1 అ కయ్యెనె పెట్టె లొపాతన యోనాక్ యెహోవాకున్ ఇనాఙ్ వింతి కల్‍సాంద్. 2 అన్ కస్టలెంఙ్ అన్ యెహోవాకున్ వింతి కలెంఙా అమ్దు అనుంఙ్ జవాబ్ సితెంత్ పాతలం తనా అన్ వాపొయెంఙ్ నీ అన్నె లెంఙ్ వింతీ. 3 నివ్ అన్ అగదం పొయ్ సముద్రముంఙ్ నాడుమ్ జొపిడుత్ అంసాతివ్ అలావ అన్ సుట్టుత్ అన్సా ఇన్నె అలావ ఇన్నె లెంఙ్ అన్ కట్టుత్ అన్సద్ 4 ఇన్నె ముందర్వలడ్ అన్ దావ్ ఇద్దర్తెతిలఙ్ ఇన్నె పవిత్ర మందిర్ మల్ల ఒల్సాద్ ఇసా ఇంతాన్ 5 ఈర్ అన్ సుట్టుత్ అన్సా ఒక్కొది ఉప్రినాడ్ అన్సాత్. సముద్ర బూడ్ అన్ తిర్‍గొర ఎద్దింన్ సముద్రంత తొఙ్ఙు అన్నె తల్లుత్ సుట్తున్. 6 అన్ ఎపుడ్ గినా సొక్కుత్ వర్సెట బుమి దర్వొజ అన్ ముస్తె గుబ్బె భునదిలోపా డిగ్తన్ అన్నే యోహోవా నీ అన్నె పానముంఙ్ గుండ్డి తనా పొదె వర్గతీ. 7 అన్నే పానం సెరెక వెలంఙ్ అన్ యోహోవాకున్ ఆదికతన్. ఇన్నే పరిసుద్ద మందిరముత్ ఇన్నతి అన్నే వింతి వర్‍సాద్. 8 పనింఙ్ వర్సెట దెయ్య పొయ్ మాన్ ఇడెకర్ తమ్మున్ వలడ్ ఇన్నె కరె సత్తెమున్ తొద్ ఇసార్. 9 అన్నె లెక్కఙ్ అన్ ఇనుంగ్ బవ్ సియ్సతున్. అన్ మొక్త మొక్కున్ సుకడిప్సెట కరెయ్ కల్సాత్. యెహవ అన్నతి రక్సనా రొంబడ్సద్. 10 అప్పుడ్ యెహోవాక్ కయ్యెన్ అగ్య సియెఙా అద్ ‍యోనాకున్ బూమి పొయ్‍ కంఙత్తీన్.