କ୍ରିସ୍ଟାନ୍ ତଡ଼ାନ୍କା ବିରୁଦ୍ତାନ୍ ତାଗ୍ଇପାଣି
1 ମି ଲୋଇରାନ୍ ଆମାୱାନି ବିରୁଦ୍ତାନ୍ ମାଟା ମାର୍ହିଙ୍ଗ୍, ଆର୍ତିଙ୍ଗ୍ ୱାନ୍ କ୍ରିସ୍ଟାନ୍ତି ବିସ୍ବାସ୍ରି ଲାକ୍ତୁ ସଲ୍ଏଣ୍ଗା ଅବିସ୍ବାସ୍ତି ବିଚାର୍କିନିୱାରି ଲାକ୍ତୁ ସନି ଉଣ୍ତିଙ୍ଗ୍ ଏଣ୍ତେସ୍ ସାସ୍ କିଜିନାନ୍ ? 2 ମାପୁରୁଦି ଲୋକୁ ଦୁନିଆଦି ବିଚାର୍ କିନାର୍ ଇଜି ଇୟା ମାଟା ଇନିକା ମିର୍ ନେସ୍ଇଦେର୍ ? ମିର୍ ଜଦି ଦୁନିଆଦି ବିଚାର୍ କିଦେଙ୍ଗ୍ ଆଟ୍ନିଦେର୍, ଆର୍ତିଙ୍ଗ୍ ମିର୍ ଇନିକା ଇୟା ଇସ୍ରି ବିସୟ୍ତିଙ୍ଗ୍ ବିଚାର୍ କିଦେଙ୍ଗ୍ ଆଟ୍ଇଦେର୍ ? 3 ମାଡ୍ ଜେ ମୁସ୍କୁପୁର୍ତି ଦୁତ୍କା ବିଚାର୍ କିନାପ୍, ଇକା ଇନିକା ମିର୍ ନେସ୍ଇଦେର୍ ? ଆର୍ତିଙ୍ଗ୍ ଦୁନିଆଦି ମାଟେଙ୍ଗ୍ୱିଜୁ ବିଚାର୍ କିନିକା, ମା ଉଣ୍ତିଙ୍ଗ୍ ନାଣ୍ତ ଉସାସ୍ ଆନାତ୍ ସିଲେ ? 4 ଇୟାୱିଜୁ ଇସ୍ରି ବିସୟ୍ତିଙ୍ଗ୍ ମାଟାୱାର୍ଗିନି ଉଣ୍ତିଙ୍ଗ୍ ଏନ୍ଦା ମଣ୍ତଲିଦୁ ଆମାକାର୍ ସନ୍ମାନ୍ ଆଏର୍, ଆୟାୱାଜା ବିଚାର୍ ଲୋକା ଲାକ୍ତୁ ସୋଲ୍ସିନିଦେର୍ ? 5 ଇୟାଉଣ୍ତିଙ୍ଗ୍ ମିର୍ ସେମାର୍ ଆନିକା ମାନାତ୍ । କ୍ରିସ୍ତବିସ୍ବାସ୍ସି ତଡ଼ାନ୍ତିମାନୁ ସୋସିମାନି ଜଗଡ଼ାଦିଙ୍ଗ୍ ତିର୍ କିଦେଙ୍ଗ୍ ସତ୍ତାନ୍ ମି ମଣ୍ତଲିଦୁ ଏନ୍ ସିଲିତିଙ୍ଗ୍ ଏନ୍ ଅରେନ୍ ବୁଦିଦି ଲୋକ୍ ମାନାନ୍ । 6 ମାତର୍ ତଡ଼ାନ୍ ମାରି ଅରେନ୍ ତଡ଼ାନ୍ତି ବିରୁଦ୍ତାନ୍ ନିୟ୍ୟାୟ୍ କିନିବାଡିଦୁ ୱେର୍ନାନ୍, ଆକା ମାରି ଅବିସ୍ବାସ୍ସିର୍ ଆୟାତାନି ବିଚାର୍ କିଜିନାର୍ ।
7 ମି ଲୋଇ ସାଲାତିମାନି ଜାଟିଜଗଡ଼ା ୱେର୍ସିନାତ୍ ଜେ । ମିର୍ ଜେ ନିଜେନିଜେଦି ବିରୁଦ୍ତାନ୍ ନିୟ୍ୟାୟ୍ କିନିବାଡିଦୁ ୱେର୍ସିନିଦେର୍, ଆବେନ୍ ମିର୍ ପୁରା ଦୋସି । ତାଗ୍ଇପାଣି କିନି ବାଦ୍ଲୁ ବରଂ ଅନ୍ୟାୟ୍ ସାସ୍ କିଜି ନାସ୍ଟୁ ଆନିକା, ମି ଉଣ୍ତିଙ୍ଗ୍ ନେଗେତ୍ ସିଲେ ନୋ ? 8 ଇକା କିନି ବାଦ୍ଲୁ ନିଜେ ନିଜେଦି ଉଣ୍ତିଙ୍ଗ୍ ଇୟାୱାଜା ନିଜେଦି ତଡ଼ାନ୍କା ଉଣ୍ତିଙ୍ଗ୍ ଅନ୍ୟାୟ୍ କିଜି ୱାରିଙ୍ଗ୍ ସେମାର୍ କିଜିନିଦେର୍ । 9 ଅଦାର୍ମୁଦିକାର୍ ଜେ ମାପୁରୁଦି ରାଜିଦି ଅଦିକାର୍ତିକାର୍ ଆଏର୍, ଇକା ଇନିକା ମିର୍ ନେସ୍ଇଦେର୍ ? ଇୟା ବିସୟ୍ତାନ୍ ମିର୍ ବାୟାବେବ୍ରି ଆମାଟ୍, ତାଗ୍ଇପାଣି, ବମା ପୁଜାକିନିକାନ୍, ଦାରିପାଣି, ବେସ୍ୟା, ତାଗ୍ଇପାଣିଦୁ ତେବାତିମାନି ଲୋକୁ 10 ମାରି ଡଙ୍ଗାଁର୍ଏନ୍, ଦନ୍ଆସା, ମଦୁଆ, ସୁରିୱାର୍ଗିନିକା ମାରି ଆଇ ଲୋକା ଜିନିସ୍କୁ ଡଙ୍ଗାଁକିନିକାର୍, ଇୟାକାର୍ ମାପୁରୁଦି ରାଜିଦୁ ବାଗ୍ ପୟ୍ଏର୍ । 11 ମାରି, ମି ମାଣ୍କୁ ଏନ୍ ଏନ୍ ଆୟାୱାଜା ମାରିଇଦେର୍, ମାତର୍ ଇଲେଇ ମିର୍ ପାପ୍ତାନ୍ ନରାଆୟ୍ ଆଜି ମାପୁରୁଦି ଉଦେସ୍ତାନ୍ ମାନିଦେର୍ । ମାରି ପ୍ରବୁ ଜିସୁ କ୍ରିସ୍ତ ମାରି ପବିତ୍ରଆତ୍ମାଦାନ୍ ମିର୍ ଦାର୍ମୁଦିକାନ୍ ଇଜି ଲେକିସ୍କିଆତିମାନିଦେର୍ ।
ନିଜେଦି ମେନ୍ଦଲ୍ତିଙ୍ଗ୍ ମାପୁରୁଦି ଗୌରବ୍ତି ଉଣ୍ତିଙ୍ଗ୍ ବ୍ୟବ୍ହାର୍ କିଦୁ
12 ୬:୧୨ ୧ କରିନ୍ତିୟ ୧୦:୨୩. ଏନ୍ ୱେର୍ତେଙ୍ଗ୍ ଆଟ୍ନାନ୍, "ୱିଜୁ ବିସୟ୍ କିନି ଉଣ୍ତିଙ୍ଗ୍ ନାଙ୍ଗିଁ ଅଦିକାର୍ ସିଆୟ୍ଆତାମାନାତ୍ ।" ସତ୍ମାଟା, ମାତର୍ ୱିଜୁ ବିସୟ୍ ମି ଉଣ୍ତିଙ୍ଗ୍ ନେଗେତ୍ ସିଲେ । ୱିଜୁ ବିସୟ୍ ପୁରା କିଦେଙ୍ଗ୍ ନା ଅଦିକାର୍ ମାନାତ୍ ଇଜି ନାଙ୍ଗିଁ ଆଡ୍ଗି କିନି ଉଣ୍ତିଙ୍ଗ୍ ନାନ୍ ଏଙ୍ଗ୍ ଏସ୍କାଙ୍ଗ୍ ସୁଜୋଗ୍ ସିଏ । 13 ଆଇକାନ୍ ଏନ୍ ୱେର୍ତେଙ୍ଗ୍ ଆଟ୍ନାନ୍, "କାଦି ପଟାଦି ଉଣ୍ତିଙ୍ଗ୍, ମାରି ପଟା କାଦିଦି ଉଣ୍ତିଙ୍ଗ୍ ଟିକ୍ ।" ସତ୍ମାଟା, ମାତର୍ ମାପୁରୁ ରୁଣ୍ତିୱାନିକାଙ୍ଗ୍ବା ନାସ୍ଟୁ କିନାନ୍ । ମେନ୍ଧଲ୍ ଦାରିପାଣିଦି ଉଣ୍ତିଙ୍ଗ୍ ସିଲେ, ମାତର୍ ପ୍ରବୁଦି ସେବାପାଣିଦି ଉଣ୍ତିଙ୍ଗ୍ ବ୍ୟବ୍ହାର୍ ଆପିତ୍, ଇରିଙ୍ଗ୍ ପ୍ରବୁ ମେନ୍ଦଲ୍ତି ଉଣ୍ତିଙ୍ଗ୍ ଦରକାର୍ମାନିକା ପୁରା କିନାନ୍ । 14 ମାପୁରୁ ପ୍ରବୁଙ୍ଗୁଁ ସାତିମାଣାନ୍ ମାରିଡ଼େସି ଜିବନ୍କିଜି ନିକ୍ତାମାନାନ୍, ମାରି, ନିଜେଦି ସାକ୍ତିଦାନ୍ ୱାନ୍ ମାଙ୍ଗିଁ ବା ମାରିଡ଼େସି ଜିବନ୍କିଜି ନିକ୍ନାନ୍ ।
15 ମି ମେନ୍ଧଲ୍ ଜେ କ୍ରିସ୍ତଦି ମେନ୍ଦଲ୍ତି ଉନ୍ଡ୍ରି ବାଗ୍ ୱାଜା, ଇକା ଇନିକା ନେସ୍ଇଦେର୍ ? ଆର୍ତିଙ୍ଗ୍ ନାନ୍ ଇନିକା କ୍ରିସ୍ତଦି ମେନ୍ଦଲ୍ତିଙ୍ଗ୍ ଆସ୍ସିସୋଲ୍ସି ବେସ୍ୟାଦି ମେନ୍ଧଲ୍ କିନା ? ଆକା ଏସ୍କାଙ୍ଗ୍ବା ଆମାକିତ୍ । 16 ମାରି ଏନ୍ ବେସ୍ୟାଦି ୱାଲେ ମିସାନାର୍, ୱାନ୍ ୱାନି ୱାଲେ ଉନ୍ଡ୍ରେ ମେନ୍ଦଲ୍ନେ ଆନାର୍, ଇକା ଇନିକା ମିର୍ ନେସ୍ଇଦେର୍ ? ଇରିଙ୍ଗ୍ ସାସ୍ତ୍ରଦୁ ନେଗେନ୍ତାନ୍ ରାସ୍ତା ମାନାତ୍, "ଆୟା ରିଏର୍ ଅରେନ୍ନେ ଆନାର୍ ।" 17 ମାତର୍ ଏନ୍ ପ୍ରବୁଦି ୱାଲେ ମିସାନାନ୍, ୱାନ୍ ୱାନି ୱାଲେ ଆତ୍ମାଦୁ ଉନ୍ଡ୍ରେ ଆନାତ୍ ।
18 ଦାରିପାଣିଦାନ୍ ଆକ ମାନ୍ଡ୍ରୁ । ଆଇ ଇନି ପାପ୍ ଲୋକ୍ତି ମେନ୍ଦଲ୍ତିଙ୍ଗ୍ କାରାପ୍ କିଏତ୍ । ମାତର୍ ଏନ୍ ଦାରିପାଣି କିନାନ୍, ୱାନ୍ ନିଜେଦି ମେନ୍ଦଲ୍ତି ବିରୁଦ୍ତାନ୍ ପାପ୍ କିନାନ୍ । 19 ୬:୧୯ ୧ କରିନ୍ତିୟ ୩:୧୬; ୨ କରିନ୍ତିୟ ୬:୧୬.ଇକା ଇନିକା ମିର୍ ନେସ୍ଇଦେର୍ ? ମାରି ମି ମେନ୍ଧଲ୍ ଜେ ମାପୁରୁଦିମାଣାନ୍ ପୟ୍ତି ମି ଜିବନ୍ତୁବାସାନି ପବିତ୍ରଆତ୍ମାଦି ମନ୍ଦିର୍, ମାରି ମିର୍ ନିଜେ ନିଜେଦି ଆଇଦେର୍, ମାତର୍ ମାପୁରୁଦିକାର୍ । 20 ୱାନ୍ ମିଙ୍ଗିଁ ନାଣ୍ତ ଦାରା ସିଜି କଟାମାନାନ୍; ଆଦେଙ୍ଗ୍ ମି ମେନ୍ଦଲ୍ତାନ୍ ମାପୁରୁଦି ଦନ୍ୟବାଦ କିଦୁ ।
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)