1 ନାନ୍‌ ଇନିକା ଅରେନ୍‍ ଅଦିକାର୍‌ତି ଲୋକ୍‌ ଆଏ ? ନାନ୍‌ ଇନିକା ଅରେନ୍‍ ପ୍ରେରିତ ସିସୁ ଆଏ ? ନାନ୍‌ ଇନିକା ମା ପ୍ରବୁ ଜିସୁଙ୍ଗୁଁ ସୁଡ଼ୁଏ ? ମିର୍‌ ଇନିକା ପ୍ରବୁଦିମାନୁ ନା କିତିମାନି ପାଣିଦି ପଲ୍‌ ଆଏତ୍‍ ? 2 ଆଇକାର୍‌ ନାଙ୍ଗିଁ ପେରିତ ସିସୁ ଇଜି ମାନାଏତିଙ୍ଗ୍‌ ବା ମିର୍‌ ମାନାତି ମାନିଦେର୍‌, ଇରିଙ୍ଗ୍‌ ପ୍ରବୁଦି ୱାଲେ ମି ଜିବନ୍‌ତି ମିସାନି ଉଣ୍ତିଙ୍ଗ୍‌ ନା ପ୍ରେରିତ ପାର୍‌ମାଣ୍‌ ମିର୍‌ ପୟ୍‌ତିମାନିଦେର୍‌ ।

3 ନ୍ୟାୟ୍‌କିନିୱାରିଙ୍ଗ୍‌ ନାନ୍‌ ୱେର୍‌ନିକା ଇକା । 4 ନା ପାଣିଦି ଉଣ୍ତିଙ୍ଗ୍‌ କାଦି ମାରି ଏର୍‌ରୁ ଉଣି ଅଦିକାର୍‌ ଇନିକା ସିଲେତ୍‌ ? 5 ଆଇ ୱିଜେରେ ପ୍ରେରିତ ସିସୁ, ପିତର୍‍ ମାରି ପ୍ରବୁଦି ତଡ଼ାନ୍‌କା ୱାଜା ବିସ୍‌ବାସ୍‌ତି କୁଟୁମ୍‌ତି ଅରେତ୍‌ ଆଡ଼ିଦିଙ୍ଗ୍‍ ପେଡ଼ି ଆଜ ତାନି ୱାଲେ ବୁଲାନି ଉଣ୍ତିଙ୍ଗ୍‌ ନାଙ୍ଗିଁ ଇନିକା ଅଦିକାର୍‌ ସିଲେତ୍‌ ? 6 ଜିନି ଉଣ୍ତିଙ୍ଗ୍‌ କେବଲ ନାଙ୍ଗିଁ ମାରି ବର୍ଣ୍ଣବାବେଙ୍ଗ୍‌ ଇନିକା କାସ୍ଟୁପାଣି କିଦେଙ୍ଗ୍‌ ଆନାତ୍‌ ? 7 ଅରେନ୍‍ ସୌନ୍ୟ ନିଜେଦି କାର୍ସୁ ନିଜେ ସାଲା କିନାନ୍‌ ନ ? ଏନ୍‌ ଅଙ୍ଗୁର୍‍ କିଡ଼ିଇ କିଜି ଆବେଣି ପଲ୍‌ ତିନ୍‌ଏନ୍‌ ? ମାରି ଏନ୍‌ ମେଣ୍ତେଙ୍ଗ୍‌ମାନ୍ଦା ପୋସା କିଜ ଡ଼ାନ୍‌ତି ପାଲୁ ଉଣୁଏନ୍‌ ? 8 ନାନ୍‌ ଲୋକ୍‌ ଇସାବ୍‌ତାନ୍‌ ଇନିକା ଇୟାୱିଜୁ ମାଟା ୱେର୍‌ସିନା ? ମୋସାଦି ନିୟମ୍‌ ବା ଇନିକା ଇୟାୱିଜୁ ମାଟା ଇନ୍‌ଏତ୍‌ ? 9 ✝୯:୯ ୧ ତିମତି ୫:୧୮.ଇରିଙ୍ଗ୍‌ ମୋସାଦି ନିୟମ୍‌ତୁ ଇକା ରାସାତାମାନାତ୍‌, "ଆତେରେ ବୁଲାଜିମାନି କଡିଦି ମକମ୍‌ତୁ ତୁଣ୍ତି ତର୍‌ମାଟ୍‌ ।" ମାପୁରୁ ଇନିକା କଡିଦି ବିସୟ୍‌ତାନ୍‌ ସିନ୍ତା କିଜିନାନ୍‌ ? 10 ୱାନ୍‌ ଇନିକା କେବଲ ମା ଉଣ୍ତିଙ୍ଗ୍‌ ଇକା ଇନ୍‌ଏନ୍‌ ? ହୁଁ ମା ଉଣ୍ତିଙ୍ଗ୍‌ ଇକା ରାସାତାମାନାତ୍‌, ଏଣ୍ତେସ୍‌ ଚାସ୍‌ପାଣିକିନିକାନ୍‌ ମାରି ପାସି ଉଣ୍ତାକିଜତାନିକାନ୍‌, ପାସିଦାନ୍‌ ବାଗ୍‌ ପୟ୍‌ନି ଉଣ୍ତିଙ୍ଗ୍‌ ଆସା ଇଡ୍‌ଜି ପାଣି କିନାର୍‌ । 11 ✝୯:୧୧ ରୋମିୟ ୧୫:୨୭.ଜଦି ମାପ୍‌ ମି ଉଣ୍ତିଙ୍ଗ୍‌ ଆତ୍ମାଦି ୱିତୁ ୱିତ୍‌ତାମାନାପ୍‌, ଆର୍‌ତିଙ୍ଗ୍‌ ମିମାଣୁକୁ ଏସ ଦୁନିଆଦି ପାସି ପୟ୍‌ଦେଙ୍ଗ୍‌ ବଦା କିନିକା ଇନିକା ଉନ୍‌ଡ୍ରି ଆସା ସିଲେ ? 12 ଜଦି ମିମାଣୁକୁ ଇୟାୱାଜା ଆସା କିନି ଉଣ୍ତିଙ୍ଗ୍‌ ଆଇୱାରିଙ୍ଗ୍‌ ଅଦିକାର୍‌ ମାନାତ୍‌, ଆର୍‌ତିଙ୍ଗ୍‌ ମା ଅଦିକାର୍‌ ଇନିକା ୱାରିମାଣୁକୁ ମାରି ନାଣ୍ତ ସିଲେ ? ମାରିବା ମାପ୍‌ ଆୟା ଅଦିକାର୍‌ ବ୍ୟବ୍‌ହାର୍‌ କିଏପ୍‌; ମାତର୍‌ ଏଣ୍ତେସ୍‌ କ୍ରିସ୍ତଦି ସୁସମାଚାର୍‌ ପ୍ରଚାର୍‌ତୁ ଇନି ବାଦା ସମାକିତ୍‌, ଇୟାଉଣ୍ତିଙ୍ଗ୍‌ ମାପ୍‌ ୱିଜୁ ସାସ୍‌ କିଜିନାପ୍‌ । 13 ଆମାକାର୍‌ ମନ୍ଦିର୍‌ତୁ ସେବା କିନାର୍‌, ୱାର୍‌ ଜେ ମନ୍ଦିର୍‌ତି କାଦି ପୟ୍‌ନାର୍‌, ମାରି ଆମାକାର୍‌ ବେଦିଦୁ ପୁଜା କିଦେଙ୍ଗ୍‌ ତେବାନାର୍‌, ୱାର୍‌ ଜେ ବେଦିଦି ୱାଲେ ମିସାଜି ମାନାର୍‌, ଇକା ଇନିକା ମିର୍‌ ନେସ୍‌ଇଦେର୍‌ ? 14 ✝୯:୧୪ ମାତିଉ ୧୦:୧୦; ଲୁକ ୧୦:୭.ଆୟାୱାଜା ଆମାକାର୍‌ ସୁସମାଚାର୍‌ ପ୍ରଚାର୍‌ କିନିକାର୍‌, ୱାର୍‌ ଜେ ସୁସମାଚାର୍‌ଦାନ୍‌ ପଟା ପସା କିନାର୍‌, ଇକା ପ୍ରବୁ ଆଦେସ୍‌ ସିତାମାନାନ୍‌ ।

15 ମାତର୍‌ ନାନ୍‌ ଇୟାୱିଜୁ ବିସୟ୍‌ ଇନିକା ବ୍ୟବ୍‌ହାର୍‌ କିଏ, ମାରି ନା ଉଣ୍ତିଙ୍ଗ୍‌ ଜେ ଇୟାୱାଜା କିଆନାତ୍‌, ଇୟାଉଣ୍ତିଙ୍ଗ୍‌ ନାନ୍‌ ଇୟାୱିଜୁ ରାସ୍‌ଏ; ଇରିଙ୍ଗ୍‌ ଏନ୍‌ ନା ଇୟା ଗର୍ବଦିଙ୍ଗ୍‌ ବେକାର୍‌ତିକା ପାର୍‌ମାଣ୍‌ କିନି ବାଦ୍‌ଲୁ ସାନିକା ନା ଉଣ୍ତିଙ୍ଗ୍‌ ନେଗେତ୍‌ । 16 ଇରିଙ୍ଗ୍‌ ଜଦି ସୁସମାଚାର୍‌ ପ୍ରଚାର୍‌ କିଜିନା, ଆବେନ୍‌ ନାନୁ ଗର୍ବ କିନିକା ଇନିକା ସିଲେ, ଇୟା ଦାଇତ୍‌ କିନି ଉଣ୍ତିଙ୍ଗ୍‌ ନାନ୍‌ ଆଦେସ୍‌ ପୟ୍‌ତାମାନା; ମାରି ଜଦି ସୁସମାଚାର୍‌ ପ୍ରଚାର୍‌ କିଏ, ଆର୍‌ତିଙ୍ଗ୍‌ ହାୟ୍‌, ନାନ୍‌ ଦଣ୍ତ୍‌ ପୟ୍‌ନିକିନ୍ଦା । 17 ଜଦି ନାନ୍‌ ନିଜେଦି ଇଚ୍ଛାଦାନ୍‌ ଇୟା ପାଣି କିତିଙ୍ଗ୍‌, ଆର୍‌ତିଙ୍ଗ୍‌ ନାଙ୍ଗିଁ ପୁରସ୍କାର୍‌ ମାନାତ୍‌; ମାତର୍‌ ମାପୁରୁ ନା ମୁସ୍‌କୁ ଇୟା ଦାଇତ୍‌ ସିତି ମାନିଙ୍ଗ୍‌ ଇକା କିଦେଙ୍ଗ୍‌ ନା ପାଣି । 18 ଆର୍‌ତିଙ୍ଗ୍‌ ନାନ୍‌ ଇନି ପୁରସ୍କାର୍‌ ପୟ୍‌ଜିନା ? ୱିଜେରି ଲାକ୍‌ତୁ ଆରେଏ ସୁସମାଚାର୍‌ ପ୍ରଚାର୍‌ କିଜିନା, ଇକା ନା ପୁରସ୍କାର୍‌, ଆୟାଉଣ୍ତିଙ୍ଗ୍‌ ସୁସମାଚାର୍‌ ପ୍ରଚାର୍‌ ଉଣ୍ତିଙ୍ଗ୍‌ ନାନ୍‌ ଇନି ସୁଜୋଗ୍‌ ସୁବିଦା ୱେଡ଼ିକା କିନି ଉଣ୍ତିଙ୍ଗ୍‌ ଅଦିକାର୍‌ ବ୍ୟବ୍‌ହାର୍‌ ଆଏତ୍‍ । 19 ନାନ୍‌ ଅରେନ୍‍ ଜିବନ୍‌ତି ଲୋକ୍‌, ଏମେୱାନି ପାଣିକିନିସାକର୍‌ ଆଏ, ଏଣ୍ତେସ୍‌ ନାନ୍‌ କ୍ରିସ୍ତଦି ଉଣ୍ତିଙ୍ଗ୍‌ ନାଣ୍ତ ଲୋକାଙ୍ଗ୍‌ ପୟ୍‌ନି ଉଣ୍ତିଙ୍ଗ୍‌ ୱିଜେରି ଦାସ୍‍ ଆତାମାନା । 20 ଏଣ୍ତେସ୍‌ ନାନ୍‌ ଜିହୁଦିରିଙ୍ଗ୍‌ ପୟ୍‌ଦେଙ୍ଗ୍‌ ଆଟ୍‍ନା, ଇୟାଉଣ୍ତିଙ୍ଗ୍‌ ନାନ୍‌ ୱାରି ଲାକ୍‌ତୁ ଜିହୁଦିରି ୱାଜା ବ୍ୟବ୍‌ହାର୍‌ କିଜିନା; ଏଣ୍ତେସ୍‌ ମୋସାଦି ନିୟମ୍‌ ମାନାନିୱାରିଙ୍ଗ୍‌ କ୍ରିସ୍ତଦିମାନୁ ପୟ୍‌ଦେଙ୍ଗ୍‌ ଆଟ୍‍ନା, ଇୟାଉଣ୍ତିଙ୍ଗ୍‌ ନାନ୍‌ ନିୟମ୍‌ତିଙ୍ଗ୍‌ ମାନାଇତିଙ୍ଗ୍‌ ବା ନିୟମ୍‌ତି ଇସାବ୍‌ତି ଲୋକା ଲାକ୍‌ତୁ ନିୟମ୍‌ତି ଇସାବ୍‌ତାନ୍‌ ମାନି ୱାଜା ବ୍ୟବ୍‌ହାର୍‌ କିଜିନା । 21 ଆୟାୱାଜା ଅଣଜିହୁଦିରିଙ୍ଗ୍‌ ପୟ୍‌ନି ଉଣ୍ତିଙ୍ଗ୍‌ ନାନ୍‌ ୱାରି ମାନୁ ପାଣି କିନିୱାଲେ ଅଣଜିହୁଦିରି ୱାଜା ନିୟମ୍‌ ସିଲି ବ୍ୟବ୍‌ହାର୍‌ କିଜିନା । ଇୟାତାନି ଅର୍ତ ସିଲେ ଜେ, ନାନ୍‌ ମାପୁରୁଦି ବିଦିବିଦାନ୍‌ ବ୍ୟବ୍‌ହାର୍‌ କିଏ, ସତ୍‌ତାନ୍‌ ନାନ୍‌ କ୍ରିସ୍ତଦି ନିୟମ୍‌ତି ଆଡ୍‌ଗିମାନା । 22 ଏଣ୍ତେସ୍‌ ନାନ୍‌ ବିସ୍‌ବାସ୍‌ତୁ ସାସ୍‌ସିଲିୱାରିଙ୍ଗ୍‌ ପୟ୍‌ଦେଙ୍ଗ୍‌ ଆଟ୍‍ନା, ଇୟାଉଣ୍ତିଙ୍ଗ୍‌ ନାନ୍‌ ସାସ୍‌ସିଲିୱାରି ଲାକ୍‌ତୁ ୱାରି ୱାଜା ଆତାମାନା; ଏଣ୍ତେସ୍‌ ନାନ୍‌ ଆମାଇନି ଉପାୟ୍‌ତାନ୍‌ ୱିଜୁ ଲୋକାଙ୍ଗ୍‌ ରକିୟା କିଦେଙ୍ଗ୍‌ ଆଟ୍‍ନା, ଇୟାଉଣ୍ତିଙ୍ଗ୍‌ ନାନ୍‌ ୱିଜେରି ଲାକ୍‌ତୁ ୱିଜୁ ରକମ୍‍ତି ବ୍ୟବ୍‌ହାର୍‌ କିତାମାନା ।

23 ନାନ୍‌ ଏଣ୍ତେସ୍‌ ସୁସମାଚାର୍‌ତି ଆସିର୍ବାଦ୍‌ତିମାନୁ ମିସାନା, ଇୟାଉଣ୍ତିଙ୍ଗ୍‌ ଇୟାୱିଜୁ କିନା । 24 ଆମାକାର୍‌ ଉର୍‌କୁତେଙ୍ଗ୍‌ ବାଗ୍‌ ଅନାର୍‍, ୱାର୍‌ ୱିଜେରେ ଉର୍‌କୁନାର୍‌ ସତ୍‍, ମାତର୍‌ କେବଲ ଅରେନ୍‍ ଜେ ପୁରସ୍କାର୍‌ ପୟ୍‌ନାନ୍‌, ଇକା ଇନିକା ମିର୍‌ ନେସ୍‌ଇଦେର୍‌ ? ମିର୍‌ ଏଣ୍ତେସ୍‌ ପୁରସ୍କାର୍‌ ପୟ୍‌ନିଦେର୍‌, ଇୟାଉଣ୍ତିଙ୍ଗ୍‌ ଆୟାୱାଜା ଉର୍‌କୁତୁ । 25 କାର୍‌ଜିନିକାର୍‌ ଅଜା କିନିୱାଲେ ୱିଜୁ ବିସୟ୍‌ତାନ୍‌ ଜାଗାର୍‌ତା ବ୍ୟବ୍‌ହାର୍‌ କିବିସ୍‌କିନାର୍‌; ୱାର୍‌ ନାସ୍ଟୁଆନି ପୁଙ୍ଗୁଁସରା ପୟ୍‌ନି ଉଣ୍ତିଙ୍ଗ୍‌ ଆକା କିନାର୍‌; ମାତର୍‌ ମାଡୁ ନାସ୍ଟୁଆଇ ପୁରସ୍କାର୍‌ ପୟ୍‌ନି ଉଣ୍ତିଙ୍ଗ୍‌ ଆକା କିନିକା । 26 ଆୟାଉଣ୍ତିଙ୍ଗ୍‌ ନାନ୍‌ ସିଦାଦାନ୍‌ ଇତି ବାଡି ଲାକ୍‌ତୁ ଉର୍‌କୁନା, ଅରେନ୍‍ ମୁଷ୍ଟିଜୁଦ୍ଦ ୱାଜା ନାନ୍‌ ନିଜେଦି ମୁଟିଦି ଡାକ୍‌ନି ୱାଜା ୱାର୍‌ଇକା ଡ଼ିସ୍‌ସୋ ସିଦେଙ୍ଗ୍‌ ଅଡ଼୍‌ବିନା‌ । 27 ଆଇ ଲୋକା ଲାକ୍‌ତୁ ସୁସମାଚାର୍‌ ପ୍ରଚାର୍‌ କିତିମାରିଙ୍ଗ୍‌ ବା ନାନ୍‌ ନିଜେ ଏଣ୍ତେସ୍‌ ସପାୟ୍‌ ଆନା, ଇୟାଉଣ୍ତିଙ୍ଗ୍‌ ନା ନିଜେଦି ମେନ୍ଦଲ୍‌ତିଙ୍ଗ୍‌ କାସ୍ଟୁ ସାସ୍‌ କିଜି ମାରି ନିଜେଦି ଆଡ୍‍ଗି କିଜି ଇଡାୟ୍‌ଆତାମାନା ।