Gênesis 35

О Яков авэл палэ андэ Вефиль

1 О Дэл пхэнляс э Яковески:

— Ваздэтут андэ Вефиль, ачё отхэ тай кер отхэ алтари э Дэвлэски, Саво сикавдяспэс туки, кана ту нашлян тэ пхралэстар катар Исав.

2 О Яков пхэнляс пэ кхерутнэнги тай алаенги, кон эсас амэнца:

— Шужарэн тумэн катар джятя дэла, савэ тумэнца, тай паровэн тумэнги о савутя. 3 Дэчи кидэнтумэн ко дром, тай амэ гелям андэ Вефиль, катэ мэ кан керав алтари э Дэвлэски, Саво зборисаило манца андэ дес ки хурлукеско тай сас манца, кай тэ на джяв.

4 Он динэ ко Яков алаи э джяте дэвлэн, савэ сас лэндэ, тай о чяня андар кана, тай о Яков хранляс лэн тал дуби андэ Шэхем. 5 Дэчи он гелэ ко дром. Э траш э Дэвлэски лиляс алаи о диза агорял лэндэ, аякха кай никхон на родэлас э Яковески пуен.

6 О Яков тай алаи, кон сас лэса, алэ андэ Луз (самким Вефиль) ки пху Ханаан. 7 Отхэ ов кердяс алтари тай тхэдяс одова тхан Эль-Бет-Эль*35.7 Адая авг. евр. зборэс си «о Дэл э Вефилеско»., вай отхэ о Дэл пхутэрдяспэс лэски, кана ов нашло пэ пхралэстар.

8 Э Девора, сави хавдярэлас э Рэвэка, мули тай сас паромэ тал дуби паш ко Вефили. Оничин ов сас тхэдо Аллон-Бахут*35.8 Адая авг. евр. зборэс си «дуби роимаско»..

9 Кана о Яков ало палэ андар Паддан-Арам, о Дэл генэ сикавдяспэс лэски тай алгышты лэс. 10 О Дэл пхэнляс лэски:

— То нав Яков, ай акана ту на кан бучёс Яков. То нав кан овэл Израиль*35.10 Авг. евр. нав «Йисраэл» шунлёл сар зборэс «сара» (ов ушарэлас) тай «Эль» (Дэл). .

Аякха о Дэл тхэдяс лэс Израиль. 11 Ов пхэнляс лэски:

— Мэ — о Дэл о Баро-Зорало*35.11 Авг. евр. «Эль-Шаддай».. Мэ аракхлён тутар пуя тай бутё. Дюняс тай бут дюнядэс кан овэн тутар, тай патишая кан овэн тутар. 12 Э пху, сави Мэ динём э Авраамес тай э Исаакес, Мэ кан дав тутэ тай ла тэ пуендэ.

13 Тай о Дэл ваздиняспэс лэстар отхэ. 14 О Яков тхэдяс о бар тэрдиндос одолэ тханэстэ, катэ о Дэл зборизэлас лэса, тай чёрдяс опэр лэстэ винас тай маслинаки олия. 15 О Яков тхэдяс о тхан, катэ о Дэл зборизэлас лэса, Вефиль*35.15 Авг. евр. нав «Бет-Эль» си «кхер э Дэвлэски»..

О мэрипэ э Рахиляко

16 Он ачявдэ о Вефиль тай сас надур катар Эфрата, кана ки Рахиль лиляс тэ аракхлёл пуёс, тай о аракхлипэ сас бут пхаро. 17 Ой бут сидэла дукх, кана аракхлёлас о пуёс. Э джювли, сави керэлас ярдыми тэ аракхлёл, пхэнляс лаки:

— Ма траша, тутэ кан овэл генэ екх чяво.

18 Кана э Рахиль мукелас по тэнышы тай мэрэлас, ой тхэдяс пэ чявэс Бэн-Они, ай о дад тхэдяс лэс Вениамин*35.18 Авг. евр. нав «Бен-Они» си «чяво мэ хурлукеско», ай нав «Бин-Ямин» си «чяво мэ прави вастэско»..

19 Э Рахиль мули тай сас паромэ опэр дром ко Эфрата (самким Вифлееми). 20 Опэр лаки гробостэ о Яков тхэдяс бар тэрдиндос. Одова бар тэрдо опэр гробус ки Рахиляко джи авдес.

21 О Израиль джялас англэ тай тхэдяс катуна пал Мигдал-Эдэр. 22 Кана о Израиль бэшэлас андэ одолэ пхуятэ, о Рувим пашлило пэ дадэски иргатинкаса э Билхаса, тай о Израиль галило адалэстар.

О чявэ э Яковески

Ко Яков сас дэшудуй чявэ.

23 Катар Лия: о Рувим, баштутно э Яковеско, о Симеон, о Левий, о Иуда, о Иссахар тай о Завулон.

24 Катар Рахиль: о Иосиф тай о Вениамин.

25 Катар Рахиляки иргатинка ки Билха: о Дан тай о Неффалим.

26 Катар Лияки иргатинка ки Зилпа: о Гад тай о Асир.

Аки о чявэ э Яковески. Он аракхлилэ лэски андэ Паддан-Арам.

О мэрипэ э Исаакеско

27 О Яков ало пэ дадэстэ ко Исаак андэ Мамрэ, кай пашэ Кирьят-Арба (самким Хеврон), катэ бэшэнас о Авраам тай о Исаак. 28 Алаи о деса э бэшымаски э Исаакески сас шэлу охтодэша брэш. 29 О Исаак сас пхуро тай чяло бэшымаса. Ов мукляс по тэнышы, муло тай гело пэ мулэ папудэндэ. Лэски чявэ о Исав тай о Яков пароскердэ лэс.