25 ଇୟାଉଣ୍ତିଙ୍ଗ୍ ନାନ୍ ମିଙ୍ଗିଁ ଇଜିନା, ଜିବନ୍ତି ଜିନି ଉଣ୍ତିଙ୍ଗ୍ ଦର୍କାର୍ମାନି କାଦି ମାରି ଏର୍ ମାରି ଆରାନି ଉଣ୍ତିଙ୍ଗ୍ ଦର୍କାର୍ମାନି ଆଙ୍ଗିଁପାସିୟା ଉଣ୍ତିଙ୍ଗ୍ ବେମ୍ରି ଆମାଟ୍ । କାଦିଦି ମାଣ୍କୁ ଜିବନ୍ ଇନିକା ନାଣ୍ତ ଦାରା ସିଲେ ? ଆଙ୍ଗିଁପାସିୟା ମାଣ୍କୁ ମେନ୍ଧଲ୍ ଇନିକା ନାଣ୍ତ ଦାରା ସିଲେ ? 26 ପଟିଆଙ୍ଗ୍ଁ ସୁଡ଼୍ଦୁ । ୱାକ୍ ୱିତୁ ୱିତ୍ଉ । ପାସି ଉଣ୍ତା କିଜି କଲ୍କିଦୁ ଉଣ୍ତାକିଉ । ଆରିଙ୍ଗ୍ବା ମି ମୁସ୍କୁପୁର୍ତି ବୁବା ୱାନିକାଙ୍ଗ୍ ତିନ୍ଡ୍ରେଙ୍ଗ୍ କାଦି ସିନାନ୍ । ମିର୍ ଇନିକା ପଟିଙ୍ଗାଁ ମାଣ୍କୁ ନାଣ୍ତ ଦାରା ସିଲେ ? 27 ମି ଲୋଇ ଏନ୍ ସିନ୍ତା କିଜି କିଜି ନିଜେଦି ଜିନି ବାର୍ସୁ ପିରିସ୍ କିଦେଙ୍ଗ୍ ଆଟ୍ନାନ୍ ?
28 "ଆଙ୍ଗିଁପାସିୟା ଉଣ୍ତିଙ୍ଗ୍ ଏନ୍ଦା ଦାନ୍ଦା ଆଜିନିଦେର୍ ? ସୁଡ଼୍ଦୁ, ବନ୍ତି ପୁଙ୍ଗୁଁକାଙ୍ଗ୍ ଏଣ୍ତେସ୍ ପିର୍ନେ । ୱାକ୍ ପାଣିକିଉ କି ନିଜେଦି ଉଣ୍ତିଙ୍ଗ୍ ଆଙ୍ଗିଁଙ୍ଗ୍ ରସ୍ଉ ।" 29 ମାତର୍ ନାନ୍ ମିଙ୍ଗିଁ ଇଜିନା, ରାଜା ସଲମନ୍ ୱାନି ୱିଜୁ ଦନ୍ ମାର୍ହିଙ୍ଗ୍ ବା, ଇୟା ପୁଙ୍ଗୁଁକା ୱାଜା ସୁନ୍ଦର୍ ଆଙ୍ଗିଁ ଏସାଙ୍ଗ୍ ଆରାଏନ୍ମାର୍ହାନ୍ । 30 ମାତର୍ ନେର୍ ଆମା ଲାଟା କିଡ଼ିଇଦୁ ମାନାତ୍, ୱିଗେରିଙ୍ଗ୍ ତେବାଏତ୍ କୟାୟ୍ଆଜି ସିସୁଗୁଟାଦୁ ପୋକ୍ନାର୍ । ମାତର୍ ଆୟାୱିଜୁ ବା ମାପୁରୁ ଏସା ସୁନ୍ଦର୍ ଆଙ୍ଗିଁଆଣ୍ ରସ୍ତାମାନାନ୍ । ମିଙ୍ଗିଁ ଆଙ୍ଗିଁପାସିୟା ସିଦେଙ୍ଗ୍ ଇଜି ୱାନ୍ ଇନିକା ନାଣ୍ତ ସୁଡ଼ୁଏନ୍ ? ମି ବିସ୍ବାସ୍ ସତେ ଏସା ଉଣା !
31 "ଆରିଙ୍ଗ୍, ନା କାଦି ଏମେଣ୍କୁ ୱାନାତ୍, ମାରି ନା ଉଣିକା ? ମାରି ଆଙ୍ଗିଁ ? ଇୟା ବିସୟ୍ତାନ୍ ସିନ୍ତା କିମାଟ୍ ।" 32 ଏମେକାର୍ ମାପୁରୁଙ୍ଗ୍ଁ ନେସ୍ଇମାନି ଅଣଜିହୁଦି ଲୋକୁ ଇୟାୱିଜୁ ବିସୟ୍ ପୟ୍ଜି ଅନାର୍ । ମାରି ଇୟାୱିଜୁ ବିସୟ୍ ଜେ ମି ଦର୍କାର୍ମାନାତ୍, ଆକା ମି ମୁସ୍କୁପୁର୍ତି ବୁବା ନେସ୍ନାନ୍ । 33 ମାରି ମାପୁରୁଦି ରାଜି ବିସୟ୍ ମାରି ମାପୁରୁ ମି ମାଣ୍କୁ ଇନିକା ବଦାକିନାନ୍, ଇୟା ମାଟା ମି ମନ୍ତୁ ଆଗ୍ଡ଼ି ବାଡି ସିଦୁ । ଆରିଙ୍ଗ୍ ୱାନ୍ ମିଙ୍ଗିଁ ଆଇ ୱିଜୁ ବିସୟ୍ ଉଣ୍ତାକିନାସିନାନ୍ । 34 ମାରି ୱିଗେରି ଉଣ୍ତିଙ୍ଗ୍ ସିନ୍ତା କିମାଟ୍ । ୱିଗେରି ସିନ୍ତା ୱିଗେ କିନିଦେର୍ । ୱିଗେରି ବିସୟ୍ତାନ୍ ସିନ୍ତା କିଜି ନେର୍ଇ ଦାନ୍ଦାଦିଙ୍ଗ୍ ପିରିସ୍ କିମାଟ୍ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)