1 ଇୟାୱିଜୁ ଗଟ୍‌ନା ୱେନ୍‌କା ପାରସ୍ୟ ରାଜା ଅର୍ତ୍ତକ୍ଷସ୍ତଦି ଅଦିକାର୍‌ ବେଡ଼ାଦୁ ସରାୟଦି ମାରିନ୍‌ ଏଜ୍ରା ବାବିଲତାନ୍‌ ସୋତାନ୍‌; ସରାୟ ଅସରିୟଦି ମାରିନ୍‌, ଅସରିୟ ହିଲ୍‌କିୟଦି ମାରିନ୍‌, 2 ହିଲ୍‌କିୟ ଶଲ୍ଲୁମ୍‌ଦି ମାରିନ୍‌, ଶଲ୍ଲୁମ୍‌ ସାଦୋକଦି ମାରିନ୍‌, ସାଦୋକ ଅହିଟୁବଦି ମାରିନ୍‌, 3 ଅହିଟୁବ ଅମରିୟଦି ମାରିନ୍‌, ଅମରିୟ ଅସରିୟଦି ମାରିନ୍‌, ଅସରିୟ ମରାୟୋତଦି ମାରିନ୍‌, 4 ମରାୟୋତ ସରହିୟଦି ମାରିନ୍‌, ସରହିୟ ଉସିଦି ମାରିନ୍‌, ଉସି ବୁକ୍‌କିଦି ମାରିନ୍‌, 5 ବୁକ୍‌କି ଅବିସୁୟଦି ମାରିନ୍‌, ଅବିସୁୟ ପିନହସ୍‌ଦି ମାରିନ୍‌, ପିନହସ ଇଲିୟାସରଦି ମାରିନ୍‌, ଇଲିୟାସର ପେରି ଜାଜକ ହାରୋଣଦି ମାରିନ୍‌ ।

6 ଇୟା ଏଜ୍ରା ବାବିଲତାନ୍‌ ସୋତା ସର୍ହାନ୍‌; ୱାନ୍‌ ଇସ୍ରାଏଲତି ମାପୁରୁ ପ୍ରବୁଦି ସିତିମାନି ମୋସାଦି ନିୟମ୍‌ ନେସ୍‌ତିମାନି ଅଜାକିନିକାନ୍‌ ମାର୍ହାନ୍‌; ମାରି, ୱାନି ଉଣ୍ତିଙ୍ଗ୍‌ ୱାରି ମାପୁରୁ ପ୍ରବୁଦି କିୟୁଦି ସାକାଦି ଇସାବ୍‌ତାନ୍‌ ରାଜା ୱାନି ୱିଜୁ ବିସୟ୍‌ ୱାନିଙ୍ଗ୍‌ ସିତାନ୍‌ । 7 ମାରି, ଅର୍ତ୍ତକ୍ଷସ୍ତ ରାଜାଦି ସାତ୍‌ ବାର୍ସେକ୍‌ତୁ ଇସ୍ରାଏଲ ଲୋକାଦି ନି ଜାଜକର୍‌ ନି ଲେବିୟରି ଏସ ଲୋକ୍‌, ମାରି ପାଟାପାର୍‌ନିକାର୍‌ ମାରି ସେର୍‌ଲା କାପ୍‌କିନିକାର୍‌ ନି ସେବାକିନିକାର୍‌ ଜିରୁସାଲମତୁ ସର୍ହାର୍‌ ।

8 ମାରି, ଏଜ୍ରା ପାସ୍‌ ଗୋଟା ଲେଜୁଦୁ, ମାରି, ରାଜାଦି ଆୟା ସାତ୍‌ ବାର୍ସେକ୍‌ତୁ ଜିରୁସାଲମତୁ ଇତାର୍‌ । 9 ଇରିଙ୍ଗ୍‌, ୱାନ୍‌ ପାର୍‌ତୁମ୍‌ ଲେଜୁଦି ପାର୍‌ତୁମ୍‌ ନାଣ୍ତିଙ୍ଗ୍‌ ବାବିଲତାନ୍‌ ସନ୍‌ଡ୍ରେଙ୍ଗ୍‌ ଆରାମ୍‌ କିତାନ୍‌, ମାରି ୱାନି ଉଣ୍ତିଙ୍ଗ୍‌ ମାପୁରୁଦି ନେଗି କିୟୁଦି ସାକାଦି ଇସାବ୍‌ତାନ୍‌ ୱାନ୍‌ ପାସ୍‌ ଗୋଟା ଲେଜୁଦି ପାର୍‌ତୁମ୍‌ ନାଣ୍ତିଙ୍ଗ୍‌ ଜିରୁସାଲମ୍‌ତୁ ଇତାନ୍‌ । 10 ଏଜ୍ରା ପ୍ରବୁଦି ନିୟମ୍‌ ସୁଡ଼ୁଜି ମାରି ମାନାଦେଙ୍ଗ୍‌, ମାରି ଇସ୍ରାଏଲ ଲୋଇ ବିଦି ନି ସାସନ୍‌ ସିକିୟା ସିଦେଙ୍ଗ୍‌ ନିଜେଦି ମନ୍‌ ସିତାମାର୍ହାନ୍‌ ।

11 ଅର୍ତ୍ତକ୍ଷସ୍ତ ରାଜା ଅଜାକିନି ଏଜ୍ରା ଜାଜକଦିଙ୍ଗ୍‌, ମାରି, ପ୍ରବୁଦି ମାଟାଦି ମାରି ଇସ୍ରାଏଲ ଉଣ୍ତିଙ୍ଗ୍‌ ୱାନି ବିଦିଦି ଅଜାକିନିୱାନିଙ୍ଗ୍‌ ଏମେ ସିଟି ସିତାମାର୍ହାନ୍‌, ଆବେଣି ରାସାତିକା ଇକା,

12 ପେରିରାଜା ଅର୍ତ୍ତକ୍ଷସ୍ତ ମାଣାନ୍‌ ମୁସ୍‌କୁପୁର୍‌ତି ମାପୁରୁଦି ନିୟମ୍‌ତି ଅଜାକିନିକାନ୍‌ ମାରି ଜାଜକ ଏଜ୍ରେଙ୍ଗ୍‌ ଜତେ ।

13 ନାନୁ ୱେର୍‌ସିନା ଜେ, ନା ରାଜିଦି ଇସ୍ରାଏଲ ଲୋଇରାନ୍‌ ଏସ ଲୋକୁ, ମାରି ୱାରି ଜାଜକ ନି ଲେବିୟର୍‌ ଜିରୁସାଲମତୁ ନିଜେଦି ବଦାଦାନ୍‌ ସନ୍‌ଡ୍ରେଙ୍ଗ୍‌ ମନ୍‌ କିନାର୍‌, ୱାର୍‌ ମି ୱାଲେ ଅର୍‌ସେ ସୋଲିର୍‌ । 14 ଇରିଙ୍ଗ୍‌ ନି କିୟୁଦାନ୍‌ ମି ମାପୁରୁଦି ନିୟମ୍‌ତି ଇସାବ୍‌ତାନ୍‌ ଜିହୁଦା ନି ଜିରୁସାଲମତି ଅବସ୍ତା ପୟ୍‌ଦେଙ୍ଗ୍‌, 15 ମାରି, ଜିରୁସାଲମତୁ ଆମାୱାନି ଇଲୁ ମାନାତ୍‌, ଇସ୍ରାଏଲତି ଆୟା ମାପୁରୁଦି ଉଦେସ୍‌ତାନ୍‌ ରାଜା ନି ୱାନି ମନ୍ତ୍ରିର୍‌ ନିଜେଦି ବଦାଦାନ୍‌ ବାଙ୍ଗାଁରାଓ ନି ୱେଣ୍ତି, 16 ମାରି, ବାବିଲତି ୱିଜୁ ଦେସ୍‌ତୁ ମିରୁ ଏମେୱିଜୁ ୱେଣ୍ତି ନି ବାଙ୍ଗାଁରାଓ ପୟ୍‌ନିଦେର୍‌, ମାରି ଲୋକୁ ନି ଜାଜକର୍‌ ୱାରି ମାପୁରୁଦି ଜିରୁସାଲମତି ପାର୍‌ତନା ଇଲୁ ଉଣ୍ତିଙ୍ଗ୍‌ ନିଜେଦି ବଦାଦାନ୍‌ ଏମେକା ସିନାନ୍‌, ଆୟାୱିଜୁ ନିଜେଦି ବଦାଦାନ୍‌ ସିତି ଦାନ୍‌ ଅନି ଉଣ୍ତିଙ୍ଗ୍‌ ମିରୁ ରାଜା ନି ୱାନି ସାତ୍‌ଲୋକ୍‌ ମନ୍ତ୍ରିରି ମାଣାନ୍‌ ପୋକାୟ୍‌ ଆଜିନିଦେର୍‌;

17 ଇୟାଉଣ୍ତିଙ୍ଗ୍‌ ମିରୁ ଇୟା ଅଦୁଲି ମାଣାନ୍‌ ଜାତୁନ୍‌ତାନ୍‌ କଡି, ମେଣ୍ତା, ମେଣ୍ତାପିଲା ନି ତାନି ୱାଲେ ତିଆର୍‌ଆତି କାଦି ନି ଉଣି ଅଙ୍ଗୁର୍‌ରସ୍‌ ଜିନିସ୍‌ କଡ଼ଜ ମି ମାପୁରୁଦି ଜିରୁସାଲମତି ପାର୍‌ତନା ଇଲୁଦି ପୁଜାବେଦି ମୁସ୍‌କୁ ସିନିଦେର୍‌ । 18 ମାରି, ବାକି ତେବାତିମାନି ୱେଣ୍ତି ନି ବାଙ୍ଗାରାମ୍‌ ମିଙ୍ଗିଁ ନି ମି ତଡ଼ାନ୍‌କାଙ୍ଗ୍‌ ଆମାକା କିଦେଙ୍ଗ୍‌ ନେଗେନ୍‌ ତର୍‌ନାତ୍‌, ଆକା ମିରୁ ନିଜେଦିୱାରି ମାପୁରୁଦି ବଦା ଅନୁସାରେ କିନିଦେର୍‌ । 19 ମାରି, ମି ମାପୁରୁଦି ପାର୍‌ତନା ଇଲୁଦି ସେବାକିନି ଏମେ ୱିଜୁ ଡୁବାଇଙ୍ଗୁଁ ମିଙ୍ଗିଁ ସିଆୟ୍‌ଆଜିନେ, ଆକାୱିଜୁ ମିରୁ ଜିରୁସାଲମତି ମାପୁରୁଦି ଆଗ୍‌ଡ଼ି ସର୍‌ପେ କିଦୁ । 20 ମାରି, ମି ମାପୁରୁଦି ପାର୍‌ତନା ଇଲୁ ଉଣ୍ତିଙ୍ଗ୍‌ ଦର୍‌କାର୍‌ ମାରି ଆମାକା ଇନିକା ମିଙ୍ଗିଁ ସିଦେଙ୍ଗ୍‌ ପଡ଼ାନାତ୍‌, ଆକା ରାଜାଦି ସାମାନ୍‌ ଇଡ୍‌ନି ଇଲୁଦାନ୍‌ ସିଦୁ ।

21 ମାରି, ନାନୁ ଅର୍ତ୍ତକ୍ଷସ୍ତ ରାଜା ଇୟା ଆଦେସ୍‌ ସିଜିନା, ମୁସ୍‌କୁପୁର୍‌ତି ମାପୁରୁଦି ନିୟମ୍‌ତି ଅଜାକିନି ଏଜ୍ରା ଜାଜକ ମି ମାଣାନ୍‌ ଏମେ ଏମେକା ଦର୍‌କାର୍‌କିନାନ୍‌, 22 ଆୟାୱିଜୁ ସହେ ଗୋଟା ତାଳନ୍ତ* ସାନ୍ଧି ୱେଣ୍ତି ନି ସହେ ଗୋଟା ଅଡି ସାନ୍ଧି ଗଦ୍‌ମୁ* ମାରି ସହେ ଗୋଟା ଅଡି ସାନ୍ଧି ଅଙ୍ଗୁର୍‌ରସ ନି ସହେ ଗୋଟା ଅଡି ସାନ୍ଧି ନିୟୁ* ମାରି ଲେକିସ୍‌ତେଙ୍ଗ୍‌ ଆଟ୍‌ଇ ସରୁ ଜାତୁନ୍‌ତାନ୍‌ ସିନି ଉଣ୍ତିଙ୍ଗ୍‌ ମାପୁ ଅର୍ତ୍ତକ୍ଷସ୍ତ ରାଜା ପରାତ୍‌ ଗାଡା ଆୟାପାଡ଼ାକାଦି ୱିଜୁ ଡାବୁଙ୍ଗ୍‌ ଇଡ୍‌ନି ପେରିୱାନିଙ୍ଗ୍‌ ୱେର୍‌ସିନା । 23 ମୁସ୍‌କୁପୁର୍‌ତି ମାପୁରୁଦି ମାଣାନ୍‌ ଆମା ଆମାକା ମାଟା କିଆୟ୍‌ଆତାମାନାତ୍‌, ଆୟାୱିଜୁ ମୁସ୍‌କୁପୁର୍‌ତି ମାପୁରୁଦି ଇଲୁ ଉଣ୍ତିଙ୍ଗ୍‌ ଟିକ୍‌ ୱାଜା କିଆୟ୍‌ଆପିତ୍‌; ଇରିଙ୍ଗ୍‌ ରାଜା ନି ୱାନି ମାରିନ୍‌କା ରାଜି ବିରୁଦ୍‌ତାନ୍‌ ଏନ୍ଧା ରିସା ୱାନାତ୍‌ ? 24 ମାରିବା, ଜାଜକରି ନି ଲେବିୟରି, ପାଟାପାର୍‌ନିୱାରି, ସେର୍‌ଲା କାପ୍‌କିନିୱାରି, ସେବାପାଣିକିନିୱାରି ମାରି ମାପୁରୁଦି ଇୟା ପାର୍‌ତନା ଇଲୁଦି ସେବାକିନିୱାରି ଏମେୱାନି ମୁସ୍‌କୁ ସିସୁଟୁ ନି ଆସ୍‌ଲି ବାସାକିନି ନିୟମ୍‌ ବିରୁଦ୍‌ ଆନାତ୍‌ ଇଜି ମାପୁ ମିଙ୍ଗିଁ ୱେର୍‌ସିନାପ୍‌ ।

25 ମାରି, ଏ ଏଜ୍ରା, ମି ମାପୁରୁଦି ବିସୟ୍‌ତି ଏମେ ବୁଦି ମି କିୟୁଦୁ ମାନାତ୍‌, ଆୟା ଇସାବ୍‌ତାନ୍‌ ପରାତ୍‌ ଗାଡା ଆୟାପାଡ଼ାକାଦି ୱିଜୁ ଲୋକାଦି ବିଚାର୍‌ତୁ ଏମେକାର୍‌ ମି ମାପୁରୁଦି ନିୟମ୍‌ ନେସ୍‌ନାର୍‌, ଇୟାୱାଜା ସାସନ୍‌କିନିକାନ୍‌ ନି ବିଚାର୍‌କିନିୱାରିଙ୍ଗ୍‌ ମିରୁ ବାସେ କିଦୁ; ମାରି, ଏନ୍‌ ଆକା ନେସ୍‌ଏନ୍‌, ୱାନିଙ୍ଗ୍‌ ମିରୁ ଅଜା କିଦୁ । 26 ମାରି, ଏନ୍‌ଆପିନ୍‌ ମି ମାପୁରୁଦି ନିୟମ୍‌ ନି ରାଜା ନିୟମ୍‌ ମାନାଦେଙ୍ଗ୍‌ ରାଜି ଆଏନ୍‌, ଆୟା ଦସ୍‌ ସାନିଦଣ୍ତ୍‌ କି ଦଂସ୍‌ଆନିକା କି ଡାବୁଙ୍ଗ୍‌ଦଣ୍ତ କି ଜଇଲ୍‌ଦଣ୍ତ୍‌ ଆପିତ୍‌ ୱେନ୍‌କା ଜାତୁନ୍‌ତାନ୍‌ ୱାନି ସାସନ୍ କିଆୟ୍‌ଆନାତ୍‌ ।

27 ଏମେ ପ୍ରବୁ ମା ବୁବାରି ମାପୁରୁ ପ୍ରବୁଦି ଜିରୁସାଲମତି ଇଲୁ ସବା କିଦେଙ୍ଗ୍‌ ରାଜାଦି ମନ୍‌ତିଙ୍ଗ୍‌ ଇୟାୱାଜା ୱାର୍‌ଗିତାମାନାନ୍‌, 28 ମାରି, ରାଜାଦି ୱାନି ମନ୍ତ୍ରିର୍‌ ନି ରାଜାଦି ସାକ୍ତିଦି ଅଦିକାରି ୱିଜେରି ଆଗ୍‌ଡ଼ି ନା ଉଣ୍ତିଙ୍ଗ୍‌ ଦୟା କିତାମାନାନ୍‌, ୱାନ୍‌ ଦନ୍ୟ ଆପିନ୍‌ । ଇୟାୱାଜା ନା ଉଣ୍ତିଙ୍ଗ୍‌ ପ୍ରବୁ ନା ମାପୁରୁଦି କିୟୁଦି ସାକାଦି ଇସାବ୍‌ତାନ୍‌ ନାନୁ ଡାଟ୍‌ ଆତା ମାରି ନା ୱାଲେ ଅର୍‌ସେ ସନ୍‌ଡ୍ରେଙ୍ଗ୍‌ ଇସ୍ରାଏଲ ଲୋଇରାନ୍‌ ପେରି ଲୋକାଙ୍ଗ୍‌ ଉନ୍‌ଡ୍ରେମାନୁ କିତା ।