1 ଲୋକୁ ମାଙ୍ଗିଁ କ୍ରିସ୍ତଦି ସେବାକିନିକାର୍‌ ଇଜି ୱେର୍‌ନିକା ମାନାତ୍‌ । ମାପୁରୁ ମାଙ୍ଗିଁ ମାର୍‌ଗିତି ସତ୍‌ତି ବିସୟ୍‌ ଗୁମୁସ୍ତା କିତାମାନାନ୍‌ । 2 ମାରି, ଇୟାୱାଜା ଦାଇତ୍‌ ମାନାତିମାନି ଲୋକୁ ନିଜେଦି ପ୍ରବୁଦି ଉଣ୍ତିଙ୍ଗ୍‌ ବିସ୍‌ବାସ୍‌ ଆନିକା ଅରେନ୍‍ ଦର୍‌କାର୍‌ । 3 ମାତର୍‌ ମି ମାଣ୍‌କୁ ମାରି ଆମା ଇନି ବିଚାର୍‌କିନି ସବାଦି ମାଣ୍‌କୁ ବିଚାର୍‌ ଆନି ଉଣ୍ତିଙ୍ଗ୍‌ ନାନୁ ସିନ୍ତା ସିଲେ, ଇୟାୱାଜା ନୋ ନାନ୍‌ ନିଜେ ବା ନିଜେଦି ବିଚାର୍‌ କିଏଜିନା । 4 ଇରିଙ୍ଗ୍‌ ନାନ୍‌ ନିଜେଦି ବିରୁଦ୍‌ତାନ୍‌ ମାନି ମାଟା ମୋନ୍‌ତୁ ନେସ୍‌ଏ । ମାରିବା ଇବେନୁ ନାନ୍‌ ଦସ୍‌ସିଲେତ୍‌ ଇଜି ପାରାମାଣ୍‌ କିଆୟ୍‌ଆଏ । ମାତର୍‌ ନା ବିଚାର୍‌ ପ୍ରବୁ କିନାନ୍‌ । 5 ଆଦେଙ୍ଗ୍‌, ବେଡ଼ାଦି ଆଗ୍‍ଡ଼ିନେ ପ୍ରବୁ ବିଚାର୍‌ କିଦେଙ୍ଗ୍‌ ୱାନି ସାନ୍ଦି କାପ୍‌କିଦୁ । ଇନି ବିସୟ୍‌ ବିଚାର୍‌ କିମାଟ୍‌ । ୱାନ୍‌ ସିକାଟିଦୁ ମାର୍‌ଗିତିମାନି ବିସୟ୍‌କୁୱିଜୁ ଜାୟ୍‌ତୁ ତର୍‌ନାନ୍‌, ମାରି ଲୋକା ମୋନ୍‌ତୁ ମାର୍‌ଗିତିମାନି ମାଟେଙ୍ଗ୍‌ୱିଜୁ ୱେକ୍‌ନାନ୍‌; ନାସ୍ତିୱାଲେ ୱିଜୁ ଲୋକୁ ମାପୁରୁଦିମାଣୁକୁ ପ୍ରସଂସା ପୟ୍‌ନାର୍‌ ।

6 ଏ ତଡ଼ାନ୍‌କୁ ନି ତାଙ୍ଗିଁକି, ନାନ୍‌ ମି ସିକିୟା ଉଣ୍ତିଙ୍ଗ୍‌ ଇୟାୱିଜୁ ମାଟେଙ୍ଗ୍‌ ନା ନିଜେଦିଙ୍ଗ୍‌ ମାରି ଆପୋଲୋଙ୍ଗ୍‌ ସୁଡ଼ୁଜି କାତା ୱେର୍‌ତା, ଏଣ୍ତେସ୍‌ "ସାସ୍ତ୍ରଦୁ ଆମାକା ରାସାତା ମାନାତ୍‌, ଆବେନୁ ତାନିମାଣୁକୁ ଆଗ୍‌ଡ଼ି ସୋଲ୍‌ମାଟ୍‌ ।" ଇକା ମିର୍‌ ମା ମାଣ୍‌କୁ ଅଜାଦୁ, ମାରି ଏଣ୍ତେସ୍‌ ମି ଲୋଇରାନ୍‌ ଏନ୍‌ ଅରେନ୍‍ୱାନି ଅସି ଗର୍ବ କିମାକିନ୍‌ ମାରି ଅରେନ୍‍ୱାନିଙ୍ଗ୍‍ ଅସି ଡ଼ିସ୍‌ମାକିନ୍‌ । 7 ଇରିଙ୍ଗ୍‌ ଏନ୍‌ ମିଙ୍ଗିଁ ପେରିକାନ୍‌ କିତାମାନାନ୍‌ ? ମାରି, ଆମାକା ମିର୍‌ ଦାନ୍‍ ୱାଜା ମାପୁରୁଦିମାଣୁକୁ ପୟ୍‌ଇଦେର୍‌, ଇୟାୱାଜା ମିଦି ଇନିକା ମାନାତ୍‌ ? ମାତର୍‌ ଜଦି ମିର୍‌ ଆକା ଦାନ୍‌ତିୱାଜା ପୟ୍‌ତିମାନିଦେର୍‌, ଆର୍‌ତିଙ୍ଗ୍‌ ଆକା ଦାନ୍‌ତି ୱାଜା ପୟ୍‌ଇତିୱାଜା ଏନ୍ଦା ଗର୍ବ କିଜିନିଦେର୍‌ ? 8 ମି ଦର୍‌କାର୍‌ତି ୱିଜୁ ବିସୟ୍‌ ପୟ୍‌ତି ୱିସ୍‌ତିଦେର୍‌ନି ? ମିର୍‌ ଇନିକା ମାଜନ୍‌ ଆତିଦେର୍‌ନି ? ମାଙ୍ଗିଁ ଡ଼ିସ୍‌ସି ମିର୍‌ ଇନିକା ଅରେନ୍‍ ଅରେନ୍‍ ରାଜା ଆତିମାନିଦେର୍‌ ? ସତ୍‌ତାନ୍‌, ମିର୍‌ ରାଜା ଆତିମାରିଙ୍ଗ୍‌ ନେଗେନ୍‌ ଆତାତ୍‌ମାନ୍ଦି, ଏଣ୍ତେସ୍‌ ମାପ୍‌ ବା ମି ୱାଲେ ରାଜା ଆଦେଙ୍ଗ୍‌ ଆଟ୍‌ତାପ୍‌ମାନ୍ଦି । 9 ଇରିଙ୍ଗ୍‌ ନାଙ୍ଗିଁ ଏତ୍‌ ୱାନାତ୍, ମା ୱାଜା ପ୍ରେରିତ୍‌ ସିସୁରିଙ୍ଗ୍‌ ମାପୁରୁ ୱିଜେରି ସାରାସାରିୱେନ୍‌କାରିବାଗ୍‌ତୁ ଇଟ୍‌ତାମାନାନ୍‌ । ନେସ୍‌ନିୱାଜା ସାନି ଦଣ୍ତବଗେ କିଜି ୱିଜୁ ଜଗତ୍‌ତି ଲୋକୁ ମାରି ଦୁତ୍‌କା ଲାକ୍‌ତୁ ସେମାର୍‌ଆନି ଲୋକା ୱାଜା ମାଙ୍ଗିଁ ୱାନ୍‌ ଇଟ୍‌ତାମାନାନ୍‌ । 10 ମାପୁ କ୍ରିସ୍ତଦି ଉଣ୍ତିଙ୍ଗ୍‌ ମୁର୍କୁ ଇଜି ଜାଣାଆତାମାନାପ୍‌ । ମାତର୍‌ ମିର୍‌ କ୍ରିସ୍ତଦିମାନୁ ବୁଦିମାନିକିଦେରା; ମାପୁ ସାକିସିଲିଲୋକୁ, ମାତର୍‌ ମିର୍‌ ସାକ୍ତିମାନିକିଦେରା । ମିର୍‌ ସନ୍‌ମାନ୍‌, ମାତର୍‌ ମାପୁ ସନ୍‌ମାନ୍‌ ଆଏପ୍‌ । 11 ମାପୁ ଇଲେଇବା ବାଙ୍ଗାଁ ମାରି ଏରିକି, କିଜିତି ଆଙ୍ଗିଁ ଆରାତାପ୍‌ ମାରି ଇନିଆଁଆନିଆଁ ବୁଲାଜିନାପ୍‌ ମାଡ୍‌ତିନ୍‌ଜିନାପ୍‌ ମାରି ତେବାନି ଇଲୁ ସିଲେତ୍‌ । 12 ✝୪:୧୨ ପ୍ରେରିତ ୧୮:୩.ନାଣ୍ତ କାସ୍ଟୁପାଣି କିଜି ମାପୁ ଦିନ୍‌ତିଙ୍ଗ୍‌ ଦିନ୍‌ ଜିରାଜି ସଲ୍‌ସିନାପ୍‌ । ଏନ୍‌ ମାଙ୍ଗିଁ ଆନାଦୁରିଆ ଇଟ୍‌ତିଙ୍ଗ୍‌, ମାପୁ ୱାନିଙ୍ଗ୍‌ ଆସିର୍ବାଦ୍‌ କିନାପ୍‌ । କାସ୍ଟୁ ପୟ୍‌ଜି, ସାସ୍‌ କିଜିନାପ୍‌ । 13 ଅପମାନ୍‌ ଆଜି ମିସାନି ମାଟା ୱେର୍‌ସିନାପ୍‌, ଇୟାସାନ୍ଦିବା ମାପୁ ଦୁନିଆଦି କାସ୍‌ରା ୱାଜା ଆତାମାନାପ୍‌, ୱିଜେରି ଉଣ୍ତିଙ୍ଗ୍‌ କିଟିଙ୍ଗ୍‌ତିରି ୱାଜା ଆତାମାନାପ୍‌ ।

14 ନାନ୍‌ ମିଙ୍ଗିଁ ସେମାର୍‌ କିନି ଉଣ୍ତିଙ୍ଗ୍‌ ଇୟାୱିଜୁ ବିସୟ୍‌କୁ ରାସ୍‌ଏ, ମାତର୍‌ ମିର୍‌ ନା ଲାଡ୍‍ତି କଡ଼ର୍‌ ଆତି ମାନିଙ୍ଗ୍‌ ନେସ୍‌ତେଙ୍ଗ୍‌ ମାରି ସେତ୍‌ନା ଆନି ଉଣ୍ତିଙ୍ଗ୍‌ ଇୟାୱିଜୁ ବିସୟ୍‌କୁ ରାସ୍‌ସିନା । 15 ଇରିଙ୍ଗ୍‌ କ୍ରିସ୍ତଦି ଜିବନ୍‌ତୁ ମି ଗାଦିଲୋକ୍‌ ଦାର୍ମୁଗୁରୁର୍‌ ତେବାନାର୍‌ । ମାତର୍‌ ମି ବୁବା ଅରେନ୍‍ । ମି ଲାକ୍‌ତୁ ସୁସମାଚାର୍‌ ପ୍ରଚାର୍‌ କିନି ମାଣ୍‌କୁ କ୍ରିସ୍ତ ଜିସୁଦିମାନୁ ନାନ୍‌ ମି ବୁବା ୱାଜା ଆତାମାନା । 16 ✝୪:୧୬ ୧ କରିନ୍ତିୟ ୧୧:୧; ପିଲିପିୟ ୩:୧୭.ଆଦେଙ୍ଗ୍‌ ନାନୁ ମିଙ୍ଗିଁ ଅନୁରଦ୍‌ କିଜିନା, ମିର୍‌ ନା ୱେନ୍‌କା ରାଦୁ । 17 କ୍ରିସ୍ତଦି ଜିବନ୍‌ତୁ ନା ଲାଡ୍‍ତି ନି ବିସ୍‌ବାସ୍‌ତି ମାରିନ୍‌ ତିମତିଙ୍ଗ୍‌ ମି ଲାକ୍‌ତୁ ପୋକ୍‌ତାଜିନା । ଏଣ୍ତେସ୍‌ ନାନ୍‌ ଜିସୁ କ୍ରିସ୍ତଦିମାନୁ ତେବାଜି ଆମା ପୁନି ଜିବନ୍‌ଜାପନ୍‌ କିଜିନା ମାରି ୱିଜୁତରିନ୍‌ ୱିଜୁ ମଣ୍ତଲିଆଙ୍ଗାଁ ଆମା ୱିଜୁ ସିକିୟା ୱେର୍‌ସିମାର୍‌ଆ, ଆକା ୱାନ୍‌ ମିଙ୍ଗିଁ ଏତ୍‌ କିବିସ୍‌କିନା ସିନାନ୍‌ ।

18 ନାନ୍‌ ମି ଲାକ୍‌ତୁ ସଲ୍‌ଏ ଇଜି ଅଡ଼ବିଜି ଏନ୍‌ ଏନ୍‌ ମେନ୍ଦଲ୍‌ତୁ ୱେଡ଼ିକା ଆତାମାନାର୍‌ । 19 ମାତର୍‌ ଜଦି ମାପୁରୁ ବଦା କିତିଙ୍ଗ୍‌, ନାନ୍‌ ମି ଲାକ୍‌ତୁ ଦାପ୍ରେ ୱାନା; ମାରି, ଆକାର୍‍ ଗର୍ବ କିଜିନାର୍‌, ୱାରି ମାଟା ସିଲେ, ମାତର୍‌ ସତ୍‌ତାନ୍‌ ୱାରି ଏସ ସାକ୍ତିମାନାତ୍‌, ଆକା ନାନୁ ସୁଡ଼ୁନା । 20 ଇରିଙ୍ଗ୍‌ ମାପୁରୁଦି ରାଜି କେବଲ ମାଟାଦି ବିସ୍‌ୟ ସିଲେ, ମାତର୍‌ ସାକ୍ତିଦି ବିସ୍‌ୟ । 21 ମି ଇଚ୍ଛା ଇନିକା ? ନାନ୍‌ ଇନିକା ମିଙ୍ଗିଁ ସାସନ୍‌ କିନି ଉଣ୍ତିଙ୍ଗ୍‌ କର୍‌ଡା ଆସ୍‌ସି ୱାନା ? ନୋ, ଜିବନ୍‌ନୋନିକା ମାରି ସାନ୍ତିଦି ମୋନ୍‌ ଆସ୍‌ସି ୱାନା ।