31 ✝ ୨୫:୩୧ ମାତିଉ ୧୬:୨୭; ମାତିଉ ୧୯:୨୮. "ଏସ୍ତିୱାଲେ ମନୁସ୍ୟପୁତ୍ର ରାଜାଦି ୱାଜା ୱାନି ମୁସ୍‌କୁପୁର୍‌ତି ଦୁତ୍‌କାୱାଲେ ୱାନାନ୍‌, ୱାନ୍‌ ଗୌରବ୍‌ଜାୟ୍‌ ରାଜାଗାଦିଦୁ ବାସ୍‌ନାନ୍‌, 32 ମାରି ଦୁନିଆଦି ୱିଜୁ ବାସାଦି ଲୋକୁ ୱାନି ଆଗ୍‌ଡ଼ି ଉନ୍‌ଡ୍ରେମାନୁ ଆନାର୍‌ । ନାସ୍ତିୱାଲେ ମେଣ୍ତେଙ୍ଗ୍‌ଗଉଡ଼ୁ ଏଣ୍ତେସ୍‌ ଗର୍‌ଏଙ୍ଗାଁ ନି ମେଣ୍ତେଆଙ୍ଗ୍‌ ୱେରେଏ କିନାନ୍‌, ମନୁସ୍ୟପୁତ୍ର ଆୟାୱାଜା ଲୋକାଙ୍ଗ୍‌ ଦୁଇ ବାଗ୍ କିନାନ୍‌ । 33 ଦାର୍ମୁଦି ଲୋକାଙ୍ଗ୍‌ ୱାନ୍‌ ଉଣି ତରିନ୍‌ ନି ଆଇ ଲୋକାଙ୍ଗ୍‌ ଡେବିରି ତରିନ୍‌ ଇଡ୍‌ନାନ୍‌ ।