1 ସଅ ଦିନ୍‌ ୱେନ୍‌କା ଜିସୁ ପିତର୍‌ ମାରି ଜାକୁବ, ଯୋହନ ତଡ଼ରିଏରିଙ୍ଗ୍‌ ଅସି ଉନ୍‌ଡ୍ରି ପେରି ଗରନ୍‌ ମୁସ୍‌କୁ ସର୍ହାର୍‌ । ଆବେନୁ ଆଇକାନ୍‍ ଏନ୍‌ ସିଲେତାନ୍‌ । 2 ସିସୁର୍‍ ସୁଡ଼୍‍ବୁ ସୁଡ଼୍‍ବୁ ଜିସୁଦି ଉନ୍‌ଡ୍ରି ମୁର୍ତି ବାଦେଲେଆଜି ଜାୟ୍‌ଆତାତ୍‌ । ୱାନି ମକମ୍‌ ୱେଡ଼ାୱାଜା ଜାୟ୍‌ଆତାତ୍‌ ମାରି ୱାନି ଆଙ୍ଗିଁ ଜାୟ୍‌ ୱାଜା ଅଡ଼ିନିକା ତରିତାତ୍‌ । 3 ମୋଶା ନି ଏଲିୟ୍‌ ଜିସୁଦି ୱାଲେ ୱାର୍‌ଗିସାନିକା ସିସୁର୍‍ ସୁଡ଼ୁତାର୍‌ । 4 ଆବେନୁ ପିତର ଜିସୁଙ୍ଗୁଁ ଇର୍ହାନ୍‌, ଏ ପ୍ରବୁ, ଏସ ୱେଡ଼ିକାଦି ମାଟା, ମାଡ୍‌ ଇବେନୁ ମାନିକା । ନିନ୍‌ ଜଦି ବଦାକିନି, ଇବେନୁ ନାନ୍ ମୁନ୍‌ଡ୍ରି ଗୁଡ଼େଙ୍ଗ୍‌ ତିଆର୍‌କିନା । ନି ଉଣ୍ତିଙ୍ଗ୍‌ ଉନ୍‌ଡ୍ରି, ମୋସାଦି ଉଣ୍ତିଙ୍ଗ୍‌ ଉନ୍‌ଡ୍ରି ମାରି ଏଲିୟ୍‌ଦି ଉଣ୍ତିଙ୍ଗ୍‌ ଉନ୍‌ଡ୍ରି ।

5 ✝ ✝ପିତର୍‌ ଇୟା ମାଟା ଇନିୱାଲେ ଖାଣ୍ତେକ୍‍ ବାଦଡ଼୍‍ ଇମ୍‌ଜି ୱାତା ଦୋ ୱାରିଙ୍ଗ୍‌ ବାଦଡ଼୍‍ତି ନିଡ଼୍‍ଗା ପିଡ଼ିକ୍‍ତାତ୍‍ ମାରି ଆବେଟ୍‌ତାନ୍‌ ଉନ୍‌ଡ୍ରି ବଲ୍ ୱାତାତ୍‍, "ଇୟାକାନ୍‌ ନା ଲାଡ୍‍ତି ମାରିନ୍‌, ୱେନିମାନୁ ନାନ୍ ନାଣ୍ତ ୱେଡ଼ିକା । ୱେନି ବାକ୍ୟ ୱେନ୍‌ଡ୍ରୁ ।"

6 ସିସୁର୍‍ ଆୟା ବଲ୍ ୱେର୍‌ରାନୋ ନିସ ତିଲାତାର୍‌ ଜେ ୱାର୍‌ ବୁମିଦୁ ମକମ୍‌ପାଡ଼୍‌କିସି ମେଡ଼େତାର୍‌ । 7 ଜିସୁ ୱାରି ଲାକ୍‌ତୁ ୱାଜି ୱାରିଙ୍ଗ୍‌ ମୁଟ୍‌ତାନ୍‌ନୋ ଇର୍ହାନ୍‌, "ନିଙ୍ଗିଁଦୁ ତିଲାମାଟ୍‌ ।" 8 ମାରି, ୱାର୍‌ ମୁସ୍‌କୁ ବେସ୍‍ସି କେବଲ୍‌ ଜିସୁଙ୍ଗୁଁ ଡ଼ିସ୍‌ତିଙ୍ଗ୍‌ ମାରି ଏଙ୍ଗ୍‌ବା ସୁଡ଼ୁଏତାର୍‌ ।

9 ୱାର୍‌ ଗରନ୍‌ତାନ୍‌ ରେତାଜି ୱାନିୱାଲେ ଜିସୁ ୱାରିଙ୍ଗ୍‌ ଆଦେସ୍‌ ସିଜି ଇର୍ହାନ୍‌, "ମନୁସ୍ୟପୁତ୍ର ସାତିମାଣାନ୍‌ ମାରିଡ଼େସିଜିବନ୍‌ ଆଇସାନ୍ଦି ଇୟା ମିର୍‌ ସୁଡ଼୍‍ତିମାଟା ଏଙ୍ଗ୍‌ବା ଇନ୍‌ମାଟ୍‌ ।"

10 ସିସୁର୍‍ ଜିସୁଙ୍ଗୁଁ ୱେନ୍‌ବାତାର୍‌, ଏଲିୟ୍‌ ଆଗ୍‌ଡ଼ି ୱାନାନ୍‌ ଇଜି ମା ସାସ୍ତ୍ରିର୍‍ ଏନ୍ଦା ଇର୍ହାମାନାର୍‌ ?

11 ଜିସୁ ଇର୍ହାନ୍‌, ହୁଁ, ଏଲିୟ୍‌ ଆଗ୍‌ଡ଼ି ୱାଜି ୱିଜୁ ବିସୟ୍‌ ମାରିଡ଼େସି ତିଆର୍‌କିନାନ୍‍ । 12 ✝ମାତର୍‌ ନାନ୍ ମିଙ୍ଗିଁ ଇଜିନା, "ଏଲିୟ୍‌ ୱାତାୱିସ୍‌ତାନ୍‌ନି ମାରି ୱାନିଙ୍ଗ୍‌ ସିନିସ୍‌କିଏଣ୍‌ଗା ଲୋକୁ ୱାନି ଉଣ୍ତିଙ୍ଗ୍‌ ଆମାକା ବଦା, ଆୟାକା କିତାମାନାର୍‍ । ମନୁସ୍ୟପୁତ୍ରଦି ଉଣ୍ତିଙ୍ଗ୍‌ ବା ୱାର୍‌ ଆୟାୱାଜା ତାଗ୍‌ଇପାଣି କିନାର୍‌ ।"

13 ନାସ୍ତିୱାଲେ ସିସୁର୍‍ ବୁଜାଦେଙ୍ଗ୍‌ ଆଟ୍‌ତାର୍‌ ଜେ, ଜିସୁ ଡୁବନ୍‌ସିନି ଯୋହନତି ବିସୟ୍‌ତାନ୍‌ ୱେର୍‌ସିନାନ୍‌ ।

14 ଜିସୁ ନି ୱାନି ସିସୁର୍‍ ଲୋକା ଗଲି ଲୋଇ ଡ଼େସି ୱାତି ୱେନ୍‌କା ଅରେନ୍‍ ଲୋକୁ ଜିସୁ ଲାକ୍‌ତୁ ୱାଜି ମେଣ୍ତେଙ୍ଗ୍‌ ଗଟ୍‌କିଜି ଇର୍ହାନ୍‌, 15 ଏ ପ୍ରବୁ, ନା ମାରିନ୍‌ତିଙ୍ଗ୍‌ ଦୟା କିଆ, ମୁର୍ଛାରୋଗ୍‌ତୁ ନାଣ୍ତ କାସ୍ଟୁ ପୟଜିନାନ୍‍ ମାରି ୱାନ୍‌ ଏସ ଦେବେଙ୍ଗ୍‌ ସିସୁଦୁ ନି ଏର୍‌ତୁ ଆର୍‌ନାନ୍‌ । 16 ନାନ୍ ନି ସିସୁରି ଲାକ୍‌ତୁ ୱାନିଙ୍ଗ୍‌ ତାତାମାର୍‌ଆ, ମାତର୍‌ ୱାର୍‌ ୱାନିଙ୍ଗ୍‌ ନେଗେନ୍‌ କିଦେଙ୍ଗ୍‌ ଆଟ୍‌ଏତାର୍‌ ।

17 ଜିସୁ ଇର୍ହାନ୍‌, "ଏ ଅବିସ୍‍ବାସ୍‍ ନି ବାୟାର୍ ମିର୍‌ ! ମି ୱାଲେ ନାନ୍ ମାରିଏସ ଦିନ୍‌ ତେବାନା ? ମାରି ଏସ ଦିନ୍‌ ମି ବ୍ୟବହାର୍‌ ସାସ୍‌କିନା ? ଆୟା କଡ଼ଦିଙ୍ଗ୍‌ ନା ଲାକ୍‌ତୁ ତାଗାଟ୍‌ ।" 18 କଡ଼ ଲୋଇମାନି ଦୁବାଦିଙ୍ଗ୍‌ ଜିସୁ ଆଦ୍‌ରିସ୍‌ କିତାନ୍‌ । ଦୁବା ୱାନିଙ୍ଗ୍‌ ଡ଼ିସ୍‌ସି ସତାସର୍ହାତ୍‌ ମାରି ଆୟା ଦାର୍ପେନେ କଡ଼ ନେଗେନ୍‌ଆତାନ୍‌ ।

19 ତାନେୱେନ୍‌କା ସିସୁର୍‍ ଜିସୁଙ୍ଗୁଁ ଅରେନ୍‌ୱାନିଙ୍ଗ୍‌ନେ ୱାଜି ୱେନ୍‌ବାତାର୍‌, "ମାପ୍‌ ଏନ୍ଦା ଆୟା ଦୁବାଦିଙ୍ଗ୍‌ ପେର୍‍ଦେଙ୍ଗ୍‍ ଆଟ୍‍ଏତାପ୍‍ ?"

20 ✝ଜିସୁ ଇର୍ହାନ୍‌, "ମି ବିସ୍‌ବାସ୍‌ ପୁରା ଉଣା । ନାନ୍ ମିଙ୍ଗିଁ ସତ୍‌ ଇଜିନା, ଜଦି ଉନ୍‌ଡ୍ରି ସାର୍‍ସୁ ପାଡ଼ୁ ୱାଜା ମି ବିସ୍‌ବାସ୍‌ ମାନାତ୍‌, ଇୟା ଗରନ୍‌ତିଙ୍ଗ୍‌ ଇବେଟ୍‌ତାନ୍‌ ଆବେନୁ ଗୁସାଜସାଙ୍ଗାଆ ଇଜି ଇରିଙ୍ଗ୍‌, ଆକା ଗୁସାନାତ୍‌ । ବିସ୍‌ବାସ୍‌ତି ଡାଟ୍‌ତାନ୍‌ ମିର୍‌ ୱିଜୁ କିଦେଙ୍ଗ୍‌ ଆଟ୍‌ନିଦେର୍‌ ।" 21 ମାତର୍‌ ପାର୍‌ତନା ନି ଉପବାସ୍‌ ଡ଼ିସ୍‌ତିଙ୍ଗ୍‌ ଆଇକା ଇନି ଉପାୟ୍‌ତାନ୍‌ ଇୟାୱାଜା ଦୁବା ସୋହସ ସଲ୍‌ଏତେ ।*

22 ସିସୁର୍‍ ୱିଜେରେ ଗାଲିଲିଦୁ ଉନ୍‌ଡ୍ରେମାନୁ ଆତି ୱେନ୍‌କା ଜିସୁ ୱାରିଙ୍ଗ୍‌ ଇର୍ହାନ୍‌, "ମନୁସ୍ୟପୁତ୍ର ଲୋକା କିୟୁଦୁ ସର୍ପେ ଆଦେଙ୍ଗ୍‌ ସଲ୍‌ସିନାନ୍‌ । 23 ୱାର୍‌ ୱାନିଙ୍ଗ୍‌ ଡାକ୍‌ନାର୍‌, ମାତର୍‌ ମୁନେଟି ୱେନ୍‌କା ୱାନ୍‌ ମାରିଡ଼େସିଜିବନ୍‌ ଆନାନ୍‌ ।" ଆବେଟ୍‌କୁ ସିସୁର୍‍ ନାଣ୍ତ ଦୁକ୍‍ ଆତାର୍‌ ।

24 ତାନେୱେନ୍‌କା ଜିସୁ ନି ୱାନି ସିସୁର୍‍ କପର୍‍ନାହୁମ୍‍ତୁ ୱାତାର୍‌, ମନ୍ଦିର୍‌ତି ସିସୁଟୁଲୋସ୍‌ନିକାର୍‌ ପିତରତି ଲାକ୍‌ତୁ ୱାଜି ୱେନ୍‌ବାତାର୍‌, "ମି ଗୁରୁ ଇନିକା ମନ୍ଦିର୍‌ତି ସିସୁଟୁ ସିଏନ୍‌ ନୋ ?"

25 ପିତର୍‌ ଇର୍ହାନ୍‌, "ହୁଁ, ସିନାନ୍‌ ।"

ପିତର୍‌ ଇନ୍‌ଡ୍ର ୱାତି ୱେନ୍‌କା ଜିସୁ ଆଗ୍‌ଡ଼ି ୱାନିଙ୍ଗ୍‌ ୱେନ୍‌ବାତାନ୍‌, "ସିମୋନ, ନିନ୍‌ ଇନିକା ଅଡ଼୍‍ବିଜିନି ? ଇୟା ଦୁନିଆଦି ରାଜାରିଙ୍ଗ୍‌ ଏନ୍‌ ସିସୁଟୁଡାବୁଙ୍ଗ୍‌ ସିନାନ୍‌ ୱାରି ଦେସ୍‌ତି ପ୍ରଜାରି ମାଣ୍‌କୁ ନୋ ଆଇଦେସ୍‌ତିୱାରି ମାଣ୍‌କୁ ?"

26 ପିତର୍‌ ଇର୍ହାନ୍‌, "ଆଇଦେସ୍‌ତିୱାରି ମାଣ୍‌କୁ ।"

ଜିସୁ ଇର୍ହାନ୍‌, "ଆର୍‌ତିଙ୍ଗ୍‌ ଦେସ୍‌ତି ପ୍ରଜାର୍‌ ସିସୁଟୁତର୍‌ନି ବଜୁତାନ୍‍ ଉସାସ୍‌ଆନାର୍‍ ? 27 ମାତର୍‌ ମାପ୍‌ ଇଲେଇ ୱାରିଙ୍ଗ୍‌ ଅପ୍‍ମାନ୍‍ କିଦେଙ୍ଗ୍‌ ଅଡ଼୍‌ବିଏପ୍‌ । ମିର୍‌ ଗାଡାଦୁ ସୋଲ୍‌ସ ବଣସି ପୋକ୍‌ତୁ । ଆଗ୍‌ଡ଼ି ଆମା ମିନି ୱାନାତ୍‌, ତାନି ୱେୟୁଦାନ୍‌ ଉନ୍‌ଡ୍ରି ୱେନ୍‌ଣ୍ତିଦି ଅଦ୍‌ଲି ପଇନିଦେର୍‌ । ଆକା ଅସ ନା ଉଣ୍ତିଙ୍ଗ୍‌ ନି ମି ଉଣ୍ତିଙ୍ଗ୍‌ ମନ୍ଦିର୍‌ତି ସିସୁଟୁଡାବୁଙ୍ଗ୍‌ ସିଦୁ ।"