1 ୱେଡ଼ା ଆଡ୍‌ଗି ନାନୁ ଉଡ୍ରି ଦୁଃକ୍‌ଦି ବିସୟ୍‌ ସୁଡ଼ୁତାମାନା, ମାରି ଆକା ଲୋକା ଉଣ୍ତିଙ୍ଗ୍‌ ବଜୁ; 2 ମାପୁରୁ ଏଙ୍ଗ୍‌ ଏଙ୍ଗ୍‌ ନିସ ଦନ୍, ସମ୍ପତି ମାରି ସାନ୍ତି ସିନାନ୍ ଜେ, ୱାନି ମନ୍‌ ପୁରା କିଦେଙ୍ଗ୍‌ ଇନି ବିସୟ୍‌ତାନ୍‌ ଉଣା ଆଏତ୍ ମାନାତ୍, ମାରିବା ଆକା ଉଣି ଉଣ୍ତିଙ୍ଗ୍‌ ମାପୁରୁ ୱାନିଙ୍ଗ୍‌ ସାକ୍ତି ସିଏନ୍, ମାରିବା ଆଇ ଲୋକୁ ଆକା ଉଣାର୍‌; ଇକା ୱାର୍ହିକା ମାରି ତାଗ୍‍ଇ ବାଦା ୱାଜା । 3 ଜଦି ଏମେ ଲୋକୁ ସହେ କଡ଼ର୍ ଜନମ୍‌ କିଜି ନାଣ୍ତ ବାର୍ସୁ ଜିଜି ମାନାନ୍, ମାତର୍‌ ୱାନି ଜିବନ୍‌ ଜଦି ୱେଡ଼ିକାଦାନ୍ ପୁରା ଆଏତ୍, ମାରିବା ଜଦି ୱାନିଙ୍ଗ୍‌ ଗୁଟାଦୁ ମୁସାଇ ଆଏନ୍, ଆର୍‍ତିଙ୍ଗ୍‌ ନାନୁ ଇନା, ଆୟା ଲୋକ୍‌ ବାଦ୍‌ଲୁ ଜନମ୍‌ ଆନି ବେଡ଼ାଦୁ ସାତିମାନି କଡ଼ପିଲା ନେଗିକାନ୍; 4 ଇରିଙ୍ଗ୍‌ ଇୟା ସାତି ଜନମ୍‌ଆତି କଡ଼ ଗାଲି ୱାଜା ୱାନାନ୍ ମାରି ସିକାଟିଦୁ ସନାନ୍, ମାରି ୱାନି ଦରୁ ସିକାଟିଦୁନେ ମିସାନାତ୍; 5 ମାରି, ଇୟା କଡ଼ ୱେଡ଼ା ସୁଡ଼ୁଏନ୍ କି ନେସ୍‍ତେଙ୍ଗ୍‌ ଆଟ୍‌ଏତାନ୍‌; ମାରିବା ଇୟା ସାତି ଜନମ୍‌ଦି କଡ଼ ଆୟା ଲୋକ୍‌ ବାଦ୍‌ଲୁ ନାଣ୍ତ ରମ୍‍ନିକା ପୋଇନାନ୍; 6 ମାରି, ଆୟା ଲୋକ୍‌ ଇନି ୱେଡ଼ିକା କିଏଣ୍‌ଗା ଦୁଇ ଆଜାର୍‌ ବାର୍ସୁ ଜିତିଙ୍ଗାଁ ବା ୱିଜେରେ ଇନିକା ଉଣ୍ତ୍ରି ବାଡିଦୁ ସଲ୍‍ଏର୍ ? 7 ଲୋକା ୱିଜେରି ପାଣି ୱାନି ପଟାଦି ଉଣ୍ତିଙ୍ଗ୍‌, ମାରିବା ଏସା ଉଟିଙ୍ଗ୍‌ବା ପଟା ପାଜ୍‌ଏତ୍ । 8 ଆଦେଙ୍ଗ୍‌ ମୁର୍କୁ ଲୋକ୍‌ ବାଦ୍‌ଲୁ ବୁଦିଦି ଲୋକ୍‌ତି ଇନି ଲାବ ? ମାରି, ଜିତିମାନିୱାରି ଆଗିଡ଼ି ସାଲାଦେଙ୍ଗ୍‌ ନେସ୍‍ନାନ୍ ଏମେ କାକୁର୍ତି ଲୋକ୍‌, ୱାନି ଇନି ଲାବ ? 9 ମନ୍‌ତି ଲାଲାୟ୍‌ ବାଦ୍‌ଲୁ ବେଟ୍‍ ଆନିକା ନେଗେତ୍‌; ଇକା ନେ ୱାର୍ହିକା ମାରି ଗାଲିଦି ୱେନ୍‌କା ଉରୁକ୍‌ନି ୱାଜା । 10 ଏମେକା ଇନିକା ଗଟାନାତ୍‌ ଆକା ପୁର୍ବେଦାନ୍‌ ତିର୍‌ ଆତା ୱିଜିତା ମାରି ୱାନ୍‌ ୱିଜୁ ଲୋକ୍‌ ଇଜି ନେସ୍‌ତାମାନାନ୍‌, ମାରି ୱାନ୍‌ ନିଜେଦି ମାଣାନ୍‌ ନାଣ୍ତ ସାକ୍ତିମାନି ଲୋକ୍‌ତି ୱାଲେ ବିରୁଦ୍‌ କିଦେଙ୍ଗ୍‌ ଆଟ୍‍ଏନ୍‌ । 11 ୱାର୍ହିକା ମାଟା ନାଣ୍ତ ମାନାତ୍‌, ଆବେଟ୍‍କୁ ଲୋକାଦି ଇନି ଲାବ ? 12 ଇରିଙ୍ଗ୍‌ ଲୋକୁ ନିଡ଼ିଗା ୱାଜା ନିଜେଦି ଏମେ ୱାର୍ହି ଜିବନ୍‌ତି ଦିନ୍‌ୱିଜୁ ଜିନାନ୍‌, ୱାନ୍‌ ଜିନି ବେଡ଼ାଦୁ ୱାନି ନେଗିକା ଇନିକା, ଇକା ଏନ୍‌ ନେସ୍‌ନାନ୍‌ ? ମାରି ଲୋକା ସାତି ୱେନ୍‌କା ଦୁନିଆଦୁ ଆମାକାଗଟେ ଆନାତ୍‌, ଆକା ଏନ୍‌ ୱାନିଙ୍ଗ୍‌ ୱେର୍‌ନାନ୍‌ ?