1 Ne ayeha sa ˂akamaa, Ashini ˂ukuyane anaza ne ncaaran maaro ne uwunda wo hare niyiyezi ne anaza ha Ashini ne agaba pan, ne aməmo tiwunda muwa muwa, 2 ama ne aye ha umanne, ᐩuyane haro anaza ne uwunda wo Vana bewo, a ne uwunda wo Vanama Ashini ˂ukuyane unaafase wo kuwede yina, hane ᐩuzangneke-wo, wərike kuwede yina ne inang are hawo. 3 Vanama a wo ure nsaa me umənu wo Ashini, a wo ᐩudonke tantaasa Ashini ure, ne ugaso wo anaza hawo, ˃upiti unaafase wo kuwede yina. Sa ˂ukuwone haro hare apuwa araa ᐩticuge ne nsano ubusa ke Ashini, hane ᐩucuge ne upang wo taare tine te Bore Upere sa ure ashini. 4 Anongo, ᐩucuge upere atuma ha Ashini sa are ashini saa niziya newo sa ᐩuciye sa nipere neha.

5 Anna ne aməmo atuma ha Ashini sa are ashini, Ashini unumaga ukunan kewo,

<<Bo a Vana bom,

yenəy me a Babba wobo>>?

Baa

<<Me nta nre Babba woo,

wo uta ure Vana bom>>?

6 Anongo, sa Ashini ˂ukuye ne Vana bewo bo uciba ne aməmo inang, ᐩukuna,

<<Sa unaafase wo atuma ha Ashini sa are ashini arumi-wo.>>

7 Sa ˂ukure ne anaza ha atuma ha Ashini sa are ashini ᐩukuna,

<<꞊Ukukutti atuma hawo sa are ashini acuge uway,

ariyare hawo acuge aniyam ha una.>>

8 Ama ne ashini ha Vanama ˂ukukone,

<<Ashini, ukpənku wo tigbama tebo uta ure shere umuwene,

uyane wo anowa uta ure ubinda wo tigbama tebo.

9 ᐩBoyeme uzira wo araa, ᐩbogaa-bo araa,

wərike nongo Ashini, Ashini habo ᐩunyante-bo ashini ke aruwanke habo,

sa ˂ukuwuuniki-bo ne mmay me nsano me iruwa.>>

10 Ukuri ᐩukuna,

<<Mbaa, ne uciba ˂kibotunki inang,

nshini a nituma ne taare tebo.

11 Ata acaano, ama bo bore ne,

ata akooninka saa mpoppuwa.

12 Bota bogbindiki-ha saa mpoppuwa,

ata atanke-ha ne saa mpoppuwa nkonema.

Ama bo anongo bore-bo,

a tinay tebo tiza timuwew.>>

13 Anna ne aməmo atuma ha Ashini sa are ashini, Ashini unumaga ukunan kewo,

<<Cuge ne taare tine tom

sa nkutti hare ugaa wo unay wobo

acuge apuwa ha uruwabta ne tikaza tebo>>?

14 Unaafase wo atuma ha Ashini sa are ashini, haza idiri yee sa ꞊ayane Ashini nituma sa ᐩatonte-ha a kande haremay sa ata aciye utubsa?