାମିନ୍‌ଦି ୱିଜୁ ଲୋକ୍‌ ମୁନେଟି ଲୋଇ ଜିରୁସାଲମତୁ ଉଣ୍ତାତାର୍‌, ଆୟା ନୋଗୋଟା ଲେଜୁଦି କଡ଼େ ଦିନ୍‌ ମାର୍ହାତ୍‌; ମାରି, ୱିଜୁ ଲୋକ୍‌ ମାପୁରୁଦି ଇଲୁଦି ଆଗ୍‌ଡ଼ିରି ଡେଣାଦୁ ବାସ୍‌ସି ଇୟା ବିସୟ୍‌ ନି ନାଣ୍ତପିରୁ ଉଣ୍ତିଙ୍ଗ୍‌ ତିର୍‌ଗିଜି ମାର୍ହାର୍‌ । 10 ଆବେଟ୍‌ ଏଜ୍ରା ଜାଜକ ନିଲ୍‌ତାନ୍‌ନୋ ୱାରିଙ୍ଗ୍‌ ଇର୍ହାନ୍‌, "ମିରୁ ମାନାଇତି ମାନିଦେର୍‌ ମାରି ଇସ୍ରାଏଲତି ଦୋସ୍‌ ନାଣ୍ତ କିନି ଉଣ୍ତିଙ୍ଗ୍‌ ଆଇ ଦେସ୍‌ତି ଆଇମେକାଙ୍ଗ୍‌ ପେଡ଼ି ଆତିମାନିଦେର୍‌ । 11 ଇୟାଉଣ୍ତିଙ୍ଗ୍‌ ଇଲେଇ ମି ବୁବାରି ମାପୁରୁ ପ୍ରବୁଦି ଲାକ୍‌ତୁ ମି ପାପ୍‌ ମାନାଦୁ ମାରି ୱାନି ୱେଡ଼ିକାନାନି ପାଣି କିଦୁ; ମାରି, ଦେସ୍‌ତି ଆଇ କୁଟୁମ୍‌ ମାଣାନ୍‌ ମାରି ଆଇ ଦେସ୍‌ତି ଆଇମେକା ମାଣାନ୍‌ ନିଜେଦିଙ୍ଗ୍‌ ୱେରେଏ କିଦୁ ।"

12 ନାସ୍ତିୱାଲେ ୱିଜେରେ ଲୋକୁ ନାଣ୍ତ ଆଉଲି ଆଜି ଇର୍ହାର୍‌, "ନିନୁ ମା ବିସୟ୍‌ତାନ୍‌ ଏଣ୍ତେସ୍‌ ଇର୍ହି, ମାଙ୍ଗିଁ ଆୟାୱାଜା କିଦେଙ୍ଗ୍‌ ଆନାତ୍‌ । 13 ମାତର୍‌ ଲୋକୁ ନାଣ୍ତ ମାରି ଇଲେଇ ନାଣ୍ତ ପିରୁ ବେଡ଼ା, ମାରି ମାଡୁ ଆତ୍ରେ ନିଲ୍‌ତେଙ୍ଗ୍‌ ଆଟ୍‌ଇକା, ମାରିବା ଇକା ଅର୍‌ଲେଟିକା କି ରିନେଟି ପାଣି ଆଏତ୍‌; ଆଦେଙ୍ଗ୍‌ ଇୟା ବିସୟ୍‌ତାନ୍‌ ମାପୁ ପେରିପାପ୍‌ କିତାମାନାପ୍‌ । 14 ଇୟାଉଣ୍ତିଙ୍ଗ୍‌ ୱିଜେରେ କୁଟୁମ୍‌ ଉଣ୍ତିଙ୍ଗ୍‌ ମା ଅଦିପତିର୍‌ ମିସାପିର୍‌, ମାରି ମା ମାପୁରୁଦି ନାଣ୍ତ ରିସା ମାମାଣାନ୍‌ ତିର୍‌ ଆନି ସାନ୍ଧି ଇୟା ବିସୟ୍‌ତି ଟିକ୍‌ ଆନି ସାନ୍ଧି ମା ଗାଡ଼୍‌ତି ଲୋକୁ ଆଇ ଦେସ୍‌ତି ଆଇମେକାଙ୍ଗ୍‌ ପେଡ଼ି କିତାମାନାର୍‌, ଆୟାୱିଜେରେ ତିଆର୍‌କିନି ବେଡ଼ାଦୁ ରାପିର୍‌ ମାରି ୱାରି ୱାଲେ ୱିଜୁ ଗାଡ଼୍‌କାଣି ନେତାର୍‌ ନି ବିଚାର୍‌କିନିକାର୍‌ ରାପିର୍‌ ।"

15 ଇୟା ମାଟା ବିରୁଦ୍‌ତାନ୍‌ ଅସାହେଲଦି ମାରିନ୍‌ ଯୋନାତନ ନି ତିକ୍‌ବଦି ମାରିନ୍‌ ଜହସିୟ ନିଙ୍ଗିଁତାର୍‌, ମାରି ମଶୁଲ୍ଲମ୍‌ ନି ଲେବିୟ ଶବ୍ବଥୟ ୱାରି ସାହାଜ୍ୟ କିତାର୍‌ ।

16 ମାତର୍‌ ବାବିଲତାନ୍‌ ଡ଼େସିୱାତି ମାରିନ୍‌କୁ ଆୟାୱାଜା ପାଣି କିତାର୍‌ । ମାରି, ଏଜ୍ରା ଜାଜକ ନି ନିଜେ ନିଜେଦି ବୁବାରିକୁଟୁମ୍‌ ଇସାବ୍‌ତାନ୍‌ ମାରି ଦର୍‌କା ଇସାବ୍‌ତାନ୍‌ ପୁରା ବୁବାଦିକୁଟୁମ୍‌ ପେରି ଏସ ଲୋକ୍‌ ୱେରେଏ କିଆତାର୍‌; ମାରି, ୱାର୍‌ ଦାସ୍‌ଗୋଟା ଲେଜୁଦି ପାର୍‌ତୁମ୍‌ ନାଣ୍ତିଙ୍ଗ୍‌ ଆୟା ବିସୟ୍‌ ସୁଡ଼ୁଦେଙ୍ଗ୍‌ ବାସ୍‌ତାର୍‌ । 17 ମାରି, ୱାର୍‌ ପାର୍‌ତୁମ୍‌ ଲେଜୁଦି ପାର୍‌ତୁମ୍‌ ନାଣ୍ତିଙ୍ଗ୍‌ ଆଇ ଦେସ୍‌ତି ଆଇମେକାଙ୍ଗ୍‌ ପେଡ଼ିଆତି ମେମାର୍‌ଆଙ୍ଗ୍‌ ୱିଜେରି ବିସାର୍‌ କିଦେଙ୍ଗ୍‌ ୱିସ୍‌ତାର୍‌ ।

18 ଜାଜକରି ମାରିନ୍‌କା ଲୋଇରାନ୍‌ ଏମେକାର୍‌ ଆଇ ଦେସ୍‌ତି ଆଇମେକାଙ୍ଗ୍‌ ପେଡ଼ି ଆତାମାର୍ହାର୍‌, ୱାର୍‌ ଇୟାକାର୍‌, ଯୋସାଦକଦି ମାରିନ୍‌ ଜେସୁୟଦି ମାରିନ୍‌କୁ ମାରି ୱାନି ତଡ଼ାନ୍‌କା ଲୋଇରାନ୍‌ ମାସେୟ, ଇଲିୟେଜର, ଯାରିବ ନି ଗଦଲିୟ । 19 ଇୟାକାର୍‌ ନିଜେ ନିଜେଦି ଆଡ଼ିକାଙ୍ଗ୍‌ ଡ଼ିସ୍‌ନାପ୍‌ ଇଜି ପାର୍‌ମାଣ୍‌ କିତାର୍‌; ମାରି, ଦୋସି ଆତିଙ୍ଗ୍‌ ୱାର୍‌ ନିଜେ ନିଜେଦି ଦୋସ୍‌ ଉଣ୍ତିଙ୍ଗ୍‌ ମାନ୍ଧାଦାନ୍‌ ଉଡ୍ରେ ମେଣ୍ତା ପୁଜା ସିତାନ୍‌ । 20 ମାରି, ଇମ୍ମେରଦି ମାରିନ୍‌କା ମାଣାନ୍‌ ହନାନି ନି ସବଦିୟ 21 ନି ହାରିମଦି ମାରିନ୍‌କା ଲୋଇରାନ୍‌ ମାସେୟ, ଏଲିୟ, ଶମୟିୟ, ଯିହିୟେଲ ନି ଉସିୟ; 22 ମାରି, ପଶ୍‌ହୁରଦି ମାରିନ୍‌କା ଲୋଇରାନ୍‌ ଇଲିୟୋଐନୟ, ମାସେୟ, ଇସ୍ମାୟେଲ, ନତନେଲ, ଯୋସାବଦ୍‌ ନି ଇଲିୟାସା ।

23 ମାରି, ଲେବିୟରି ମାଣାନ୍‌ ଯୋସାବଦ୍‌ ନି ସିମିୟି ନି କଲାୟ, ଇୟାତାନିଙ୍ଗ୍‌ କଲିଟ ଇନାର୍‌, ପଥାହିୟ, ଜିହୁଦା ନି ଇଲିୟେଜର; 24 ମାରି, ପାଟାପାର୍‌ନିୱାରି ଲୋଇରାନ୍‌ ଇଲିୟାସିବ; ସେର୍‌ଲାକାପ୍‌କିନିୱାରି ଲୋଇରାନ୍‌ ଶଲ୍ଲୁମ୍‌ ନି ଟେଲମ୍‌ ନି ଊରି । 25 ଇସ୍ରାଏଲ ମାଣାନ୍‌ ପରିୟୋଶଦି ମାରିନ୍‌କା ଲୋଇରାନ୍‌ ରମିୟ, ଜିସିୟ, ମଲ୍‌କିୟ, ମିୟାମିନ୍‌, ଇଲିୟାସର, ମଲ୍‌କିୟ ନି ବନାୟ । 26 ମାରି, ଏଲମ୍‌ଦି ମାରିନ୍‌କା ଲୋଇରାନ୍‌ ମତ୍ତନିୟ, ଜିକରିୟ ନି ଯିହିୟେଲ ନି ଅବ୍‌ଦି ନି ଯେରେମୋତ୍‌ ନି ଏଲିୟ । 27 ମାରି, ସତ୍ତୁଦି ମାରିନ୍‌କା ଲୋଇରାନ୍‌ ଇଲିୟୋଐନୟ, ଇଲିୟାସିବ ନି ମତ୍ତନିୟ ନି ଯେରେମୋତ୍‌ ନି ସାବଦ୍‌ ନି ଅସିସା 28 ମାରି ବେବୟଦି ମାରିନ୍‌କା ଲୋଇରାନ୍‌ ଯିହୋହାନନ୍‌, ହନାନିୟ, ସବ୍ବେୟ, ଅତଲୟ; 29 ମାରି, ବାନିଦି ମାରିନ୍‌କା ଲୋଇରାନ୍‌ ମଶୁଲ୍ଲମ୍‌, ମଲ୍ଲୁକ ନି ଅଦାୟା, ଯାଶୁବ ନି ଶାଲ, ଯିରେମୋତ୍‌ ।

30 ମାରି, ପହତ୍‌ ମୋୟାବଦି ମାରିନ୍‌କା ଲୋଇରାନ୍‌ ଅଦନ୍‌ ନି କଲାଲ, ବନାୟ, ମାସେୟ, ମତ୍ତନିୟ, ବତ୍ସଲେଲ ନି ବିନ୍ନୁୟି ନି ମନଃଶି; 31 ମାରି, ହାରିମଦି ମାରିନ୍‌କା ଲୋଇରାନ୍‌ ଇଲିୟେଜର, ଜିସିୟ, ମଲ୍‌କିୟ, ଶମୟିୟ, ଶିମିୟୋନ; 32 ବିନ୍ୟାମିନ୍‌, ମଲ୍ଲୁକ, ଶେମରିୟ; 33 ହଶୁମଦି ମାରିନ୍‌କା ଲୋଇରାନ୍‌ ମତ୍ତନୟ, ମତ୍ତତ୍ତ, ସାବଦ୍‌, ଇଲିପେଲଟ୍‌, ଯିରେମୟ, ମନଃଶି, ସିମିୟି; 34 ବାନିଦି ମାରିନ୍‌କା ଲୋଇରାନ୍‌ ମାଦୟ, ଅମ୍ରାମ୍‌ ନି ଉୟେଲ; 35 ବନାୟ, ବେଦିୟା, କଲୁହୁ; 36 ବନିୟ, ମରେମୋତ୍‌, ଇଲିୟାସିବ; 37 ମତ୍ତନିୟ, ମତ୍ତନୟ ନି ଯାଶୟ; 38 ମାରି, ବାନି ନି ବିନ୍ନୁୟି, ସିମିୟି; 39 ଶେଲିମିୟ ନି ନାଥନ ନି ଅଦାୟା; 40 ମଗ୍ନଦ୍‌ବୟ, ଶାଶୟ, ଶାରୟ; 41 ଅସରେଲ୍‌ ନି ଶେଲିମିୟ, ଶେମରିୟ; 42 ଶଲ୍ଲୁମ୍‌, ଅମରିୟ, ଜୋସେପ । 43 ନବୋଦି ମାରିନ୍‌କା ଲୋଇରାନ୍‌ ଯିୟିୟେଲ୍‌, ମତ୍ତତିୟ, ସାବଦ୍‌, ସବିନଃ, ଜଦ୍ଦୋୟ ନି ଯୋୟେଲ, ବନାୟ;

44 ଇୟାୱିଜେରେ ଆଇ ଦେସ୍‌ତି ଆଡ଼ିକାଙ୍ଗ୍‌ ପେଡ଼ି ଆତାମାର୍ହାର୍‌; ମାରି, ଆୟା ଆଇମେକା ମାଣାନ୍‌ ଏଙ୍ଗ୍‌ ଏଙ୍ଗ୍‌ କଡ଼ର୍‌ଆଇଲିକ୍‌ ଜନମ୍‌ ଆତାମାର୍ହାର୍‌ ।