1 ମାରି ନିନୁ ମୁରୁଲି କାଡ଼ାଦୁ ନିଜେଦି ତିଆର୍‌ କିତି ମାପୁରୁଙ୍ଗୁଁ ଏତ୍ କିଦୁ; ଏଣ୍ତେସ୍‌କି ଦୁଃକ୍‌ତି ବେଡ଼ା ୱାଜିନାତ୍, ଏମେୱିଜୁ ବାର୍ସୁଦୁ ନିନୁ ୱେର୍‌ନି, ଇୟାୱିଜୁଦୁ ନା ଇନି ସୁକ୍ ସିଲେତ୍, ଆୟାୱିଜୁ ବାର୍ସେକ୍‌ ଲାକ୍‌ତୁଆଜି ୱାଜିନାତ୍ । 2 ଆୟା ବେଡ଼ାଦୁ ୱେଡ଼ା, ଜାୟ୍‌, ଲେଜୁ ମାରି ସୁକେଙ୍ଗ୍‌ ସିକାଟି ଆନେ, ମାରି ପିରୁ ୱେନେକା ଡ଼େସି ବାଦଡ଼ ଆନାତ୍; 3 ଆୟା ନାଣ୍ତିଙ୍ଗ୍‌ ଇଲୁ କାପ୍‍କିନିକାର୍‌ ତିର୍‌ଗିନାର୍‌ ମାରି ସାକ୍ତିଦି ଲୋକୁ ନିଜେ ଆଡ୍‌ଗି ଆନାର୍ ମାରି ଜାତା ନୁର୍‌ନିକେଙ୍ଗ୍‌ ଉଣା ଆତିଙ୍ଗ୍‌ ପାଣିଦାନ୍‌ ତେବାନେ, ମାରି ଜର୍‌କା‌ ସାରି ସୁଡ଼ୁନିକେଙ୍ଗ୍‌ କାଣି ଆନେ । 4 ମାରି ସାରି ତରନ୍‌ ସେର୍‌ଲା କେର୍‌ବିନାତ୍, ଆୟା ବେଡ଼ାଦୁ ନୁରୁନି ଆଉଲି ଉଣା ଆନାତ୍‌, ମାରି ପଟିଦି ଆଉଲିଆତିଙ୍ଗ୍‌ ଲୋକୁ ନିଙ୍ଗିଁନାର୍‌ ମାରି ବାଜାମରି ଏସ୍‌ନି ଆଇଲିକ୍ ଇସ୍‌ଉ; 5 ମାରି, ୱାର୍ ପେରି ବାଡିଦି ବିସୟ୍‌ତାନ୍‌ ତିଲାନାର୍ ମାରି ସାରିଦୁ କାସ୍ଟୁ ୱାନାତ୍‌; ମାରି, ବୁମିକାତଲି ମାରାନ୍‌ ପୁଙ୍ଗୁଁ ପୁନାତ୍ ମାରି ମାଡ଼ିମାଉ ନିଜେଦି ବଜୁଦୁ ନାଣ୍ତବଜୁ ଆନାତ୍ ମାରି ତାନି ପାଣିଦି ବଦା ଉଣା ଆନାତ୍; ଇରିଙ୍ଗ୍‌ ଲୋକୁ ନିଜେଦି ୱିଜୁଦିନ୍ ତେବାନି ବାଡିଦୁ ସନାନ୍ ମାରି ଆଡ଼୍‍ବାନିକାର୍‌ ସାରିଦୁ ବୁଲାଜି ମାନାର୍; 6 ଆୟା ବେଡ଼ାଦୁ ୱେଣ୍ତିଦି ପୁସା ଡ଼େବୁ ଆନାତ୍, ବାଙ୍ଗାରାମ୍‌ତି ନକି ରୁଙ୍ଗୁନା ସନାତ୍, ସିକିଲାଦି ସାଟି ଏରୁ ସନି ଲାକୁତୁ ପାଡ୍‌ନାତ୍ ମାରି କୁଇକାଲ୍‌ତୁ ରେନି ନାସୁ ତେଉନାତ୍; 7 ମାରି, ଦୁଡ଼ି ପୁର୍ବେ ୱାଜା ସିକିଲାଦୁ ମିସାନାତ୍, ମାରି ଆତ୍ମା ସିତିମାନି ମାପୁରୁଦି ଲାକୁତୁ ଆତ୍ମା ଡ଼େସି ସନାତ୍ । 8 ଅଜାକିନିକାନ୍‌ ଇଜିନାନ୍, ୱାର୍ହିକାଦି ୱାର୍ହିକା, ୱିଜୁ ନେ ୱାର୍ହିକା ।

9 ମାରି, ଅଜାକିନିକାନ୍‌ ବୁଦିଆଜି ଲୋକାଙ୍ଗ୍‌ ୱିଜୁ ଦିନ୍ ବୁଦିଦି ସିକିୟା ସିତାନ୍; ମାରି, ୱାନ୍ ଏତ୍‌କିଜି ମାରି ପଇଜି ନାଣ୍ତ ଆଦେସ୍‌ ଦାଡ଼ି ଇସାବ୍‌ତାନ୍‌ ରସ୍‌ସି ଇଟ୍‍ତାନ୍‌ । 10 ଅଜାକିନିକାନ୍‌ ୱେଡ଼ିକାଦି ମାଟା ମାରି ଏମେକା ନେସ୍‌ନି ୱାଜା ରାସାତାତ୍, ଆୟା ସତ୍ ମାଟା ପୟ୍‌ତାନ୍‌ । 11 ବୁଦିଦି ମାଟା ୱିଜୁ ତୁତାରି ବାଡିଗା ୱାଜା ମାରି ଗାଉଡ଼ୁଙ୍ଗାଁ ମାଟା ଆଟୁୱାଦି ଇନ୍‌ମୁ କୁଟି ୱାଜା, ଆୟାୱିଜୁ ଉଡ୍ରି ମାପୁରୁଦି ମାଡ଼ାନ୍ ସିଆଇ ଆତାମାନାତ୍ । 12 ମାରି, ଏ ନା କଡ଼, ନିନୁ ମାଟା ମାନାଆ; ନାଣ୍ତ ବଇ ରାସ୍‌ତେଙ୍ଗ୍‌ ୱିଜ୍‌ଏତ୍‌; ମାରି, ନାଣ୍ତ ଅବ୍ୟାସ୍‌ କିତିଙ୍ଗ୍‌ ମେନ୍ଦଲ୍‌ ୱାନ୍ଦ୍‌ନାତ୍‌ । 13 ସାରାସାରି ମାଟା ଇକା; ୱିଜୁ ୱେରାଇ ଆତାମାନାତ୍; ମାପୁରୁଙ୍ଗୁଁ ତିଲାଦୁ ମାରି ୱାନି ମାଟା ୱିଜୁ ମାନାଦୁ; ଇରିଙ୍ଗ୍‌ ଇକା ନେ ଲୋକ୍‌ତି ପୁରା ପାଣି । 14 ଏଣ୍ତେସ୍ ମାପୁରୁ ୱିଜୁ ପାଣି, ମାରି ନେଗିକା ନ ତାଗ୍‍ଇକା ୱିଜୁ ମାର୍‍ଗିତି ବିସୟ୍‌ ବିସାର୍‌ତୁ ତାନାନ୍ ।