1 ଆୟା କାଡ଼ାଦୁ ଡୁବନ୍‌ ସିନି ଜୋହନ ଜିହୁଦା ଦେସ୍‌ତି ବାଲିବୁମିଦୁ ୱାଜି ପ୍ରଚାର୍‌ କିଦେଙ୍ଗ୍‍ ଆସ୍‌ତାନ୍‌ । 2 ✝୩:୨ ମାତିଉ ୪:୧୭; ମାର୍କ ୧:୧୫.ୱାନ୍‌ ଇର୍ହାନ୍‌, "ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ତୁ, ଇରିଙ୍ଗ୍‌ ମାପୁରୁଦି ରାଜି ଇଗା ୱାଜିନାତ୍‍ ।" 3 ବାବବାଦି ଜିସାୟ ଏମେୱାନି ବିସୟ୍‌ତାନ୍‌ ଇର୍ହାମାର୍‌ର୍ହାନ୍‌, ଯୋହନ ନେ ଆୟା ଲୋକୁ ।

"ବାଲି ବୁମିଦୁ ଏନ୍‌ ଅରେନ୍‍ ଆଉଲି ଆଜି ଇଜିନାନ୍‌,

ପ୍ରବୁଦି ଉଣ୍ତିଙ୍ଗ୍‌ ସାରି ରସ୍‍ଆ;

ୱାନି ଉଣ୍ତିଙ୍ଗ୍‌ ଉଣ୍ତ୍ରି ସାଡ଼ୁକୁ ରାସ୍ତା ତିଆର୍‌ କିଦୁ ।"

4 ଯୋହନତି ଆଙ୍ଗିଁଙ୍ଗ୍‌ ଉଟ୍‌ ବୁର୍‍ବୁସାଦାନ୍‍ ତିଆର୍‌ ଆତାମାର୍ହାତ୍‍ । ୱାନ୍‌ ୱାନି ଜୁକିଦୁ ଉଣ୍ତ୍ରି ତଲ୍‍ତି ନାସ୍‍ ତରାଜିମାର୍ହାନ୍‍ । ମାଡ଼ିମାଉ ନି ଗରନ୍‌ ପୁକି ୱାନି କାଦି ମାର୍ହାତ୍‌ । 5 ଜିରୁସାଲାମ୍‍ ଗାଡ଼୍‌ତାନ୍‍, ୱିଜୁ ଜିହୁଦା ରାଜିଦାନ୍‍ ମାରି ଜର୍ଦନ ଗାଡା ଲାକ୍‌ତୁରି ୱିଜୁ ନାର୍‍କାଣ୍‍ ଲୋକୁ ୱାନି ଲାକ୍‌ତୁ ୱାଜିମାର୍ହାର୍‍ । 6 ୱାର୍‌ ନିଜେ ନିଜେଦି ପାପ୍‌ ୱେର୍‌ସି ଯୋହନତି ମାଣାନ୍‌ ଜର୍ଦନ ଗାଡାଦୁ ଡୁବନ୍‌ ଅସିମାର୍ହାର୍‍ ।

7 ✝ ୩:୭ ମାତିଉ ୧୨:୩୪; ୨୩:୩୩. ଏସ୍ତିୱାଲେ ଯୋହନ ସୁଡ଼ୁତାନ୍‌ ନାଣ୍ତ ପାରୁସିର୍‌ ନି ସାଦୁକିର୍ ଡୁବନ୍‌ ଅତେଙ୍ଗ୍‌ ୱାଜିନାର୍‍; ୱାନ୍‌ ୱାରିଙ୍ଗ୍‌ ଇର୍ହାନ୍‌, "ଏ ବିସ୍‌ମାନି ସାରାସ୍‍ତି କୁଟୁମ୍‌ ମାପୁରୁ ମିଙ୍ଗିଁ ଏମେ ଦଣ୍ଡ୍‌ ସିଦେଙ୍ଗ୍‍ସଲ୍‍ସିନାନ୍‍, ଆବେଣାନ୍‍ ରକିୟା ପଇଦେଙ୍ଗ୍‍ ଆଟ୍‍ନିଦେର୍‍ଇଜି ଏନ୍‌ ମିଙ୍ଗିଁ ଇର୍ହାନ୍‌ ? 8 ଜଦି ସତ୍‌ତାନ୍‌ ପାପ୍‌ ପାଣିଦାନ୍‌ ମନ୍‍ ଡ଼େପ୍‍ତି ମାନିଦେର୍‌, ଇକା ମି ନେଗି ପାଣିଦାନ୍‌ ତର୍‌ତୁ । 9 ✝୩:୯ ଜୋହନ ୮:୩୩.ଅବ୍ରାହାମ ମା ବୁବା, ମୋନ୍‌ତୁ ମୋନ୍‌ତୁ ବା ଇୟାୱାଜା ଇନ୍‌ମାଟ୍‌ । ନାନ୍ ମିଙ୍ଗିଁ ଇଜିନା ଜେ ମାପୁରୁ ଇୟା କାଲ୍‍କାଙ୍ଗ୍‍ ଅସି ଅବ୍ରାହାମତି କୁଟୁମ୍‌ ତିଆର୍‌କିଦେଙ୍ଗ୍‌ ଆଟ୍‍ନାନ୍‍ । 10 ✝୩:୧୦ ମାତିଉ ୭:୧୯.ମାରାକା ମଦଲ୍‍କୁ କାତ୍‍ତେଙ୍ଗ୍‍ ଇଜି ପାଡ଼ିସି ତିଆର୍‍କିତା ଇଟ୍‌ତାମାନାର୍‌ । ଏମେ ମାରାତୁ ନେଗି ପଲ୍‌ ରେଏତ୍‌, ଆକା କାତାଜି ସିସୁଦୁପକାନାତ୍‍ । 11 ମିର୍‌ ପାପ୍‌ତାନ୍‌ ମନ୍‍ତିଙ୍ଗ୍‍ ଡ଼େପ୍‍ତିମାନିଦେର୍‍, ଇକା ୱେର୍‌ତେଙ୍ଗ୍‌ ନାନ୍ ମିଙ୍ଗିଁ ଏର୍‌ତୁ ଡୁବନ୍‌ ସିଜିନା । ମାତର୍‌ ନା ୱେନ୍‌କା ଏନ୍‌ ୱାଜିନାନ୍‍, ୱାନ୍‌ ମିଙ୍ଗିଁ ପବିତ୍ରଆତ୍ମା ନି ସିସୁଦୁ ଡୁବନ୍‌ ସିନାନ୍‍ । ୱାନ୍‌ ନାବାଣାନ୍‍ ପେରିକାନ୍‌ ୱାନି ଜୁତେଙ୍ଗ୍‌ କୁତ୍‌ତେଙ୍ଗ୍‌ ବା ନାନ୍ ଜଗ୍‌ ସିଲେ । 12 ପାସିଦାନ୍‍ ପଟୁ ୱିଜୁ ଟୁଟ୍‍ତେଙ୍ଗ୍‍ ଇଜି ୱାନି କିୟୁଦୁ ସେରିଇ ମାନାତ୍‌ । ୱାନ୍‌ ପାସି ୱିଜୁ ୱାନି କଲ୍‍କିଆଙ୍ଗ୍‍ଁ ଇଡ୍‌ନାନ୍‌ ମାରି କୁଲିଙ୍ଗ୍‌ ପଟୁ ୱିଜୁ ଏସାଙ୍ଗ୍‍ ନାମ୍‍ଇ ସିସୁଦୁ ଆଡ଼ାକ୍‌ନା ପକ୍‍ନାନ୍‍ ।"

13 ନାସ୍ତିୱାଲେ ଜିସୁ ଗାଲିଲିଦାନ୍‌ ୱାଜି ଡୁବନ୍‌ ଅତେଙ୍ଗ୍‌ ଜର୍ଦନ ଗାଡାଦୁ ଯୋହନତି ଲାକ୍‌ତୁ ଇଗା ୱାତାନ୍‌ । 14 ମାତର୍‌ ଯୋହନ ଜିସୁଙ୍ଗୁଁ ମାନାକିଜି ଇର୍ହାନ୍‌, "ନାନ୍ ଗାଦେ ନି ମାଣ୍‌କୁ ଡୁବନ୍‌ ଅନିମାଟା ନିନ୍‌ ଆରିଙ୍ଗ୍‍ବା ନା ଲାକ୍‌ତୁ ୱାତିମାନି ?" 15 ମାତର୍‌ ଜିସୁ ଇର୍ହାନ୍‌, "ଇଲେଇ ନା ମାଟାଦୁ ରାଜିଆଆ । ଇରିଙ୍ଗ୍‌ ଇୟାମାଣ୍‍କୁ ମାଡୁ ମାପୁରୁଦି ବଦାଦି ପାଣି କିଦେଙ୍ଗ୍‌ ଆଟ୍‍ନିକା ।" ଆବେଟ୍‌ ଯୋହନ ୱାନିଙ୍ଗ୍‌ ଡୁବନ୍‌ ସିଦେଙ୍ଗ୍‍ ରାଜିଆତାନ୍‍ ।

16 ଜିସୁ ଡୁବନ୍‌ ଅସି ଏର୍‍ତାନ୍‍ ନିଙ୍ଗିଁଜି ୱାତି ଦାପ୍ରେ ୱାନ୍‌ ସୁଡ଼ୁତାନ୍‌ ମୁସ୍‌କୁପୁର୍‌ ରେଆତାମାନାତ୍‍ ମାରି ପବିତ୍ର ଆତ୍ମା ପାର୍‍ୱାଦି ୱାଜା ରେତାଜି ୱାଜି ୱାନି ମୁସ୍‌କୁ ବାସ୍‌ତାତ୍‌ । 17 ✝୩:୧୭ ମାତିଉ ୧୨:୧୮; ୧୭:୫; ମାର୍କ ୧:୧୧; ଲୁକ ୯:୩୫.ତାନିୱେନ୍‍କା ମୁସ୍‌କୁପୁର୍‌ତାନ୍‌ ବଲ୍ ୱାତାତ୍‍, "ଇକାନ୍‌ ନା ଲାଡ୍‍ତି ମାରିନ୍‌, ୱାନିମାନୁ ନାନ୍ ୱେଡ଼ିକା ।"