1 ଅର୍ତ୍ତକ୍ଷସ୍ତ ରାଜାଦି ସାସନ୍‌ ବେଡ଼ାଦୁ ନିଜେ ନିଜେଦି ବୁବାରି କୁଟୁମ୍‌ତି ଆମା ପେରିକାର୍‌ ମା ୱାଲେ ବାବିଲତାନ୍‌ ସୋତାର୍‌, ୱାରି କୁଟୁମ୍‌ ଇୟାକା, 2 ପିନହସ୍‌ଦି ମାରିନ୍‌କା ମାଣାନ୍‌କୁ ଗେର୍ଶୋମ୍‌; ଇଥାମରଦି ମାରିନ୍‌କା ମାଣାନ୍‌କୁ ଦାନିୟେଲ; ଦାଉଦଦି ମାରିନ୍‌କା ମାଣାନ୍‌କୁ ହଟୁଶ୍‌ । 3 ଶଖନିୟଦି ମାରିନ୍‌କା ମାଣାନ୍‌କୁ; ପରିୟୋଶଦି ମାରିନ୍‌କା ମାଣାନ୍‌କୁ ଜିକରିୟ ମାରି ମେମାର୍‌ଙ୍ଗାଁ କୁଟୁମ୍‌ତାନ୍‌ ତାନି ୱାଲେ ଲେକ୍‌ସିକିତିଙ୍ଗ୍‌ ସହେ ପଚାସ୍‌ ଲୋକୁ । 4 ପହତ୍‌ ମୋୟାବଦି ମାରିନ୍‌କା ମାଣାନ୍‌କୁ ସରହିୟଦି ମାରିନ୍‌ ଇଲିହୋଐନୟ ନି ୱାନି ୱାଲେ ଦୁଇସ ଲୋକୁ ମେମାର୍‌ଙ୍ଗୁଁ । 5 ଶଖନିୟଦି ମାରିନ୍‌କା ମାଣାନ୍‌କୁ ଜହସିୟେଲଦି ମାରିନ୍‌; ୱାନି ୱାଲେ ତିନିସ ଲୋକୁ ମେମାର୍‌ଙ୍ଗୁଁ । 6 ମାରି, ଆଦିନଦି ମାରିନ୍‌କା ମାଣାନ୍‌କୁ ଯୋନାତନଦି ମାରିନ୍‌ ଏବଦ୍‌ ନି ୱାନି ୱାଲେ ପଚାସ୍‌ ଲୋକୁ ମେମାର୍‌ଙ୍ଗୁଁ । 7 ମାରି, ଏଲମ୍‌ଦି ମାରିନ୍‌କା ମାଣାନ୍‌କୁ ଅତଲିୟଦି ମାରିନ୍‌ ଯିଶାୟାହ ନି ୱାନି ୱାଲେ ସତୁରି ଲୋକୁ ମେମାର୍‌ଙ୍ଗୁଁ । 8 ମାରି, ଶପଟିୟଦି ମାରିନ୍‌କା ମାଣାନ୍‌କୁ ମିକାୟେଲଦି ମାରିନ୍‌ ସବଦିୟ ମାରି ୱାନି ୱାଲେ ଅସେ ଲୋକୁ ମେମାର୍‌ଙ୍ଗୁଁ । 9 ଯୋୟାବଦି ମାରିନ୍‌କା ମାଣାନ୍‌କୁ ଯିହିୟେଲଦି ମାରିନ୍‌ ଓବଦିୟ ମାରି ୱାନି ୱାଲେ ଦୁଇସ ଅଟ୍ର ଲୋକୁ ମେମାର୍‌ଙ୍ଗୁଁ । 10 ମାରି, ଶଲୋମିତ୍‌ଦି ମାରିନ୍‌କା ମାଣାନ୍‌କୁ ଯୋସିପିୟଦି ମାରିନ୍‌ ମାରି ୱାନି ୱାଲେ ସହେ ସାଟେ ଲୋକୁ ମେମାର୍‌ଙ୍ଗୁଁ । 11 ବେବୟଦି ମାରିନ୍‌କା ମାଣାନ୍‌କୁ ବେବୟଦି ମାରିନ୍‌ ଜିକରିୟ ମାରି ୱାନି ୱାଲେ ଅସେ ଆଟ୍‌ ଲୋକୁ ମେମାର୍‌ଙ୍ଗୁଁ । 12 ଅସ୍‌ଗଦଦି ମାରିନ୍‌କା ମାଣାନ୍‌କୁ ହକାଟନଦି ମାରିନ୍‌ ଯୋହାନନ୍‌ ମାରି ୱାନି ୱାଲେ ସହେ ଦାସ୍‌ ଲୋକୁ ମେମାର୍‌ଙ୍ଗୁଁ । 13 ମାରି, ଅଦୋନିକାମଦି ମାରିନ୍‌କା ମାଣାନ୍‌କୁ କନିଷ୍ଠର୍‌ ନି ୱାରି ଦର୍‌କୁ ଇୟାକେଙ୍ଗ୍‌, ଇଲିପେଲଟ୍‌, ଯିୟିୟେଲ୍‌ ନି ଶମୟିୟ; ୱାରି ୱାଲେ ସାଟେ ଲୋକୁ ମେମାର୍‌ଙ୍ଗୁଁ । 14 ମାରି, ବିଗ୍‌ବୟଦି ମାରିନ୍‌କା ମାଣାନ୍‌କୁ ଊଥୟ ନି ସକ୍କୁର ମାରି ୱାରି ୱାଲେ ସତୁରି ଲୋକୁ ମେମାର୍‌ଙ୍ଗୁଁ ।

15 ମାରି, ନାନ୍‌ ଇୟାୱାରିଙ୍ଗ୍‌ ଅହବାଗାମିନି ଗାଡା ଲାକ୍‌ତୁ ଉଡ୍ରେମାନୁ କିତା; ମାରି ଆବେନୁ ମାପୁ ଗୁଡ଼ା କିଜି ମୁନେନ୍‌ ତେବାତାପ୍‌; ଆବେନୁ ନାନୁ ଲୋକାଙ୍ଗ୍‌ ନି ଜାଜକରିଙ୍ଗ୍‌ ନେଗେନ୍‌ ସୁଡ଼ୁଜି ଲେବିଦି ମାରିନ୍‌କା ମାଣାନ୍‌କୁ ଏଙ୍ଗ୍‌ ପୟ୍‌ଏତା । 16 ଆର୍‌ତିଙ୍ଗ୍‌ ନାନୁ ଇଲିୟେଜର, ଅରିୟେଲ, ଶମୟିୟ, ଇଲ୍‌ନାତନ୍‌, ଯାରିବ, ଇଲ୍‌ନାତନ୍‌, ନାଥନ, ଜିକରିୟ ନି ମଶୁଲ୍ଲମ୍‌, ଇୟା ପେରି ଲୋକାଙ୍ଗ୍‌; ବା ଯୋୟାରିବ୍‌ ନି ଇଲ୍‌ନାତନ୍‌ ଅଜାକିନିୱାରିଙ୍ଗ୍‌ କୁକୁତେଙ୍ଗ୍‌ ଲୋକାଙ୍ଗ୍‌ ପୋକ୍‌ତା । 17 ଇୟାୱେନ୍‌କା ନାନୁ ୱାରିଙ୍ଗ୍‌ କାସିପିଆ ଦରୁଦି ବାଡିଦି ପେରି ଲୋକ୍‌ ଇଦ୍ଦୋ ଲାକ୍‌ତୁ ପୋକ୍‌ତା; ମାରି, ମା ମାପୁରୁଦି ଇଲୁ ଉଣ୍ତିଙ୍ଗ୍‌ ମା ଲାକ୍‌ତୁ ୱେର୍‌ନିୱାରିଙ୍ଗ୍‌ ତାଗାଟ୍‌ ଇଜି କାସିପିଆ ବାଡିଦି ଇଦ୍ଦୋଦିଙ୍ଗ୍‌ ନି ୱାନି ତଡ଼ାନ୍‌କା ସେବାକିନିୱାରିଙ୍ଗ୍‌ ୱେର୍‌ନି ଉଣ୍ତିଙ୍ଗ୍‌ ନାନୁ ୱାରିଙ୍ଗ୍‌ ଆଦେସ୍‌ କିତା । 18 ଆବେଟ୍‌ ମା ଉଣ୍ତିଙ୍ଗ୍‌ ମା ମାପୁରୁଦି ନେଗି କିୟୁଦି ସାକାଦି ପାର୍‌ମାଣ୍‌ତାନ୍‌ ୱାର୍‌ ଇସ୍ରାଏଲତି ନାତି, ଲେବିଦି ମାରିନ୍‌ ମହଲିଦି ମାରିନ୍‌କା ମାଣାନ୍‌କୁ ଅରେନ୍‌ ପ୍ରବିଣ ଲୋକ୍‌ତିଙ୍ଗ୍‌; ମାରି, ଶେରେବିୟ ନି ୱାନି ମାରିନ୍‌ ନି ତଡ଼ାନ୍‌କୁ ୱିଜେରେ ଅଟ୍ର ଲୋକାଙ୍ଗ୍‌; 19 ମାରି, ହଶବିୟ ନି ୱାନି ୱାଲେ ମରାରି ମାରିନ୍‌କା ମାଣାନ୍‌କୁ ଯିଶାୟାହ, ୱାନି ତଡ଼ାନ୍‌କୁ ନି ୱାରି ମାରିନ୍‌କୁ ୱିଜେରେ କଡ଼େ ଲୋକାଙ୍ଗ୍‌; 20 ମାରି, ଦାଉଦ ନି ଅଦିପତିର୍‌ ଆମା ସେବାକିନିୱାରିଙ୍ଗ୍‌ ଲେବିୟରି ସେବାପାଣି ଉଣ୍ତିଙ୍ଗ୍‌ ସିତା ମାର୍ହାର୍‌, ୱାରି ଲୋଇରାନ୍‌ ଦୁଇସ କଡ଼େ ସେବାକିନି ଲୋକାଙ୍ଗ୍‌ ତାତାର୍‌; ଇୟାୱିଜେରି ଦରୁକୁ ରାସାଆୟ୍‌ ଆତାତ୍‌ ।

21 ଇୟାୱେନ୍‌କା ମା ଉଣ୍ତିଙ୍ଗ୍‌ ମାରି ମା କଡ଼ର୍‌ ଆଇଲିକଡ଼କ୍‌ ନି ୱିଜୁ ସମ୍ପତି ଉଣ୍ତିଙ୍ଗ୍‌ ଉନ୍‌ଡ୍ରି ସିଦା ସାରି ଉଣ୍ତିଙ୍ଗ୍‌ ପାର୍‌ତନା କିନି ଉପାୟ୍‌ତାନ୍‌ ମା ମାପୁରୁଦି ଆଗ୍‌ଡ଼ି ନିଜେଦିଙ୍ଗ୍‌ ନମ୍ର କିନି ଉଣ୍ତିଙ୍ଗ୍‌ ମାପୁ ଅହବା ଗାଡା ଲାକ୍‌ତୁ ଉପାସ୍‌ତିକା ୱେର୍‌ତାପ୍‌ । 22 ଇରିଙ୍ଗ୍‌ ସାରିଦୁ ସାତ୍ରୁ ବିରୁଦ୍‌ତାନ୍‌ ମା ସାହାଜ୍ୟ ଉଣ୍ତିଙ୍ଗ୍‌ ରାଜାଦିଙ୍ଗ୍‌ ଉନ୍‌ଡ୍ରି ଦଲ୍‌ ସନ୍ୟ ନି ଗଡ଼େଙ୍ଗ୍‌ ଲସ୍‌ତେଙ୍ଗ୍‌ ମାଙ୍ଗିଁ ସେମାର୍‌ ୱାତାତ୍‌; "ଏଣ୍ତେସ୍‌କି ଆମାକାର୍‌ ମା ମାପୁରୁଦିଙ୍ଗ୍‌ ପୟ୍‌ନାର୍‌, ଆୟା ୱିଜେରି ନେଗି ଉଣ୍ତିଙ୍ଗ୍‌ ୱାରି ଉଣ୍ତିଙ୍ଗ୍‌ ୱାନି କିୟୁଦି ସାକା ମାନାତ୍‌; ମାତର୍‌ ଏମେକାର୍‌ ୱାନିଙ୍ଗ୍‌ ଡ଼ିସ୍‌ନାର୍‌, ଆୟା ୱିଜେରି ବିରୁଦ୍‌ତାନ୍‌ ୱାନି ସାକ୍ତି ନି ରାଗା ମାନାତ୍‌ ।" ଇୟା ମାଟା ମାପୁ ରାଜେଙ୍ଗ୍‌ ୱେର୍‌ତା ମାର୍ହାପ୍‌ । 23 ଇୟାଉଣ୍ତିଙ୍ଗ୍‌ ମାପୁ ଉପାସ୍‌ କିତାପ୍‌ ମାରି ଆୟା ଉଣ୍ତିଙ୍ଗ୍‌ ମା ମାପୁରୁଦି ଲାକ୍‌ତୁ ଲସ୍‌ତାପ୍‌; ଆବେଟ୍‌ ୱାନ୍‌ ମା ଉଣ୍ତିଙ୍ଗ୍‌ ୱେଡ଼ିକା ଆତାନ୍‌ ।

24 ଆବେଟ୍‌ ନାନୁ ଜାଜକରି ଲୋଇରାନ୍‌ ବାର ଲୋକ୍‌ ପେରି ଲୋକାଙ୍ଗ୍‌, ମାରି, ଶେରେବିୟ, ହଶବିୟ ନି ୱାରି ୱାଲେ ୱାରି ଦାସ୍‌ ଲୋକ୍‌ ତଡ଼ାନ୍‌କାଙ୍ଗ୍‌ ୱେର୍‌ଏ କିତା; 25 ମାରି, ରାଜା ନି ୱାନି ମନ୍ତ୍ରିରି ନି ୱାନି ଅଦିପତିର୍‌ ମାରି ବାନୁତେବାତିମାନି ଇସ୍ରାଏଲ ଲୋକୁ ୱିଜେରେ ମା ମାପୁରୁଦି ଇଲୁ ଉଣ୍ତିଙ୍ଗ୍‌ ଏମେ ୱେଣ୍ତି ନି ବାଙ୍ଗାଁରାଓ ନି ଡୁବାଇଙ୍ଗୁଁ ୱିଜୁ ଉପହାର୍‌ ୱାଜା ସିତା ମାର୍ହାର୍‌, ଆକା ୱାରିଙ୍ଗ୍‌ ତୁସ୍‌ସି ସିତା; 26 ନାନୁ ୱାରି କିୟୁଦୁ ସୋଅସ ପଚାସ୍‌ ଅଡି ୱେଣ୍ତି ନି ସହେ ଅଡି ୱେଣ୍ତିଦି ଡୁବାଇଙ୍ଗୁଁ; ସହେ ଅଡି ବାଙ୍ଗାରାମ୍‌; 27 ଏକ୍‌ ଆଜାର୍‌ ଡ୍ରାକ୍‌ମା ଗ୍ରିସ୍‌ଦେସ୍‌ତି ଅଦୁଲି ଦାରାଦି କଡ଼େ ଗୋଟା ବାଙ୍ଗାରାମ୍‌ତି ଡୁବାଇ, ମାରି ବାଙ୍ଗାଁରାଓ ୱାଜା ନାଣ୍ତଦାରା, ନେଗି ଜାୟ୍‌ କଂସ୍‌ତି ରୁଣ୍ତି ଡୁବାଇ ତୁସ୍‌ସି ସିତା ।

28 ମାରି, ନାନୁ ୱାରିଙ୍ଗ୍‌ ୱେର୍‌ତା, "ମିରୁ ପ୍ରବୁଦି ଉଦେସ୍‌ତାନ୍‌ ପବିତ୍ର ନି ଡୁବାଇ ୱିଜୁ ବା ପବିତ୍ର ଆନାତ୍‌; ମାରି, ଇୟା ୱେଣ୍ତି ନି ବାଙ୍ଗାରାମ୍‌ ମି ବୁବାରି ମାପୁରୁ ପ୍ରବୁଦି ଉଦେସ୍‌ତାନ୍‌ ନିଜେଦି ବଦାଦାନ୍‌ ସିତିମାନି ଦାନ୍‌ ଆନାତ୍‌ । 29 ପ୍ରବୁଦି ଜିରୁସାଲମତି ଇଲୁଦି ବାକ୍‌ରାଦୁ ପେରି ଜାଜକରି ନି ଲେବିୟରି ନି ଇସ୍ରାଏଲିୟ ବୁବାରି କୁଟୁମ୍‌ତିଅଦିକାରି ଆଗ୍‌ଡ଼ି ଇୟାୱିଜୁ ତୁସ୍‌ସି ସିଇ ସାନ୍ଧି ମିରୁ ଜାଗ୍‌ରାତା ତେବାଦୁ ମାରି ଇୟାୱିଜୁ ରକିୟା କିଦୁ ।" 30 ଆବେଟ୍‌ ଜାଜକର୍‌ ନି ଲେବିୟର୍‌ ମା ମାପୁରୁଦି ଜିରୁସାଲମତି ଇଲୁଦୁ ତାନି ଉଣ୍ତିଙ୍ଗ୍‌ ଆୟା ତୁସ୍‌ସ୍ତି ୱେଣ୍ତି ନି ବାଙ୍ଗାଁରାଓ ମାରି ଡୁବାଇଙ୍ଗୁଁ ୱିଜୁ ମାନାତାର୍‌ ।

31 ଇୟାୱେନ୍‌କା ମାପୁ ଜିରୁସାଲମତୁ ସନି ଉଣ୍ତିଙ୍ଗ୍‌ ପାର୍‌ତୁମ୍‌ ଲେଜୁଦି ବାର୍‌ଦିନ୍‌ତି ନାଣ୍ତିଙ୍ଗ୍‌ ଅହବା ଗାଡା ଲାକ୍‌ତୁରାନ୍‌ ଡ଼ିସ୍‌ତା ସୋର୍ହାପ୍‌; ମା ମାପୁରୁଦି କିୟୁ ମା ସାକା ଆତାତ୍‌, ମାରି ସାରିଦୁ ବା ୱାନ୍‌ ସାତ୍ରୁ ନି କାପ୍‌କିଜି ବାସ୍‌ନି ଲୋକା କିୟୁଦାନ୍‌ ମାଙ୍ଗିଁ ରକିୟା କିତାନ୍‌ । 32 ଆବେଟ୍‌ ମାପୁ ଜିରୁସାଲମତୁ ଇଜି ଆବେନୁ ମୁନେନ୍‌ ତେବାତାପ୍‌ ।

33 ଆବେଟ୍‌ ନାଲ୍‌ଏଟିଙ୍ଗ୍‌ ଆୟା ୱେଣ୍ତି ନି ବାଙ୍ଗାରାମ୍‌ ମାରି ଡୁବାଇଙ୍ଗୁଁ ୱିଜୁ ମା ମାପୁରୁଦି ଇଲୁଦୁ ତୁସ୍‌ସ୍ତି ତାସି ଊରିୟ ଜାଜକଦି ମାରିନ୍‌ ମରେମୋତ୍‌ କିୟୁଦୁ ସିଆୟ୍‌ଆତାତ୍‌; ୱାନି ୱାଲେ ପିନହସଦି ମାରିନ୍‌ ଇଲିୟାସର ମାର୍ହାନ୍‌; ମାରି, ୱାରି ୱାଲେ ଜେସୁୟଦି ମାରିନ୍‌ ଯୋସାବଦ୍‌ ନି ବିନ୍ନୁୟିଦି ମାରିନ୍‌ ନୋୟଦିୟା, ଇୟା ଲେବିୟର୍‌ ମାର୍ହାର୍‌; 34 ୱିଜୁ ଜିନିସ୍‌ ଲେକିସ୍‌କିଜି ନି ଇସାବ୍‌ ଆଜି ସିଆୟ୍‌ଆତାତ୍‌ ମାରି ଆୟା ବେଡ଼ାଦୁ ଆୟାୱିଜୁଦି ବଜୁ ରାସାୟ୍‌ ଆତାତ୍‌ ।

35 ନିର୍ବାସନ୍‌ଦାନ୍‌ ୱାତି ଜଇଲ୍‌ତୁମାନି ମାରିନ୍‌କୁ ୱିଜୁ ଇସ୍ରାଏଲ ଉଣ୍ତିଙ୍ଗ୍‌ ଇସ୍ରାଏଲ୍‌ତି ମାପୁରୁଦି ଉଦେସ୍‌ତାନ୍‌ ହୋମବଲି ୱାଜା ବାରଗୋଟା କଡିଙ୍ଗ୍‌, ନବେ ସୋ ଗୋଟା ମେଣ୍ତେଙ୍ଗ୍‌, ସତୁରି ସାତ୍‌ ଗୋଟା ମେଣ୍ତାପିଲେକ୍‌, ପାପ୍‌ତି ପୁଜା ଉଣ୍ତିଙ୍ଗ୍‌ ବାର‌ଗୋଟା ଗରିଏଙ୍ଗ୍‌ ସିତାର୍‌; ଇୟାୱିଜୁ ସଦାପ୍ରବୁଦି ଉଦେସ୍‌ତାନ୍‌ ହମ୍‌ ଆଡ଼ିକ୍‌ନି ପୁଜା ମାର୍ହାତ୍‌ । 36 ଇୟାୱେନ୍‌କା ୱାର୍‌ ଗାଡା ଆୟାପାଡ଼ାକାଦି ରାଜାଦିପାଣିକିନିୱାରିଙ୍ଗ୍‌ ନି ଦେସ୍‌ତି ନେତାରିଙ୍ଗ୍‌ ରାଜାଦି ସିଟି ସର୍‌ପେ କିତାର୍‌; ଆବେଟ୍‌ ୱାର୍‌ ଲୋକାଦି ମାରି ମାପୁରୁଦି ଇଲୁ ପାଣିଦୁ ସାହାଜ୍ୟ କିତାର୍‌ ।