୧ କରିନ୍ତିୟ 11

1 ✝ ୧୧:୧ ୧ କରିନ୍ତିୟ ୪:୧୬; ପିଲିପିୟ ୩:୧୭. ନାନ୍‌ ଏଣ୍ତେସ୍‌ କ୍ରିସ୍ତଦି ୱେନ୍‌କାସୋର୍‌ଇ ୱାଜା ମିର୍‌ ବା ଆୟାୱାଜା ନା ୱେନ୍‌କା ରାଦୁ ।

ଉନ୍‌ଡ୍ରେମାନୁ ଉଣ୍ତାନି ଉପାସନା ମାରି ତାଲାଦୁପିଡ଼୍‌କାନିକା

2 ମିର୍‌ ଜେ ୱିଜୁ ବିସୟ୍‌ତୁ ନାଙ୍ଗିଁ ଏତ୍‌ କିନିଦେର୍‌ ମାରି ନାନ୍‌ ମିଙ୍ଗିଁ ଜେ ୱିଜୁ ସିକିୟା ସିତାମାନା, ଆୟାୱିଜୁ ମାନାଜିନିଦେର୍‌, ଇୟାଉଣ୍ତିଙ୍ଗ୍‌ ନାନ୍‌ ମିଙ୍ଗିଁ ପ୍ରସଂସା କିଜିନା । 3 ମାତର୍‌ କ୍ରିସ୍ତ ଜେ ୱିଜେରି ମେମାର୍‌ଙ୍ଗାଁ ତାଲାଦି ୱାଜା ମାରି ମେମାର୍‌ଏନ୍‌ ଜେ ଆଡ଼୍‌ସିଦି ତାଲାଦି ୱାଜା ମାରି ମାପୁରୁ ଜେ କ୍ରିସ୍ତଦି ତାଲାଦି ୱାଜା, ଇକା ମିର୍‌ ନେସ୍‌ତୁ ଇଜି ନା ଇଚ୍ଛା । 4 ଆମା ମେମାର୍‌ଏନ୍‌ ନିଜେଦି ତାଲାଦୁ ପିଡ଼ିକାଜି ପାର୍‌ତାନା କିନାନ୍‌ ମାରି ମାପୁରୁଦି ବାକ୍ୟ ୱେର୍‌ନାନ୍‌, ୱାନ୍‌ କ୍ରିସ୍ତଙ୍ଗ୍‌ ଅପମାନ୍‌ କିନାନ୍‌ । 5 ମାତର୍‌ ଆମା ଆଇମା ନିଜେଦି ତାଲାଦୁ ପିଡ଼ିକାଏଣ୍‌ଗା ପାର୍‌ତାନା କିନାତ୍‌ ମାରି ମାପୁରୁଦି ବାକ୍ୟ ୱେର୍‌ନାତ୍‌, ୱାଦ୍ ୱାନି କନ୍‌ଲିଙ୍ଗ୍‌ ଅପମାନ୍‌ କିନାତ୍‌ । ଆୟାନାନି ଆଇମା ତାନି ତାଲା ଟାଙ୍ଗିଁରି ଆନି ସାମାନ୍‌ । 6 ଜଦି ଏମେ ଆଇମା ତାଲାଦୁ ପିଡ଼ିକାଏତ୍‌, ଆର୍‌ତିଙ୍ଗ୍‌ ତାନି ତାଲାଦି କୁକୁଟି ବା କୟ୍‌ଜପୋକ୍‌ତି; ମାତର୍‌ ଆଇମାଦି ଉଣ୍ତିଙ୍ଗ୍‌ କୁକୁଟି କୟ୍‌ନିକା ମାରି ତାଲା ଟାଙ୍ଗିଁରି ଆନିକା ସେମାର୍‌, ଆର୍‌ତିଙ୍ଗ୍‌ ୱାନ୍‌ ତାଲା ପିଡ଼ିକାପିତ୍‌ । 7 ମେମାର୍‌ଏନ୍‌ ମାପୁରୁଦି ମୁର୍ତିୱାଜା ମାରି ଗୌରବ୍‌ଦି ୱାଜା ଆତିଙ୍ଗ୍‌ ସତ୍‌ତାନ୍‌ ୱାନି ତାଲା ପାଡ଼ାକ୍‌ନିକା ଦର୍‌କାର୍‌ ସିଲେ, ମାତର୍‌ ଆଇମା ମେମାର୍‌ଏନ୍‌ତି ଗୌରବ୍‌ତି ୱାଜା । 8 ଇରିଙ୍ଗ୍‌ ମେମାର୍‌ଏନ୍‌ ଆଇମାଦିମାଣୁକୁ ତିଆର୍‌ ଆଏନ୍‍, ମାତର୍‌ ଆଇମା ମେମାର୍‌ଏନ୍‌ତିମାଣୁକୁ ତିଆର୍‌ ଆତାମାନାତ୍‌ । 9 ମାରି ମେମାର୍‌ଏନ୍‌ତି ତିଆର୍‌କିନିକା ଆଇମାଦି ଉଣ୍ତିଙ୍ଗ୍‌ ଆଏତାତ୍‌; ମାତର୍‌ ମେମାର୍‌ଏନ୍‌ତି ଉଣ୍ତିଙ୍ଗ୍‌ ଆଇମାଦି ତିଆର୍‌ ଆତାତ୍‌ । 10 ଇୟାଉଣ୍ତିଙ୍ଗ୍‌ ମେମାର୍‌ଏନ୍‌ତି ଅଦିକାର୍‌ ଆଇମାଦି ମୁସ୍‌କୁ ମାନାତ୍‌, ଇୟାତାନି ନେଗେନ୍‌ତାନ୍‌ ସୁଡ଼ୁନି ୱାଜା, ଦୁତ୍‌କା ଉଣ୍ତିଙ୍ଗ୍‌ ଆଇମା ତାଲାଦୁ ପିଡ଼ିକାନିକା ଟିକ୍‌ । 11 ମାରିବା ପ୍ରବୁଦିମାନୁ ମେମାର୍‌ଏନ୍‌ତିମାଣୁକୁ ଆଇମା ୱେର୍‌ଏ ସିଲେ ମାରି ଆଇମାଦିମାଣୁକୁ ମେମାର୍‌ଏନ୍‌ ୱେର୍‌ଏ ସିଲେ । 12 ଇରିଙ୍ଗ୍‌ ଆଇମା ଏଣ୍ତେସ୍‌ ମେମାର୍‌ଏନ୍‌ତିମାଣୁକୁ ତିଆର୍‌ ଆତାତ୍‌, ମେମାର୍‌ଏନ୍‌ ଆଇମାଦିମାଣୁକୁ ଜନମ୍‍ ଆତାମାନାନ୍‌ । ମାତର୍‌ ୱିଜୁ ବିସୟ୍‌ ମାପୁରୁଦିମାଣୁକୁ ତିଆର୍‌ ଆତାତ୍‌ ।

13 ମିର୍‌ ନିଜେନିଜେ ବିସାର୍‌ କିଦୁ, ତାଲାଦୁ ପିଡ଼ିକାଏଣ୍‌ଗା ମାପୁରୁଦି ଲାକ୍‌ତୁ ପାର୍‌ତାନା କିନିକା ଆଇମାଦି ଉଣ୍ତିଙ୍ଗ୍‌ ଇନିକା ନେଗେତ୍‌ ? 14 ଦୁନିଆଦି ଗୁଣୁ ଇନିକା ମିଙ୍ଗିଁ ସିକିୟା ସିଏତ୍‌ ଜେ, ମେମାର୍‌ଏନ୍‌ତିଙ୍ଗ୍‌ ନିର୍‌ଇ କୁକୁଟି ଡ଼ିସ୍‌ତିଙ୍ଗ୍‌ ୱାନି ଉଣ୍ତିଙ୍ଗ୍‌ ସେମାର୍‌ତିମାଟା, 15 ମାତର୍‌ ଆଇମାଦିଙ୍ଗ୍‍ ନିର୍‌ଇ କୁକୁଟି ଡ଼ିସ୍‌ତିଙ୍ଗ୍‌ ତାନି ଉଣ୍ତିଙ୍ଗ୍‌ ଆକା ନେଗିମାଟା ? ଇୟା ନିର୍‌ଇ କୁକୁଟି ତାନି ତାଲାଦି ସୁନ୍ଦର୍‌ତି ଉଣ୍ତିଙ୍ଗ୍‌ ସିଆୟ୍‌ଆତାମାନାତ୍‌ । 16 ମାତର୍‌ ଏନ୍‌ ଜାଟିଜଗଡ଼ା କିଦେଙ୍ଗ୍‌ ଇଚ୍ଛା କିତିଙ୍ଗ୍‌ ୱାନ୍‌ ନେସ୍‌ନି ଜେ, ମାମାନୁ ଇୟାୱାଜାଦି ରିତିନିୟମ୍‌ ସିଲେତ୍‌, ମାରି ମାପୁରୁଦି ଉପାସନା ମଣ୍ତଲିଆଙ୍ଗାଁ ସିଲେତ୍‌ ।

ପ୍ରବୁବୋଜ

17 ମାତର୍‌ ମିର୍‌ ଉପାସନା ଉଣ୍ତିଙ୍ଗ୍‌ ଉନ୍‌ଡ୍ରେମାନୁ ଆନିୱାଲେ ଜେ, ଇକା ମି ଉଣ୍ତିଙ୍ଗ୍‌ ନେଗିକା ଆଏଣ୍‌ଗା ତାଗ୍‌ଇକା ଆଜିନାତ୍‍, ଇବେନୁ ନାନ୍‌ ମିଙ୍ଗିଁ ପ୍ରସଂସା କିଦେଙ୍ଗ୍‌ ଆଟ୍‌ଏଣ୍‌ଗା ଇୟା ଆଦେସ୍‌ ସିଜିନା । 18 ଇରିଙ୍ଗ୍‌ ଆଗ୍‍ଡ଼ିନେ ନାନ୍‌ ୱେନ୍‌ଜିନା ଜେ, ମଣ୍ତଲିଦୁ ମିର୍‌ ଉନ୍‌ଡ୍ରେମାନୁ ଆନିୱାଲେ ମିମାନୁ ଦଲ୍‌ ଏର୍‌ପିସିସାନିକା ଗଟାଜିନାତ୍‌, ମାରି ନାନ୍‌ ଏସ ଇସାବ୍‌ତାନ୍‌ ଇକା ବିସ୍‌ବାସ୍‌ କିଜିନା । 19 ଏଣ୍ତେସ୍‌ ମିମାନୁ ପରିକାଦୁ ଜିଣାତି ଲୋକୁ ୱେଙ୍ଗିଁନାର୍‌, ଇୟାଉଣ୍ତିଙ୍ଗ୍‌ ମିମାନୁ ଦଲ୍‌ ଏର୍‌ପିସିସାନିକା ପୁରା ଗଟାନାତ୍‌ । 20 ମିର୍‌ ଉନ୍‌ଡ୍ରେ ଦଲ୍‌ ୱାଜା ଉଣ୍ତାଜି ଆମା ଉଣିମାନୁ ମିସାଜିନିଦେର୍‌, ଆକା "ପ୍ରବୁବୋଜ ଆଏତ୍‍," 21 ଇରିଙ୍ଗ୍‌ ନାସ୍ତିୱାଲେ ମିର୍‌ ଉଣି ବେଡ଼ାଦୁ ୱିଜିଦେର୍‌ ଆଇୱାନିଙ୍ଗ୍‍ କାପ୍‌କିଏଣ୍‌ଗା ନିଜେ ନିଜେଦି କାଦି ଉଣିଦେର୍‌, ଆୟାଉଣ୍ତିଙ୍ଗ୍‌ ଅରେନ୍‍ ବାଙ୍ଗାଁଦୁ ତେବାନାନ୍‌ ମାରି ଆଇକାନ୍‍ ଅରେନ୍‍ ସୋସ୍‌ନା ତେବାନାନ୍‌ । 22 ମିଙ୍ଗିଁ ଇନିକା ଉଣିତିନି ଉଣ୍ତିଙ୍ଗ୍‌ ନିଜେଦି ଇଲୁ ସିଲେତ୍‌ ? ମାରି ମିର୍‌ ଇନିକା ମାପୁରୁଦି ମଣ୍ତଲିଦିଙ୍ଗ୍‌ ସେମାର୍‌ କିଜିନିଦେର୍‌, ମାରି ଆମାୱାରିଙ୍ଗ୍‌ ଇନିକା ବା ସିଲେତ୍‌, ୱାରିଙ୍ଗ୍ ସେମାର୍‌ କିଜିନିଦେର୍‌ ? ନାନ୍‌ ମିଙ୍ଗିଁ ଇୟା ବିସୟ୍‌ତାନ୍‌ ଇନିକା ୱେର୍‌ନା ? ଇନିକା ମିଙ୍ଗିଁ ପ୍ରସଂସା କିନା ? ଇୟା ବିସୟ୍‌ତାନ୍‌ ନାନ୍‌ ମିଙ୍ଗିଁ ପ୍ରସଂସା କିଦେଙ୍ଗ୍‌ ଆଟ୍‍ଏ ।

23 ଇରିଙ୍ଗ୍‌ ନାନ୍‌ ପ୍ରବୁଦିମାଣୁକୁ ପୟ୍‌ତିମାନି ଆମା ସିକିୟା ଆକା ମିଙ୍ଗିଁ ୱେର୍‌ସିନା, ଆକା ସାତ୍ରୁରି କିୟୁଦୁ ସର୍‌ପେ ଆନି ନାଡ଼ା ପ୍ରବୁ ଜିସୁ ରୁଟି ଅସି 24 ମାପୁରୁଙ୍ଗୁଁ ଦନ୍ୟବାଦ୍‌ ସିଜି ଆକା ରୁକୁସି ଇର୍ହାନ୍‌, "ଇକା ମି ଉଣ୍ତିଙ୍ଗ୍‌ ନା ମେନ୍ଧଲ୍‍; ନାଙ୍ଗିଁ ଏତ୍‌କିନି ଉଣ୍ତିଙ୍ଗ୍‌ ଇକା କିଦୁ ।" 25 ଆୟାୱାଜା ତିର୍‌ଇ ୱେନ୍‌କା ୱାନ୍‌ ଉଣି ଡୁବାଇ ବା ଆସ୍‌ସି ଇର୍ହାନ୍‌, ଇୟା ଅଙ୍ଗୁର୍‌ରସ ନା ନେତେର୍‌ତାନ୍‌ ତିଆର୍‌ଆତିମାନି ମାପୁରୁଦି ପୁନି ନିୟମ୍‌; ମିର୍‌ ଏସ ଦେବେଙ୍ଗ୍‌ ଇବେଣ୍‌କୁ ଉଣିଦେର୍‌, ନାସ ଦେବେଙ୍ଗ୍‌ ନାଙ୍ଗିଁ ଏତ୍‌କିନି ଉଣ୍ତିଙ୍ଗ୍‌ ଇକା କିଦୁ ।

26 ଇରିଙ୍ଗ୍‌ ଏସ ଦେବେଙ୍ଗ୍‌ ମିର୍‌ ଇୟା ରୁଟି ତିନିଦେର୍‌ ମାରି ଇୟା ଅଙ୍ଗୁର୍‌ରସତିଙ୍ଗ୍‌ ଉଣିଦେର୍‌, ନାସ ଦେବେଙ୍ଗ୍‌ ମିର୍‌ ପ୍ରବୁଦି ୱାନିଦିନ୍‌ ସାନ୍ଦି ୱାନି ସାତି ମାଟା ୱେର୍‍ସି ମାନିଦେର୍‌ । 27 ମାରି, ଏନ୍‌ଆପିନ୍‌ ଜଗ୍‌ସିଲି ୱାଜାଦାନ୍‌ ପ୍ରବୁଦି ଇୟା ରୁଟି ତିନାନ୍‌ ମାରି ଇୟା ଡୁବାୟ୍‌ତିଅଙ୍ଗୁର୍‌ରସ ଉଣାନ୍‌, ୱାନ୍‌ ପ୍ରବୁଦି ମେନ୍ଦଲ୍‌ତିଙ୍ଗ୍‌ ନି ନେତେର୍‌ତି ବିରୁଦ୍‌ତାନ୍‌ ପାପ୍‌ କିନାନ୍‌ । 28 ମାତର୍‌ ଲୋକ୍‌ ନିଜେଦିଙ୍ଗ୍‌ ପରିକା କିପିନ୍‌, ମାରି ଆୟାୱାଜା ଦାନ୍‌ ଇୟା ରୁଟି ତିନିନ୍‌ ମାରି ଇୟା ଡୁବାୟ୍‌ତିଅଙ୍ଗୁର୍‌ରସ ଉଣିନ୍‍ । 29 ଇରିଙ୍ଗ୍‌ ଆମା ଲୋକ୍‌ ପ୍ରବୁଦି ମେନ୍ଦଲ୍‌ତିଙ୍ଗ୍‌ ସତ୍‌ତି ଅର୍ତ ବୁଜାଏଣ୍‌ଗା ତିନାନ୍‌ ମାରି ଉଣାନ୍‌, ୱାନ୍‌ ପୁରା ଦଣ୍ତ୍‌ ପୟ୍‌ନାନ୍‌ । 30 ଆୟାଉଣ୍ତିଙ୍ଗ୍‌ ମି ମାଣ୍‌କୁ ନେର୍‌ରୁ ଗାଦିଲୋକ୍‌ ସାକିସିଲିକାର୍‌, ରୋଗ୍‌ତିକାର୍‌ ମାରି ଗାଦିଲୋକ୍‌ ସାତାମାନାର୍‌ । 31 ଜଦି ଆଗ୍‍ଡ଼ିରାନ୍‍ ମାପୁ ନିଜେ ନିଜେଦି ବିଚାର୍‌ କିତିଙ୍ଗ୍‌, ଆର୍‌ତିଙ୍ଗ୍‌ ମାଡୁ ମାପୁରୁଦି ଦଣ୍ତ୍‌ ବୋଗାଇତିକା ମାନ୍ଧି । 32 ମାତର୍‌ ଦୁନିଆଦି ୱିଜୁଦିନ୍‌ତି ଦଣ୍ଡ୍‌ତାନ୍‌ ମାଙ୍ଗିଁ ରକ୍‌ୟା କିନି ଉଣ୍ତିଙ୍ଗ୍‌ ପ୍ରବୁ ମାଙ୍ଗିଁ କାସ୍ଟୁ ସିଜି ବିସାର୍‌ କିଜିନାନ୍‌ ।

33 ମାରି, ଏ ନା ତଡ଼ାନ୍‌କୁ, ମିର୍‌ ପ୍ରବୁବୋଜ ଉଣି ଉଣ୍ତିଙ୍ଗ୍‌ ଉନ୍‌ଡ୍ରେମାନୁ ଉଣ୍ତାନି ୱାଲେ ନିଜେନିଜେଦି ଉଣ୍ତିଙ୍ଗ୍‌ କାପ୍‌କିଦୁ । 34 ମି ଉଣ୍ତାନିକା ଏଣ୍ତେସ୍‌ ମାପୁରୁଦି ଦଣ୍ତ୍‌ତି ଉଣ୍ତିଙ୍ଗ୍‌ ଆଏତ୍‍, ଆୟାଉଣ୍ତିଙ୍ଗ୍‌ ଜଦି ଏନ୍‌ ବାଙ୍ଗାଁ, ଆର୍‌ତିଙ୍ଗ୍‌ ୱାନ୍‌ ଇନ୍‌ଡ୍ର ଉଣୁଜ ରାପିନ୍‌, ତେବାତିମାନି ବିସୟ୍‌କୁ ୱିଜୁ ନାନ୍‌ ସରିଙ୍ଗ୍‌ ବୁଜାନା ।