జెకర్యా 11

1 లెబానోనూ, ఇన్నె బొయ్దా పుసుత్ ఇడ్. కిస్తా నిప్క వత్న ఇన్నె దేవదారు మాకులున్ రంబిప్‍సావ్. 2 దేవదారు మాకు ఓద్రిల్తే. దండి మాకు నాస్ ఎద్దెవ్. సోబాత మాక్, అర్ర్. తానుంఙ్ ఇంతె జిబ్బు అడవి కత్కతేర్. సిందూర మాకులారా, అర్రుర్. 3 గొర్రెలె గాయ్కిక్ అర్రెక అవజ్ వినుక్ వత్తిన్. తానుంఙ్ ఇంతె ఔరె సోయ్త పండెక బూమికున్ నాస్ ఎద్దేవ్. కొదమ సివ్విక్లె గుర్రు ఇనేకద్ విన్కువర్సంద్. తనుంఙ్ ఇంతే యొర్దాను లోవత్ అడవిక్ నాస్ ఎద్దెవ్ .

ఇద్దర్ గొర్రెల గాయ్కిక్

4 అన్నె దెయ్యం యెహోవా తనేద్ ఇడ్సంద్ ఇంతే "బావుఙ్ తయార్ అనెక గొర్రెల మందన్ మేప్. 5 అదవున్ ఒర్కిల్త ఔరు అలుఙ్తెనా బద్నం తోసెటరమ్ ఇసార్. అదవున్ వీటరున్ ఔర్' అముంఙ్ గుల్ దన్ రొంబాడద్, యెహోవా స్తోత్రం ఇస ఇడ్సార్. అదవున్ జాగ్లి కాయెకర్ అదవున్ వలాడ్ జాలి ఓలిపేర్." 6 ఇద్ది యెహోవా గొట్టి. "తనా అన్ ఈ దేసముత్ బత్కెకర్ కివ్ ఓలిపెన్. ఒక్కొనె కెయ్యుత్ ఒక్కొనున్ సిసాతున్. ఔరు రాజులే కెయ్యుత్ ఔరున్ సదరున్ సిసాతున్. ఆ రాజులున్ దేసమున్ నాస్ కత్తపుడ్ ఆన్ ఎరుని పుసేన్." 7 అదుఙి అన్ ఇంది వసా కోత్తన్. ఒక్కొద్నే పేర్ "దయ." మర్కోద్నే పేర్ "కలయ్తండర్." బవుఙ్ తయార్ అనెకవులత్తి కమ్మజోర్తవుంఙ్ గాయ్కి ఎద్దన్. 8 అన్ ఒక్కొ నేలత్ ముగ్గుర్ గాయ్కికున్ పుస్తాన్. తానుంఙ్ ఇంతె ఔర్ అన్నె గొట్టిన్ కరబ్ ముట్టెర్. అన్ ఔరె గొట్టిన్ వాలడ్ అటిల్తాన్. 9 అదుంఙ్ ఎత్తి "అన్ ఇడ్డి తన ఇమ్మున్ కావలి అనేన్. తిక్కెకర్ తిక్కేన్ వంద్, నాస్ ఎరెకార్ నాస్ ఎరెఙ్ వంద్. మిక్తర్ ఒక్కొనె సరిరుఙ్ ఒక్కొద్ ఒక్కొద్ తినేఙ్ వంద్" ఇస ఇడ్తాన్. 10 సదర్ మందినాడ్ అన్ కత్త కరార్ మోకుబ్ కత్ అదుంఙ్ గుర్తు "దయ" ఇనెక కోలాన్ సుమ్ముత్న అదున్ కిన్పతాన్. 11 గొట్టిన్ కినుప్త దినం ఆన్ ఇడ్డెకాద్ యెహోవా గొట్టి ఇస మందాత్ బాదలున్ ఓల్స, అన్ గడ్పుత్ ఓల్సా అనెకరుఙ్ కరిల్తున్. 12 అన్ ఔరడ్ " ఇముఙ్ సోయ్ అండే అన్నె జీతం అనుంఙ్ సియ్యూర్, తోద్తే ఇంతే మద్దుర్" ఇంతన్. అప్పుడ్ ఔరు అన్నె జీతం 30 వెండి బిల్లా సితేర్. 13 అప్పుడ్ యెహోవా తొద్ ఇన్నెకాద్ " ఔరు అనుంఙ్ సొబనాడ్ సియ్త అదున్ కుమ్మరిఙ్ సియ్" ఇసా అనుంఙ్ ఆగ్య సియెఙా అన్ ఆ 30 వెండి బిల్లాలున్ యెహోవా మందిరుత్ *11:13 దన్తా ఎల్ల మత్తయ 27:6-10;కుమ్మరిఙ్ సిసాతున్. 14 మల్ల అన్ యూదక్ ఔరుంఙ్, ఇస్రాయేల్ ఔరున్ నడుమున్ అనేకా దాదక్నే బందమున్ భద్నం ఎన్నానంఙ్ "కలయుత్తంత్" ఇనేక అనే రెండవ కోలాన్ సుమ్ముత్న అదున్ కిన్కసతున్. 15 అప్పుడ్ యెహోవా అనుఙ్ ఇడ్డెకద్ తనేద్ ఇంతే "మల్లొక్కొసారి గయ్కి సామన్లున్ సుముత్ బుద్ది తోసెట గయ్కి లాఙ్ అండద్. 16 తానుంఙ్ ఇంతె అన్ దేసముత్ ఒకొ గాయ్కిన్ నిర్నయ్ కల్సనండతున్. అమ్దు ఎప్పుడి గొర్రెలున్ లక్స్య ఇడేంద్. బుజడిల్తా అదవున్ కిరవెంద్. పేట్ తిన్దాద్వున్ సోయ్ కాలెంద్. సొయ్ అనెకవున్ పొరయెంద్. మరి కోరువుతావున్ గిగ్గాలున్ చీల్వూత్ అదవ్లే మూర్య తిసాన్సంద్. 17 మందన్ సయుత్ పని సుకడ్యక్ గాయ్కి బాద తపిలేద్. అమ్నే కేయ్, ఉన్నా కండ్ల కత్తిన్ దానం ఎర్సంద్. అమ్నే కేయ్ పూర ఆర్సాద్, అమ్నె ఉన్న కడ్ల గుడ్డి ఎద్దిన్."