1 ✝ନାସ୍ତିୱାଲେ ସିସୁର୍‍ ଜିସୁଦି ଲାକ୍‌ତୁ ୱାତା ୱେନ୍‌ବାତାର୍‌, "ମୁସ୍‌କୁପୁର୍‌ତି ରାଜିଦୁ ୱିଜେରିମାଣାନ୍‌ ଏନ୍‌ ପେରିକାନ୍‌ ?"

2 ଜିସୁ ଅରେନ୍‍ ଇସ୍ରି କଡ଼ଦିଙ୍ଗ୍‌ ୱାରି ଆଗ୍‌ଡ଼ି ନିଲପ୍‌ତାନ୍‌ନୋ ଇର୍ହାନ୍‌, 3 ✝ନାନ୍ ମିଙ୍ଗିଁ ସତ୍‌ ଇଜିନା, ମିର୍‌ ଇସ୍ରିକଡ଼ୱାଜା ବାଦ୍‍ଲିଆଏତିଙ୍ଗ୍‌ ଏସାଙ୍ଗ୍‍ବା ମୁସ୍‌କୁପୁର୍‌ତି ରାଜିଦୁ ସନ୍‌ଡ଼୍ରେଙ୍ଗ୍‌ ଆଟ୍‍ଇଦେର୍‍ । 4 ମାରି, ଏନ୍‌ ଇୟା ଇସ୍ରି କଡ଼ଦି ୱାଜା ନିଜେଦିଙ୍ଗ୍‌ ନମ୍ର ଆନାନ୍‌, ୱାନ୍‌ ମୁସ୍‌କୁପୁର୍‌ତି ରାଜିଦୁ ୱିଜେରିଙ୍ଗ୍‌ ପେରିକାନ୍‌ । 5 ମାରି, ଏନ୍‌ଆପିନ୍‌ ନା ଦର୍‌ତାନ୍‌ ଇୟାୱାଜା ଅରେନ୍‍ ଇସ୍ରି କଡ଼ଦିଙ୍ଗ୍‌ ମାନାନାର୍‌, ୱାନ୍‌ ନାଙ୍ଗିଁ ବା ମାନାନାର୍‌ ।

6 ମାତର୍‌ ଏନ୍‌ଆପିନ୍‌ ନାମାନୁ ବିସ୍‍ବାସ୍‍ କିଜିମାନି ଇୟା ଇସ୍ରିକଡ଼ରି ମାଣ୍‌କୁ ଅରେନ୍‍ୱାନିଙ୍ଗ୍‍ ଏର୍‌ପେନାନ୍‌, ୱାନି କକ୍‌ଲାଦୁ ଉନ୍‌ଡ୍ରି ପେରି ଜାତାକାଲୁ ତର୍‌ସୋ ୱାନିଙ୍ଗ୍‌ ସାମ୍‌ଦୁର୍‌ତି ନାଣ୍ତଗୁମିମାନି ଏର୍‌ତୁ ପୋକ୍‌ତିଙ୍ଗ୍‌ ୱାନି ଉଣ୍ତିଙ୍ଗ୍‌ ନେଗେନ୍‌ଆନାତ୍‌ । 7 ଲୋକାଦି ବିସ୍‌ବାସ୍‌ତୁ ଏର୍‌ପେନି ଉଣ୍ତିଙ୍ଗ୍‌ ଗାଦି ମାଟେଙ୍ଗ୍‌ମାନେ । ଆୟାଉଣ୍ତିଙ୍ଗ୍‌ ଇୟା ଦୁନିଆଦି ଅବସ୍ତା ନିସ ତିଲାନିକା । ୱିଜୁୱାଲେ ଇୟାୱାଜା ଆର୍‍ପ୍‍ନିକା ୱାନାତ୍‌, ମାତର୍‌ ଏନ୍‌ ଏର୍‌ପିନିକା ଗଟାକିନାନ୍‌, ୱାନି ଦସ୍‌ ଏସା ପେରିକାଆନାତ୍‍ !

8 ✝ଜଦି ମି କିୟୁ ନି ପାଦାମ୍‌ ଉଣ୍ତିଙ୍ଗ୍‌ ମିର୍‌ ବିସ୍‍ବାସ୍‍ ଆରାକିନିଦେର୍‌, ଆର୍‌ତିଙ୍ଗ୍‌ ଆକା କୟ୍‌ଜ ପୋକ୍‌ତୁ । ରୁଣ୍ତି କିକୁ ନି ରୁଣ୍ତି ପାଦାମ୍‌କୁ ମାନ୍‌ଞ୍ଜି ଏସ୍‌କାଙ୍ଗ୍‌ୱିଜିଇ ସିସୁଦୁ ପୋକାନି ବାଦୁଲୁ ଉନ୍‌ଡ୍ରି କିୟୁ ନି ଉନ୍‌ଡ୍ରେ ପାଦାମ୍‌ ସିଲେଣ୍‌ଗା ଏସ୍‌କାଙ୍ଗ୍‌ୱିଜିଇ ଜିବନ୍‌ତୁ ଡ଼ୁଗୁନିକା ମି ଉଣ୍ତିଙ୍ଗ୍‌ ନେଗେତ୍‌ । 9 ✝ମାରି, ମି କାଣ୍‌ଗା ଉଣ୍ତିଙ୍ଗ୍‌ ଜଦି ମି ବିସ୍‍ବାସ୍‍ ନାଷ୍ଟୁ ଆଜିନାତ୍‍, ତାନିଙ୍ଗ୍‌ ଉଦୁଜ ପୋକ୍‌ତୁ । ରୁଣ୍ତି କାଣୁକୁ ମାନ୍‌ଞ୍ଜି ସିସୁକାସ୍‌ନି ନରକଦୁ ପୋକାନି ବାଦୁଲୁ ଉନ୍‌ଡ୍ରି କାଣ୍‌ଗା ଅସି ଏସ୍‌କାଙ୍ଗ୍‌ୱିଜ୍‌ଇ ଜିବନ୍‌ତୁ ଡ଼ୁଗୁନିକା ମି ଉଣ୍ତିଙ୍ଗ୍‌ ନେଗେତ୍‌ ।

10 ✝ଇୟା ଇସ୍ରିକଡ଼ରି ମାଣ୍‌କୁ ଅରେନ୍‍ୱାନିଙ୍ଗ୍‍ ବା ନିସାର୍‍ କିମାଟ୍‌ । ନାନ୍ ମିଙ୍ଗିଁ ସତ୍‌ ଇଜିନା, ଇୟାୱାରିଙ୍ଗ୍‌ ଜାତୁନ୍‌କିଜିମାନି ମୁସ୍‌କୁପୁର୍‌ତି ଦୁତ୍‌କୁ ୱିଜୁଦିନ୍‌ ନା ବୁବା ମାପୁରୁଦି ଲାକ୍‌ତୁମାନେ । 11 ଇରିଙ୍ଗ୍‌ ସାରିବାଣାତିମାନି ଲୋକାଙ୍ଗ୍‌ ରକ୍‌ୟା କିଦେଙ୍ଗ୍‌ ମନୁସ୍ୟପୁତ୍ର ୱାତାମାନାନ୍‍ । *

12 ମିର୍‌ ଇନିକା ଅଡ଼୍‍ବିଜିନିଦେର୍‍, ଜଦି ଅରେନ୍‍ ଲୋକାୱି ଗୋଟା ମେଣ୍ତେଙ୍ଗ୍‌ମାନେ ମାରି ଆବେଣୁକୁ ଉନ୍‌ଡ୍ରି ମୁରୁନାତ୍‌, ଆର୍‌ତିଙ୍ଗ୍‌ ୱାନ୍‌ ଇନିକା କିନାନ୍‌ ? ନବେ ନଅଗୋଟା ମେଣ୍ତେଙ୍ଗାଁ ଗରନ୍‌ ଲାକ୍‌ତୁ ସାରାଦେଙ୍ଗ୍‌ ଡ଼ିସ୍‌ନାସିନାନ୍‌ନୋ ଆୟା ମୁରିତିମାନି ମେଣ୍ତାଦିଙ୍ଗ୍‌ ପୟ୍‌ଦେଙ୍ଗ୍‌ସୋନାନ୍‌ । 13 ଏସ୍ତିୱାଲେ ୱାନ୍‌ ମେଣ୍ତାଦିଙ୍ଗ୍‌ ପୟ୍‌ନାନ୍‌, ନାନ୍ ମିଙ୍ଗିଁ ସତ୍‌ ଇଜିନା, ମୁରୁଇତିମାନି ନବେ ନଅଗୋଟା ମେଣ୍ତେଙ୍ଗାଁ ଉଣ୍ତିଙ୍ଗ୍‌ ୱାନି ଏସ ୱେଡ଼ିକା, ଇୟା ଉନ୍‌ଡ୍ରେ ମେଣ୍ତାଦି ଉଣ୍ତିଙ୍ଗ୍‌ ୱାନିକାମାଣାନ୍‌ ନାଣ୍ତ ୱେଡ଼ିକାଆନାନ୍‌ । 14 ଟିକ୍‌ ଆୟାୱାଜା, ଇୟା ଇସ୍ରିକଡ଼୍‍ରି ମାଣ୍‌କୁ ଅରେନ୍‍ୱାନିଙ୍ଗ୍‍ ବା ସାରିବାଣାପିନ୍‌, ଇକା ମି ମୁସ୍‌କୁପୁରୁତି ବୁବା ମାପୁରୁଦି ବଦା ସିଲେତ୍‍ ।

15 ✝ଅରେନ୍‍ ତଡ଼ାନ୍‌ ଜଦି ମି ବିରଦ୍‌ତାନ୍‌ ଇନି ଦସ୍‌ କିନାନ୍‌, ୱାନି ଲାକ୍‌ତୁ ସୋଲ୍‌ସ ୱାନି ଦସ୍‌ ୱାନିଙ୍ଗ୍‌ ତର୍‌ସସିଦୁ । ମାତର୍‌ ମିର୍‌ ରିଇଦେର୍‌ ଅରେନ୍‌ନେ ମାନିୱାଲେ ଇକା ନେସ୍‌ଇୱାଜା କିଦୁ । ଜଦି ୱାନ୍‌ ମି ମାଟା ୱେନାନ୍‌, ନି ତଡ଼ାନ୍‌ତିଙ୍ଗ୍‌ ନିନ୍‌ ଡ଼େସି ପଇନିଦେର୍‌ । 16 ଜଦି ୱାନ୍‌ ୱେନ୍‌ଏନ୍‌, ଅରେନ୍‍ ସିଲ୍‍ତିଙ୍ଗ୍‍ ରିଏରିଙ୍ଗ୍‌ ଆସ୍‌ସୋ ୱାନି ଲାକ୍‌ତୁସାନ୍‌ଡ୍ରୁ । ମା ସାସ୍ତ୍ରଦି ଇସାବ୍‌ତାନ୍‌, "ରିଏର୍‌ ସିଲ୍‍ତିଙ୍ଗ୍‍ ମୁଏରିଙ୍ଗ୍‍ଁ ସାକିଦି ଆଗ୍‌ଡ଼ି ମି ୱିଜୁ ଦାବି ସତ୍‌ ଇଜି ପାରାମାଣ୍‌ ଆପିତ୍‌ ।" 17 ଜଦି ୱାନ୍‌ ମି ମାଟା ମାନାଏନ୍‌, ଆର୍‌ତିଙ୍ଗ୍‌ ଇୟା ବିସୟ୍‌ତାନ୍‌ ପାର୍‌ତନା ମଣ୍ତଲିଦିଙ୍ଗ୍‌ ୱେର୍‍ତୁ, ସାରାସାରିୱେନ୍‌କା, ଜଦି ୱାନ୍‌ ମଣ୍ତଲି ମାଟା ବା ମାନାଏନ୍‌, ଆର୍‌ତିଙ୍ଗ୍‌ ୱାନିଙ୍ଗ୍‌ ଅରେନ୍‍ ସିସ୍‍ଟୁ ଡାବୁଙ୍ଗ୍‌ ଲୋସ୍‌ନିକାନ୍‌ ସିଲ୍‍ତିଙ୍ଗ୍‍ ଅରେନ୍‍ ଅବିସ୍‍ବାସ୍‍ସି ଇଜି ଅଡ଼୍‌ବିଜ ୱାନିୱାଲେ ମିସାବିଡ଼ାଆମାଟ୍‍ ।

18 ✝"ନାନ୍ ମିଙ୍ଗିଁ ସତ୍‌ ଇଜିନା, ମିର୍‌ ଇୟା ଦୁନିଆଦୁ ଆମାକା ବନ୍ଦ୍‌କିନିଦେର୍‌, ମୁସ୍‌କୁପୁର୍‌ତୁ ବା ଆକା ବନ୍ଦ୍‌ତେବାନାତ୍‌ ମାରି ଆମାୱାନିଙ୍ଗ୍‌ ମିର୍‌ ଦୁନିଆଦୁ ସାରିସିନିଦେର୍‌, ମୁସ୍‌କୁପୁର୍‌ତୁ ବା ଆକା ସାରିସିଆୟ୍‌ଆନାତ୍‌ ।

19 "ମାରି ନାନ୍ ମିଙ୍ଗିଁ ସତ୍‌ ଇଜିନା, ଦୁନିଆଦୁ ଏସ୍ତିୱାଲେ ମି ଲୋଇରାନ୍‌ ରିଇଦେର୍‌ ଜେ ଏଣ୍ତେସ୍‌ ନାନି ବିସୟ୍‌ତାନ୍‌ ଉନ୍‌ଡ୍ରେମନ୍‌ଆଜି ଆୟାଉଣ୍ତିଙ୍ଗ୍‌ ପାର୍‌ତନାକିନିଦେର୍‌, ନା ମୁସ୍‌କୁପୁର୍‌ତି ବୁବା ମି ଆୟା ବଦାପୁରାକିନାନ୍‌ । 20 ଇରିଙ୍ଗ୍‌ ଏମେ ବାଡିଦୁ ରିଏର୍‌ ଲୋକ୍ ସିଲ୍‍ତିଙ୍ଗ୍‍ ମୁଏର୍‌ ଲୋକ୍ ନା ଦର୍‌ତାନ୍‌ ଉନ୍‌ଡ୍ରେମାନୁ ଉଣ୍ତାନାର୍‌, ଆୟା ବାଡିଦୁ ନାନ୍ ୱାରିମାନୁ ମାନା ।"

21 ✝ଅର୍‍ଲେନ୍‍ ପିତର୍‌ ୱାତାନ୍‌ନୋ ଜିସୁଙ୍ଗୁଁ ୱେନ୍‌ବାତାନ୍‌, "ପ୍ରବୁ, ଅରେନ୍‍ ତଡ଼ାନ୍‌ ନା ବିରଦ୍‌ତାନ୍‌ ବାର୍‌ବାର୍‌ ଦସ୍‌ କିଜିମାର୍ହାନ୍‌, ୱାନିଙ୍ଗ୍‌ ନାନ୍ ଏସ ଦେବେଙ୍ଗ୍‌ କେମାକିନା ? ଇନିକା ସାତ୍‌ଦେବେଙ୍ଗ୍‌ ସାନ୍ଦି ?"

22 ଜିସୁ ଇର୍ହାନ୍‌, "ସିଲେ ସାତ୍‌ଦେବେଙ୍ଗ୍‌ ସିଲେ ।" ମାତର୍‌ ସାତ୍‌ଦେବେଙ୍ଗ୍‌ ସତୁରି ଗୁଣୁ ସାନ୍ଦି । 23 ଇରିଙ୍ଗ୍‌ ମୁସ୍‌କୁପୁର୍‌ ଇୟାୱାଜା । ଅର୍‍ଲେନ୍‍ ଅରେନ୍‍ ରାଜା ପାଣିକିନିୱାରି ଇସାବ୍‌ଆକୁ ସୁଡ଼ୁଦେଙ୍ଗ୍‌ ଇଜି ବଦାକିତାନ୍‍ । 24 ୱାନ୍‌ ଇୟା ଇସାବ୍‌ ଆରାମ୍‌ କିତିୱାଲେ ଲକେ ଡାବୁଙ୍ଗୁଁ ଅତି ଅରେନ୍‍ ପାଣିକିନିୱାନିଙ୍ଗ୍‌ ରାଜାଦି ଲାକ୍‌ତୁ ତାତାର୍‌ । 25 ରୁଣୁ ତେୱ୍‌ନି ଉଣ୍ତିଙ୍ଗ୍‌ ଇୟା ଲୋକ୍‌ତିମାନୁ ଇନିକା ସିଲେତିଙ୍ଗ୍‍ ୱାନି ମାଲିକ୍‍ ୱାନିଙ୍ଗ୍‌ ମାରି ୱାନି ଆଡ଼୍‌ସିଙ୍ଗ୍‌, କଡ଼କକ୍‌ରା ମାରି ୱିଜୁ ସମ୍ପତ୍ତି ପୋର୍‌ଜ ରୁଣ୍‌ଡାବୁଙ୍ଗ୍‌ ଅତେଙ୍ଗ୍‌ ଆଦେସ୍‌ ସିତାନ୍‌ । 26 ସାକର୍‌ ରାଜାଦି କାଲ୍‌କା ଆଡ୍‍ଗି ପାଡ଼ିଗିଜି ମାଡ଼ିସ୍‍କିଜି ଇର୍ହାନ୍‌, "ଆଜ୍ଞା ମାରି ଅଡ଼ପ୍‍ ସାସ୍‌ ଆସ୍‌ଆ ନାନ୍ ନି ୱିଜୁ ରୁଣ୍‌ଡାବୁଙ୍ଗ୍‌ ତେୱେନାସିନା ।" 27 ମାଲିକ୍‍ଦି ମନ୍‌ତୁ ଦୟା ଆତାତ୍‌, ଆବେଟ୍‌ ରୁଣ୍‌ଡାବୁଙ୍ଗ୍‌ତାନ୍‌ କେମାସିଜି ୱାନ୍‌ ସାକର୍‌ତିଙ୍ଗ୍‌ ଡ଼ିସ୍‌ତାସିତାନ୍‌ ।

28 ଇୟା ଲୋକୁ ବୁଲାଜି ସନିୱାଲେ ୱାନିମାଣାନ୍‌ ଉଣା ଏସ ଡାବୁଙ୍ଗୁଁ ରୁଣୁ ଅତିମାନି ୱାନି ଅରେନ୍‍ ଅର୍‍ସେପାଣିକିନି ସାକର୍‌ତିଙ୍ଗ୍‌ ବେଟ୍‌ବୁଡ଼ାତାନ୍‌ । ୱାନ୍‌ ୱାନି କକ୍‌ଲାଦିଙ୍ଗ୍‌ ଆସ୍‌ସି, ୱାନି କକ୍‌ଲାଦିଙ୍ଗ୍‌ ପିଡ଼ିସି ଇର୍ହାନ୍‌, ନା ମାଣାନ୍‌ ଉଦାର୍‌ ଅତିମାନି ଡାବୁଙ୍ଗୁଁ ଡ଼େସି ସିଦା । 29 ୱାନିୱାଲେ ଅର୍‌ସେ ପାଣିକିକାନ୍‍ ୱାନି କାଲ୍‌କା ଆଡ୍‍ଗି ପାଡ଼ିଗିଜି ମାଡ଼ିସ୍‍କିଜି ଇର୍ହାନ୍‌, ସାସ୍‌ ଆସ୍‌ଆ, ନି ୱିଜୁ ଡାବୁଙ୍ଗୁଁ ତେୱେନାସିନା । 30 ମାତର୍‌ ପାର୍‍ତୁମ୍‍ତି ଲୋକୁ ୱାନି ଗୁଆରି ୱେନ୍‌ଏତାନ୍‌, ମାରି ରୁଣ୍‌ଡାବୁଙ୍ଗ୍‌ ତେୱେଇ ସାନ୍ଦି ୱାନିଙ୍ଗ୍‌ ଜଇଲ୍‌ତୁ ଇଡିସ୍‌କିତାନ୍‌ । 31 ଇୟା ଗଟ୍‌ନା ସୁଡ଼ୁଜି ଆଇ ଅର୍‌ସେପାଣିକିନିକାର୍‌ ନାଣ୍ତ ଦୁକ୍‍ଆତାର୍‌ । ୱାର୍‌ ରାଜାଦି ଲାକ୍‌ତୁ ସର୍ହାର୍‌ନୋ ଆମାକା ଗଟାତା ମାର୍ହାତ୍‌, ୱିଜୁ ୱେର୍‌ତାର୍‌ । 32 ରାଜା ପାର୍‍ତୁମ୍‍ତି ପାଣିକିନିୱାନିଙ୍ଗ୍‌ କୁକିସ୍‌କିତାନ୍‌ନୋ ଇର୍ହାନ୍‌, ଏ ଜଗ୍‌ସିଲି ପାଣିକିନିକିନ୍ଦା, ନିନ୍‌ ଗୁଆରି କିତିଆକା ନାନ୍ ନି ୱିଜୁ ରୁଣ୍‌ଡାବୁଙ୍ଗ୍‌ ଡ଼ିସ୍‌ତାସିତା । 33 ନାନ୍ ଏଣ୍ତେସ୍‌ ନି ଉଣ୍ତିଙ୍ଗ୍‌ ଦୟା ତର୍‌ତା, ନି ଅର୍‍ସେପାଣି କିନିୱାନିଙ୍ଗ୍‌ ବା ଆୟାୱାଜା ଦୟା କିନିକା ନି ଟିକ୍‌ ମାର୍ହାତ୍‌ । 34 "ରାଜା ନାଣ୍ତ ରିସାଆତାନ୍‍ ମାରି ୱିଜୁ ରୁଣ୍‌ଡାବୁଙ୍ଗ୍‌ ଡ଼େସିସିଇ ସାନ୍ଦି ଦଣ୍ତ୍‌ବଗାନି ଉଣ୍ତିଙ୍ଗ୍‌ ୱାନିଙ୍ଗ୍‌ ଜଇଲ୍‌ତୁ ପୋକ୍‌ତାନ୍‌ ।"

35 ଜିସୁ ୱିଜୁ ମାଟା ୱିସ୍‌ତାନ୍‌ନୋ ୱାରିଙ୍ଗ୍‌ ଇର୍ହାନ୍‌, "ମି ବିରଦ୍‌ତାନ୍‌ ଦସ୍‌ କିତିମାନି ତଡ଼ାନ୍‍ତିଙ୍ଗ୍‌ ଜିବନ୍‌ନୋନିୱାଜା ଜଦି କେମାକିଇଦେର୍‌, ଆର୍‌ତିଙ୍ଗ୍‌ ନା ମୁସ୍‌କୁପୁର୍‌ତି ବୁବା ବା ମି ଉଣ୍ତିଙ୍ଗ୍‌ ଇୟାୱାଜା ବ୍ୟବହାର୍‌ କିନାନ୍‌ ।"