ମାତିଉ 12

ରମ୍‍ନିଦିନ୍‍ତି ବିସୟ୍‌ତାନ୍‌ ପ୍ରସ୍ନ

1 ତେନି ଏସ ଦିନ୍‌ ୱେନ୍‌କା ଉଣ୍ତ୍ରି ରମ୍‍ନିଦିନ୍‍ତୁ ଜିସୁ ପାସି କିଡ଼ିଇ ସିଜି ସଲ୍‍ସିମାର୍ହାନ୍‍ । ୱାନି ସିସୁର୍‌ ବାଙ୍ଗାଁଆତାର୍‍ଆକା ୱାର୍‌ ସେରେନ୍‍କୁ ତେଉସି ତିନ୍‌ଡ୍ରେଙ୍ଗ୍‌ ଆସ୍‌ତାର୍‌ । 2 ପାରୁସିର୍‌ ଇକା ସୁଡ଼ୁଜି ଜିସୁଙ୍ଗୁଁ ଇର୍ହାର୍‌, "ସୁଡ଼ୁଦୁ, ରମ୍‌ନିଦିନ୍‍ତୁ ମି ସିସୁର୍‍ ଏଣ୍ତେସ୍‌ ନିୟମ୍‌ ସିଲି ପାଣି କିଜିନାର୍‍ ।"

3 ଜିସୁ ୱାରିଙ୍ଗ୍‌ ଇର୍ହାନ୍‌, "ଅର୍‍ଲେନ୍‍ ଦାଉଦ ନି ୱାନି ତଡ଼୍‍କୁ ବାଙ୍ଗାଁ ଆନିୱାଲେ ୱାନ୍‌ ଇନିକା କିତାମାର୍‌ଆନ୍‌, ଆକା ମିର୍‌ ପଡ଼ାଇଦେର୍‌ ନୋ ? 4 ୱାନ୍‌ ମାପୁରୁଦି ଇଲ୍‌ତୁ ସଲ୍‌ସି ମାପୁରୁ ଉଦେସ୍‍ତାନ୍‍ ପୁଜାସିତିମାର୍ହି ରୁଟି ୱାନ୍‌ ନି ୱାନି ତଡ଼୍‍କୁ ତିର୍ହାର୍‍ । ନିୟମ୍‌ ଇସାବ୍‌ତାନ୍‌ ଜାଜକଦିଙ୍ଗ୍‍ ଡ଼ିସ୍‌ତିଙ୍ଗ୍‌ ଆୟା ରୁଟି ତିନ୍‌ଡ୍ରେଙ୍ଗ୍‌ ଇଜି ଆଇ ଏଙ୍ଗ୍‌ବା ଅଦିକାର୍‌ ସିଲେତାତ୍‍ । 5 ମିର୍‌ ଇନିକା ପଡ଼ାଇଦେର୍‌ ନୋ ? ମସାଦି ନିୟମ୍‌ ଇସାବ୍‌ତାନ୍‌ ଜାଜକର୍‌ ରମ୍‌ନି ଦିନ୍‍ତୁ ମନ୍ଦିର୍‌ ଲୋଇ ଜାଜକତି ପାଣିକିନି ମାଣାନ୍‌ ରମ୍‌ନି ଦିନ୍‍ତି ନିୟମ୍‌ ଅମାନ୍ୟ କିଜିମାରିଙ୍ଗ୍‌ବା ଆୟାଉଣ୍ତିଙ୍ଗ୍‌ ୱାର୍‌ ଦସି ଆଏଜିମାର୍ହାର୍‍ ? 6 ନାନ୍ ମିଙ୍ଗିଁ ଇଜିନା, ମନ୍ଦିର୍‌ ମାଣାନ୍‌ ପେରି ବିସୟ୍‌ ଇବେମାନାତ୍‍ । 7 ✝୧୨:୭ ମାତିଉ ୯:୧୩.ସାସ୍ତ୍ର ଇନାତ୍‍, ନାନ୍ ବଦାକିନା ଦୟା, ପୁଜାସିନିକା ସିଲେ; ଇୟା ମାଟାଦି ଅର୍ତ ଜଦି ସତ୍‌ତାନ୍‌ ବୁଜାତିଦେର୍‍ମାନ୍ଦି, ଇୟା ଦସ୍‌ କିଇ ଲୋକାଙ୍ଗ୍‌ ମିର୍‌ ଦସିକିଇତିଦେର୍‍ମାନ୍ଦି । 8 ଇରିଙ୍ଗ୍‌ ମନୁସ୍ୟପୁତ୍ର ରମ୍‌ନିଦିନ୍‍ତି ପ୍ରବୁ ।"

ଅରେନ୍‍ କିୟୁ ୱାର୍‍ତିସର୍‍ଇ ଲୋକୁ

9 ଜିସୁ ଆୟା ବାଡିଦାନ୍‍ ଡ଼ିସ୍‌ସି ପାର୍‍ତନାକିନି ଇଲ୍‌ତୁ ଡ଼ୁଗିତାନ୍‍ । 10 ୱାନି ଉନ୍‌ଡ୍ରି କିୟୁ ୱାର୍‍ତିସର୍‍ରି ଅରେନ୍‍ ଲୋକୁ ଆବେ ମାର୍ହାନ୍‍ । ଜିସୁଦି ଦସ୍‌ ଆସ୍‌ତେଙ୍ଗ୍‌ ଏସ ଲୋକୁ ଆବେ କାପ୍‍କିଜି ମାର୍ହାର୍‍ । ଆୟା ଉଣ୍ତିଙ୍ଗ୍‌ ୱାର୍‌ ଜିସୁଙ୍ଗୁଁ ୱେନ୍‌ବାତାର୍‌, "ରମ୍‌ନି ଦିନ୍‍ତୁ ନେଗେନ୍‍ କିନିକା ମା ନିୟମ୍‌ ବିରୁଦ୍‌ ସିଲେନୋ ?"

11 ✝ ୧୨:୧୧ ଲୁକ ୧୪:୫. ଜିସୁ ଇର୍ହାନ୍‌, "ଜଦି ମି ଲୋଇରାନ୍‌ ଏ ୱାନି ମେଣ୍ତା ରମ୍‌ନିନାଣ୍ତିଙ୍ଗ୍‌ ଉନ୍‌ଡ୍ରି ପେରି ଗୁଟାଦୁ ଆର୍‍ନାତ୍‍, ମିର୍‌ ତାନିଙ୍ଗ୍‌ ନିକ୍‍ସି ତେଇଦେର୍‍ନୋ ? 12 ଅରେନ୍‍ ଲୋକ୍‌ତି ଦାରା ଉନ୍‌ଡ୍ରି ମେଣ୍ତାଦି ବାଦ୍‌ଲୁ ନାଣ୍ତ । ମାରି ରମ୍‌ନି ନାଣ୍ଡିଙ୍ଗ୍ ଆଇୱାନିଙ୍ଗ୍‍ ସାକାକିନିକା ମା ନିୟମ୍‌ ଇସାବ୍‌ତାନ୍‌ ନେଗି ପାଣି ।" 13 ଇକା ଇଜି ୱାନ୍‌ କିୟୁ ୱାର୍‍ତିମାର୍‍ରି ଲୋକ୍‌ତିଙ୍ଗ୍‌ ଇର୍ହାନ୍‌, "ନି କିୟୁ ପେର୍‌ଆ ।"

ୱାନ୍‌ ୱାନି କିୟୁ ପେର୍‍ତି ଦାପ୍ରେ ଆୟା କିୟୁ ଆଇ କିୟୁ ୱାଜା ନେଗେନ୍‍ ଆତାସର୍ହାତ୍‍ । 14 ଇୟା ୱେନ୍‌କା ପାରୁସିର୍‌ ଆୟା ବାଡିଦାନ୍‍ ସହସି ସଲ୍‌ସି ଜିସୁଙ୍ଗୁଁ ଡାକ୍‍ତେଙ୍ଗ୍‍ ଇଜି ଉପାୟ୍‍କିତାର୍‍ ।

ମାପୁରୁ ବାସେକିତି ସେବାକିନିକାନ୍‍

15 ୱାନି ବିରଦ୍‌ତାନ୍‌ ଆତିମାନି ଉପାୟ୍‍ତି ମାଟା ୱେନ୍‌ଜି ଜିସୁ ଆୟା ରାଜି ଡ଼ିସ୍‌ସି ଆଇତରିନ୍‍ ସର୍ହାନ୍‍ । ନାଣ୍ତ ଲୋକୁ ୱାନି ୱେନ୍‌କା ୱେନ୍‌କା ସର୍ହାର୍‍ । ମାରି ୱାନ୍‌ ୱିଜୁ ରଗ୍‌ ଲୋକାଙ୍ଗ୍‌ ନେଗେନ୍‌ କିତାନ୍‌ । 16 ମାତର୍‌ ୱାନି ବିସୟ୍‌ତାନ୍‌ ଆଇୱାରିଙ୍ଗ୍‌ ଇନିକା ଇନ୍‌ଇ ଉଣ୍ତିଙ୍ଗ୍‌ ଆଦେସ୍‌ ସିତାନ୍‌ । 17 ଇୟାବାଣାନ୍‍ ବାବବାଦି ଜିସାୟଦି ମାଣାନ୍‌ ମାପୁରୁ ଏମେ ମାଟା ଇର୍ହାମାର୍ହାନ୍‌, ଆକା ସତ୍‌ ଆଦେଙ୍ଗ୍‌ ଇକା ଇର୍ହାନ୍‌ ।

18 "ଇକାନ୍‌ ନା ଦାସ୍‌, ଏମେୱାନିଙ୍ଗ୍‌ ନାନ୍ ବାସେକିତାମାନା,

ୱାନିଙ୍ଗ୍‌ ନାନ୍ ଲାଡ୍‍କିନା, ୱାନି ଉଣ୍ତିଙ୍ଗ୍‌ ନାନ୍ ୱେଡ଼ିକା ।

ନା ଆତ୍ମା ୱାନି ମୁସ୍‌କୁ ରେତାନାତ୍‍;

ୱିଜୁ ଅଣଜିହୁଦି ଲୋକାମାନୁ ୱାନ୍‌ ନା ବିସାର୍‌କିନି ବିସୟ୍‌ ୱେର୍‌ନାନ୍‌ ।

19 ୱାନ୍‌ ଜାଟିଜଗଡ଼ା କିଏନ୍‌ କି ଆଉଲି ଆଏନ୍‍,

ରାସ୍ତା ମଜାୟ୍‍ ନିଲ୍‍ଜି ନାଣ୍ତ ଆଉଲି ଆଜି ମାଟା ଇନ୍‌ଏନ୍‌ ।

20 ୱାନ୍‌ ୱାଙ୍ଗିଁତି ନାଡ଼ାଦିଙ୍ଗ୍‍ ରୁକ୍‍ଏନ୍‍,

ମାରି କାସ୍‍ନିସାଲିତାଦିଙ୍ଗ୍ ନାପ୍‍ଏନ୍‍ ।

ୱାନ୍‌ ସାକିସିଲିୱାରିଙ୍ଗ୍‍ ନି ସିଲିସାତିକାର୍‍ ନ୍ୟାୟ୍‌ ବିସାର୍‌ ପୟ୍‍ନିସାନ୍ଦି ୱାନ୍‌ ୱାନି କିନିମାଣାନ୍‍ ସୁପ୍‍ ଆଏନ୍‍ ।

21 ୱାନି ମୁସ୍‌କୁ ଦେସ୍‌ତି ୱିଜୁ ଅଣଜିହୁଦି ଲୋକୁ ଆସା ଇଡ୍‍ନାର୍‍ ।"

ଜିସୁ ନି ବାଲ୍‍ଜିବୁଲ୍‍

22 ତାନି ୱେନ୍‌କା ଅର୍‍ଲେନ୍‍ ଲୋକୁ ଅରେନ୍‍ କାଣା ନି ଗୁଲେଙ୍ଗ୍‍ ତାସିୱାତାର୍‍ । ୱାନ୍‌ ଦୁବା କାସ୍ତାମାର୍‌ର୍ହାତ୍‌ ଆକା ମାଟା ଇନ୍‌ଡ୍ରେଙ୍ଗ୍‌ ଆଟ୍‍ଏଜି ମାର୍‌ର୍ହାନ୍‌ । ଜିସୁ ୱାନିଙ୍ଗ୍‌ ନେଗେନ୍‌କିତାନ୍‌ । ୱାନ୍‌ ସୁଡ଼ୁଦେଙ୍ଗ୍‍ଆଟ୍‍ତାନ୍‍ । ମାରି ମାଟା ଇନ୍‍ଡ୍ରେଙ୍ଗ୍‍ ଆଟ୍‍ତାନ୍‍ । 23 ଜିସୁଦି ଇୟା ପାଣିଦୁ ୱିଜୁ ଲୋକୁ କାବାଆଜି ଇର୍ହାର୍‌, "ଇକାନ୍‌ ଇନିକା ଆୟା ଦାଉଦ ମାରିନ୍‌ ଆଏନ୍‍ ନୋ ?"

24 ✝ ୧୨:୨୪ ମାତିଉ ୯:୩୪; ୧୦:୨୫. ପାରୁସିର୍‌ ଇକା ୱେନ୍‌ଜି ଇର୍ହାର୍‌, "ୱାନ୍‌ ଦୁବେଙ୍ଗାଁ ପେରିକାନ୍‌ ବାଲ୍‍ଜିବୁଲ୍‍ ସାକ୍ତି ପୟ୍‌ଜି ଦୁବେଙ୍ଗ୍‍ ଡ଼ିସିସ୍‍କିଜିନାନ୍‍ ।"

25 ୱାର୍‌ ଇନିକା ଏତ୍‌ କିଜିନାର୍‍ ଜିସୁ ନେସ୍‍ତେଙ୍ଗ୍‍ଆଟ୍‍ସି ଇର୍ହାନ୍‌, ଉନ୍‌ଡ୍ରି ଦେସ୍‌ତି ଲୋକୁ ୱେର୍‌ଏ ୱେର୍‌ଏ ଦଲ୍‌ ବାଗ୍‍ଆଜି ନିଜେ ନିଜେଦି ଲୋଇ ଜୁଦ୍‍ କିତିଙ୍ଗ୍‌, "ଆୟା ଦେସ୍‌ ନାଣ୍ତ୍‍ ଦିନ୍‌ ତେବାଏତ୍‍ । ଏମେ ଗାଡ଼୍‌ ବା ଇଲୁ ଲୋଇ ଆଇ ଆଇ ଦଲ୍‍ଆଜି ଜାଟିଜଗଡ଼ା କିତିଙ୍ଗ୍‌, ୱାର୍‌ ବେଗି ନାସ୍ଟୁଆନାସନାର୍‍ । 26 ଆରିଙ୍ଗ୍‌, ସୟତାନ୍ ରାଜିଦୁ ଜଦି ଉନ୍‌ଡ୍ରି ଦଲ୍‌ ଆଇ ଦଲ୍‌ ବିରଦ୍‌ତାନ୍‌ ଜୁଦ୍‌କିନାତ୍‍, ନେସ୍‍ତେଙ୍ଗ୍‍ ଆନାତ୍‍ଜେ ଆକା କଣ୍ତ୍‌ କଣ୍ତ୍‍ଆଜି ଦଂସ ଆନାସନାତ୍‍ । 27 ମିର୍‌ ଇଜିନିଦେର୍‌, ନାନ୍ ଜଦି ବାଲ୍‍ଜିବୁଲ୍‍ତି ସାକ୍ତିଦାନ୍ ତାଗ୍‌ଇ ଦୁବେଆଙ୍ଗ୍‍ଁ ପେର୍‍ଜିନା । ଆରିଙ୍ଗ୍‌ ୱାନିକାଙ୍ଗ୍‌ ପେର୍‍ଦେଙ୍ଗ୍‍ ଇଜି ମି ସିସୁରିଙ୍ଗ୍‌ ଏନ୍‌ ସାକ୍ତି ସିଜିନାନ୍‌ ? ମି ସିସୁରି ଇୟା ପାଣିଦାନ୍‌ ମି ଦସ୍‍କିନିକା ମିସ୍‌ ଇଜି ପାର୍‍ମାଣ୍‍ଆଜିନାତ୍‍ । 28 ଦୁବେଙ୍ଗ୍‍ ଡ଼ିସିସ୍‍କିନି ସାକ୍ତି ନାନ୍ ବାଆଲ୍‍ଜିବୁଲ୍‍ତି ମାଣାନ୍‌ ପୟ୍‍ଏ । ମାପୁରୁଦି ଆତ୍ମାଦାନ୍‌ ଆକା ନାନ୍ ପୟ୍‌ତାମାନା । ଇୟାମାଣ୍‍କୁ ମାରି ଉନ୍‌ଡ୍ରି ବିସୟ୍‌ ପାର୍‍ମାଣ୍‍ଆଜିନାତ୍‍ ମାପୁରୁଦି ରାଜି ମି ଲାକ୍‌ତୁ ୱାତାତ୍‌ନି ।

29 "ଅରେନ୍‍ ବପୁମାନି ଲୋକ୍‌ତିଙ୍ଗ୍‌ ଆଗ୍‌ଡ଼ି ତର୍‍ଏତିଙ୍ଗ୍‍, ଏନ୍‌ ୱାନି ଇଲୁତୁ ଡ଼ୁଗୁଜି ୱାନି ଦନ୍‌ ରେଲ୍‍ଜ ଅତେଙ୍ଗ୍‍ ଆଟ୍‌ଏନ୍‍ ।

30 ✝ ୧୨:୩୦ ମାର୍କ ୯:୪୦. "ଏନ୍‌ ନା ତରିନ୍‌ ସିଲେନ୍‌, ୱାନ୍‌ ସତ୍‍ନେ ନା ବିରୁଦ୍‍ତାନ୍‍ ମାନାନାର୍ । ଏନ୍‌ ନା ୱାଲେ ମିସାଜି ଉଣ୍ତାକିଏଜିନାନ୍‍, ୱାନ୍‌ ଇନ୍‍ଙ୍ଗାଁ ଆନିଙ୍ଗାଁ କିନା ପୋକ୍‌ନାନ୍‌ । 31 ଇୟାଉଣ୍ତିଙ୍ଗ୍‌ ନାନ୍ ମିଙ୍ଗିଁ ସତ୍‌ ଇଜିନା, ଲୋକୁ ଏମେ ପାପ୍‌ କିପିନ୍‌ ବା ନିନ୍ଧା ମାଟା ଇନିନ୍‍, ଆୟାଉଣ୍ତିଙ୍ଗ୍‌ ୱାନିଙ୍ଗ୍‌ କେମାସିଆଇ ଆଦେଙ୍ଗ୍‌ ଆଟ୍‍ନାତ୍‍ । ମାତର୍‌ ଜଦି ଏନ୍‌ ପବିତ୍ରଆତ୍ମାଦି ବିରଦ୍‌ତାନ୍‌ ନିନ୍ଦା ମାଟା ଇନାନ୍‌, ୱାନି କେମାଆଏତ୍‍ । 32 ✝୧୨:୩୨ ଲୁକ ୧୨:୧୦.ଏମେକାନ୍‍ ମନୁସ୍ୟପୁତ୍ରଦି ବିରଦ୍‌ତାନ୍‌ ଇନିକା ଇରିଙ୍ଗ୍‌, ୱାନ୍‌ କେମା ପୟ୍‌ନାନ୍‌ । ମାତର୍‌ ଏନ୍‌ ପବିତ୍ରଆତ୍ମାଦି ବିରଦ୍‌ତାନ୍‌ ନିନ୍ଧା ମାଟା ଇନାନ୍‌, ୱାନ୍‌ ଇଲେଇ ମାରି ୱାନିଦିନ୍‍ତୁ ଏସାଙ୍ଗ୍‍ବା କେମାପୟ୍‍ଏନ୍‍ ।

ମାରାନ୍‌ ନି ତାନି ପଲ୍‌

33 ✝ ୧୨:୩୩ ମାତିଉ ୭:୨୦; ଲୁକ ୬:୪୪. "ନେଗି ପଲ୍‌ ଆସ୍‌ତେଙ୍ଗ୍‌ ଇଜି ମାରାନ୍‌ ମଟା ଆନିଦରକାର୍‍ । ତାଗ୍‌ଇ ମାରାତୁ ତାଗ୍‌ଇ ପଲ୍‌ ଆସ୍‌ନାତ୍‌ । ମାରାନ୍‌ ଏଣ୍ତେସ୍‌ନାନିକା, ପଲ୍‍ତାନ୍‍ ନେସ୍‍ତେଙ୍ଗ୍‍ଆନାତ୍‍ । 34 ✝୧୨:୩୪ ମାତିଉ ୩:୭; ୨୩:୩୩; ଲୁକ ୩:୭; ମାତିଉ ୧୫:୧୮; ଲୁକ ୬:୪୫.ମିର୍‌ ସାରାସ୍‍ତି ୱାଜା ତାଗ୍‌ଇ ଲୋକୁ, ମିର୍‌ ନେଗି ମାଟା ଏଣ୍ତେସ୍‌ ଇନ୍‌ଡ୍ରେଙ୍ଗ୍‌ ଆଟ୍‌ନିଦେର୍‌ ? ଅରେନ୍‍ୱାନି ମନ୍‍ ଲୋଇ ଆମାକା ଅଡ଼୍‍ବିଜିମାନାନ୍, ଆକା ୱେୟୁଦାନ୍‌ ସପ୍‍ନାନ୍‍ । 35 ଅରେନ୍‍ ନେଗି ଲୋକୁ ନେଗି ସାମାନ୍‍ତୁ ବର୍ତିଆତିମାନି ୱାନି ଜିବନ୍‌ତାନ୍‌ ନେଗି ମାଟା ସପ୍‍ସି ତାନାନ୍‍ । ଅରେନ୍‍ ତାଗ୍‌ଇ ଗୁଣୁତି ଲୋକୁ ତାଗ୍‌ଇ ସାମାନ୍‍ତୁ ବର୍ତିଆତିମାନି ୱାନି ଜିବନ୍‌ତାନ୍‌ ତାଗ୍‌ଇ ମାଟା ସପ୍‍ସି ତାନାନ୍‍ ।

36 "ମିର୍‌ ଇର୍ହିମାନି ୱିଜୁ ଉପ୍‍କା ମାଟେଙ୍ଗାଁ ଉଣ୍ତିଙ୍ଗ୍‌ ବିସାର୍‌ ଦିନ୍‍ତୁ ମିଙ୍ଗିଁ ଇସାବ୍‌ ସିଦେଙ୍ଗ୍‍ଆନାତ୍‍ । 37 ମି ମାଟାଦାନ୍‌ ମିର୍‌ ବିସାର୍‍ଆଜି ନିର୍ଦସ୍‍ ନୋ ଦସି ଇଜି ଆସାଇଆନିଦେର୍‍ ।"

କାବାଆନି ପାଣିକିଦେଙ୍ଗ୍‌ ଦାବିକିତାର୍‍

38 ✝ ୧୨:୩୮ ମାତିଉ ୧୬:୧; ମାର୍କ ୮:୧୧; ଲୁକ ୧୧:୧୬. ଅର୍‍ଲେନ୍‍ ଏସ ପାରୁସିର୍‌ ନି ଦାର୍ମୁ ଗୁରୁର୍‍ ଜିସୁଙ୍ଗୁଁ ଇର୍ହାର୍‌, "ଗୁରୁ, ନି ଉଣ୍ତ୍ରି କାବାଆନି ପାଣି ସୁଡ଼୍‍ଦେଙ୍ଗ୍‍ ବଦା କିଜିନାପ୍‍ ।"

39 ✝ ୧୨:୩୯ ମାତିଉ ୧୬:୪; ମାର୍କ ୮:୧୨. ଜିସୁ ୱାରିଙ୍ଗ୍‌ ଇର୍ହାନ୍‌, "ଇୟା ଜଗ୍‍ତି ଲୋକୁ ଏସା ଦୁସ୍ଟ ନି ମାପୁରୁଙ୍ଗ୍‌ଁ ମାନାଇକାର୍‍ ।" ମିର୍‌ ନାଙ୍ଗିଁ ଉଣ୍ତ୍ରି କାବାଆନି ପାଣି ତର୍‌ତେଙ୍ଗ୍‍ଁ ଇଜିନିଦେର୍‌ ? କେବଲ୍‌ ବାବବାଦି ଜୁନସ୍‍ତି ଜିବନ୍‌ତୁ ଗଟେଆତିମାନି କାବାଆନି ପାଣି ନେ ମିଙ୍ଗିଁ ତର୍‌ସି ସିଆଇଆନାତ୍‍ । 40 ଜୁନସ୍‍ ଏଣ୍ତେସ୍‌ ମିନି ପଟାଦୁ ମୁଣ୍ତ୍ରି ଦିନ୍ ମୁଣ୍ତ୍ରି ନାଡ଼ା ତେବାତାମାର୍ହାନ୍‍, ଆୟାୱାଜା ମନୁସ୍ୟପୁତ୍ର ବୁମି ଲୋଇ ମୁଣ୍ତ୍ରି ଦିନ୍ ମୁଣ୍ତ୍ରି ନାଡ଼ା ତେବାନାନ୍‌ । 41 ଆମା ନାଣ୍ତିଙ୍ଗ୍‌ ମାପୁରୁ ବିସାର୍‌କିନାନ୍‌ ନିନିବିତି ଲୋକୁ ମି ବିରଦ୍‌ତାନ୍‌ ଇନ୍‌ଡ୍ରେଙ୍ଗ୍‌ ଇଜି ନିନାର୍‍, ଇରିଙ୍ଗ୍‌ ଜୁନସ୍‍ତି ପ୍ରଚାର୍‌ ୱେନ୍‌ଜି ୱାର୍‌ ପାପ୍‌ ସାରିଦାନ୍‍ ଡ଼େସିୱାତାର୍‍ । ମାରି ସୁଡ଼୍‍ଦୁ, ନାନ୍ ମିଙ୍ଗିଁ ଇଜିନା, ଜୁନସ୍‍ତି ମାଣ୍‌କୁ ପେରିକାନ୍‌ ଅରେନ୍‍ ଇବେନୁ ମାନାନ୍‌ । 42 ମାପୁରୁଦି ବିସାର୍‌ ଦିନ୍‍ତୁ ସିବାଦି ରାଣି ମି ଦସ୍‌ ତର୍‌ତେଙ୍ଗ୍‍ଁ ଇଜି ନିନାତ୍‍, ଇରିଙ୍ଗ୍‌ ସଲମନ୍‍ତି ବୁଦିଦି ମାଟା ୱେନ୍‌ଡ୍ରେଙ୍ଗ୍‌ ଇଜି ଦୁନିଆଦି ଆକ ଦେସ୍‍ତାନ୍‍ ୱାଦ୍‌ ୱାତା ମାର୍ହାତ୍‌; ମାତର୍‌ ନାନ୍ ସତେନେ ଇଜିନା, ସଲମନତି ମାଣ୍‌କୁ ଇବେ ପେରିକାନ୍‌ ଅରେନ୍‍ ଇବେ ମାନାନ୍‌ ।

ତାଗ୍‌ଇ ଆତ୍ମା ଡ଼େସିୱାନିକା

43 "ଉଣ୍ତ୍ରି ତାଗ୍‍ଇଦୁବା ଅରେନ୍‍ ଲୋକୁ ମାଣାନ୍‌ ସତିସର୍‌ଇ ୱେନ୍‌କା ୱାର୍‌ତି ବାଡି ସୁଡ଼୍‌ଜି ମାରି ଉନ୍‌ଡ୍ରି ରମ୍‌ନି ବାଡି ପୟ୍‌ନାତ୍‌ । ଜଦି ଆୟା ନାନି ବାଡି ତାନେଙ୍ଗ୍‌ ପୁଟ୍‌ଏତ୍‌ । 44 ନାସ୍ତିୱାଲେ ୱାଦ୍‌ ଇନାତ୍‍, ନାନ୍ ଏମେ ଇନ୍‍ଡ୍ରଣାନ୍‍ ସତା ୱାତାମାର୍‍ଆ, ନା ଆୟା ଇନ୍‌ଡ୍ର ମାରିଡ଼େସି ସନା, ୱାଦ୍‌ ଡ଼େସି ସଲ୍‌ସି ସୁଣାତ୍‍, ଆୟା ଇଲୁ ମାରି ସିପାଇଆଜି ମେଲା ତେବାତାମାନାତ୍‌ । 45 ନାସ୍ତିୱାଲେ ୱାଦ୍‌ ସଲ୍‌ସି ତାନେମାଣାନ୍‍ ନାଣ୍ତ ତାଗ୍‌ଇ ମାରି ସାତ୍‍ଗୋଟା ଆତ୍‍ମେଙ୍ଗ୍‍ ଅର୍‌ସେ ଆସ୍‍ନା ୱାନାତ୍‌ । ମାରି ୱାକ୍‍ ୱାଜି ଆୟା ଇଲୁ ଲୋଇ ସଲ୍‌ସି ବାସାନେ । ନାସ୍ତିୱାଲେ ଲୋକ୍‌ତି ଅବସ୍ତା ଆଗ୍‍ଡ଼ିରି ବାଦ୍‌ଲୁ ନାଣ୍ତ ତାଗ୍‌ଇକା ଆନାତ୍‌ । ଇଲେଇ ଜିବନ୍‌ମାନି ତାଗ୍‌ଇ ଲୋକା ଉଣ୍ତିଙ୍ଗ୍‌ ଆୟାୱାଜା ଗଟାନାତ୍‌ ।"

ଜିସୁଦି ଆଇସି ନି ତଡ଼ାନ୍‌କୁ

46 ଜିସୁ ଲୋକା ୱାଲେ ୱାର୍‍ଗିଜିସାନିୱାଲେ ୱାନି ଆଇସି ନି ତଡ଼ାନ୍‌କୁ ଆୟା ବାଡିଦୁ ୱାଜି ୱାନିଙ୍ଗ୍‌ ଇନିକା ଇନ୍‌ଡ୍ରେଙ୍ଗ୍‌ ଇଜି ଆତ୍ରେ କାପ୍‌କିଜି ୱାନିଙ୍ଗ୍‌ କୁକିସ୍‍କିତାର୍‍ । 47 ଅରେନ୍‍ ଲୋକୁ ୱାଜି ଜିସୁଙ୍ଗୁଁ ଇର୍ହାନ୍‌, "ସୁଡ଼ୁଆ, ମି ୟାୟା ନି ତଡ଼ାନ୍‌କୁ ନି ଉଣ୍ତିଙ୍ଗ୍‌ ଆତ୍ରେ କାପ୍‍କିଜିନାର୍‍ ।"

48 ଜିସୁ ଇର୍ହାନ୍‌, "ଏଦ୍‌ ନା ୟାୟା ? ମାରି ଏର୍‌ ନା ତଡ଼ାନ୍‌କୁ ?" 49 ସିସୁରି ତରିନ୍‌ କିୟୁ ଜୁଟ୍‍ସି ଇର୍ହାନ୍‌, "ସୁଡ଼୍‍ଦୁ, ଇୟାକାର୍‌ ଆଜିନାର୍‌ ନା ୟାୟା ନି ତଡ଼ାନ୍‌କୁ । 50 ଏନ୍‌ ନା ମୁସ୍‌କୁପୁର୍‌ତି ବୁବାଦି ବଦାଦିଙ୍ଗ୍‍ ମାନାନାନ୍‍, ୱାନ୍‌ ନା ତଡ଼ାନ୍‌, ନା ତାଙ୍ଗିଁ ମାରି ନା ୟାୟା ।"