João 12

యెరూసలేముంఙ్ కుసీ మజానడ్ సెరెకద్

12 అదుంఙ్ మరొక్కొదినం పస్క పండ్గు వత్తిన్ మంది అత్తీ మిరయ్తెర్. యేసుంద్ యెరూసలేముంఙ్ వర్సనండాద్ ఇసా వింతేర్, 13 ఔర్ సిమ్కనయ్ కజ్జుర్ పండ్లు కొమ్ తొటా వత్ అమ్నుంఙ్ అడ్డమ్ సేత్, "యోహాన్! ప్రబునెత్ పేరడ్ వరెకద్ ఇస్రాయేలుఙ్ రాజక్ స్తుతి ఎక్కాద్!" ఇసా వాపొయ్తెంద్ అమ్నున్ కలయెంఙ్ సెద్దేర్.

14,15 "సియోన్ నే పిల్ల, అర్సనెం! ఇన్నె రాజక్ గాడ్దినె కొవ్వెనత్తీ ఉద్దుత్ వర్సనడ్డద్" ఇసా వాయుత్ అనెకా యేసు చిన్నం గాడ్దిన్ ఓలుత్ అదున్ పొయ్ ఉద్తెంద్ వర్సానండాద్. 16 అమ్నె సిసులుంఙ్ ఈ సంగతిక్ సజెనీ ఒర్కిలెతమ్ గని యేసునే మహిమ సుమ్ముత్ మల్ల, ఇద్ సంగతిక్లడ్ అమ్నే లహిప్ తా సిమ్కన, ఔర్ అమ్నుఙ్ ఇనంఙ్ ఇదర్తెర్ సిసా అది కల్సా నండాద్

17 అముదు లాజరున్ తప్నెతనట్ కూగుత్, తిక్తతనట్ మల్ల బత్కిప్సాంద్ యేసునడ్ అనెకా మందిన్ అమ్నున్ వాలడ్ మరొక్కొరుంఙ్ సాక్సం సియ్తెద్. 18 అముదు ఇద్ ఓలెకా సమత్కల్ ఇదర్తెంద్ వింత్న కరనముంఙ్ వాలడ్ మంది మిరయ్ తెర్ అమ్నుఙ్ కలయెఙ్ సెద్దెర్. 19 ఇదున్ వాలడ్ పరుసిక్, ఓలుర్, నేండ్ తనై కలెఙ్ సలెమం. దున్యసిమ్మన అమ్నున్ వెంటా సెద్దిన్.