1 ఇస్రాయేల్ జిబ్బు పెర్గత అంగుర్నె మాకులాడ్ సమానం. ఔరె పండ్లు నెరయుత్ కయ్తేవ్. కయ్తా కమనా ఔర్ బావ్ సియ్యెకా మరి పెర్రెత్ కట్తెర్. తమ్మె బూమి జాగత్ జర్ర , ఔర్ తమ్మె ముర్తిక్లె ముండెలున్ మరి గొట్టిలాన్ తయర్ కత్తెర్ . 2 ఔరె మనుత్ బల్మితదీ, ఔర్ జల్దియ్ తమ్మె కత్త తప్పులుఙ్ సిక్స ఎర్సద్. యెహోవా ఔరున్ బావ్ సియ్యెకవూన్ కుల్ఙిప్సార్. ఔరె ముర్తిక్లె ముండెలున్ నాస్ కల్సంద్. 3 ఔర్ ఇనఙ్ ఇసార్. "నేండుఙ్ రాజక్ తోతెంద్, నేండ్ యెహోవాకున్ అర్రిఙ్ అర్సెం. రాజు నేడుంన్ తా గల్సంద్?" 4 అదుఙి ఔర్ అగమీ బొంక్కుసర్ ఇడ్సర్. పైలి వాగ్దానం నడ్ సెర్ద కల్సర్. నాంఙిలిత ఉర్రెంహా వత్తేతీ విసంత గడ్డిలాన్ దేసముత్ ఔరె న్యాయ్ మొలయ్సవ్. 5 బేతావెనులో అనెక లెఙ్హలే గొట్టిత్ సమరీయ్య పట్నముత్ అనెక మంది అర్ససార్. అద్నే వైబవం సెద్దిన్ ఇస మంది, కూసిఙ్ వత్ అద్నే దెయ్యలకెర్ దుంకపడ్సర్. 6 ఔర్ దండి రాజక్ వర్గనీ అస్సురు దేసముఙ్ కొండపుత్ సెసార్. ఎప్రాయిము అవమానం ఎర్గల్సంద్. ఇస్రాయేల్ ఔర్ మూర్తికున్ గొట్టిక్ విన్తదుఙ్ లాజ్జ వర్సర్. 7 షోమ్రోను రాజు నాస్ ఎద్దెద్. బురమ్ రాపుత్ కోసెక సెక్క లాఙ్ అన్సంద్ . 8 ఇస్రాయేల్ ఔరె పాపాలుఙ్ రూప్ ఎద్ద ఆవెనులోని ఎత్తెదా పూజా జాగత్ నాస్ ఎర్సంద్. ఔరె బావ్ సియెక పీటా పొదే సాల్ల కుంప పెర్గసనాద్. మట్టలాడ్ " అమ్మున్ ముచ్చర్" ఇసా, మెట్టున్ ఓలుత్ " అమ్మున్ పొదే రాలుర్" ఇసా ఇడ్సర్.

9 ఇస్రాయేలూ, గిబియా దినాల తన నీ పాపం ఇదర్స వత్తివ్. ఔర్ అత్తి అండెర్. గిబియాలో అనెక పాపుల పొదే లాడయ్ జోరనట్ వరేదా? 10 అన్ ఇన్త అప్పుడ్ ఔరున్ సిక్స సిసాత్. ఔర్ కత్త ఇందిగ్ అంతు పాపులున్ అన్ ఔరున్ కొండ్పత్త అప్పుడ్, యుదుల్ ఎర్సెటర్ మిరయుత్ ఔరున్ పొయ్ వర్సర్. 11 ఎప్రాయిము సెన్కులున్ పరయేకాదున్ వలాడ్ ఉచరడ్ కమాపేకద్ కోందా. అద్నే నూయుఙ్ మక్కుత్ అన్ జువ్వ కట్సతూన్. ఎప్రాయిము కేన్ ఉర్సంద్. యూదా బూమిన్ ఉర్సంద్. యాకోబు అదున్ వక్రిప్సంద్. 12 ఇముంఙ్ సటీ సోయ్త వితనా. కారర్ నమ్మకం ఇనెక పంట అర్కూర్. ఇంక్కేప్పుడి ఉర్సెట పడిద్ బూమిన్ ఉర్రుర్. అమ్నున్ కన్కేదెవ్ ఇనంఙ్ ఇమ్మె పొదే నీతితవాన వర్గల్లెక గాయ్దా, యెహోవాన్ కిరవేకదుఙ్ ఇద్ది వేల. 13 నీవ్ పాపులే ఇనేక పంట వైతంఙ్ కెనున్ ఉర్తీవ్. పాపం ఇనేక పంట పుస్తివ్. తనుంఙ్ ఇంతే ఇన్నె తకాత్ పొదె ఆదర్ పట్టివ్. లెక్క ఇడెఙ్ సాల్సెట సైన్యమున్ నమ్తివ్ . 14 ఇన్నే మందిన్ నడుమున్ లొల్లి ఎర్సనండద్ . గొడల ఇన్నే పట్నమొత్తం కరబ్ ఎద్దెవ్. షల్మాను రాజు లడెయ్ కత్ బేతర్బేలును కరాబ్ కత్తేతి అద్ అన్సాద్. సినపరున్ నా అమ్మన్ బూమిత్ సుత్కుత్ కుడ్కుత్ అలుఙ్తెతి అద్ అన్సాద్. 15 ఇనంఙ్ నీర్ కత్త తప్పు పాపులున్ వలాడ్ బేతేలూ, ఇనుఙ్ నాస్ వర్సంద్. దుప్పరిత వేలఙ్ ఇస్రాయేల్ రాజకున్ పూర నాస్ కల్సర్.