1 ୱେନ୍‌କା ପାରୁସିର୍‌ ମାରି ଜିରୁସାଲାମ୍‍ତାନ୍‌ ୱାତି ମାର୍‍ଇ ଏସୋ ସାସ୍ତ୍ରିର୍‌ ଜିସୁ ସାରିବେଡ୍‍ତି ଉଣ୍ତାତାର୍‌ । 2 ୱାର୍‌ ସୁଡ଼ୁତାର୍‌ ଯେ, ୱାନି ଏସୋ ସିସୁର୍‍ ଜିହୁଦିରି ଇସାବ୍‌ତାନ୍‌ କିୟୁ ନର୍‍ବାଏଣ୍ତା ଉଣୁଜି ମାର୍‌ଆର୍‌ ।

3 ପାରୁସିର୍‌ ମାରି ୱିଜେରେ ଯିହୁଦୀଲୋକ୍‍ ୱାରି ପୁର୍ବେଦି ନେତାରି ରୀତିନୀତି ମାନାଜି ନେଗେଣ୍ତ୍‍ କିୟୁ ନର୍‍ବାଏତିଙ୍ଗ୍‍ ୱାର୍‌ ଉଣୁଏର୍‌, 4 ସାତାଦୁ ସର୍‍ହି ୱାତି ୱେନ୍‌କା ନିଜେ ନିଜେଦି ମୁସ୍‌କୁ ଏର୍‌ ଲଜାଏତିଙ୍ଗ୍‍ ଉଣୁଏର୍‌; ମାରି ଗିନା, ମୁତା ମାରି କସ୍‍ ନକି ଏର୍‌ତୁ ମୁଡ଼ୁକିିସି ନର୍‍ବାନିକା, ଖାଟେଲ୍‍ତୁ ଏରୁ ସିଲିକ୍‌ନିକା ୱିଜୁ ଆଇ ରୀତିନୀତି ମାନାଦେଙ୍ଗ୍‌ ଇଜି ୱାର୍‌ ଆଦେସ୍‌ ପଇତା ମାର୍‌ଆର୍‌ ।

5 ପାରୁସିର୍‌ ମାରି ସାସ୍ତ୍ରିର୍‌ ଜିସୁଙ୍ଗୁଁ ଇର୍ହାର୍‌, "ନି ସିସୁର୍‍ ପୁର୍ବେଦି ନେତାରି ରୀତିନୀତି ଦାଣ୍ତ୍‍ ସାଲାଏଣ୍ତା କିକୁ ନର୍‍ବାଏଣ୍ତା ଏନ୍ଦା ଉଣୁଜିନାର୍‌ ?"

6 ଜିସୁ ୱାରିଙ୍ଗ୍‌ ଇର୍ହାନ୍‌, ଏ ସାଲାକିଦି, ଜିସାଇୟ ବାବବାଦି ମି ବିସୟ୍‌ତୁ ଟିକ୍‍ତାନ୍‍ ମାଟା ୱେର୍‍ତା ମାନାନ୍‌, ଏଣ୍ତେସ୍‌ ରାସାତାମାନାତ୍‌,

ମାପୁରୁ ଇନାନ୍‌, ଇୟା ଜାତିଦି ଲୋକ୍‌ଡର୍‌ ମାଙ୍ଗିଁ ତାମେ ମକମିନେ ମାନାନାର୍‌,

ମାତର୍‌ ୱାରି ଜିବନ୍‌ ମାବାଣ୍‍କୁ ଆକ ତେବାନାତ୍‍ ।

7 ୱାର୍‌ ଲୋକୁ ତିଆର୍‌ କିତିମାନି ରୀତିନୀତି ଦିଙ୍ଗ୍‍ ମାପୁରୁଦି ଆଦେସ୍‌ ଇଜି ଶିକ୍ଷା ସିନାର୍‍

ଆର୍‍ଏନେ ମା ସେବା କିଜିନାର୍‍ ।

8 "ମିର୍‌ ମାପୁରୁଦି ଆଦେସ୍‌ ଡ଼ିସ୍‌ସି ଲୋକୁ ତିଆର୍‍କିତି ନିୟମ୍‌ତିଙ୍ଗ୍‌ ଆସ୍‍ସିନିଦେର୍‍ ।"

9 ମାରି ଜିସୁ ୱାରିଙ୍ଗ୍‌ ଇର୍ହାନ୍‌, ମିର୍‌ ମି ସାଲାକିଦାନ୍‍ ମାପୁରୁଦି ମାଟାଦିଙ୍ଗ୍‌ ମାନାଇଜିନିଦେର୍‍ । 10 ଇରିଙ୍ଗ୍‌ ମୋସା ନିୟମ୍‌ ସିତାମାନାନ୍‌, ମି ବୁବା ୟାୟାଏଙ୍ଗ୍‍ ମାନାଦୁ, ମାରି ଏନ୍‌ ନିଜେଦି ବୁବା ନି ୟାୟାଙ୍ଗ୍‌ ଆନାଦୁରିଆ ସିନାନ୍‌, ୱାଣ୍ତ୍ରୁ ଏଣ୍ତେସ୍‌ କିଜିବା ସାନି ଦଣ୍ଡ୍‌ ପଇନାନ୍‌ । 11 ମାତର୍‌ ମି ଇନ୍‌ଡ୍ର, ଜଦି ଅରେନ୍‍ ଲୋକ୍‌ତିମାନୁ ୱାନି ବୁବା ୟାୟାଏଙ୍ଗ୍‍ ସାହାଜ୍ୟ କିଦେଙ୍ଗ୍‌ ମାନାତ୍‌, ମାତର୍‌ ଆୟା ଲୋକୁ ଇଜିନାନ୍‌, କାର୍ବାନ୍‍ ମାପୁରୁତିଙ୍ଗ୍‍ ପୁଜା ସିତାମାନା । 12 ଆଦେଙ୍ଗ୍‌ ମିର୍‌ ୱାନିଙ୍ଗ୍‌ ୱାନି ବୁବା ୟାୟାଦିଙ୍ଗ୍‍ ସାହାଜ୍ୟ କିନି ଉଣ୍ତିଙ୍ଗ୍‌ ସିଇଦେର୍‍ । 13 ଇୟାୱାଜା ମିର୍‌ ପୁର୍ବେଦି ଲୋକ୍‌ତି ରୀତିନୀତି ଉଣ୍ତିଙ୍ଗ୍‌ ମାପୁରୁଦି ବାକ୍ୟଦିଙ୍ଗ୍‍ ଲାତ୍‍ ଡାକ୍‍ସିନିଦେର୍‍ ମାରି ଆୟାୱାଜା ନାଣ୍ତ ସେଇ ପାଣିବା କିଜିିନିଦେର୍‍ ।

14 ଅର୍‌ଲେନ୍‌ ଜିସୁ ଲୋକାଙ୍ଗ୍‌ ଲାକ୍‌ତୁ କୁକ୍‌ସି ୱାରିଙ୍ଗ୍‌ ଇର୍ହାନ୍‌, "ମିର୍‌ ୱିଜେରେ ନା ମାଟା ୱେନ୍‌ଡ୍ରୁ ମାରି ବୁଝାଦୁ ।" 15 ଲୋକ୍‌ତି ମେନ୍ଧଲ୍‍ ଆତ୍ରେ ଇୟାୱାଜା ଇନି ବିସୟ୍‌ ସିଲେତ୍‌, ଆମାକା କି ୱାନି ଲୋଇ ଡ଼ୁଗୁଜି ୱାନିଙ୍ଗ୍‌ ଅପବିତ୍ର କିନାତ୍‌, ମାତର୍‌ ଏମେ ଏମେକା ଲୋକ୍‌ତି ଲୋଇରାନ୍‌ ସନାତ୍‌, ଆୟାୱିଜୁ ୱାନିଙ୍ଗ୍‌ ଅପବିତ୍ର କିନାତ୍‌ । 16 ଜଦି ଆମାୱାନିଙ୍ଗ୍‌ ୱେନ୍‌ଡ୍ରେଙ୍ଗ୍‌ ଗିତଣିଙ୍ଗ୍‍ମାନେ ୱାଣ୍ତ୍ରୁ ୱେନିନ୍‌ ।*୭:୧୬ ଏସୋ ପାଡ଼ିଇ ରାସାତିମାନୁ ଇୟା ପଦ୍‌ ରାସାଏତ୍‌ ।

17 ଜିସୁ ଲୋକାଙ୍ଗ୍‌ ଡ଼ିସ୍‌ସି ଇନ୍‌ଡ୍ର ୱାତି ୱେନ୍‌କା ୱାନି ସିସୁର୍‍ ଇୟା କାତାଦି ଅର୍ତ ବୁଝାକିଜି ସିଦା ଇଜି ଇର୍ହାର୍‌ । 18 ଆବେଟ୍‌ ଜିସୁ ୱାରିଙ୍ଗ୍‌ ଇର୍ହାନ୍‌, "ମିର୍‍ବା ଇନିକା ୱାରିୱାଜା ବୁଜାଦେଙ୍ଗ୍‌ ଆଟ୍‍ଏଜିନିଦେର୍‍ ? ଏମେକା କି ଆତ୍‍ରେରାନ୍‍ ଲୋକା ଲୋଇ ଡ଼ୁଗ୍‍ନାତ୍‍, ଆକା ୱାନିଙ୍ଗ୍‌ ସେଏଣ୍ଡ୍‌ କିଦେଙ୍ଗ୍‌ ଆଟ୍‍ଏତ୍‍ । 19 ଇରିଙ୍ଗ୍‌ ଆକା ୱାନି ଜିବନ୍‌ତୁ ଡ଼ୁଗ୍‍ଏତ୍‍, ମାତର୍‌ ପଟା ଲୋଇ ଡ଼ୁଗୁଜି ଆତ୍ରେ ସନା ସନାତ୍‌ ।" ମାରି ଇବେଣୁକୁ ୱିଜୁ ଖାଦି ନରାନା ସନାତ୍‌, ଇକା ଜିସୁ ଇର୍‌ଆନ୍‌ ।

20 ଜିସୁ ଇର୍ହାନ୍‌, "ଆମାକା ଲୋକ୍‍ମାଣ୍‍କୁ ସନାତ୍‌, ଆକାନେ ୱାନିଙ୍ଗ୍‌ ଅପବିତ୍ର କିନାତ୍‌ । 21 ଇରିଙ୍ଗ୍‌ ଲୋଇରାନ୍‌, ଲୋକ୍‌ତି ଜିବନ୍‍ତାନ୍‍, ତାଗ୍‌ଇଚିନ୍ତା ସନାତ୍‌, ଦାରିପାଣି, ଡଂଆ, ଲୋକ୍‌ତିଙ୍ଗ୍‌ ସାୟାମାର୍‌ଗାଡାକ୍‌ନିକା, 22 ଆଇୱାନି ଆଇମାଦିମାନୁ ସନିକା, ଲୋଭ୍‍, କାରାପ୍‌, ମିଛ୍‍ ମାଟା, ଗାଡ଼୍‍ୟା, ସୁଡ଼୍‌ଜି ଆକାର୍‍ ଆନିକା, ସୁଡ଼୍‌ଜି ଲାଲ୍‍ଇଆନିକା, ନିଦା, ଗାର୍ବୁ କିନିକା, ମୁର୍ଖୁଆନିକା; 23 ଇୟା ତାଗ୍‌ଇ ପାଣିୱିଜୁ ଲୋଇରାନ୍‌ ସହସି ଲୋକ୍‌ତିଙ୍ଗ୍‌ ଅପବିତ୍ର କିନାତ୍‌ ।"

24 ଆୟାୱେନ୍‌କା ଜିସୁ ଆୟା ବାଡି ଡ଼ିସ୍‍ସି ସୋର ଗାଡ଼୍‌ତି ରାଜିଦୁ ସର୍‌ଆନ୍‌, ଉଣ୍ତ୍ରି ଇନ୍‌ଡ୍ର ଡ଼ୁଗିତାନ୍‍ନୋ, ଏର୍‍ବା ଏଣ୍ତେସ୍‌ ଆକା ନେସ୍‌ଏର୍‌, ଇକା ବଦା କିଜିମାର୍‍ଆନ୍‍, ମାତର୍‌ ୱାଣ୍ତ୍ରୁ ଆବେ ମାର୍ଗିଜୋ ମାନ୍‌ଡ଼୍ରେଙ୍ଗ୍‌ ଆଟ୍‍ଏତାନ୍‍ । 25 ଆୟାଦାପ୍ରେ ଅରେତ୍‌ ଆଇମା ଜିସୁ ୱାତି ମାର୍‍ଇ କାବୁର୍‌ ୱେର୍‍ଆଦୋ ୱାତାତ୍‍, ଇରିଙ୍ଗ୍‌ ତାନି ଗାଡ଼୍‍ସିଙ୍ଗ୍‍ ତାଗ୍‍ଇଆତ୍ମା ଆସ୍‌ତା ମାର୍‌ଆତ୍‌ । ଆଦେଙ୍ଗ୍‌ ଆୟା ଆଇମା ୱାନି ପାଦାମ୍‌କାଙ୍ଗ୍‌ ମାଡ଼ିସ୍‌ କିଜି ଗୁରିତାତ୍‍ । 26 ଆୟା ସୁର ଦେଶ୍‍ତି ସୁରଫେନିକିୟା ଜାତିଦି ଅରେତ୍‌ ଗ୍ରୀକ୍‍ ଆଇମା ମାର୍‌ଆତ୍‌ । ତାନି ଆଇଲି ମାଣାନ୍‌ ଦୁବା ଡ଼ିସ୍‍ସିସ୍‍ କିଦେଙ୍ଗ୍‌ ଇଜି ଜିସୁଙ୍ଗୁଁ ଇନ୍‌ଡ୍ରେଙ୍ଗ୍‌ ଆସ୍‌ତାତ୍‌ । 27 ଆବେଟ୍‌ ଜିସୁ ତାନିଙ୍ଗ୍‌ ଇର୍‌ଆନ୍‌, "ନିଜେଦି କଡ଼ରିଙ୍ଗ୍‌ ଆଗ୍‌ଡ଼ି ଖାଦି ପଟାବର୍ତି ଉଟ୍‍ପିସ୍‍ତେଙ୍ଗ୍‍ ଆନାତ୍‌, ଇରିଙ୍ଗ୍‌ କଡ଼ରି ବାଟା ଖାଦି ଅସି ନୁକୁଡ଼ିଆଙ୍ଗାଁ ମାନୁ ପୋକ୍‍ନିକା ନେଗେତ୍‌ ସିଲେ ।"

28 ଜିସୁଙ୍ଗୁଁ ଆୟା ଆଇମା ଇର୍ହାତ୍‌, "ହୁଁ, ପ୍ରବୁ, ନୁକୁଡ଼ିଙ୍ଗ୍‍ବା ଟେବୁଲ୍‍ ଆଡ୍‍ଗି ମାନ୍‌ଜି କଡ଼ର୍‌ ଉଟି ୱିସ୍‌ତି ସକ୍‌ଡ଼ି ଆର୍ତିକା ଉଣେ ।"

29 ଜିସୁ ଆୟା ଆଇମାଦିଙ୍ଗ୍‍ ଇର୍‌ଆନ୍‌, "ନିନୁ ଇୟା ମାଟା ଇର୍‍ଇ ଉଣ୍ତିଙ୍ଗ୍‌ ସାଙ୍ଗ୍‍ଆ, ନି ଗାଡ଼ିଦି ମାଣାନ୍‌ ଦୁବା ସତା ସର୍‌ଆତ୍‌ ନି ।"

30 ଆୟା ଆଇମା ଇନ୍‌ଡ୍ର ଡ଼େସି ସଲ୍‌ସି ସୁଡ଼ୁତାତ୍‍ ଯେ ତାନି ଆଇଲି ଟାଟିଦୁ ଡରିତା ମାନାତ୍‌ ମାରି ସତେନେ ଦୁବା ଆଇଲି ମାଣ୍‌କୁ ଡ଼ିସ୍‍ତା ସର୍‌ଆତ୍‌ ।

31 ଆୟାୱେନ୍‌କା ଜିସୁ ସୋର୍‍ ସାନ୍ଧିଦାଣ୍ତ୍ ଡ଼ିସ୍‌ସି ସିଦନ୍‍ ମାରି ଦେକାପଲି ସାନ୍ଧି ସିଜି ଗାଲିଲି ସାମ୍‌ଦୁର୍‌ ପାଡ଼ି ୱାତାନ୍‌ । 32 ଏସୋ ଲୋକୁ ଗୁଲା ମାରି ବଇରା ଲୋକ୍‌ତିଙ୍ଗ୍‌ ଜିସୁ ଲାକ୍‌ତୁ ତାତାର୍‌ । ମାରି ୱାନି ମୁସ୍‌କୁ କିୟୁ ଇଡ୍‌ଦେଙ୍ଗ୍‌ ଜିସୁଙ୍ଗୁଁ ଇର୍ହାର୍‌ । 33 ଜିସୁ ଆୟା ଲୋକ୍‌ତିଙ୍ଗ୍‌ ଲୋକା ଗଲିଦାନ୍‍ ଅଡ଼ପ୍‍ ଆକ ଅତାନ୍‍ନୋ ୱାନି ରୁଣ୍ତି ଗିତଣିଆଙ୍ଗ୍‍ ୱାନି ଡ଼ାସ୍‍କେଙ୍ଗ୍‍ ମୁଟ୍‌ତାନ୍‌ ମାରି ପୁସ୍‍ସି ୱାନି ୱେତଲ୍‍ତିଙ୍ଗ୍‍ ମୁଟ୍‌ତାନ୍‌, 34 ଆୟାୱେନ୍‌କା ୱାନ୍‌ ସ୍ୱର୍ଗ ମୁସ୍‌କୁ ସୁଡ଼୍‍ଜି ପୁଣ୍ତା ଡ଼ିସ୍‌ସି ୱାନିଙ୍ଗ୍‌ ଇର୍‌ଆନ୍‌, "ଇପ୍‍ପଥଃ," ଇରିଙ୍ଗ୍‌ ଗୁଲାଦି "ୱେୟୁ ୱାର୍‍ଗିଦେଙ୍ଗ୍‍ ରାଆ ।"

35 ଆୟା ଦାପ୍ରେ ୱାନ୍‌ ଗିତଣିଙ୍ଗ୍‍ ୱେନ୍‌ଡ୍ରେଙ୍ଗ୍‌ ଆଟ୍‍ତାନ୍‍ ମାରି ୱାନି ୱେତଲ୍‍ କୁଦିତାତ୍‍ ଆବେଟ୍‌ ୱାନ୍‌ ନେଗେନ୍‌ କିଜି ୱାର୍‍ଗିଦେଙ୍ଗ୍‍ ଆଟ୍‍ତାନ୍‍ । 36 ଇୟା ନେଗେଣ୍ତ୍‍ କିତି ମାଟା ଏଙ୍ଗ୍‌ବା ଇନ୍‌ମାଟ୍‌ ଇଜି ଆଟ୍‍ୱାଦାନ୍‍ ଜିସୁ ଲୋକାଙ୍ଗ୍‌ ଇର୍‌ଆନ୍‌, ମାତର୍‌ ଜିସୁ ଏସା ମାନା କିତିଙ୍ଗ୍‌ବା, ଲୋକ୍‌ଡର୍‌ ନାସାନେ ୱେର୍‌ସି ବୁଲାତାର୍‌ । 37 ମାରି, ୱିଜେରେ ଲୋକୁ ନାଣ୍ତ କାବାଆଜି ଇର୍ହାର୍‌, "ୱାଣ୍ତ୍ରୁ ୱିଜୁ ପାଣି ନେଗ୍ରେଣ୍ତା କିତାମାନାନ୍‍; ୱାଣ୍ତ୍ରୁ ୱେନ୍ଇ ଲୋକାଙ୍ଗ୍‌ ୱେନି ବପୁ ମାରି ୱାର୍‌ଗିଇ ଲୋକାଙ୍ଗ୍‌ ୱାର୍‍ଗିନି ବପୁ ବା ସିନାନ୍‍ ।"