1 হেৎদ ইঙ্কিন আম্ফিপলি শেহার হেৎদ আপৌল্লোনিয়া শেহার র হরকাতে সেএন্তেকিন থিষলনীকী নাগার তে হিচে নাকিন।

2 হেৎদ পৌল ইনিরাঃআ আরিচালি লেকাতে ইঙ্কূ য়া হান্ডে সেনেনায় হেৎদ আপিয়া ঝিরা মাহারে ইঙ্কূ লঅ শাস্ত্ররাঃআ জাগার ইদিকাতে আলোচনা কেয়ায়, উদুকেৎকু য়ায় যে,

3 ইনি শাস্ত্ররাঃআ জাগার হলেজকাতে চেচেদকেৎকু য়ায় যে খ্রীষ্টরাঃআ গজঃঅ হেৎদ গজাঃকানকুরাঃআ তালা হাতেন জীউৎ রাকাব জরুরি তাহিনকেনা হেৎদ নিই যে যীশুরাঃআ বাব্ত্তে ইঞ আপেকে গামাপে তানা, ইনিগে হানি খ্রীষ্টতানায়।

4 ইনাতে ইহুদি কুরাঃআ তালারে কথক হড় সায় এমকেয়াকু হেৎদ পৌল হেৎদ শেলাস লঅ মেশায়নাকু; হেৎদ ভক্ত গ্রীক কুরাঃআ তালারে গাদা হড় হেৎদ গাদা মুখিয়া কুড়ি হনকু ইঙ্কূ লঅ মেশায়নাকু।

5 মেন্খান ইহুদিকু ঋৃষা কাতে বাজার রেঙ্কূ কথক বদমাশ হড়কুকে ইদিকাতে মিয়াৎ দল বাইকেৎতেকু নাগার রে রেটেপেটে তেয়ার কেয়াকু হেৎদ যাসোন রাঃআ অড়াতে জার্পা কাতে হড়কু রাঃআ সামাংরে আগু নাতিনাং পৌল হেৎদ শেলাস কে পাঞ্জা লাগায় নাকু।

6 মেন্খান ইনকিনকে কাকু নামকেৎ কিনতে ইঙ্কূ যাসোন হেৎদ কথক হাগাকুকে সাবকাতে শেহার রিনিজ মাঝিরাঃআ সামাংরে গহাড় ইদিকেৎ কুয়াকু, কিকিচকাতে গাম লাগায়নাকু, নিকু হড়কু গোটা ধার্তিরে রেটেপেটে করা ঘুরায়তানাকু, নিকু নেথাং রেহঅ সেটেরা কানাকু;

7 যাসোন ইঙ্কিন কে খাতিরতাৎ কিনায়; হেৎদ নিকিন বারহড় কৈসররাঃআ হুকুম রাঃআ বিরুধরে তাড়ম কাতে গামেয়াকিন যীশু নুতুমতে অটঅ মিয়াৎ রাপাজ মেনাইয়া।

8 চিন্তং নিয়া থুতি আয়ুম কেয়াকু ইন্তং সাধারণ হড়কু হেৎদ মাঝিকু ললচায়নাকু।

9 ইন্তং ইঙ্কূ যাসোন রাঃআ হেৎদ এটা যতচ কুরাঃআ জামিন এমকাতে আড়াকেৎকু য়ায়।

10 হেৎদ হাগাকু ইনা নিদা বাতিরাংগে পৌল হেৎদ শেলাস তিকিনকে বিরয়া নাঙ্গা র তেকু কুলকেৎ কিনা। এনথাংরে সেটেরেন্তেকিন ঘিড়মেন্তাং ইহুদিকু রাঃআ সমাজ অড়ারে সেনেনাকিন।

11 নিকুদ থিষলনীকী শেহার রেঙ্কূ ইহুদীকু রাঃআ হাতেন ভদ্র তাহিন কেনাকু; চিয়াচি নিকু পুরা ইচ্ছাতে জাগার আয়ুমে কেনাকু হেৎদ সার্তি সারিরাঃআ নাতিনাং সারা হুলাং শাস্ত্র দরবার লাগায়নাকু।

12 ইনাতে ইঙ্কূ য়া তালারে গাদা ভদ্র হেৎদ গ্রীককু রাঃআ তালারেহঅ গাদা সম্ভ্রান্ত কুড়িহন হেৎদ কড়াহন পাতিয়ায়নাকু

13 মেন্খান থিষলনীকী শেহার রেঙ্কূ ইহুদি চিন্তং সারিনাম কেয়াকু যে, বিরয়ারেহ পৌল রাঃআ হরকাতে ঈশ্বর রাঃআ জাগার পাস্না হুইয়াকানা, ইন্তং ইঙ্কূ এনথাংরেহঅ হিজকাতে হড়কে অস্থির হেৎদ উত্তেজিতকাতে রাকাব লাগায়নাকু।

14 ইন্তং হাগাকু ঘিড় মেন্তাং পৌলকে দরেয়া জাকিৎ সেন রাঃআ নাতিনাং কুলকিয়াকু; হেৎদ শেলাস হেৎদ তিমথীয় এনথাংরে তাহীনাকিন।

15 হেৎদ অকয় পৌলকে সঙ্গেতে ইদিধরা লিয়াকু, ইঙ্কূ আথীনী শেহার জাকিৎ ইদিকিয়াকু; হেৎদ ইঙ্কূ চিল্কা পৌলকে আড়াকাতে সেনেনাকু, ইঙ্কূ ইনিরাঃআ হান্ডে হাতেন শেলাস হেৎদ তীমথিরাঃআ ঘিড় মেন্তাং ইনিরাঃআ হান্ডে যেন সেন দাড়িকাকিন ইনি রাঃআ নাতিনাং হুকুম নাম কেয়া কিন।

16 পৌল চিন্তং ইঙ্কিন তাঙ্গিরে আথানীতে তাহিনকেনায়, ইন্তং নাগার রাঃআ নাআহানা জায়গারে হাসা ঠাকুর মূর্তি নেলনামকেৎ তে ইনিরাঃআ আত্মা রাগতে জুল রাকাবেনা।

17 এন্তে ইনি সমাজ অড়ারে ইহুদি হেৎদ অইহুদিভক্ত হড়কু রাঃআ হান্ডে হেৎদ বাজাররে সারা হুলাং অকয়কু লঅ নাপাম কেনায়, ইঙ্কূ য়া হান্ডে যীশু রাঃআ বাব্ত্তে থুতিকেনায়

18 হেৎদ ইপিকু রেঙ্কূ হেৎদ ও স্তোয়িকী রেঙ্কূ কথক হড় দার্শনিক পৌল লঅ তর্ক বিতর্ক লাগায়নাকু। হেৎদ অকয়দ গামকেয়াকু "নিই বকৎবকৎ কিনা গাম বুঝাই তানা? অটঅ অকয়দ গামকেয়াকু ইনিকে এটা দেবতা কুরাঃআ পাস্নাইচ মেন্তে মনেআয়; চিয়াচি ইনি যীশু হেৎদ জিউৎ রাকাব বাব্ত্তে বুগিনবার্তা পাস্না কেনায়।

19 হেৎদ ইঙ্কূ পৌলরাঃআ তিহি সাবকাতে আরেয়পাগে মারাং দরবাররে ইদিকাতে গামকিয়াকু, আলে কি সারি দাড়িয়ালে, নেএ যে নামা চেচেদ আম পাস্না তানাম, নিয়া চিল্কা লেকানা?

20 চিয়াচি আম হুডাং হাহাড়া থুতি গামতাৎ আম; ইনাতে আলে সারিনামে তানালে নিয়া যত থুতি রাঃআ মানে কিনা।

21 চিয়াচি আথীনী নাগার রেঙ্কূ হড় হেৎদ এনথাং রেঙ্কূ বাসায়ান বিদিশুমকু শুধু নামা যাহানা থুতি গাম চি আয়ুম ছাড়া এটা যাহুনারে মাহা কাকু নষ্টয় কেনাকু।

22 ইন্তং পৌল আরেয়পাগরাঃআ তালারে তিঙ্গুয়েন্তে গামকেয়ায় "এ আথীনীয় রিন হড়কু নেলেতানাইঞ, আপে যত বিষয়রে কুঠিন ঠাকুর দেবতাভক্ত"

23 চিয়াচি দাড়াভাড়া হুলাং আপেয়া উপাসনারাঃআ জিনিস নেল নেলতে মিয়াৎ বেদি নেলকেয়াইঞ, অকারাঃআ চেতাংরে অলমেনা "এটা দেবতা রাঃআ দিশা " এন্তে আপে যে এটা দেবতা রাঃআ হমরবিন্তি য় তানাপে, ইনিকে ইঞ আপেয়া হান্ডে পাস্না তানাইঞ।

24 ঈশ্বর অকয় জগত হেৎদ ইনারাঃআ তালারে যত জিনিস বাইতাৎ আয়। ইনিগে সেরমা হেৎদ ধার্তি রিনিগ প্রভু, এন্তে মান্মিরাঃআ তিহিরে বাইয়াকানা বাড়িচ রে কায় তাহিনায়;

25 যাহান অভাবরাঃআ কারণতে হড়রাঃআ দেঙ্গাহঅ কায় হাতায়আয়, ইনিগে যতচ কে জিউ হেৎদ শাঃহেদ যতগে এমতাৎ কুয়ায়।

26 হেৎদ ইনি মিয়াৎ মান্মি হাতেন মান্মিরাঃআ যত জাতি সির্জাওতাৎ কুয়্যায়, ইনি তাহিরাঃআ নাতিনাং নিয়া ধার্তি এমতাৎ আয়, ইনি তাহিরাঃআ নাতিনাং মাহা সীমা ঠারাও তাৎ আয়,

27 যেন ইঙ্কূ ঈশ্বরকে পাঞ্জাইকাআকু, যদি যাহানা পাঞ্জা পাঞ্জাতে ইনি রাঃআ নাপাময়াকু, অথচ ইনি আবুয়া যাহায় রাঃআ হান্ডে হাতেন সাঙ্গিনরে বানুইয়া।✝17:27 জিসাই 55:6; জিরাঃআমায়া 23:23

28 চিয়াচি ঈশ্বররেগে আবু বাঞ্চা মেনাবুয়া, আবুয়া গজঃঅ হেৎদ বাঞ্চা, চিল্কা আপেয়া কথক হড় কবিহঅ গামতাৎকু "চিয়াচি আলেহঅ ইনিরাঃআ পিড়ি।

29 ইনা মেন্তে আবু চিন্তং ঈশ্বর রাঃআ হন, ইন্তং ঈশ্বর রাঃআ স্বভাবকে মান্মিরাঃআ শিল্প হেৎদ চিন্তা লেকাতে বাইয়াকানা সোনা চি রুপা চি দিরি লঅ তুলনা আবুয়া লাক্তি লহয়তানা।✝17:29 আদি 1:27; জিসাই 40:18-20; জিসাই 44:10-17

30 ঈশ্বর ইনা অবুঝ মাহা কে বাগিগিডিতিয়ায়, মেন্খান নাহা যত থাং রেঙ্কূ যত মান্মিকে মন পাল্টারাঃআ হুকুম এমকেৎকু য়ায়। 31 চিয়াচি ইনি মিয়াৎ মাহা গটা তাৎ আয়, অকা হুলাং নিজেরাঃআ বাছায়ান হড়রাঃআ দ্বারায়তে ধার্তি রেঙ্কূ হড়কে দরবার কুয়ায়, হেৎদ নিয়া যতরাঃআ পাতিয়া জুকুরাং প্রমাণ এমতাৎ আয়, ইনাতে গজকুরাঃআ তালা হাতেন ইনিকে রাকাবতিয়ায়। 32 এন্তে গজকুরাঃআ জীউৎ রাকাবরাঃআ থুতি আয়ুমকাতে কথক লান্দা লাগায়নাকু, মেন্খান কথক গামকেয়াকু, আমা হান্ডে নিয়া বাব্ত্তে অটঅ মিশা আয়ুমেয়ালে। 33 নেকাগে পৌল ইঙ্কূ য়া হান্ডে হাতেন সেনেনায়। 34 মেন্খান কথক হড় ইনি লঅ গাতিকাতে যীশুকে পাতিয়া কিয়াকু, ইঙ্কূ য়া তালারে আরেয়পাগী রিনিজ দিয়নুষিয় হেৎদ দামারি নুতুমিজ মিয়াৎ কুড়িহন হেৎদ অটঅ কথক হড় তাহিন কেনাকু।