1 থিষলনীকীয় 5

যীশু রাঃআ রুয়ার হিচু মাহা সপড়া তাহিমে।

1 মেন্খান, এ বকইঞ তুকু, বিশেষ বিশেষ মাহা কুরাঃআ হেৎদ হুলাং কুরাঃআ বাব্ত্তে আপেকে জাহানা অল কা বেসা।

2 চিয়াআ চি আপে দপে সারিয়া, চিল্কা কম্বুড়ু নিদায় হিচুয়া এঙ্কাগে প্রভু রাঃআ মাহা হিচু য়া।

3 মান্মি চিন্তং গামেয়া কু, আলে শুলুকতে মেনা লেয়া হেৎদ জাহান বর বায়ানা, ইন্তং গে আকুয়াআ হান্ডে পয়াতি রাঃআ জানাম হাসু হিচ সেটেরআ, এঙ্কা আচ্কাগে বিনাশ সেটেরআ; হেৎদ ইনা ক যাহা লেকা তে কাকু নির বানচা দাড়িয়া (মথি 24:27 -29)

4 মেন্খান আপে, এ হাগাকু, নুবারে বানুপেয়া ইনাতে ইনা হুলাং কুম্বুড়ুলেকা কায় সাবপেয়ায়,

5 আপে যতচ কুদ মার্শাল রিঙ্কূ হেৎদ সিঙ্গি রিঙ্কূ হন তানাপে; আবু নিদা নুবা রেঙ্কূদ লহয়।

6 নিয়া মেন্তে দেলা, আবু এটাকু লেকা কাবু গিতিচ শচজআ, এনাখান চির্গালবু তাহীনা হেৎদ রিলামালা আত্মা পেরেচ বু তাহিনা।

7 চিয়া চি অকয়কু গিতিচ শচয়া, ইঙ্কূদ নিদা গেকু গিতিচআ হেৎদ অকয় কু আরখি নুইয়া, ইঙ্কূদ নিদা কু বুল গিতিচ আকু।

8 মেন্খান আবুদ সিঙ্গি রিঙ্কূ মেন্তে দেলা হিচু পে, আত্মা তেবু কব্জ কাতে সেসেন কাআ, পাতিয়া হেৎদ দুলাড় রাঃআ কুড়াম ঢাকুল তুসিঙ কাতে হেৎদ বাঞ্চা রাঃআ আশলেখানাঃআ দাহাড়ী বহরে তুসিঙঅ কাআবু (জিসাই 59:17)

9 চিয়াচি ঈশ্বর আবুকে রাগ নাতিনাং তেদ কায় বাছা তাৎবুয়া, মেন্খান আবুয়া প্রভু যীশু খ্রীষ্ট লিয়া বাঞ্চা নামজম নাতিনাংগে দঃহ কেৎ বুয়ায়।

10 ইনিদ আবু নাতিনাং গচ লেনায়, চির্গালবু তাহীন চি গিতিচ শ্চ য়াবু, যীশু লঅগে বু জীউৎ তাহীন কাআ।

11 এন্খান চিল্কা আপে দ করা আগু তাৎআপে, এঙ্কাগে আপান আপিন কে ভরসা এমা কূপে, হেৎদ আপান আপিন কে গাঁথা রাকাবআপে।

মুচাৎ বাৎলা কু

12 মেন্খান এ হাগা মিসি কু, আলে আপে কেলে নেহরাপে তানা; অকয়কু অপেয়ায় তালা রে কামী তানাকু হেৎদ প্রভু নুতুম তে আপেয়ায় চেতান রে বহাল মেনাঃআ কুয়া হেৎদ আপেকে চেথ এমাপে তানা কু, ইঙ্কূ কে মৌন এমাকুপে।

13 হেৎদ আকুয়াআ কামি নাতিনাং ইঙ্কূকে দুলাড়তে নামলেকান কু আটকার কুপে। আপে মেসাজুড়িআকান পে

14 হেৎদ এ হাগা মিসি কু, আপে লে বিন্তিয়াপে তানা অকয় কু পাড়ুয়া গেয়া, ইঙ্কূ কে চেথ এমাকুপে, ঢুর্কা কুকে স্বান্তনা একা কূপে, নিজুরি কুকে দেঙ্গা কূপে, যত হড় নাতিনাং সাহায়চ হুইপে।

15 নেলেপে যাহায় গে যাহায় বিন উপ্কার হালা রাঃআ নাতিনাং যাহায় রাঃআ আলয় বিন উপকারে কাআয়, মেন্খান আপান আপিন হেৎদ জত্চ কু লঅ বেশ আচরণ নাতিনাং কুরুমুটু কাআয় (1 পিতর 3:9)

16 সারাঘাড়ি রাঃআসকা পে।

17 হেৎদ সারাঘাড়ি বিন্তিয়েপে।

18 যত বাব্ত্ত কুরে সারহাও পে, চিয়া চি নিয়া দ খ্রীষ্ট যীশু রে আপে নাতিনাং ঈশ্বর রাঃআ ইচ্ছা তানা।

19 রিলামালা আত্মাকে আলো পে ইড়িচ ইয়া।

20 ভাবি জাগারাঃআ কু আলো পে খাট কুয়া।

21 যত বাব্ত্তে তুনুম আটকারেপে, অকাঃআ বুগিনা,ইনা যত সাপ ধ্যয়পে।

22 যত লেকান বাড়িচ হাতেন সাঙ্গিন রে তাহীনপে।

ভর-আশিস,

23 হেৎদ জিউ সুলুক রিনিচ ঈশ্বর আচ গে বেসলেকা কাতে রিলামালা পে কাঃআয়, হেৎদ আপেয়া আত্মা, জিউ, হড়ম গোটাকু হেৎদ আবুয়া প্রভু যীশু খ্রীষ্ট রুয়ার হিচু হুলাং উতার মৌন রুখিয়া দঃহয় কায়।

24 অকয়্য় আপেকে রাঃআ পেয়ায়্য়, ইনিদ পাতিয়ানিচ, ইনিগে এঙ্কা করায়ায়।

25 এ হাগা মিসি কু, আলে নাতিনাং বিন্তি পে।

26 যত হাগা -মিসি কুকে রিলামালা তে চঅ লঅ আতাং দারম কুপে।

27 ইঞ আপেকে যীশু নুতুম তে গামাপে তানাঞ, যত হাগা মিসি কুকে নিয়া গিরা সেকাম ফড়াহা আয়ুমাকুপে।

28 আবুয়া প্রভু যীশু খ্রীষ্ট রাঃআ দায়া-দুলাড় আপে লঅ তাহীন কা।