1 ଆୟାୱାଲେ ଅର୍‍ଲେନ୍‍ ମାରିଡ଼େସି ନାଣ୍ତ ଲୋକୁ ଜିସୁମାନୁ ଉଣ୍ତାତାର୍‌, ନାସ୍ତିୱାଲେ ୱାରିମାନୁ ଉଣିତିନିକା ସିଲେତାତ୍‍ ଆକା ଜିସୁ ୱାନି ସିସୁରିଙ୍ଗ୍‌ ଲାକ୍‌ତୁ କୁକ୍‍ତାନ୍‍ନୋ ୱାରିଙ୍ଗ୍‌ ଇର୍‌ଆନ୍‌, 2 "ଇୟା ଲୋକା ଉଣ୍ତିଙ୍ଗ୍‌ ନା ଜିବନ୍‌ ଦୟା ଆଜିନାତ୍‍, ଇରିଙ୍ଗ୍‌ ଇକାର୍‌ ମୁନେନ୍‌ ଆତାତ୍‌ନି ନାୱାଲେ ମାନାର୍‌ ମାରି ୱେରିମାନୁ ଉଣ୍ତେଙ୍ଗ୍‌ ଇନିକା ବା ସିଲେତ୍‍ । 3 ଜଦି ନାନୁ ୱାରିଙ୍ଗ୍‌ ତାମେ ଇଲ୍‌କାଙ୍ଗ୍‌ ଉଟ୍‍ପିସ୍‍କିଏଣ୍ତା ପୋକ୍‌ନା, ନାସ୍ତିୱାଲେ ୱାର୍‌ ସାର୍‍ଦୁ ସନାରୋ ମେଡ଼୍‍ନାର୍‍; ଇରିଙ୍ଗ୍‌ ୱାରିମାଣାନ୍‌ ଏସୋ ଲୋକୁ ନାଣ୍ତ ଆକଣାନ୍‍ ୱାତାମାନାର୍‌ ।"

4 ସିସୁର୍‍ ଜିସୁଙ୍ଗୁଁ ଇର୍ହାର୍‌, "ଇୟା ସିମ୍ରା ବାଡିଦୁ ଏନ୍‌ ଆମାବାଣ୍‍କୁ ରୁଟି ତାସ ୱେରିଙ୍ଗ୍‌ ପଟାବର୍ତି ଉଟ୍‍ପିସ୍‍କିଦେଙ୍ଗ୍‍ ଆଟ୍‍ନାନ୍‍ ?"

5 ଜିସୁ ୱାରିଙ୍ଗ୍‌ ୱେନ୍‍ବାତାନ୍‌, ମି ଲାକ୍‌ତୁ ଏସଗୋଟା ରୁଟିଙ୍ଗ୍‌ ମାନେ ? ୱାର୍‌ ଇର୍ହାର୍‌, "ସାତ୍‍ଗୋଟା ରୁଟିଙ୍ଗ୍‌ ।"

6 ଜିସୁ ଲୋକାଙ୍ଗ୍‌ ବୁମି ମୁସ୍‌କୁ ବାସ୍‌ତେଙ୍ଗ୍‌ ଆଦେସ୍‌ ସିତାନ୍‌; ମାରି, ୱାଣ୍ତ୍ରୁ ଆୟା ସାତଗୋଟା ରୁଟିଙ୍ଗ୍‌ ଅତାନ୍‌ନୋ ମାପୁରୁଦିଙ୍ଗ୍‌ ଧନ୍ୟବାଦ ସିଜି ରୁଟିଙ୍ଗ୍‌ ମକା ମକା କିଜି ରୁକ୍‍ସି ବାଟା କିଜି ସିଦେଙ୍ଗ୍‍ ୱାନି ସିସୁରିଙ୍ଗ୍‌ ସିତାନ୍‌ ମାରି ୱାର୍‌ ଲୋକାଙ୍ଗ୍‌ ଆୟା ରୁଟିଙ୍ଗ୍‌ ବାଟାକିଜି ସିତାର୍‍ । 7 ମାରି ୱାରିମାନୁ ଏସୋ ଇସ୍ରି ମିନ୍‌କୁବା ମାର୍‍ହେ; ଜିସୁ ଆୟା ମିନ୍‍କାଙ୍ଗ୍‌ ମାପୁରୁଦିଙ୍ଗ୍‍ ଦନ୍ୟବାଦ୍‌ ସିଜି ବାଟା କିଜି ଲୋକାଙ୍ଗ୍‌ ସିଦେଙ୍ଗ୍‍ ଇର୍‌ଆନ୍‌ । 8 ୱିଜେରେ ତିନ୍‌ଞ୍ଜି ପଟା ପାଜିତାର୍‌ ମାରି ସାତ୍‍ଗୋଟା ଡାଡ଼ିଦୁ ଏଜିତି ରୁଟି ମକେଙ୍ଗ୍‌ ଡାଡ଼ିଦୁ ବର୍ତି କିତାର୍‌ । 9 ଇୟା ଉଟି ଲୋକୁ ନାଲ୍‌ଗି ହାଜାର୍‌ ମାର୍‌ଆର୍‌ । 10 ଆୟାୱେନ୍‌କା ଜିସୁ ଲୋକାଙ୍ଗ୍‌ ପୋକ୍‌ତାନ୍‌ ମାରି ଆୟାଦାପ୍ରେ ୱାନି ସିସୁରିୱାଲେ ଡଙ୍ଗାଁଦୁ ଏକ୍‌ତାନ୍‌ନୋ ଦଲ୍‍ମନୁଥା ରାଜିଦୁ ୱାତାନ୍‌ ।

11 ✝ପାରୁସିର୍‌ ୱାତା ରୋ ଜିସୁୱାଲେ ମାଟାଦିଙ୍ଗ୍‌ ମାଟା ଆଦେଙ୍ଗ୍‌ ଆସ୍‌ତାର୍‌ । ମାରି ୱାର୍‌ ୱାନିଙ୍ଗ୍‌ ଉରିଦୁ ଆର୍‍ତେଙ୍ଗ୍‍ ବଦାକିଜି, ୱାନ୍‌ ଯେ ମାପୁରୁ ମାଣ୍‌କୁ ୱାତାମାନାନ୍‍ ଆକା ତର୍‌ତେଙ୍ଗ୍‍ଁ ବାଦଡ଼୍‍ତାନ୍‍ ଉଣ୍ତ୍ରି କାବାଆନି ପାଣି ତର୍‌ତେଙ୍ଗ୍‍ଁ ଇର୍ହାର୍‌ । 12 ଜିସୁ ଜିବନ୍‌ତୁ ଦୁକ୍‍ଆଜି ନାଣ୍ତ ପୁଣ୍ତା ଡ଼ିସ୍‌ସି ଇର୍‌ଆନ୍‌, "ଇନ୍‍ଦାନିଙ୍ଗ୍‍ ଇୟା ଜୁଗ୍‍ତି ଲୋକ୍‌ଡର୍‌ ସିନା ପଇଜିନାର୍‍ ? ନାନୁ ମିଙ୍ଗିଁ ସତ୍‌ ୱେର୍‌ସିନା, ଇୟା ଜୁଗ୍‌ତି ଲୋକ୍‌ତିଙ୍ଗ୍‌ ଆମା ସିନା ବା ପୁଟ୍‌ଏତ୍‌ ।"

13 ୱାନ୍‌ ୱାରିଙ୍ଗ୍‌ ଡ଼ିସ୍‌ସି ମାରିଡ଼େସି ଡଙ୍ଗାଁଦୁ ଏକ୍‍ତାନ୍‍ନୋ ସାମ୍‌ଦୁର୍‌ ଆୟାପାଡ଼ି ସର୍‌ଆନ୍‌ ।

14 ଆୟାୱାଲେ ସିସୁର୍‌ ରୁଟି ଅତେଙ୍ଗ୍‌ ବାଣାତା ସରଆର୍‌; ଡଙ୍ଗାଁଦୁ ୱାରିମାନୁ କେବଲ୍ ଉନ୍‍ଡ୍ରେନେ ରୁଟି ମାର୍‌ଆତ୍‌ । 15 ✝ଜିସୁ ଶିଶୁରିଙ୍ଗ୍‌ ଆଟ୍‌ୱା ମାଟା ଇର୍‌ଆନ୍‌, "ଜାଗାର୍‌ତା ଆଦୁ," ପାରୁସିର୍‌ ମାରି ହେରୋଦ୍‍କା ମିଚ୍‍ ମାଟାଦାନ୍‌ ଜାଗାର୍‌ତା ମାନ୍‌ଡ଼୍ରୁ, ଆମାକା ଖମୀର୍‍ତି* ୱାଜା ଆନାତ୍‌ ।

16 ସିସୁର୍‌ ଇୟା ବିସୟ୍‌ତୁ ୱାରିୱାରି ଲୋଇ ୱାର୍‌ଗିଜି ସାତାର୍‌, "ମାବାନ୍‍ ରୁଟି ସିଲେତ୍‍ଆକା ୱାନ୍‌ ଇୟାୱାଜା ଇଜିନାନ୍‌ ।"

17 ଜିସୁ ଆକା ନେସ୍‌ତାନ୍‌ନୋ ୱାରିଙ୍ଗ୍‌ ଇର୍‌ଆନ୍‌, ମି ଲାକ୍‌ତୁ ରୁଟିଙ୍ଗ୍‌ ସିଲୁ ଇଜି ଏନ୍ଦା ୱାର୍‌ଗିଜି ସାଜିନିଦେର୍‌ ? ମିର୍‌ ଇୟାସାନ୍ଦି ନେସ୍‌ଇଦେର୍‌ ନୋ ? କି ବୁଝାଇଦେର୍‍ ନୋ ? ମି ଜିବନ୍‌ ନିସାନେ ଆଟ୍‌ୱା ଆତାମାନାତ୍‌ ? 18 ✝କାଣୁକୁ ମାନ୍‌ବୁ ମାନ୍‌ବୁ ମିର୍‌ ସୁଡ଼୍‍ଇଜିନିଦେର୍‍ ? ମାରି, ଗିତଣିଙ୍ଗ୍‍ ମାନ୍‌ବୁ ମାନ୍‌ବୁ ୱେନ୍ଇଜିନିଦେର୍‍ ? ମିର୍‌ ଇନିକା ଅଡ଼୍‍ବିଦେଙ୍ଗ୍‍ ଆଟ୍‍ଇଜିନିଦେର୍‍ ? 19 ପାସ୍‌ଗୋଟା ରୁଟିଙ୍ଗ୍‌ ରୁକ୍‍ସି ଏଣ୍ତେସ୍‌ , ହାଜାର୍‌ ଲୋକାଙ୍ଗ୍‌ ତିର୍‍ପିସ୍‍କିତା ମାର୍‍ହା, ଆୟାନାଣ୍ତିଙ୍ଗ୍‌ ଏଜିତି ରୁଟି ମକେଙ୍ଗ୍‌ ୱିଜୁ ପେର୍‌ଜି ଏସୋ ଗୋଟା ଡାଡ଼ିଦୁ ବର୍ତି କିତିମାର୍‍ଇଦେର୍‍, ଆକା ମିଙ୍ଗିଁ ଏତ୍‌ ସିଲେତ୍‌ ? ସିସୁର୍‌ ୱାନିଙ୍ଗ୍‌ ୱେର୍‌ତାର୍‌, "ବାରଗଟା ଡାଡ଼ିଙ୍ଗ୍‍ ।"

20 ଜିସୁ ମାରି ୱେନ୍‌ବାତାନ୍‌, "ଏସିୱାଲେ , ହାଜାର୍‌ ଲୋକା ଉଣ୍ତିଙ୍ଗ୍‌ ସାତ୍‍ଗୋଟା ରୁଟିଙ୍ଗ୍‌ ରୁକ୍‍ସି ସିତାମାର୍‍ହା," ଏଜିତି ରୁଟି ମୁକେଙ୍ଗ୍‍ ପେର୍‌ଜି ଏସୋ ଗୋଟା ଡାଡ଼ିଦୁ ବର୍ତି କିତିମାର୍‍ଇଦେର୍‍ ? ସିସୁର୍‌ ଇର୍ହାର୍‌, "ସାତ୍‍ଗୋଟା ଡାଡ଼ିଙ୍ଗ୍‍ ।"

21 ଜିସୁ ୱାରିଙ୍ଗ୍‌ ଇର୍‌ଆନ୍‌, "ମିର୍‌ ଇଲେଇବା ବୁଜାଦେଙ୍ଗ୍‌ ଆଟ୍‍ଇଜିନିଦେର୍‍ ।"

22 ୱେନ୍‌କା ୱାର୍‌ ବେତ୍‍ସାଇଦା ନାର୍‍ତୁ ୱାତାର୍‌ । ଆବେ ଏସୋ ଲୋକୁ ଅରେନ୍‍ କାଣା ଲୋକ୍‌ତିଙ୍ଗ୍‌ ଜିସୁ ଲାକ୍‌ତୁ ତାତାର୍‌ ନୋ ୱାନିଙ୍ଗ୍‌ ମୁଟ୍‌ସୋ ନେଗେଣ୍ତ୍‍ କିଦେଙ୍ଗ୍‌ ଇର୍ହାର୍‌ । 23 ଜିସୁ କାଣାଦି କିୟୁ ଆସ୍‌ତାନ୍‌ନୋ ନାର୍‍ତାଣ୍ତ୍‍ ଆକ ଅତାନ୍‍, ଆବେ କାଣାଦି କାଣ୍‍ଗାଦୁ ପୁସ୍‍କାଣାଙ୍ଗ୍‌ ଉସ୍‍ତାନ୍‍ ନୋ ୱାନି ମୁସ୍‌କୁ କିୟୁ ଇଡ୍‌ଜି ୱାନିଙ୍ଗ୍‌ ୱେନ୍‌ବାତାନ୍‌, "ନିନ୍‌ ଇନିକା ସୁଡ୍‍ଜିନି ନୋ ?"

24 ଆୟା ଲୋକୁ ମୁସ୍‌କୁ ବେସ୍‍ସି ଇର୍‌ଆନ୍‌, "ହୁଁ ନାନ୍ ଲୋକାଙ୍ଗ୍‌ ସୁଡଦେଙ୍ଗ୍‌ ଆଟ୍‍ସିନା, ଇରିଙ୍ଗ୍‌ ନାନ୍ ଲୋକାଙ୍ଗ୍‌ ବୁଲାନି ମାରାକ୍‍ ୱାଜା ସାରିବେଡ଼୍‍ତି ସୁଡ଼୍‍ଜିନା ।"

25 ମାରିଡ଼େସି ଜିସୁ ୱାନି କାଣୁକୁ ମୁସ୍‌କୁ କିୟୁ ଇଟ୍‌ତାନ୍‌; ଆବେଟ୍‌ ୱାଣ୍ତ୍‍ରୁ ନେଗ୍ରେଣ୍ତା ସୁଡ଼୍‍ଦେଙ୍ଗ୍‍ ଆଟ୍‍ତାନ୍‍ ମାରି ନେଗେଣ୍ତ୍‍ ଆତାନ୍‍ନୋ ୱିଜୁ ସୁଡ଼୍‍ଦେଙ୍ଗ୍‍ ଆଟ୍‍ତାନ୍‍ । 26 ଜିସୁ ୱାନିଙ୍ଗ୍‌ ତାମେ ଇନ୍‌ଡ୍ର ପୋକ୍‌ସି ଇର୍‌ଆନ୍‌, "ଇୟା ନାର୍‍ତୁ ସଲ୍‍ମା, ମାତର୍‌ ମି ଇନ୍‌ଡ୍ର ସାଙ୍ଗ୍‍ଆ ।"

27 ଇୟା ୱେନ୍‌କା ଜିସୁ ମାରି ୱାନି ସିସୁର୍‍ କାଇସରିୟା ପିଲିପି ରାଜିିଦି ଲାକ୍‌ତୁ ମାନି ନାର୍‍କାଙ୍ଗ୍‍ଁ ସନିୱାଲେ ସନିସାର୍‍ଦୁ ଜିସୁ ୱାନି ଶିଶୁରିଙ୍ଗ୍‌ ୱେନ୍‌ବାତାନ୍‌, "ନାନ୍ ଏନ୍‌ ଇଜି ଲୋକ୍‌ଡର୍‌ ଇନିକା ଇଜିନାର୍‍ ?"

28 ✝ଆବେଟ୍‌ ସିସୁର୍‌ ଇର୍ହାର୍‌, "ଏସୋ ଲୋକୁ ଇଜିନାର୍‍ ଡୁବନ୍‌ସିନି ଯୋହନ, ମାରି ଏସୋ ଲୋକୁ ଇଜିନାର୍‍ ନିନ୍‌ ଏଲିୟ୍‌, ମାରି ଏର୍‌ ଏର୍‌ ଇଜିନାର୍‍, ନିନ୍‌ ବାବବାଦିରି ଲୋଇ ଅରେନ୍‍ ବାବବାଦି ।"

29 ✝ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, "ନାନ୍ ଏନ୍‌ ଇଜି ମିର୍‌ ଇନିକା ଇଜିନିଦେର୍‌ ?" ପିତର୍‌ ୱେର୍‌ତାନ୍‌, "ନିନ୍‌ ଆଜିନି ମାପୁରୁତି ପୋକ୍‍ତିମାନି ରକ୍ଷା କିନି କ୍ରିସ୍ତ ।"

30 ଜିସୁ ୱାରିଙ୍ଗ୍‌ ଆଟ୍‌ୱା ମାଟା ୱେର୍‌ତାନ୍‌, "ନାନ୍ ଏନ୍‌ ନା ବିସୟ୍‌ ଏଙ୍ଗ୍‌ବା ଇନ୍‌ମାଟ୍‌ ।"

31 ମାରି ଜିସୁ ସିସୁରିଙ୍ଗ୍‌ ବୁଜାକିଦେଙ୍ଗ୍‍ ଆସ୍‌ତାନ୍‌, "ନାନ୍ ମନୁଷ୍ୟପୁତ୍ର ନାଣ୍ତ କାସ୍ଟୁ ପଇନା ମାରି ପେରି ନେତାର୍‌, ପେରି ଯାଜକର ମାରି ସାସ୍ତ୍ରୀରି ମାଣାନ୍‌ ଦଣ୍ଡ୍‌ ପଇଜି ସାଦେଙ୍ଗ୍‌ ଆନାତ୍‌, ମାତର୍‌ ମୁନେଟି ୱେନ୍‌କା ମାରିଡ଼େସି ଜିବନ୍‌ଆଜି ନିଙ୍ଗ୍‍ନାନ୍‍ ।" 32 ଜିସୁ ଇୟାୱିଜୁ ମାଟା ନେଗେନେକିଜି ସିସୁରିଙ୍ଗ୍‌ ବୁଜାକିତାନ୍‍ । ଆବେଟ୍‌ ପିତର୍‌ ଜିସୁଙ୍ଗୁଁ ଆଇ ବାଡିଦୁ କୁକ୍‌ସି ଅତାନ୍‌ନୋ ୱାନିଙ୍ଗ୍‌ ଇର୍‌ଆନ୍‌, "ପ୍ରବୁ ଇୟାୱାଜା ମାଟା ଇନ୍‍ମା ।" 33 ମାତର୍‌ ଜିସୁ ୱାନି ସିସୁରିଙ୍ଗ୍‌ ସୁଡ଼୍‌ଜି ପିତର୍‍ତିଙ୍ଗ୍‍ ଇର୍‌ଆନ୍‌, "ନା ଲାକ୍‌ତୁରାନ୍‌ ଆକ ଆଆ, ସୟତାନ୍‍, ଇରିଙ୍ଗ୍‌ ନିନ୍‌ ମାପୁରୁତି ବିସୟ୍‌ ଅଡ଼୍‍ବିଏଣ୍ତା ଲୋକା ବିସୟ୍‌ ଅଡ଼୍‌ବିଜିନି ।"

34 ✝ଆୟାୱେନ୍‌କା ଜିସୁ ୱାନି ସିସୁରିଙ୍ଗ୍‌ ମାରି ଉଣ୍ତାତିମାର୍‍ଇ ଲୋକାଙ୍ଗ୍‌ ଲାକ୍‌ତୁ କୁକ୍‌ସି ଇର୍‌ଆନ୍‌, "ଏନ୍‍ବା ନାୱାଲେ ୱାଦେଙ୍ଗ୍‌ ବଦା କିନାନ୍‌," ୱାଣ୍ତ୍ରୁ ନିଜେ ନାନ୍ ଇନିକା ସିଲେ ଇଜି ଅଡ଼୍‍ବିପିନ୍‍, ୱାଣ୍ତ୍ରୁ ନା ଉଣ୍ତିଙ୍ଗ୍‌ ଦୁକ୍‍ ମାରି ସାନିକା ବଦା କିଜି ୱାଲେ ୱାଲେ ରାପିନ୍‍ । 35 ଏନ୍‍ବା ନିଜେଦି ଜିବନ୍‌ତିଙ୍ଗ୍‌ ରକିୟା କିଦେଙ୍ଗ୍‌ ବଦା କିନାନ୍‌, ୱାଣ୍ତ୍ରୁ ୱାନି ଜିବନ୍‌ ଆରା କିନାନ୍‌; ମାତର୍‌ ଏନ୍‌ ନା ଉଣ୍ତିଙ୍ଗ୍‌ ମାରି ଇୟା ସୁସମାଚାର୍‌ ଉଣ୍ତିଙ୍ଗ୍‌ ନିଜେଦି ଜିବନ୍‌ ସିନାନ୍‍, ୱାଣ୍ତ୍ରୁ ୱାନି ଜିବନ୍‌ ରକିୟା କିନାନ୍‌ । 36 ମାରି, ଜଦି ଅରେନ୍‌ ଲୋକୁ‌ ସାରାଦୁନିଆଦିଙ୍ଗ୍‌ ଜିଣାଜି ୱାନି ଜିବନ୍‌ ଆରା କିନାନ୍‌, ଲୋକୁ ୱାନି ଇନିକା ଲାଭ୍‍ ଆନାତ୍‌ ? 37 ମାରି, ଲୋକୁ ୱାନି ଜିବନ୍‍ତିଙ୍ଗ୍ ଡ଼େସି ପ‍ଇଦେଙ୍ଗ୍‌, ଇନିକା ସିଦେଙ୍ଗ୍‍ ଆଟ୍‍ନାନ୍‍ ? 38 ଜଦି ଏନ୍‍ବା ନା ଉଣ୍ତିଙ୍ଗ୍‌ ନା ସୁସମାଚାର୍‌ ଉଣ୍ତିଙ୍ଗ୍‌ ଇୟା ଦୁନିଆଦି ଦାରିପାଣିକିନି ଲୋକାମାଣାନ୍‌ ମାରି ପାପି ଲୋକ୍‌ତି ଲାକ୍‌ତୁ ନା ବାକ୍ୟ ବିସୟ୍‌ତାନ୍ ସେମାର୍‌ ଆନାନ୍‌, ମନୁଷ୍ୟପୁତ୍ର ଏସ୍ତିୱାଲେ ପବିତ୍ର ଦୁତ୍‍କାୱାଲେ ୱାନି ବୁବାସିଦି ମହିମାଦାନ୍‌ ମାରିଡ଼େସି ୱାନାନ୍‌, ଆୟାୱାଲେ ୱାନ୍‍ବା ଆୟା ବିସୟ୍‌ତାନ୍ ସେମାର୍‌ କିନାନ୍‌ ।